ساري بولبول

بهروز خانعلي‌پور
وطن توپراغينا قوربانام/غربت ائلده وطنيم اول وطنيم/سني عؤمرومده بير قوش کيمي اوچوردوم/غريب بولبول اؤتهنيم اول اؤتهنيم.
آي قاراباغ شيکسته‌سي سن اوجال/هاراييما يئتهنيم اول يئتهنيم ...
اورهک دؤيونتولريله قاراباغا باغلي اولسادا اوزونه توتار خطاب اولاراق دئيير هاردا قالدين؟!
عزيزينم قاراباغ/شکي شيروان قاراباغ/تهران جننته دؤنسه/ياددان چيخماز قاراباغ.
عزيزينم مئيليم سنه/دوشوبدور گؤيلوم سنه/من دؤنسم اوزوم دؤنسون/سن دؤنسن نئنيم سنه.
عزيزينم گئدر قالماز/آخار سولار گئدر قالماز/وفالي يارا جان قوربان/وفاسير يار گئدر، قالماز.
کونلوم کئچير قاراباغدان/گاه اوداغدان گاه بوداغدان/هاوالانسين خانين سسي/آخشام اوستو قوي اوزاقدان.
ايندي بو باياتي اوستونده يازيلان اورهک نغمهسي شوشانين، قاراباغين و بيتوو آذربايجانين سيمبولونا چئوريلميش و ياشايير.
هئچ توي شنليگي اولماز کي کيمسه بو کؤنول ماهنيسيني اوخوتماسين و حؤرمتله ‌دينلهمه‌سين و هئچ اوزان اولماز کي موسيقي حياتيندا بو ماهنيني بوزلاماسين.
آما ائله بيل بو کدرين و غمين سونو يوخيدي ... قاراباغدا خاري بولبول آدلي بير خاري بيتگيسي واريدي. قاراباغين آدليم بولبولو “ساري بولبول” تکجه بو خاري بيتگي‌سينين اوستونه قونوب اوخويارميش. چوخ باغبانلار گلير اما خاري بولبول تهراندا، وطن باغيندا، بيتميرکي بيتمير و ساري بولبول اوخومورکي اوخومور. آغابييم دئيير:
– بو باغدا منه طعنه وورورکي سنينده قاراباغدان باشقا يئري وطن سئچمهيه حاققين يوخ‌. ايلک عشقيندن ساوايي آيري کسه کؤنول وئرمهيه حاققين يوخ.
اودورکي آغا بييم خانيم يانا يانا بئله سؤيلهيير:
وطن باغي آل الواندي/يوخ ايچينده خاري، بولبول/عؤمور سورمهلي دوراندي/سسين گلسين باري بولبول.
سحرين گولشن چاغيندا/نه گزيرسن باغي، بولبول؟/اوخودون عقليم آپاردين/سوندون منه ياري بولبول.
بولبول سن ناله چکرسن/گؤز ياشين گيله تؤکرسن/ايللردير جفا چکرسن/اينديده بير زاري بولبول.
بولبول گئييبسن آل ياشيل/قوللارين بوينومدان آشير/آغلاماق منه ياراشير/قوي آغلاييم باري، بولبول.
بولبول سني کيم اوچورتدو؟/دالدان دالا کيم قاچيرتدي؟/سنه باده کيم ايچيرتدي؟/کيملر اولدو ساقي بولبول؟
بولبول سنين ايشين قاندي/عاشيقلر اودونا ياندي/ندن هر يئرين الواندي؟/کؤکسون آلتي ساري بولبول.
اؤزون، سئوگيسين، اوره‌يين، ائلين و سئوگيليسين محبسده گؤرن آغابييم خانيم سون بنديني بئله دئيير:
اوخو قوشلار‌ ديله گلسين/آزاد نغمه ائله گلسين/ياريم گوله گوله گلسين/من چالاندا تاري بولبول.
آغابييم خانيمدان “گئجه” باشليقلي بير غزل وار. نلري و نلري بير باشا ايضاح ائدن بو غزل اونون يار مناسيبتين و عؤمرونون نئجه کئچديييني ترنم ائدير.
افسوس کي ياريم گئجه گلدي گئجه قالدي گئجه گئتدي/هئچ بيلمهديم عؤمروم نئجه گلدي نئجه قالدي نئجه گئتدي.
آغابييم ائله او باغدا اينديکي تهران دروازهسي آدلانان يئرده توپراغا وئريلدي. آغابييمين گؤزو يولدا و ائله اينديده دروازهده اؤز ازلي سئوگيليسيني گوزلويور کيميدير. آغابييمين اورهکلري يانديريب ياخار سؤزلري ‌ديللر ترجماني اولاراق دورور و هله ده هر‌دينله‌ييجيني اودلارا ياخير! ...
من اوشاغليقدان قاراباغ شعرينين و شيکسته هاواسينين نئجه يارانديغيني و کيمه عاييد اولدوغونو اؤيرنمک ايسترديم؛ چونکو ايلک دؤنه ياي فصلي زمي بيچيني يالين باشيندا ايستي‌دن مئهلنرکن آتام اوجا سسيله اوخوموشدو. اينديکي کيمي ياديمدادي. آتاما دئديم بيرده اوخو و آتام ايکينجي دؤنه اولکيندن داها گؤزه‌ل و ياتيملي اوخودو و گؤز دولسو آغلادي دا... بير سوسوز آدام سوآختاران کيمي من اينيستايا گيرن کيمي بير باشا بعضي يازارلايميزين صفحه‌سين گئده‌ر و ... کي ابراهيم بي رشيدينين بو قيصاجا سئوگي حکايه‌سين اوخودوم وقرار آلديم کي بو حکايه‌ني گئنيش شکليده اؤيره‌نم گره‌ک ... کي سونوجوندا تملي ابراهيم بيين يازيسي اولماقلا بو يازي عرصه‌يه گلدي.
سون