سو سپيلمه‌ميش کوچه‌لر گؤزو ياشلي قالدي

سعيد موغانلي

علي احمدي آده (ع. اورمولو) مين‌اوچ‌يوز‌ايگيرمي‌دؤردونجو ايلده اورميه‌ده آنادان اولموشدو. عؤمرونون چوخونو تهراندا غوربتده ياشادي.بيلدير تهرانين لاپ جنوبوندا اولان ايگيرمي مئتيرليک ائوينه چاغيردي. بير سيرا فيلمنامه نمايشنامه، تورکجه سريال، شعرلري و اورمو فولکولورو اثرلرينين چاپيندان دانيشديق. نفسي گوجله چيخا-چيخا، او‌ کيتابلاردان نمونه‌لر اوخودو. هر سطير باشي اؤسگوروب بير قورتوم چاي ايچيردي و سورا چوخ گؤزل و نفيس پيپيندن آغيز دولوسو پوک ووروردو. کئچميشده شاهزادا کيمي ياشايان سئوگيلي شاعير، ايندي او بوجاقدان بير چاي سوزوب گتيرينجه ايکي شعر اوخودو. او قدر کيتاب وار ايدي اوتاقدا گوجله يئر تاپيب اوتورموشدوق.سسيني آريتلاييب گؤزل سسلي شاعير دوستوم دئدي: اوغول بولاري چاپ ائلرسن؟ سسينين تئمي او قدر گؤزل ايدي ائله بيلديم هله شعرين قالانين اوخوماقدادي. دئدي نييه مات قالدين؟ چاپ ائلرسن؟ منده بير قيران قالماييب، هاميسين خاتين خانيم ييغدي آپاردي…..دئديم آچيق جواب وئريم اوستاد؟ دئدي ايللر بويو دوستلوغوموز کيمي و شعريميز کيمي آيدين، آچيق، صادق و کانکرت…...
چاپ ائلرم دئديم اوستاد! ولي آليب اوخويان يوخدور. او بيري کيتابلاريميز کيمي ييغيليب قالار آنباردا، باشقا بير يوک اولار منه! داي يئر تاپميرام ييغماغا….باشين سالدي آشاغا، بير آه چکدي و‌ باشلادي پيپيني يئني‌دن دولدورماغا…...
دئدي من ده اؤلرم آپاررام گوروما بولاري قوي هئچ اوخوماسينلار… لعنت اليمه قلم وئرن کيشييه، لعنت بو ادبياتا، لعنت شاعيرليگيمه…...
دئديم نيگران قالما اوستاد هر نه دوزه‌له‌جک هر نه قايداسيندا اولاجاق…...ياواشجا دئدي چايي سويوتما، سويوسا داي تزه‌له‌يه بيلمرم…...مظلوجاسينا دئدي هئچ اولماسا بو قاباق چاپ ائتديکلريمدن پخش ائدين.دئديم آپاررام ياييلار کيتابچيلارا آلمازلار، قالار اوردا من سيزدن شرمنده اولارام، بو‌ خالق اَن اوجا شعار وئرنلرين دالييجا گئدير، ديل – مدنيت گوپچو سياستچي‌لرين و شعار وئرنلرين چوروموش ساققيزي اولوب.سؤيکندييم بسته-بسته باغلانميش کيتابلارا ياپيشيب قالخديم. قرارلاشديق کي هر آي بير دؤنه اوتوراق و نهايي‌لشديرک، آز نسخه‌ده و پولوموز چاتان حدده نشر ائدک.نوروز بايراميندان قاباق کرونا شاعيره آمان وئرمه‌دي و بيزيم ادبيات و‌ مدنيت نئچه گنجينه‌ني ايتيردي…...
اوچ آيدان سونرا (سايين شاعير اسماعيل اولکرين) پيجيندن بيلديم کي اوستاد اورمولو (اسفندين اون‌ايکيسينده) دونياسيني دَييشيب.
آلتميشينجي ايللرده »گؤزو ياشلي کوچه‌لر« کيمي مدرن شعر مجموعه‌سي نشر ائدن شاعيرين مجازي دونيادا بيله بيرجه شکلي ده پايلاشيلمادي. اصلا يئني نسل اونو تانيميرلار دا…...
اوز-اؤزومه دوشونورم‌کي، يالقوزآباددا بير داش آتان و دارقوزآباددا ديوارلارا شعار يازانين ديرناغينا داش دَيسه‌يدي مجازي دونيا يالان خبرلرله دولموشدو.(گؤزو ياشلي کوچه‌لر، چيله‌يير آي ايشيغي، نار گيله، و زامان بير بهانه‌دير) قوجامان شاعيرين نشر اولان اثرلري بونلاردان عيبارت‌دير.دقيق ياديمدادي آلتميشبنجي ايللرين سونلاريندا گؤزو ياشلي کوچه‌لر نشر اولموشدو. غزل و قوشما اوخوماغا عادتيميز اولان بيزيم کيمي گنج شاعيرلر، ها گوجه‌نيرديک اثري اوخويوب لذت آلاق…! دئمه بيزدن اون- ايگيرمي ايل قاباقدايدي ياراديجي شاعير…...بو‌ گون گوزو ياشلي کوچه‌لر کيتابيني واراقلاييرام، بلکه بيرجه املايي سهوي ده يوخدو او قالينليقدا کيتابين…! ايندي گل مجازي اساتيدين تلگرام و اينستاگرام صفحه‌لرينه باخ، هر سطير باشينا ? يانليش‌لري وار. سورا دا ادعالارينا گاميش هئچ، دَوه ده »اوتورا!« بيلمير…
[آينالاردا قيريق قيريق گيلئي سسي/آينالارين اوزونده گؤز/ديلينده کؤز/آينالاردان آينالارا قول آچيلير،آينالاردا درين-درين جنايت‌لر…]
گؤزو‌ ياشلي کوچه‌لر / شعر توپلوسو – ع. اورمولو(علي احمدي آده)