يارپاقلار بير قيز سينيب تؤکولن کيمي‌تؤکولور
يارپاقلار بير قيز سينيب تؤکولن کيمي‌تؤکولور
1397/04/30
بولگه لر سرويسي: کيشي اوتوراجاغين اوستونده يئر به يئر اولوب ساققاليني سيغاللاييب سونرا ايکي الين اوزونه قويوب ديرسکلريني ماسانين اوستونه داياييب، اؤنونده اوتوران قيزين گولوشلرين خاطيرلاييب، گؤزلوگون اوستوندن يئنيدن قيزا باخدي؛ سانکي دونيانين بوتون قايغيلاري قيزجيغازين گؤزلرينه چؤکموشدو؛ بير کيچيک دينقيلدي گؤزله‌ييردي گؤزلري قان پيناري اولسون…
باخيشيني سول يانا چئويريب، قيزين کناريندا اوتوراجاقداکي اوغلانا باخدي؛ گؤزلويون اورتا بارماغيله اوسته ويريب، قيقاج باخيشلاريني يئنيدن اوغلانا تيکدي؛ سانکي هئچ بير شئي اؤنملي دئييل! بئله بير گيزلي گولوشده دوداقلاريندا گيزليج-پانچ اويناييردي!
الين آرپا بوغدا ساچلارين اورتاسيندا گزديريب، چاشقينجا ماسانين اوستونده اولان بوشانماق قرارينا باخدي؛ قيرخ نئچه ايلليک عؤمورونو بو يولدا کئچيرميشدي… بيرگون ايکي آيري اوره‌گي بيرلشديريب، او بيريسي گون ايکي اوره‌گي آييرميشدي.
قيزين کيمليگين الينه آليب واراقلادي، اوره‌يينه بير سانجي تاخيلدي؛ ايکينجي کز بير يووا داغيليردي!
کيمليگي بوکمه‌دن باشين اوسته قالخيزيب دئدي:
– ايسته‌سه‌نيز گئدين بير آز داها دوشونون …
خافاخافدان اوغلان آتيلدي سؤزونون اورتاسينا: -آقا قورتارين بو دوستاقدان مني، ايسته‌ميرم! اوخويون!- دئدي.
کيشينين سؤزو آغزيندا قورودو. اوتاق يئنه سسسيزليکله قاپاندي.
قيز سسسيزجه‌سينه قارشيسينداکي ديوارا باخيردي؛ ديلينين آلتيندا بير شئيلر ميزيلداييردي، کيشي دونوب آرخاسينا باخدي؛ بير گؤزل جيزگي چرچئوه‌ده پاريلداييردي: »گر جلوه عشق اولسا گتيررم نئجه گلمز«!…
کيشي اوغلانا دئدي:
– بير آزجيق ديشاريدا گؤزله‌يين لوطفن!
اوغلان دئيينه-دئيينه آستا-آستا اوتاقدان چيخدي. کيشي دئدي:
– کئشکه بير شانس داها اؤزونه، بير ده حيات يولداشينا وئره‌سن قيزيم!
قيز اوزاقلارا باخيردي؛ سانکي بير فيلم ائکراندا گؤزلري سومولکو کاسادا سانکي دونموشدو. کيشي ائشيتدي يا يوخ قيز دئدي:
– ايت ايتليگيندن ال چکسه بئله، سومسونمکدن ال چکه بيلمز. بيريسي يوخدو دئسين منيم کوچه-بازار قادينلاريندان نه‌ييم اکسيکدي کي گونده بير قادين ياتاغيما قوناق اولور؟! ياتاق اوتاغيمدا هر چئشيد ساچ قيريلتيسي وار، ساري، قارا، قومرال. يازيق منيم پاليت رنگلي ساچلاريم.
آغلاماق سسي اوتاغي بوغدو! اوغلان قاپيني آچيب ايچري بويلاندي. کيشي اوجا سسله دئدي:
– قاپاتين قاپيني…
قيز چانتاسيندان بير کاغيذ دسمالي چيخارديب، گؤزلريندن، بورنوندان آخان سويو سيلدي؛ يئنه دارما-داغين دوشونجلري ايله اوزاقلارا دالدي.
***
اوخولون سونونجو زيلي سسلندي. قيزجيغاز تله‌سيک چانتاسيني اوموزلارينا آتيب، يولا دوشدو. سويوق يئل ياناقلارينا توخوندوقجا، سانکي ياناقلاريندا بير جوت آلما جوجه‌ريردي! اوخولدان ائولرينه اون دقيقه‌دن چوخ يول يوخودو. آچار ساليب قاپيني آچدي؛ بير ماهنيني اوخويا-اوخويا آستانادا دايانيب، آياققابيلاريني چيخارديب، باشماق رفينه قويدو؛ سونرا آنا-آنا چاغيراراق، باساماقلاري بيربه‌بير کئچيب، اوتاغين قاپيسيني آچدي. گؤزلري خالاسينا ساتاشينجا سئوينج هيجقيريغي اوتاقدا اوينادي! چانتا ايله بيرليکده خالاسيني باغرينا باسدي؛ سويوق ياناقلاريني خالاسينين ياناقلارينا سيخدي.
***
قاپي دينقيلدادي. اوغلان يئنيدن باشيني ايچري گتيريب دئدي:
– من تلسيرم
– بير آز داها گؤزله، سسله‌يه‌جه‌يم.
قيز سسسيز آغلاييردي؛ يالنيز دامجي-دامجي ياش؛ سونرا گؤز ياشلارينين ايچينده گولومسه‌ييب دئدي:
– ائشيتميسيز قارقادان سوروشدولار کيمين گلينيسن؟ دئدي خالامين. ايکي ايل قان اوتدوم، هر گئجه عميم‌قيزينين عشقيندن دئدي، من ياتديم سونوندا… آنام اوتوروب دوروردو خالامي، بير ده اوغلونو قارقاييردي؛ امما منجه گؤزلليک زورلا اولماز! خالامين اوغلو سئوديگينه قوووشدو، منيم سئوگيم ده اوره‌ييمده قويلاندي. بئله بير شئيلر فيلملرده، کيتابلاردا اولار دئيه‌رديم، آمما من ياشاديم، ياشلانديم. سئوگي منجه اؤلموشدو. يئنه قاييتميشديم ايلک ساياغيما؛ سئوگيني آلاي ائديرديم، آمما بير گون سئوگي تورو اوره‌ييمي‌دوستاقلادي. حيات بويالي گونلره دؤنوشدو؛ نيفرت کؤچوب، يئرينه سئوگي يئرلشدي. هر دفعه پرنسس سسله‌ديکجه اؤزومو دونيانين مله‌يي سانيرديم!هارادان بيله‌يديم نئچه پرنسس ياشايير اوره‌گينده؟!
قاپي يئنيدن دينقيلدادي؛ قيز دؤنوب باخدي، آمما بو دفعه قاپي آچيلمادي، دئدي:
– قديمکيلر ياخشي دئييب، تخت آلماق اولار، بخت آلماق اولماز! رحمتليک بؤيوک آنام دا دئيه‌ردي: آستانا دييشيلر، بخت ائله ايلک بختدير .
قاپي دينقيلدادي، اوغلان ايچري گلدي و اوتوراجاغين اوستونده اوتوردو. کيشي بير شئيلر يازيردي بير ده…
بير پاييز آخشامي‌يئل بوتون گوجو ايله قيزين اوزونه شاللاق چکيردي. گوجو يئتميردي سارالميش ياناقلاريني قيزارديب، آجيغيني پاييزدان آلسين!
يارپاقلار ساراليب، بير قيز سينيب تؤکولن کيمي‌تؤکولور…
منبع :