اوشاق سسي اونا گؤزل بير ماهني‌ايدي

مژگان صيامي

اوشاق سسي، اونا درد و بير بؤيوک نيسگيل اولاراق، يئرينده، ان گؤزل بير ماهني‌ايدي. ايشي پنجره‌نين آرخاسيندان اوشاق‌لارين اويونلارينا هاي – کوي‌لرينه و داعوا – گولوش سس‌لرينه باخيب، ياشاماق ايدي. يا ائو ايشينه چاليشيردي، يا ياتيب، يادا ديزلريني قوجاقلاييب، فيکيرلشيردي…
کيشي، يالنيز يونيفورماسينداکي (اوچ اولدوزا) گووه‌نيردي. قاش‌لاري هر زمان دوگون، ياغ‌دان توک سئچيردي… دوزنلي و ترتيبلي اولماغي آرواديندان چوخ ايسته‌ييردي! بيرينجي گوندن سانکي ساخلوويا گلين گتيرميشدي!
ساعات اوزون – قيسسا آياق‌لاري ايله، اون ايکيني سووشوردو. قادينين بير الي مين اولموش، دويونو سوزوردو، خوره‌يين دادينا باخيردي (شور اولماسين – شيت اولماسين – يئرينه دوشسون – يانماسين – دانناق يئمه‌سين…) دووغا آشيني، سون دفعه اولاراق، قاريشديريب، آلتين سوندوردو دويونو دمه ويردي. خيارلا – پامادور، بالا – بؤيوک اولمامالي‌ايدي! بارماغيني کسدي، سالاد قانا بويانيب او ايسه اوفولداياراق، چيم چشيب کيلوولوق (ساري) قزئته‌نين ايچينه توکوب زيبيل قابينا تپدي؛ تورشو – قاتيق حاضيرلادي…
گول‌لره سو وئريب، دوشن يارپاق‌لاري آووجونا‌ييغدي. گوزو ساتاشدي اري‌نين يونيفورما بورکونه؛ عصبلنه‌رک، دوداق‌لاريني بوزوب، مطباغا قاييتدي. زيبيل قابي دولدو، دويونون آلتين سؤندوردو.
تراس‌دان، جنابين آغير پوتون‌لارين گؤتوروب، واکس ويردي. ندنسه هر زمان اوره‌يي چيرپينيردي. هوولوندن اوتونو ياپيشديردي دوز کؤينه‌يين ياخاسينا! بير آن يازيق اولدوغونو حس ائتدي، بوکدو، آپاريب باسدي اوز پالتارلاري‌نين آراسينا (هله‌ليک ايتير – باتير ائله‌سين، دئيه…)
ميزين اوستونو دؤشه‌دي….نحس اولان سس‌سيزليکدن يورولموشدو، تلويزيونو يانديردي، اوچ کيشي توپلانتي قوروب (خانيم‌لارين حساس روح‌لاريني آچيقلاييرلار):
“آغالار هر گون ان آزيندان بير دؤنه ده اولموش اولسا، حيات يولداش‌لارينا – سني سئويرم – دئمه‌لي‌ديرلر! بو ايکي کلمه، اونلارين برابر ياشامين دا، چوخ بؤيوک تاثير بوراخا بيلر…
يازيق قادين، ايل‌لر بويو تامارزي قالديغي او ايکي کلمه‌يه دوشونوردو، باشقا کانالا ويردي، ايکي کيشي ايله بير قادين (مسلمانچيليق) دان دانيشاراق، بير – بيري‌نين سؤزلريني آلقيشلاييردي‌لار. باشقا کانال‌لاري دئييشديرمک ايچين، هئچ حالي يوخ ايدي. ديش‌لرين قيسارکن، قيرميزي دويمه‌ني باسيب، سؤندوردو.
هر گونکو کيمي، پنجره‌نين دمير ميله‌لري‌نين آرخاسيندان، اوشاق‌لارين اويون‌لارينا باخيردي ساواشمالارينا، دئييب گولوب، آتيليب – دوشمه‌لرينه،‌ ييخيليب – دورمالارينا، شيرين – شيرين داورانيش‌لارينا گؤزونو تيکيب، زمانين نئجه سووشماغيندان خبري اولموردو. اؤز اوره‌يينده چوخ شئي‌لري اوزوب – دوزوردو… آرزي‌سينا دوشوب، حسرتله آه چکيردي. هاچارين فيرلانما سسيني ائشيديب، کنارا چکيلدي. سانکي ايکي قيزغين دمير؟ اونون ياناق‌لارينا توخونوب، ايز بوراخدي….يئدي – ايچدي، عجبا! اوزل بير ماهنا دوتمادان، اوزانيب، گؤزونو يومدو…
قاب – قاشيغي يووارکن، باشيندان چيخمايان و وجودونو، خورا کيمي ‌يئين فيکره دوشونوردو (يتيم خانا)!آغزينا گتيرنده، ائوده قان دوشوردو…
ال – آياقي اسيردي، سؤز اوزانيردي، قورخوردو، هئچ بيلميردي بو دردي هارايا آپارسين، کيمه دئسين، نه دئسين…آنجاق کين – کدورت، بوتون جانينا يئريميشدي، تمامي ايله بوروموشدو، دوزومو داشميشدي….“ندن قورخورام! نييه گره‌ک بو قده‌ر قورخام! آللاهيم اولماييب کي، هر نه اولورسا اولسون! ايت ده باشيني قووزاييب، بير تيکه چوره‌يي تاپيب، يئيير. هاچاناجاق بو قارا گونلري، بايقوش ساياغي دوزوب، يالنيز پئتوچولوق ائده‌جه‌يم! بو ياشاماق نه درده ده‌يرکي…”بشقاب، اليندن سوروشوب، يئرده تيکه – تيکه اولدو!کيشي سانکي نعره چکدي: “شپبه! چولاق! گيج بئيين! ناخوش! آوارا… جهنم اول، گؤزومه گؤرونمه! من آجيق وئرمه‌لرين سببيني ياخشي بيليرم، نه ايسته‌ديييني ده بيليرم… آمما يوووووخ! خيريه اوشاغي منيم ايچين لازم دئييل! اونو اؤلو گوزلرين گورر، من حارامزادا بسله‌مه‌رم… هارا گئديرسن يولون آچيق‌دير! نه دئديييمي آنلامازسان، بوشانا بيلرسن، چوخ دا گئج اولماييب…” آردي وار....