حاق عاشيغي، آشيق غريب

الده اولان معلومات و ديل‌دن- ديله ياشاميش و يادداش‌لاردا قالميش شيفاهي سؤزلره گؤره، آيريجا »آشيق اسد آغجاقيشلاق‌لي”نين دئديينه اساس روايت، آشيق غريب 5 شاگيردي ايله »قوشاچاي«ين »ياريجان کندي«نده »آشيق موساخان«ين آتاسي‌نين تويون‌دا اولان زامان 1820نجي ايلده ياريجان کندينده دونياسيني ده‌ييشير. و ياريجان کند جاماعاتي‌نين ال‌لرينين اوستون‌ده حاق آشيغي، آشيق غريبي 100 آتلي‌نين موشايعتي ايله شهرک قصبه‌سينه گتيريرلر و «شهرک قبريستانليغي»نين لاپ باش طرفينده تورپاغا تاپشيريرلار.آشيق غريب‌ين تؤره‌مه‌لري‌نين ساخلاديق‌لاري ال يازما کيتابي و قبير داشي ايندي‌ده قورونوب ساخلانيلير.
روايت دير آشيق غريب شاه‌صنم-ه دئميش کي: منيم ائولادلاريم مزاريمين اوستون‌ده هئچ بير تيکينتي يا توربه سالماسينلار. زامان گلر ائل- اوبا بوتون گزيب دولانديغيم و سسيم- سوراغيم گئدن يئرلردن مني ايستيه‌نلر ييغيليب گله‌جکلر مزاريمين اوستون‌ده زيارتگاه و توربه تيکه‌جکلر.
آشيق غريب شعرلري‌نين بيرين‌ده بئله دئيير:
آشيق غريب، تالئح يازي يازان‌دا
مني آشيق يازدي سيرري اوزان‌دا
هردن واخت اولان‌دا يازيب -پوزان‌دا
من ايل‌لر سونرامدان خبر وئريرم
آغجاقيشلاق‌لي »آشيق سلجوق شهبازي«نين تشبوثو و تالاشي اساسين‌دا، 2016نجي ايل‌ده »ايران آشيق‌لار بيرلييي« يارانير و بو بيرليين قوروجوسو و صدري آشيق سلجوق شهبازي‌نين دؤولت مسئول‌لارينا موراجعت مکتوبونون اساسين‌دا آشيق غريب‌ين آدي، داستاني و مزاري ثبت ميللي اولور.آشيق غريب‌ين آدي، داستاني و مزاري‌نين ثبت ميللي اولماسين‌دا تبريزين ميراث فرهنگي ايداره‌سي‌نين چوخ زحمتي اولدو و شهرک کندين‌ده دونيايا گؤز آچيميش طنز شاعيري و يازي‌چي »ميرزا شهرک« چوخ زحمت‌لر چک‌ديلر.2020 -نجي ايل‌ده »ايران آشيق‌لار بيرليي«‌نين صدري، آشيق سلجوق شهبازي‌نين تالاشينين اساسين‌دا و شهرک کندي‌نين کؤمه‌يي ايله، آيريجا »پروفئسور علي پولاد»-ين مالي يارديمي ايله آشيق غريب‌ين مزاري‌نين اوستون‌ده مؤحتشم بير توربه سالينماغا باشلانير و حال حاضردا بو توربه بير نئچه آيا باشا چاتاجاق.آشيق غريب آدينا 2017نجي ايل‌ده اؤلکه پايتختي تئهران شهري‌نين اقوام مدنيتت سيناما- تياتر- موسيقي ساراييندا اولوسلار آراسي فئستيوال کئچيريلدي و بو فئستيوال‌دا 350 آشيق بوتون ايران شهرلريندن، آذربايجان جمهوروسوندا‌ن، تورکيه‌دن و گورجوستان‌دان آشيق دسته‌لري ايشتيراک ائتديلر.حاق آشيغي آشيق غريب‌ين آديناا ديپلوم‌لار حاضرلاندي و »آشيق‌لار ائوي‌نين صدري« قوروجوسو و صدري آشيق سلجوق شهبازي‌نين ايمضا و پوچاتي ايله ايشتيراکچي آشيق‌لاردان تقدير اولوندو.