قيرخ ايکي ياش هارا، دوخسان يوبلئيي هارا!

روح‌انگيز پورناصح

ايشين ايچينده بورايا گلمه‌ييمي باشا دوشمورم. بير آز فيکيرلشندن سونرا، مطباخا دؤنمه‌لييم دئيه، قاييديرام. اورادا ياديما دوشور، يئني‌دن اوتاغا دؤنوب ايشيمي گؤرندن سونرا بير داها قاييديرام.
هر گون آزي اون دؤنه بوجور گئديب قاييتمام اولور، بير آز اوشونوب بير آزدا سئوينيرم! آخي »گابريل گارسيا مارکز»ين «حوزنلو فاحيشه‌لريم« کتابينين بير يئرينده، راوي ده سئوينير. او دئيير:
»محض همين واختلاردا کيمسه دئدي کي، قوجاليغين ايلک سيمپتومو – اينسانين اؤز آتاسينا اوخشاماغا باشلاماسيدير. من، يقين کي، ابدي گنج‌لييه محکومام، – دئيه او زامان دوشوندوم، چونکي آت صيفتيم هئچ زامان آتامين سرت غراييب جيزگي‌لرينه اوخشاماياجاق. نه ده رُما ايمپراطورونون، يعني آنامين جيزگي‌لرينه«.
من ده سئوينيرم، چونکي اونلارين هئچ بيري اونوتقانليق توتماميشديلار. ائله بيل من ده مارکزين راوي‌سي کيمي ابدي گنج‌لييه محکومام. سونرا اؤز اؤزومه دوشونورم، اولا: او رمان راوي‌سي‌دير. ثانيا: ابدي گنج‌لييين اونوتقانليقلا برابر اولماسينين نه فايداسي؟ عؤمرونون چوخونو يالاندان بو اوتاق‌دان او اوتاغا، مطباخدان اوتاغا، اوتاق‌دان مطباخا... يئريييب گيجلله‌نه‌جکسن! بلکه ده آدام هئچ اؤلمه‌دي. بلکه‌ده آدام تئز ايشدن دوشدو!
آخي همين بو راوي قيرخ ايکي ياشينداايکن بئل آغريسينا گؤره حکيمه گئديب بئله دئيير:
»... حکيم آغريلاريما اهميت وئرمه‌دي، دئدي کي، بو ياشينيز اوچون نورمال‌دير.
– بئله اولان حالدا ياشيم آنورمال‌دير، – دئيه اونا اعتيراض ائله‌ديم.
حکيم منه يازيق- يازيق باخيب گولومسه‌دي:
– گؤرورم فيلسوفسونوز، – دئدي«.
ايندي ايه‌ر من آلتميش ايکي ياشيمدا گئتسه‌م او حکيمين يانينا يقين دئير: بالا سن اييرمي ايلدير اؤلوبسن، گؤتوره‌نين يوخدور. گئت کفنيني حاضيرلا، قالانلار دردسره دوشمه‌سين‌.
بلکه ده اونلارين قيرخ ايکي ياشينداکي‌لار بيزيم دوخسان ياشلي‌لاريميزلا برابر گلير؟ آدام دئيير بس يالنيز بورانين حکيم‌لري آغيزلارينا گله‌ني دانيشيرلار. پس لاتين آمريکادا دا بئله اتي‌آجي حکيم‌لر وار! بلکه ده اتي‌آجيليق‌دان دئميرميش، ائله اونا اينانيرميش! بيلميرم اؤزونون نئچه ياشي وارميش؟ هر نئچه ياشيندا اولسا دا اصلن اونون يانينا گئتمه‌رم. کئشکه آديني دا يازاردي، بيلمه‌ميش اونون يانينا گئتمه‌يئيديم، آمما ائله ده ياشا ربطي اولماياجاق!
آخي همين بو کيتابدا راوي ائله لاپ کيتابين باشلانغيجيندا دوخسان ياشلي اولماسيندان دانيشير:
»دوخسان ياشيمين تامام اولدوغو گون اؤزومه بير هديه دوشوندوم....« هله اؤزونه دوخسان يوبلئيي توتماق ايسته‌يير، يوبلئيينه ده بير باکيره قيز ايسته‌يير. آمما تئز قضاوت ائله‌مه‌يين، اونا ده‌يمه‌ميش پولو قويور باليشينين اوستونه، ياواشجادان دالي قاپيدان چيخير گئدير.
بو اوزدن حکيم ائله بئله بير سؤز دئييب دا! قيرخ ايکي ياش هارا، دوخسان يوبلئيي هارا؟