پري و چوبان

محمد قاضي سمندر

سون بولوم

گونلر کئچيردي، چوبان سس‌سيز سمير‌سيز ياتميشدي، اونون گؤروشونه دوست تانيش گليردي لاکين او بير کلمه‌ده دانيشميردي. اونون پري‌سي‌ده اونون گؤروشونه گلدي. حاليني سوروشدور. اوره‌يي چيرپارکن آغلار گؤزله چال چاغيردان دانيشدي. آنا ايکي گنجي باهم اوتاقدا قويوب ائشييه چيخدي.
پري: منيم عزيزيم سنه نه اولوبدور؟
چوبان جاواب وئرمه‌دي. پري آغلادي، اصرار ائتدي، سئوگيلي‌سي درديني اونا دئسين. چوبان گؤزلريني يوموب دئدي: من انسانلاري سئوميرم. سني ده سئوميرم. من دنيز پري‌لرينه عاشيق اولموشام.
پري: من قانميرام...
چوبان دئدي: من سني سئوميرم!
قيز آغلادي، اونو اوپوب اوتاغي ترک ائتدي. قانادي سينميش قوش کيمي او ائوي ترک ائله‌دي.
قيش سويوق و آغير، گونلر گئدنه اوخشاميرديلار. لاکين هئچ قارانليق هئچ سويوق ابدي دئييل. بايراما ايکي هفته قالميش قارلار اريمه‌يه باشلادي. آغ يئللر حيات نفسي يئره گتيرديلر.
بير گون آنا اؤز بالاسينا اوزون توتوب دئدي:
– يازدير، بالا! بايرام گليب دير.
– ياز.– بلي ياز، گوللو ياز... ايندي سهندين باشيندا قمري‌لار اوخويور، تورخايلار، باغري قارالار يومورتلاييب بالا چيخارداجاقلار.
– دوغرودان¬دا بو ايل ياز گله¬جک آنا؟
– بالا نه دئيير¬سن، چيخ ياماجلارا گؤر نه خبر¬دير. ايندي قيزلار قوجاق – قوجاق نوروز گولو توپلاييرلار.چوبان آه چکدي، آنا آغلادي.
– سن¬سيز داغلار قار گئيينسين گؤروم بالا. قويونلارين، گئچي‌لرين سودو قوروسون. – آنا دئدي.
چوبان آسقيردي، يئريندن دوردو و دئدي: آنا! قوي اؤلسم ده داغلاردا اؤلوم. من باهار¬دا بو اوتاقدا قالانمارام.
سورو داغا چيخيردي، قويون – قوزونون ملشمه‌سي کندين کوچه‌لريني بوروموشدو. گنج چوبان، خسته حال‌لا داغا چيخيردي. دام اوستوندن آل گئيينميش پري، چاشقين¬ليقلا اؤز سئو¬گيلي‌سيني گؤروب و اونا تبسّوم ائتدي. گنج چوبان اونو نظرده‌ن کئچريب باشيني آشاغي سالدي. قيز اونا بير سو‌فره فتير وئريب دئدي:
ائي منيم عشقيم، ائي داغلارين يورلماز قهرماني، مني اونوتما! خسته چوبان فتير دسماليني آليب بير سؤز دئمه‌دي. اوندان بير آز اوزاقلاشاندا بو سؤزلري تکرار ائتدي:
بوندان سونرا مني هئچکس، هئچ زامان آلدادا بيلمز.
الوداع ائي منيم کهليگيم... الوداع ائي يارالي گؤيرچينيم!... الوداع
قارا ياز قورتارماميشدي. دورنالاردان خبر يوخ ايدي. آنجاق بعضن ياسلي نئچه قارا قوش و قارتال گؤرونوردو کي جنوب‌دان شيمالا ساري گئديرديلر. چوبان سورونو داغا- دره‌يه ياييب، بير قارا داش اوسته اوتورموشدو و بالاجا توته‌ييني چاليردي. توتک‌ده بير عاشيق هاواسي سيزيلديردي. يارب بو« ديلغمي » دير؟ يوخ... « غربتي » دير؟ يوخ... اوشاقليقدان اؤيرنميش هاوادا چوبانين ياديندان چيخميشدي. يئنه‌ده توتک سيزلادي. هاوا يادينا دوشدو: « يانيق کرمي... کرم، او يازيق کرم، بو يانيق کرمي‌ني چالميشدي.»
ايلاهي زياد خان اوغلونون دردي نه آغير ايدي، چوبان دئدي.
گؤز ياشلاري اونون اوزونو ايسلاتدي.
سنين آهين‌دا خوش، آمانيندا خوش
داغلا سينه‌ميزي، داغلا کرمي
زيادخان اوغلونون ناکام عشقيني
يامان آغلاييرسان، آغلا کرمي
او ايل بوتون سهندين داغي داشي ياس توتدو، ناله اولدو، اينيلتي سسلري يالا- ياماجا ياييلدي، ياي تزه گيرميشدي . بير گون، گون اورتاچاغي چوبان سورونو سووارماق اوچون هر گون¬کي کيمي گؤلون دؤوره‌سينه ييغميشدي. و اؤزوده بير بولاغين باشيندا داغين اته¬يينده اوتورموشدو. بيردن گؤردوکي بير پريزاده سويون ايچينده اوزور. باشيني گؤيه قالديريب دئدي: ايلاهي چوخ شوکور بو پريني منيم اوچون گؤندرميسن، حتمن بئله¬دير. بونو دئييب داغدان گؤلون باشينا گئتمه‌يه باشلادي. لاکين پري سودان چيخيب يئنه‌ده اونو تنها بوراخدي. بو ايش نئچه گون تکرار اولدو. چوبان بير گون سورونو گؤلون باشيندا سويا اؤتوروب، اؤزو بير چالي کولونون ديبينده گيزلندي. گونش چوبانين باشي اوسته گلنده يئنه‌ده پري گؤلون باشيندا سويا دوشوب اوزه- اوزه چوبان اولان طرفه گلدي. اونون قارا ساچلاري، آغ اندامي گونشين شعالارينين آلتيندا دوغرودان‌دا گؤزل¬ايدي. قيز گؤلون کنارينا يئتيشنده باشيني قوزادي کي ، داغ باشينداکي چوبانا باخسين، آمما پوسغو¬دا ياتميش چوبان اونا فرصت وئرمه‌دي. کول ديبيندن قالخيب اوزونو اونا ساري چئويريب دئدي:
– ائي پريزاده، ائي دريانين نازنين پريسي. مني بو يازيق چوباني گزيرسن؟!
– دور يئرينده، ياخين گلمه! قيز دئدي.
– گؤزوم اوسته، هر نه امرين اولسا باش ايه‌رم. ائي منيم عقليمي زاييل ائدن. ائي منيم خياليمي پريشانليغا ساليب آشفته ائدن.
– سن کيم سن؟ نه ايسته‌ييرسن؟
– من بو داغلارين چوبانييام و آيلارديرکي سنين انتظاريندايام.
– سن همان چوبانسان کي اؤز ايستکلي سئوگيلي¬سيني بوراخيب و اونون اليف قدين، بوينو بورولموش بنؤوشه‌تک ائتدين؟ سن اونون نرگيز گؤزلريني ابدي‌ليک آغلار قويدون؟ عار اولسون سنه... عار... ائي نانکور...
چؤبان دئدي: اي پريزاده آخي من سني سئويرم!
پري دئدي: سن مني گؤرمه¬ميش نه جور سئوه بيلرسن؟... سن اؤز معشوقه¬ني آغلار قويدون اي وفاسيز. سن خياليله آلداندين.
پري يئنه اوزمه¬يه باشلادي.
چوبان باشلادي هؤنکؤر- هؤنکؤر آغلاماغا. اونون سسينه داغلار آغلادي... قايالار تيتره¬دي.
چوبان لعنت سنه اي درويش... لعنت. سن مني آلداتدين. سونرا دئدي: مني تک قويما من يازيغام!
پري دئدي: آند ايچرسن کي مني تک قويماياسان؟
چوبان دئدي: من بو داغلارين چوباني دئييلم اگر سندن بير گون ده آيريلسام!
پري: سؤيون پالتارلاريني اؤزونو سويا آت!
گنج چوبان پالتارلاريني سويونوب اؤزونو سويا آتدي. پري اونون اليندن توتوب گؤلو با هم اوزدولر. سونرا گؤلدن چيخيب بير سؤيود آغا¬جينين ديبينده اؤتوردولار. چوبان ياخشي باخدي اؤز پري¬سي¬ني گؤردو. اونون اوزوندن اؤپوب دئدي:
منيم گناهيمي باغيشلا! من نه قانماز¬ايديم. باغيشلا مني. پري اونو قوجاقلاييب قولونو بوينونا سالدي و دئدي: تويوموزا آز قالير. پاييز يئتيشير. چوبان دئدي: پاييزدا يوخ، ائله بوگون. اونلار هر ايکيسي گولوب، قوجاقلاشديلار. سون