ماماچا

کؤچورن: رحيم خياوي
دوگوزوم جي بولوم

قاييديب اوتاغا گيرديم. ايلک دفعه ايدي کي، اَريمدن باشقا آيري کيشي ايله بير اوتاقدا ايديم. عجبا، حاجي بيلسه‌يدي نه دئيه‌جکدي؟ اما بو کيشي عادي بير کيشي اولا بيلمزدي. اوّلکي کيمي ياري‌اوزانميش وضعيتده زاريلداييردي. يومروق‌لاريني هاوايا چيرپيردي. بو وضعيتده اولارکن هردن ديزلري و بودلاري آراسيندان او يئريني گؤروردوم. اما بو کيشي‌نين بئله وضعيته نئجه دوشدويونو هئچ جور باشا دوشه بيلميرديم.
– ماماچا، سني آند وئريرم اللها، مني راحاتلا! من بونا دؤزه بيلميرم. بير شئي ائله! بير ايش گؤر!
– سنين اوچون بير کيشي ماماچا گتيرمه‌لي‌ديرلر. بير ارمني کيشيسي وار، حکيم‌دير. فرنگده اولوب. ياخشي اولار کي، گئديب اونو گتيرسين‌لر. بلکه ده او، بو مسئله‌دن باش چيخارا بيلر.
– يوخ! اولماز! گئديب اونو گتيره‌نه قدر کؤرپه دوشر. دوشونور‌م، دوغوش ياخينلاشيب. آغري آمانيمي کسيب‌دير!
دوغرودان دا، بو کيشي کؤرپه‌ني دوغاجاغينا اينانيردي؟ هر بير بويلودان سوروشدوغوم عادي بير سوالي اونا دا وئرديم.
– بيرينجي دوغوشدور؟
– هه، بيرينجي و سونونجودور! چوخ آغرييير! سيز قادين‌لاري ايندي ياخشي باشا دوشور‌م.
– آتاسي کيم‌دير؟
– آتاسي بير يابانچي ايدي، چيخيب گئتدي.
– عجب! بس دئمک بيج‌دير!
داها دانيشمادي. زاريلداييردي. يومروق‌لاريني قالديريب محکمجه اطرافينداکي کرپيج‌لره ووروردو. سونرا يئني‌دن دريندن نفس آليردي. داها سونرا باغيرير و يئنه ده اطرافيني يومروقلاييردي. اوزرينه اَييلن کيمي ديزلريني آرالادي، دئيه‌سن اؤزو ده بيليردي کي، داها عنادکارليغين فايداسي يوخدور. نهايت درجه‌ده چاليشيرديم کي، گؤزوم اوراسينا ساتاشماسين. اما ممکن دئييلدي! هر حالدا کؤرپه بير يئردن چيخمالي ايدي. بو دا همين يئردن اولمالي ايدي. اؤزومه سؤز وئرديم بورادان چيخيب گئتديکدن سونرا داها بير ده ماماچا اولماغين آديني دا توتماياجاغام. نه ائده‌جه‌ييمي بيلميرديم. صابون و قاينانميش سو ايله اليمي يودوم. سو دولچاسي‌نين يانيندا آسيلميش دسمال ايله ال‌لريمي قورولاديم. سونرا بير اليمي اوزاديب همين اييرنج يئرينين آلتيندان ياواشجا بارماق‌لاريمي اورا سوخدوم. غريبه‌سي اوندا ايدي کي، ايچريده بارماق‌لاريم ياري‌برک کؤرپه کلّه‌سينه توخوندو. ايکينجي اليمي ايسه يئکه و ايسلانميش قارنينا قويوب و دؤردطرفلي فيرلاتديم. کؤرپه اولدوغونا شبهه‌م يوخ ايدي. اليمي اوره‌يينه ياخين يئره قويدوم. ديري اولدوغونو حس ائتديم. دئدي:
– بيليرم ديري‌دير. چونکي حرکت‌لريني حس ائدير‌م.
من اونون نه دانيشديغيني ائشيتميرديم. بعضي وقت‌لر بويلو کؤرپه‌نين حرکتيني حس ائتمه‌سينه باخماياراق، ممکن‌دور کي، ?? ساعت اؤنجه کؤرپه اؤلموش اولسون. ياواشجا بارماغيمي يئنه ايچرييه سوخارکن کؤرپه‌نين التهابلي باشي اليمه توخوندو. اليمله باشا يول آچديم. بو مدت عرضينده چاليشيرديم کي، اليم او اييرنج يئره توخونماسين. سونرا بو بير-ايکي ات پارچاسينا دا عادت ائتديم. آرتيق اييره‌نميرديم. دئديم:– گوجن و دريندن نفس آل. سونرا يئنه ده گوجن و درين نفس آل.
او باشلادي، بوتون گوجو ايله گوجه‌نير و دريندن نفس آليردي. من ده ايکي اليمي کيچيک بير دليک فورماسيندا کؤرپه‌نين باشي قارشيسيندا توتاراق، اونون گليشيني گؤزله‌ييرديم. غفيلدن بويلو اوجادان باغيردي. دوشونور‌م هوشونو ايتيردي. چونکي اوندان سونرا هئچ بير زاريلتي ائشيديلمه‌دي. کؤرپه‌نين باشي چيخدي. باش چوخ يئکه ايدي. من ياواشجا باشي اليمده توتوب سونرا ايچريدن يومشاق چييين‌لري ده چيخارتديم. سونرا بد‌ن و آياق‌لاري باييرا چيخدي. بئله‌ليکله، کؤرپه عادي قايدادا ساغلام دوغولدو. کؤرپه قاش‌قاباقلي بير اوغلان اوشاغي ايدي. کؤرپه‌ني حصيرين کونجونده اولان ياستيغين اوزرينه قويدوم.
گؤبه‌ييني کسديم. بوتون دوغوش مرحله‌لري بيتميشدي. آنجاق بويلو هوشونو ايتيرميشدي. هر يئري قان بوروموشدو. کؤرپه چيخديغي يئره بير قدر پامبيق تپديم و اوستونو ده بير تميز پارچا ايله اؤرته‌رک آياغا قالخديم. ايندي بويلونون کيم اولدوغونو اؤير‌نمک زماني ايدي. ساکتجه بوينوندان رئزيني چيخارتديم. ترپنمه‌دي. مقنعه‌ني ده اوزوندن گؤتوردوم.
حيرتدن يئريمده‌جه دونوب قالديم. عذابکش بير حرمتلي کيشي سيماسيني گؤردوم. قالين قاش، اوزون ساققال، چاتلاميش دوداقلي بير گؤزل کيشي ايدي. مقنعه‌ني آچاندان سونرا ائله ده قاباليغي يوخ ايدي، بويون و باشي نرمال گؤرونوردو. حتي قارني دا، ائله يئکه دئييلدي. سانکي کؤرپه بوتون بدنينده يئرلشه‌رک اونو بئله قابا گؤستريرميش. آنجاق دوغولدوقدان سونرا او، طبيعي حالينا قاييتميشدي. کيشي اؤزو چوخ ياشلي ايدي.
گؤزلريني آچيب رنگينه باخماق ايسته‌ديم، اما اويانماسيندان قورخدوم. چکدييي عذاب-اذيت جيزگي‌لرينده ايز سالميشدي. اييرنج حس ايله الهي بير حس بيرليکده بوتون وجودومو بوروموشدو. مقنعه‌ني يئني‌دن باشينا کئچيريب و رئزيني ده بوينونا ساريديم. ماراقليسي اوندا ايدي کي، هله ده کؤرپه آغلاماميشدي.
چونکي بئله اولسايدي، آناسيني اوياتميش اولاردي. ال‌لريمي يويوب چادراما بورونه‌رک قاپييا طرف يولا دوشدوم. بورادان چيخيب گئتمه‌لي ايديم. ساکتجه دسمالي گؤزومدن آچديق‌لاري اوتاغين قاپيسيني دؤيدوم. بير آنليغا دايانديم. بير سس ائشيديلميردي. يئني‌دن قاپيني دؤيوب دئديم: آردي وار