آدسيز يئرده دوغوش

ويدا حشمتي

  آرخادا، تکجه اونون آياقلاري‌نين ايزلري گؤرونور. گئده‌جه‌يي يئره، اوزون يول اولدوغونو بيله‌رک آغير-آغير اولسا دا ايره‌لي‌له‌يير. ديزلرينه کيمي قارا باتير. دنگه‌سي پوزولارکن، اليني قارلارا آتيب، ييخيلير. زورلا آياغا قالخير.
کاتدانين -آجيقلي باخيشلاري گؤزونده جانلانير. باغيرارکن: »سن ده او بيري‌لر کيمي »آدسيز يئر»ه سورگون اولاجاقسان«. بره‌لميش گؤزلري ايله، اونون گؤزونون ايچينه باخاراق باغيرير: »ايندي گئت، نه دانيشا بيلرسن دانيش!«. بارماغيني چؤله ساري توتوب، آدسيز يئرين يولونو اونا گؤسترير.
کولک، قارين نارين دنه‌لريني اوزونه چيرپير. اوزونو شالي ايله توتوب، يولونا داوام ائدير. هر آتديمدا ديزلرينه کيمي، قارا باتير. کند ايله آدسيز يئرين اورتاسينداکي هوندور آغاج اوزاقدان، صلابتلي بير قالا کيمي ديم-ديک دايانيبدير. آتديملاريني يئيين‌لديب، اؤزونو آغاجين گؤوده‌سينه چاتديرير. بوداقلارين اوستونده قار اوتوروبدور. آرخاسينا باخديقدا، ائله بيل آغ بير اؤلکه‌نين اوستونده ايلانا بنزر بير ايز، سينير بلله‌ييبدير. سينيرين او ال-بو الينده، هر دن قان لکه‌سي بو اولاغان اوستو آغليغي، عئيبه‌جرله‌‌ديبدير. بو يابانجي اؤلکه‌ده، قوو وورسان، قولاق توتولور.
آغاجين هنده‌وري‌نين قارلاريني، الي ايله کنارا چکيب، دينجيني آلماق اوچون آغاجا سؤيکنير. قاشلاريني چاتيب، گؤزلريني قييياراق، اودقونور.
کاتدانين سسي قولاقلاريندا گزير. او، اللريني قولاقلارينا قويور. بو ساعاتدان سونرا، نه اوز وئره‌جه‌ييني آنلامايير. آز زامان اؤنجه، قونشونون گنج اوغلونو دا آدسيز يئره سورگون ائتميشديلر. »نه ده اولسا، کندين ياريسي آدسيز يئرده ياشايير« دوشونجه‌سي، اوره‌ييني راحاتلادير. گؤزلريني يومور.ايکي کيشي اونو ائودن چيخارديب، کاتدانين حيه‌طينده‌کي بؤيوک تؤوله‌يه آپاريرلار. اونو چارپايي‌دا اوتوردورلار. قويونلار اونا باخيرلار، او، قويونلارا.
دوز باشي‌نين اوستونده، تاوانين اورتاسيندا باجا وار، اوردان ايشيق گلير، هردن ده باجادان، قارين دنه‌لري فيرلانا-فيرلانا اوچوب، اوزونه قونور.
او، کيشي‌لري تانيماغا چاليشير، آنجاق بؤرکو قاشلاري‌نين آلتينا قدر ائنديرميش، آغيز-بورونلاريني شالين آلتيندا گيزله‌ديبلر.
تاوانا گؤز ديکير، بلکه بيري بو باجادان اونو گؤروب، قورتاردي. کيچيک بير قوش باجادان اونا باخير.
گؤزلريني آچير. هوندور آغاجين بوداغينداکي قارلار اوزونه تؤکولور. قارقالار قاريلداييب، آغاجين باشي‌نين اوستونده، اوچوشورلار. گؤزلريني قيييب، اونلارا باخير. بوداغا قونان کيچيک قوشو گؤرور. اليني يئره قويوب قالخماغا چاليشسا دا، هئيي قالماييبدير.‌ باشيني چييينينه قويوب، گئنه گؤزلريني يومور. قوش اونون باشينا قونور. قوشو آووجونا آليب، قيزيشديرير.
قاريلداماق سسينه باشيني قالديرير. قارقالار، داها ياخينلاشيب، اوچورلار.بولودلارين آرخاسينداکي گونش باتماق اوزره‌دير.
آووجونو آچير، قوش اوچمايير، کيريميش کيچيک ووجودو تيتره‌يير. قوشو جيبينه قويور.
آياغا قالخماق ايسترکن، ديزلري قاتلانير. اوزو اوسته يئره دوشور. اوزو قارا دايانير. کندده‌کي حادثه‌لر گؤزونده جانلانير.
کيشي‌نين بيري، اونو ووروب، يئره سردي. بيري‌نين ده الينده، کلبه‌تين وار. ديشيني چکن داللاک کيشي يادينا دوشور. »آچ آغزيوي« دئيه امر ائدير. او، آغزيني آچماق ايسته‌مه‌يير. او بيري کيشي ياخينلاشير. »آچ آغزيوي!..«. او گينه آچمايير. بيردن محکم بير سيلله ايله، يئره سريلير. اوزو يئره دايانير. تؤوله‌نين قاتي، تزک قوخوسو اوره‌ييني بولانديرير. کيشي‌نين بيري اونو چئويرير. قيچلاري‌نين اوستونده اوتوروب، بير الي ايله بيلکريني دوشلري‌نين اوستونده، سيخ-سيخ ساخلايير، بير الي ايله ده اووودلاريني باسير. باشيني ترپتمه‌يه بئله، ايمکان يوخدور.
بو آن، کيشي‌نين ياشيل رنگلي شالينا گؤزو دوشور. اوره‌يي‌نين باغي قيريلير. آز قالير باغري چاتلاسين. بو شالين ايپلريني ننه‌سي وئرميشدي. او، چيلله‌ده بو شالي، نيشانلي‌سينا وئرميشدي.
گوندوزون ايشيندن يورغون اولسا دا، گئجه‌لر بو شالي توخويوردو. بارماقلاري هر ايلمه‌يه توخوندوقدا، دوداقلارينا شيرين گولوش قونارکن، اؤزونه دئييردي: »نيشانليم بو شالي بوينونا سالاندا، مني خاطيرلاييب، قيزيشاجاقدير«.
گؤزونون قيراغيندان داملالار سوزولوب، ساچلاري‌نين اورتاسيندا ايتيب، باتير.
کيشي ياخينلاشيب، ديليني کلبتينه سالير. بير گؤز قيرپيميندا ديليني قيرتير. او، آغريدان باغيرير. نيشانليسي هله ده قيچلاري‌نين اوستونه آغيرليغيني ساليب، گؤزلرينه باخير. باشي يان طرفه آخير، گؤزلري يومولور. آغزي‌نين قيراغيندان قان آخير.اؤزونه گلينجه هر طرفي، قان ايچينده‌ گؤرور. او ايکي کيشي، باشي‌نين اوستونو کسيبلر. اونو سورويه-سورويه حيه‌طه چيخاديرلار.
***
کاتدا غضبلي باخيشيني اونا ديکير. دوداغي‌نين اوستونده‌کي، قيرميزي ات خال، ترپنه-ترپنه باغيرير: »اوزون دانيشان آدامين، ديلي قيسسالار. بونو هامي بيلسين!..«. آردي وار