اوشاق سسي اونا گؤزل بير ماهني‌ايدي

مژگان صيامي

ديزلريني قوجاقلايارکن يوخو دوتوردو، بير آن سيزلاما سسينه ديکسيندي!!
“آناااا – آنااا – آناا – آنامي ايستيرم…”
بو دونه آرتيق دقتله دينله‌دي، يئنه همن سس قولاغينا چاتدي: “آناااا – آنام هاني؟ آنامي ايستيرم! آنااا……”
يئريندن سيچراييب، اوزونو پنجره آرخاسينا يئتيردي، آچيب يان يؤوره‌يه باخاندا، بير قيز اوشاغيني کوچه باشيندا يالنيزجا گوردو! حيرت‌له اونا باخيب بئينيندن دستور آلمادان، پيله‌کان‌لاري ايکي – بير ائديب، اؤزونو يئتيردي کوچه باشينا. ايچيندن گلن درين و اينانيلماز بير دويغو ايله چيغيردي: “قيزيم… قيزييييم! گؤزل قيزيم، منيم بالام” !بوتون آناليق سئوگيسي ايله، کؤرپه قيزي باغرينا باسيب، اؤپوش‌لري ياغديردي. گؤزلرينده، ياش دايانميردي! اوشاق، ايلک باش دا تعجب‌لنيب، بيراز هراسان باخيب، سونرا يوکسک بير باغيرتي ايله آغلادي… “من آنامي ايسته‌ييرم! آناااا… آنامي، آنامي”
قوخلاييردي، اؤپوردو، اوره‌يينه سيخيردي، اللريني قيزيل رنگلي ساچ‌لارينا چکيردي، ائله بويونا اوخشاييردي سانکي هر گونکو ايشي ايدي!
اوشاق، دايانمادان مله‌ييردي. ياواش – ياواش قونشولار ‌ييغيشدي، جاماعات چوخالدي…
قوجاغيندا اوشاق، قاچاراق آدديم‌لاري ايله يولا دوشدو! هئچ بيلينميردي هارا گئديردي، آنجاق سرعتله اوردان اوزاقلاشماق ايسته‌ييردي…
وجودونو اضطراب بوروموش آناسي، دهشتلي باخيش‌لا، تيتره‌يه‌رک، اونلارين دالي سوره قاچيردي، چاغيردي: “لاله!!! لاله‌م…. قيزيم! سن اليمي ندن بوراخدين؟ نه اولدو؟ او بير آن دا سنه نه گلدي، سني کيم بورايا……. گل! گل نازيم! گل جانيم، اؤلدوم من قيزيم، گل گئدک، شوکورلر اولسون آللاهيم…” اللريني اوزالتدي اوشاغيني آلسين، آمما! يازيق قادين، بوتون گوجو ايله اوشاغي ساخلاميش، بوراخماق ايسته‌ميردي: “يوووخ! بو منيم بالام‌دير، آدي دا مارال‌دير، باخ! سوروش، اؤز قيزيم‌دير، منيم اليمدن آلا بيلمزسن، بيزدن اوزاقلاش، يوخسا اؤزومو اؤلدوره‌رم… چکيل کنارا، گئت بورادان”!طيفيل اوشاق آرادا قالميشدي، بئللي اولاراق، چوخ قورخموشدور، آغلايير، قوش ساياغي چيرپينير، ال – آياق چاليردي. اوشاغين آناسي سؤيوش وئره‌رک، قيزيني، زاواللي قادينين قوجاغيندان، بوتون غضب و نفرت‌له چکيب چيخارتماق ايسته‌ييردي، او آن آژير سسي گله‌رک، باخيش‌لار دؤندو…
بير سروان، ايکي افسر دوشوب، اوز وئرن ماجراني بيلندن سونرا، قادينين آنورمال شکيل ده داورانيش‌لاريني گؤره‌رک، اهمالجا اوشاغي آلماق ايسته‌دي….وز – گؤزو پالچيقلي، اوستو – باشي ايسلانيب، ديلي سؤز دوتموردو، داها نه قاچماغا يئري وار ايدي، نه دايانماغا و نه قاييتماغا… هاراي ايسته‌ين‌لر کيمي، تام بير پريشان حال دا ايدي، نه ائتدييني بيلميردي.
بوتون آجيماسيزليقلا، اوشاغي، قوجاغيندان چکيب – چيخاريب، وئرديلر آناسينا!
چيلغينا دؤندو! قيشقيردي، قراري کسيلدي، هر آن اوزاقلاشماقدا اولان (اوشاق) و آناسي‌نين آرخاسينجا سيزلاييردي، يالواريردي، سسي باتدي، آغزي کؤپوکلندي، گؤزلري‌نين قاراسي گئتدي! سانکي باغري داياندي، جاني قيفيللاندي…!
جايناق‌لاري قارتال ساياغي قالدي، سانکي بيريني جيرماقلاما ايسته‌ييردي. قادينا نه گلدي! کيمسه بيلمه‌دي….آمبولانس يئتيشدي، حاليني گؤره‌رک، تاختا ساياغي گؤتوروب، برانکاردا قويوب، قاپي‌لاري اؤرتوب، يولا دوشدولر….سانکي ائوده، هر شئيين اوسته، اؤلوم تورپاغي قونموشدو!(دلي‌لر خسته خاناسي)‌نين تابلوسو، کيشيني دايانديغي يئرده قوروتموشدو!
دامجي – دامجي، دوم – دورو ياغمور ياغيردي، چيچک‌لر باش قالديرميشدي، ائولرين چيراغي يانيردي، عائله سسي دونياني بوروموشدو…
کيشي، بيرينجي دؤنه اولاراق، اؤزونو بؤيوک بير بوشلوقدا حس ائتدي…گوزلريندن، ياش يوخ! سئل آخيردي…. سون