غرور

نازيک دوداقلاريندا هميشه‌کي گولومسه‌مه اولسا دا، گؤزل آمما سولغون اوزونون گونشيني سان کي بير تالا قارا بولود آلميشدي. »غم« و »سوسقونلوق« اونون آيريلماز خصوصيتي ايدي. عموميت‌له آز دانيشاردي، اؤزلليک‌له اؤزو و عائيله‌سي باره‌سينده.
احواليندان خبر آلاندا »بيلگين آدام منيم احواليمي گؤرونوشومدن يوخسا اثرلريمدن آنلايار، دانيشماغيما گرک يوخ«،- دئييردي.
ياتاقخانادا منيم کناريمداکي تخت‌ده ياتيردي. دئمک بورادا قونشو ساييليرديق. بئکار واختلاريندا کاموا توخويوردو.نه واختدان اونون اينجه بارماقلارينين ايتي و ريتملي توخونما حرکت‌لريني سوزوردوم.
آراميزدا کي بوز اريسين دييه شوخلوقجا: »سنين کيمي خانيميسي اولان گونده قيرخ دفعه گرک باشينا فيرلانسين، هله بئله کوبارليق و خانيم- خاتينليقدان علاوه، ال ايشي باجاريغين دا وار، اوسته‌ليک رسامسان، خطاطسان، ماشاللاه هر بارماغيندان بير هنر ياغير. هله بلکه باشقا هونرلريندن ده خبريميز يوخدور«،- دئديم.
آجي گولومسه‌ييب »ايتفاقن بئله خانيملارين چوخلوق شانسي اولمور«،- ميزيلداندي.
سونرا نه ايسه دئدييينه پشيمان اولان کيمي هؤوله‌سک: »بو قونونو باغلاياق دوستوم، باشقا قونولاردان دانيشاق لوطفن»،-دئدي و درسيميزدن، اوستادلاريميزدان، اورادان- بورادان دانيشديق. البته چوخلوق من دانيشيرديم و او توخونماسيني توخويا- توخويا هردن بير صحبته قاريشيردي. هردن ده جيسمي بورادا اولسا دا، فيکري باشقا يئرلره اوچدوغونو دوشونوردوم!
»توخونما مادّي قازانجدان علاوه پيرتلاشيق فيکيرلريمي دوزَنه ساليب، حاليما توختاقليق وئرير«،- دئييردي.بازاردان ايپک ساپ آليب يئکه ماسا اؤرتويو توخويوب يئني‌دن بازاردا ساتيردي.دئييردي: ايپ- ساپي ماغازا يييه‌سي وئرير، من ايسه توخويورام. هره‌ميز بير سهم قازانيريق.بو ساپلار چوخ باهادير، اؤرتوک ده باها ساتيلير. بونلار چوخلوق وارلي ائولرين ماساسينين اؤرتويو اولور.
***
سونرالار سؤز آراسي، شهرداشلاريندان بوشانديغيني ائشيتديم.
سان کي »مريم« درس اوخوماغا گلنده، اَري مين فسق- فجوردان چيخيرميش! ائوه آراق، قومار بوساطي ساليرميش، باشلاري قيزيشاندان سونرا دا نارکوتيکه قورشانيرميشلار و هاميسيندان پيس، بو ايشلري هله مکتبه گئتمه‌ين، آغزيندان سود اييسي گلن اوچ ياشيندا اوغلونون قارشيسيندا ائله‌ييرميش!قادين قونشولار طريقي ايله ماجراني باشا دوشَن کيمي اوشاغيني گؤتورور آجيقلا ائودن چيخير، امک‌لي آتاسي‌نين هميشه اجاره وئردييي کؤهنه ائوه سيغينير، بالاسي ايله اورادا يئرلشير. طلاق تئز اولسون دييه »کبينيم حالال، جانيم آزاد«- دئيير، اؤيرتمنليک حقوقو و ال ايشلري ايله، کيمسه‌يه محتاج اولمادان ايکي نفرليک عائيله‌سيني دولانديرير.
اَرينين نارکوتيکه و سايير فسادلارا ايليشمه‌يي دادگاها بللي اولور دييه، اوشاغين حضانت حاققي قادينا وئريلير و بئله‌ليک‌له ياراماز کيشي‌دن جاني قورتارير.
***
آتا- بابالاريميز دئميشکن: »کور کورو تاپار، سو چوخورو«، ياشامدا هر کس اؤز خويونا اوخشارلا تاپيشير.من ده اونون کيمي، چوخلوق اؤزومه قاپالي و ايچسل آدام اولدوغوما گؤره گون به گون دوستلوغوموز آرتدي.او ايلين يايي اوغلونون دوغوم گونو بهانه‌سينه مني شهرلرينه قوناق چاغيردي. هم ده بو قوناقليق چوخ خصوصي اولدوغونو وورغولادي. (قالاباليقي سئومه‌دييمي بيليردي).
من اصلينده طبيعت وورغونويام، ائودن- ائوه گئتمه‌يي سئومه‌سم ده، اونون دعوتيني يئره سالماديم. اوغلونا يولداش اولسون دييه من ده بالاجا سود اَمَر قيزيملا گئتديم.
اوغلونون آد گونونه اؤز هنرمند اللري ايله، کوکلا شکلينده تورت حاضيرلاميشدي. کوکلانين گوزلرينين يئرينه گيله‌نار قويموشدو، بورنونو، بؤرکونو ده چيه‌لک‌له بزه‌ميشدي. آغزي‌نين يئرينه ايسه بير ديليم نازيک خيار قويموشدو. »چيه‌لک اوغلومون ان چوخ سئوديگي ميوه‌دير«،- دئييردي.
مراسيمدن سونرا شام يئديک، چوخ زحمته دوشوب دادلي- دوزلو خوره‌کلر حاضيرلاميشدي.
اونون بير هونري ده عجيب سليقه‌لي ائودارليغي ايدي! ائو اشياسي سان کي هندسه اؤلچوسو ايله، بير آربادا، غريب واسواسيليغلا دوزولموشدو!
اؤز- اؤزومه »عجب حوصله‌سي وار«،- دئديم. آمما گؤره‌سن بو قدر واسواسليغين سببي، يالنيز حوصله چوخلوغو ايدي؟!
اوشاقلاريميزين کادولاري آچماغا، شارلار و باشقا اويونجاقلارلا اويناماغا باشلاري قاريشدي. بيز ايسه اونون چکديگي رسم‌لره، يازديغي خط‌لره باخديق. چوخلوق چؤهره رسامي ايدي. آداملارين اوزونو بير پسيخولوق ديققتي ايله چئشيدلي حالت‌لرده چکميشدي. رسيم‌لرين ايچينده اؤزونون و اوغلونون دا چئشيدلي حالت‌لرده شکيل‌لري واريدي. رسم‌لر ائله جانلي ايديلار سان کي آداملا دانيشيرديلار!
اونو اوزمه‌ييم دييه نه من عائيله‌سي‌نين کئچميشيندن بير سؤز سوروشدوم، نه ده اؤزو بو باره‌ده دانيشدي.منه»خوش حالينا، سن دويغولاريني شعر يوخسا حيکايه شکلينده يازا بيليرسن«،- دئدي.من ايسه گوله‌رک، »نه فرق ائدير کي، سن ده شعر و حيکايه‌ني داها جانلي شکيلده رسيمله‌ييرسن، اونلارا روح باغيشلاييرسان«،- دئديم.اؤرنک اوچون باخ بو دوشوندوروجو اثرين. بونا بير ديوان شعر، يوخسا بير اوزون رومان يازماق اولار.(اوجسوز بوجاقسيز بير قارانليق کؤهول اولان تابلوسونا ايشاره ائتديم کي گونش، ساچلاري پريشان حالدا، قاپ-قارا ماغارانين درين‌ليگينه چکيليردي و بير اوشاق کؤهولونون آستاناسيندا، اونو خلاص ائتسين دييه، آغلايا- آغلايا گونشين تئللريندن توتوب بوتون گوجويله اونو ديشاري‌يا چکيردي)!گولومسونه‌رک دئدي: »آمما فيکريمجه دوستونون هله بير هونَريندن خبرين يوخدور«”جوشقويلا »نمنه؟!« – سوروشدوم.
اوشاقلاريميز اويناماقدان يورولوب ائله فرشين اوستونده يوخولاميشديلار. اونلاري آستاجا بير آنا قايغيسي ايله ياتاغا قويوب، اوزلريندن اؤپوب، يورغانلا اوست‌لريني چکدي.بو قدر محبت و ايستي قانليقلا، نه‌دن هميشه سويوق قانلي گؤروندويونو دوشونموردوم!
سان کي ايچينده هميشه يايين قيزماري ايله قيشين سَرت چوووغونو ساواشدايديلار!اليمدن توتوب: »بورا گل«- دئدي.
پيلله‌لردن ائنيب ائوين زئرزمي‌سينه گئتديک.
اورادا بالاجا بير کوزه‌چي‌ليک کارگاهي وار ايدي.چئشيدلي شکيل‌لرده ساخسي قابلار دوزلديب، بوياييب، اوستونه شکيل‌لر چکيب، رفلره دوزموشدو.
رنگلنميش ساخسي بير ديبچک چوخ ماراقيمي چکدي.اؤز شکيلي هميشه‌کي حزين گولومسه‌سي ايله ديبچگين اوستونه ناخيشلانميشدي.
اليمي ياخيندان باخماق اوچون اونا اوزاتديم.
لاپدان »اونا اَل دَيمه«- چيغيردي. ديک آتيلديم. اليم يئر ايله گوي آراسيندا، يئريمده قورويوب قالديم. بو تپکيني اوندان گؤزله‌ميرديم!
عصبلشميش حالدا يومروغونو سيخاراق دئدي:»باغيشلا مني دوستوم، او ديبچک بير غوغالي، آجي گونون ياديگاري‌دير، سينيق‌دير. حياتيمي آلت-اوست ائدن، آرزولاريمي پوچا چيخاران او شرفسيز کيشي‌يه نيسبت، کينه‌م اونودولماسين دييه، چؤله آتماديم. سئوسن عيني‌سيني سنه دوزلده‌رم، گؤردوکده هميشه مني خاطيرلايارسان. سينيق طرفيني ديوارا ساري چئويرميشم، ساغلام طرفي ايسه بيزه باخير!«
بو سؤزلري دانيشديغجا جوشقودان جيسمي، طوفان قارشيسيندا اولان آغاجلار کيمي تيتره‌ييردي. دوداقلاري اَسيردي. آغلاماغيني گيزلتمه‌يه چاليشسا دا، گؤز ياشلاري بولاق کيمي گؤزل گؤزلريندن آخيردي.هئچ بير سوز دئمه‌دن اونو بَرک- برک قوجاقلاديم.
دوغرو دئييردي، اونون دانيشماغا گره‌يي يوخ ايدي. اونون احوالاتيني اثرلريندن، داورانيشيندان دويماق اولوردو! بلکه او دا سينيق طرفيني...