شاختا پيچاق‌كيمي كسيردي
1398/01/26
بولگه لر سرويسي: زينب به‌ييم ال‌لريني ديزلرينه سؤيكه‌ييب، ايكي پيلله‌ني آغـير- آغـير يوخاري قالخدي. او، قاپينـي آچـيب ايچري كئچـين‌جه، كولك قاري دوكانا دولدوردو.
دوكانچـي تئز دوروب قاپينـي باغلادي. زينب به‌ييمين گؤزلري قارانلـيقدا هئچ نه‌يي گؤرموردو. بير نفر اونون قولوندان توتوب- آنا گل قيزيش- دئـيه، اونو اودون بوخاري‌سينـين يانـينا چكدي. زينب به‌ييمين گؤزلري ياواش- ياواش قارانلـيغا آلـيشدي. او، دوكانداكي آداملاري تانييا بيلمه‌سه‌ده، توسدو- دومان ايچـيندن بيرآز اونلاري سئچه بيليردي. كندين قوجالاري سكي‌يه دوزولوب تنبه‌كي ائشيرديلر؛ گنج‌لرسه بوخاري باشينا توپلاشيب، آياغ اوسته توخوم چـيرتلايـيرديلار. زينب به‌ييم بيرآز ايسينيب، سونرا تره‌زييه ساري يؤنلدي. او، كالاغايسينـين اوجونا دويونله‌ييب الينده برك- برك توتدوغو ايكي يومورتانـي ائحمال آچـيب تره‌زييه قويدو. – بيرينه قند، بيرينه‌ده »جاهان« چايـي وئر- دئدي. او، قندي، چايـي يـئنه كالاغايسينـين اوجونا دويونله‌ييب دوكاندان چـيخدي. بو آن قوجا بختيار سينه‌سينين توسدوسونو بوشالدا- بوشالدا فلك چرخيوه قادام زينب‌ده قوجالدي- دئدي. باهادير آدلـي بير گنج اوزونو قوجالارا توتوب سوروشدو: – دايـي! بونون اري‌نين باشينا او تايدا نه گلدي؟ سليم دايـي نـئچه دفه او گوندن سونرا- بالا نه دئـييم نبي‌نين دوشمانـي قورتاران دئـييلدي. او، خانلارا قان اوتدوردو. فيرقه قاچاندان سونرا بير زامان جاماعات اوردا- بوردا اونو گيزلتديلر. ترلان خانـين بالالاري ال چكمه‌ديلر. نبي بئزاري‌يـيب آداخلـيسينـي‌دا بوراخـيب قاچدي. بيردن سارخان كيشي: – ايه نبي قاچاندان سونرا دا ال چكميرديركي! نـئچه دفه آدام گوندرديلر نبي‌نين آروادينـي قاچـيرسينلار. زينب توتوق وئرمه‌دي. بير دؤنه‌ده الينه دؤندويوم زينب ايكي آتلـينـي چكيب آت‌دان سالـيب، اوزلرينه توپوردو. تو دابانا- دئـييب قيشلاغاجان داللارينا دا باخماديلار. سردار آدلـي بير باشقا گنج سوروشدو.دايـي نه دن نبي‌نين اؤلومونو زينب به‌ييمه خبر وئرمه‌ديلر؟ سليم‌دايـي‌دان قاباق مشه‌موروت: – ايه اوندا زينب به‌ييم بئش آيـين گليني‌ايدي، نه‌كي دئديلر اينانمادي. باققال نوسي‌ده سؤزه قاريشدي: – دايـي! دئـييرلر زينب يامان‌دا گؤزه‌ل‌ايميش؟
– ايه! زينب كيمي ماحالدا گلين وار ايدي؟! هم ايييت كيمي ايييت‌ايدي، هم سونا كيمي گلين. ماحالدا رئـييس قالمادي كي اونا ائلچـي گونده‌رمه‌سين. آنجاق كي، زينب »نـئت كي نـئت« دئدي: »نه‌قده‌ر نبي‌نين آدي اوستومده‌دير اوتوروب گؤزلييه‌جه‌يم«. آتا كيشي الينده‌كي چه‌لييين گؤيه قالخـيزاراق – ايه! اسي‌كاتداني نييه دئميرسن، بئچارا قوجا واختيندا‌دا اوندان ال‌چكميردي. سس‌دن قولاق توتولوردو.
بوتون دوكانداكي‌لار قوجالـي- جاوانلـي زينب حاققيندا سوزه قاريشميشديلار. – بونون بير سسي وار ايدي، بير سسي وار ايدي… – دئـييرلر نبي‌نين توفنگيني هله‌ده ساخلايـير. – پاپيرلا، ده‌لي قنبر بير گـئجه دوواريندان آشماق ايسته‌ينده، اونلاري قاتيب قاباغـينا كؤوشنه قده‌ر قووور. – دئـييرلر- امنييه رئـييسي بير كيسه قيزيل گؤنده‌رير. زينب سؤيوش وئره كيسه‌ني گـئري قايتارير. – دئـييرلر نبي اسي‌كاتداني تؤيله‌يه سالاندا، زينب قاه- قاه چكيب گولموشدو… – دئـييرلر… دئـييرلر… زينب به‌ييم قالـيش‌لارينـي سورويه- سورويه، قار جيغـيري‌ايله گليب ائوينه چاتدي. او، داشين آلتيندان آچاري گؤتوروب قاپينـي آچدي. ايچري گيرنده ساري آناج‌لا بوز پيشيك اونون ال- آياغـينا دولاشديلار. زينببهييم:
– بئي! جانـيز يانسين چكيلين گؤروم! ال- آياغـيم دوندو. – دئـييب، تئز قاپينـي باغلادي. او، تنديرين آغزيندان دوواغـينـي كنارا چكيب قارا چايدانـي ارسين‌له چـيخارتدي. تزه آلديغي »جاهان« چايـيندان بير آز آتيب، دمه قويدو. دونندن باشي يامان آغريردي. سوتول چايدان ايكي ايستكان سوزوب، پوفله‌يه- پوفله‌يه ايچدي. ائله بونا بندايميش، باشي‌نـين آغريسي آزالدي. اوزونو تويوغا توتوب: – آغزين شيرين اولسون قيزيم! چايـينـي ايچديم باشيم توخدادي- دئدي. تويوق ايره‌لي گليب دوز اونون قاباغـيندا داياندي. زينب به‌ييم باشينـي تومارلايا- تومارلايا اونو سوه‌لمه‌يه باشلادي: – كه‌كيلينه‌ده قوربان، اؤزونه‌ده، قارا سورمه‌لي گؤزونه‌ده… »قارا سورمه‌لي گؤزونه‌ده« سوزو اونو آجي خاطيره‌لر، گـئچميشينه آپاردي- آخـي او، بو شعري »شكيل« آدلـي فئرييينه اوخوياردي.
– آخ! ايندي شكيل‌ده قالسايدي داها نه غميم اولاردي؟ اونون‌دا يومورتاسينا نوووت آلارديم، ساپ آلارديم، – الي قوروسون اسي‌كاتدانـين – دئـييب. دريندن بير كؤكس اؤتوردو. نبي تازاجا قاچميشدي اسي‌كاتدا اونون قاپي‌سينا گليب.
– رئـييس سنه پول گؤنده‌ريب – دئيينده. زينببهييم: – رئـييس آنلامايـيب: او، يـئتيم قويدوغو اوشاقلارين قئـيدينه قالسين. منيم ال‌لريم چولاق دئـييل‌كي- دئـييب. او گـئجه دان يـئري سؤكولونجه نه جهره‌سي‌نين نه‌ده حزين سسي‌نين آردي آراسي كسيلمه‌ميشدي. اسي‌كاتدا- قالـيب- قالـيب يومشالارسان- دئـيه قاييتميشدي. ايل‌لر- ايل‌لردن اؤته- اؤته زينب-ين گوموش پوللو يليني، خورامان يـئريشيني‌ده اؤزويله آپارميشدي‌لار. اسي‌كاتدا اوندان تاماه ديشيني چكسه‌ده، هله‌ده اونون آزار- اذيتيندن بير آن بئله ال چكمه‌ميشدي. هله سحر تزه- تزه آچـيلـيردي زينببهييم يوخودان دوروب تندير سالماغا باشلاميشدي. قاپي چالـيناندا- كيم سن؟ – دئـييب، جاواب آلديقدا، اسي‌كاتداني سسيندن تانـيدي. زينببهييم قاپينـي آچماياندا، اسي‌كاتدا: – آرواد! تاختا چكميشيك سنه دوشوب! قوناغـيميز وار تئز اول اوچ نفرليك ناهار حاضيرلا گتير- دئـييب، گـئري دؤنموشدو. زينببهييم شكيل تويوغون يومورتاسيندان بير ياخشي قايقاناق پيشيريب، بير نـئچه تزه ال چوره‌يي‌ده سيني‌يه قويوب، اسي‌كاتدانين ائوينه آپاردي. امنييه، قايقاناغـي گؤره‌ن كيمي دولو سيني‌ني اونون باشينا چالـيب، سؤيوش وئره- وئره: – گـئت تويوق گتير! – دئدي. زينببهييم علاج‌سيز قالـيب ائوينه قاييتدي. گؤزونون آغـي قاراسي اولان تكجه تويوغونو باغرينا باسيب، اسي‌كاتدانين ائوينه آپاردي. اسي‌كاتدا تويوغو آلان كيمي قانادلارينـي آياغـي‌نـين آلتينا قويوب پيچاغـينـي آچدي. بو آن زينببهييم گؤزلريني يوموب، اوزونو يانا چئويردي. گؤزلري‌نين ياشينـي كالاغايسينـين اوجويله سيليب- اسي بالان قانـينا بلشسين- دئـيه، ائوينه قاييتميشدي شكيلين آجي خاطيره‌سي زينبب‌به‌ييمين قانـينـي قارالتدي. اوره‌يي يامان سيخـيلدي. چايـينـي ياريمچـيق قويوب، آياغا قالخدي. قاپينـي آچـيب، بايـيرا باخاندا هله‌ده،هاوا ايشيق‌ايدي. – دوروم ائودن چـيخـيم- دئدي. گـئديب يورقان دوشه‌يين آلتيندان بير دويونجه‌ني گؤتوروب ائودن بايـيرا چـيخدي. قاركسمسه‌ده شاختا پيچاق‌كيمي كسيردي. قاپينـي دؤينده اركناز ننه قاپينـي آچـيب اونو ايچري آپاردي. ميرزه ممي كورسونون توووندا اوتوروب، كيتاب اوخويوردو. او، زينب‌به‌ييمي گؤزلويونون اوستوندن گؤره‌ن كيمي، گولوستان كيتابينـي قاتلايـيب، زينب‌به‌ييمه – خوش گلدين- دئدي.
– اولمايا نبي‌دن يـئنه مكتوب آلميسان؟! سوروشاندا زينببهييم چنه‌سيني سينه- سينه ساري آپاريب، دويونچه‌ني اونا اوزالتدي.
ميرزه‌ممي هله دسمالي آچماميش اوجا سس‌له مكتوبو اوخوماغا باشلادي. آخـي او قيرخ ايلدن آرتيق دير كي بو مكتوبو هر نـئچه گوندن بير زينب‌به‌ييمه اوخويوردو. زينببهييم گؤزونو كورسونون اوستونده‌كي جئجيمه زيلله‌ميشدي…
نبي دام اوستوندن اونا قند آتيردي. ايندي ياخـينا گليب اونون آتي‌نـين اوزنگي‌سيني باسدي. گـئت به گـئت ميرزه ممي‌نين سسي، آرازين سسينه قاريشيردي. نبي هر نـئچه آدديمدان بير گـئري دؤنوب اونا ال ترپه‌ديردي…
– عزيز سئوگيليم من تئزليك‌له وطنه قايـيداجاغام. اوره‌يين نه ايستيرسه منه مكتوب ياز سنه گؤنده‌ريم. زينببهييم هر زامان تكجه مكتوبون بو سون سطرينه دقت‌له قولاق آساردي. ايلك دفه مكتوبو اوخوياندان سونرا ميرزه ممي‌دن ايسته ميشدي‌كي مكتوبون جاوابيندا نبي‌يه باياتي يازسين. ميرزه ممي‌ده: كوشكو بالابان آرازا باخار آرازين سويو گؤزلردن آخار سن او تايداسان، من بو تايدايام هيجرانـين منـي يانديرار، ياخار يازميشدي.
مكتوب قورتارماق‌هامان زينببهييم ديك آياغا قالخدي. ميرزه ممي اپريميش كاغاذي يـئنه دؤرد بوكوب، دسمالا باغلايـيب، زينب‌به‌ييمه قايتاردي. اركناز ننه نه كي يالواردي زينببهييم شاما قالمادي.
زينببهييم ائوينه گيرنده يـئنه ايكي عزيزي اونو قارشيلادي.هاوا تزه- تزه قارالـيردي. زينببهييم فناري يانديريب- ياغـي قورتارماسين- دئـيه، خودونو آلدي. سونرا سوفره‌ني گتيريب خـير- خـيردا چؤركلري دوغرايـيب تويوغون قاباغـينا آتدي. تويوق بيرآندا چؤركلري اودوب، يـئنه بويلانـيب گؤزلريني اونون اللرينه تيكدي. زينببهييم:
– ياناسان سني! به گؤرمورسن چؤره‌ييم يوخدو؟ كئچ گـئت يات داينا- دئـييب، تويوغو الي ايله ايته‌له‌دي. ساري تويوق ايستر- ايستمز يانلارينـي باسا- باسا اوتاغـين بوجاغـينداكي نينه طرف يوللاندي. زينببهييم ميتيل دؤشكچه‌ني تنديرين قيراغـينا چكيب، قيچلارينـي تنديره ساللادي. پيشيك گليب اونون يانـيندا اوزاندي. او، پيشييي تومارلاياندا، پيشي‌يين سوموكلري دري‌نين آلتيندان الينه توخونوردو.
– بو گون‌ده آج قالديق- دئـييب، قوللاريني قوجاقلايـيب، حزين- حزين اوخوماغا باشلادي. بير آزدان پيشيك اونون سسي‌نين آهنگي‌له يوخويا گـئتدي. فاناردا سانكي ياواش- ياواش مورگوله‌ييردي. نهايت فاناردا گؤزونو يوموب زينب‌به‌ييمي تك قويدو. زينببهييم قارانلـيقدا هله‌ده حزين- حزين اوخويوردو: كوشگو بالابان آرازا باخار آرازين سويو گؤزلردن آخار هاردا قالميسان وفالـي ياريمهيجرانـين مني يانديرار ياخار…….
منبع :