شمعداني لر‌دن تورش اييسي گلير

بو، نرگيزين هميشه‌کي سؤزويدو. او، تازا اوز- آستارلانميش يورقاني اييله‌ييب، »قار قوخوسو گلير« دئينده، هميشه قوخولاري دويماق اوستونده سؤزلري چپ گلردي.
نرگيز شمعداني گولونو سئوسه‌يدي ده، يورقانين قار قوخوسو تک، شمعداني‌نين دا قوخوسونو دويمازدي.
»ياني نمنه شمعداني‌دان تورش اييسي گلير؟ بولوسن بورون حيسّي‌نن ديل حيسّي‌نين نه قدر فرقي وار؟ دوز کيشي‌نن آرواد کيمي…«
يورقانيني بوُرنونا توتوب، اييله‌يير. اونا ائله گلير کي، پرستارين اسپرئيي‌نين قوخوسو دا يورقانين قار قوخوسونا قاريشيبدي. ايکيندي چاغي پرستار يورقاني اوز- آستارلاياندا، اويسا نرگيزين ياتاغي‌نين کناريندا اوتوروب، فيکري پرستارين اللرينده قالميشدي. پرستارسا ائله ناشي‌يانا يورقانين اوزونو تيکيردي کي، بير- ايکي دفه ايينه‌ بارماغينا باتميشدي.
اوشويور. يورقاني باشينا چکير. نفسي يورقانا ده‌يديکده بورنونون اوجو قيزيشير. يورقاني باشيندان سيييريب، سينه‌سينه‌جن آشاغي چکير. نظرينه گلير بيلينمز بير يئردن کولک اوتاغينا دولور.»آخي، يايين آخير آييندا بئله ده اوشوتمه اولار؟«فيکيرلريني ائله اوجا سسله ديلينه گتيرير کي اوزاقدان ائشيدن اولسا دئير بَه يورقانين آلتيندا اوندان ساوايي آيري بير آدام دا وار. هله اوشوتمه‌ بير يانا، يورقاندان قالخان اسپرئيين اييسي عاغليني قاريشديريب. بالينجي باغرينا باسيب کيپريکلريني بير- بيرينه سيخير. آمما گئنه ده گؤزو يوخويا قيزيشمير. پرستار بال آريسي تک بورنونون اوستونده ويزيلدايير.»دا سن اييله‌مه‌يين لاپ شورونو چيخاتدين. آخي بال دا کهليک‌اوتو اييسي وئرر؟ هئچ اولماسا دئنه‌ کهليک‌اوتو دادي وئرير!«، نرگيز دئميشدي.
بال آريسي‌نين گؤزلري‌نين رنگي ده نرگيزين گؤزلري‌نين رنگينده‌دير. آمما نسه بو گونلر نرگيزين گؤزلري‌نين آلا- چن آغليغينا، بال رنگلي ببک‌لرينه اؤلوم توزو سپيليب.
تنبل‌- تنبل يئريندن قالخيب، يورقانين آلتيندان چيخديقدا گئنه ده جاني گيزيلده‌ييب. اوشويور. سحر تئزدن گؤزو نرگيزين ناخوش اوزونه ساتاشماسيني ايستمه‌سه ده، آغير- آغير اونون اوتاغينا گئدير. نرگيزسه هله يوخودادير. يورقاني اوستوندن کنارا چکيليب. اويسا هله ده بال آريسي باشيندا ويزيلداياراق، نرگيزين سويو چکيلميش دريسينه، يوخودا تيتره‌ين انگينيه باخير. بال آريسيني ذهنينده دولانديرديغينا گؤره اؤزوندن اوتانير. اليني اوزالديب، يورقاني نرگيزين اوستونه چکير. سونرا دوشا ساري گئدير. هر نه قدر بال آريسي‌نين دوشدان ائشيکده قالديغيني ايسته‌سه بئله، آنجاق بال آريسي گئنه ده دوش آلتيندا ويزيلدايير.
ائيواندا اوتوروب، الينده کيتاب، گؤزآلتي پنجره‌‌ آرخاسيندان نرگيزين اوتاغيني سوزور. پرستار نرگيزين ياتاغي اطرافيندا وار- گل ائدير. ائيوانا دوزلموش شمعدانيلارين تورشا چالان اييسي بورنونا دولور. شمعداني نرگيزين ان چوخ سئودييي گولدور. لاکين ناخوشلوق ياتاغينا دوشندن بري گوللري ده بير چوخ شئي‌لر کيمي‌اونودوب. آمما او، هله ده هر گون شمعدانيلاري سووارير. ياز فصلينده گولدانلارين تورپاقلاريني ده‌ييشير، سارالميش يارپاقلاري، سولموش گوللري قوپاريب، شمعدانيلاري طراوتلي ساخلاماغا چاليشير. پرستار نرگيزين قوللاريندان توتوب، اونو ياتاغيندا اوتوردور.
ايچينده آدسيز- سانسيز، آنلاشيلماز بير حيس جانلانماقدادير. دامارلاريندا تلاطم وار. دالغالار ساحيله چيرپيلان کيمي، قان دامارلارينا چيرپيلير. نبضي تئز- تئز وورور. اليني بوينونون دامارينا چکير. بيله‌يي‌نين داماري تک او دا تئز- تئز وورور. گؤزلريني پنجره‌دن يايينديريب
شمعدانيلارا زيلله‌يير. بو گونه‌جن بال آريسيني شمعداني گولونون اوستونه قونموش گؤرمه‌ييب. بلکه ده گؤروب، آمما ايندي‌يه‌جن بال آريسي ذهنينده بئله سسلي ويزيلداماميشدي.پرستار چرقديني قولاقلاري‌نين داليسيندان کئچيرديب، تپه‌سي اوسته دويونله‌ييب، نرگيزي ياتاغي‌نين قيراغينداکي ،اوتوراجاقدا اوتورتماغا چاليشير.
آنجاق نه ائديرسه نرگيزي تک‌باشينا قالديرماغا گوجو چاتمير. پرستارا يارديم ائتمک اوچون کيتابي ائيوانداکي صندلين اوستوته قويوب، اوتاغا گيرير. نرگيزي صندل اوستونده اوتوردوب کورکلريني اوووشدورو.