ياغيش باشلادي يئنه اوره‌گيم سيخيلدي

علي تقي زاده لاريجان

بير اينجي بولوم

هاما او گون او جنتده سوردويوم ان آجي بير گون ايدي. 1349 اونجي گونش ايلي يايين قيرخ بئشي‌دي. بير ساکيت ايکيندي چاغي ايدي. آتام، من، بيرده ياشلي، قيرميزي يابوموز زرنه يوردونون اويون يئريندن قانلي قجله طرف گئديرديک. اوزون ايللر آتام بير آل وئرچي کيمي کليبردن، آبش احمد دن مال آليب اونا چاتيب کنديميزه گتيرردي. بيرخيرداجا کاسيب دوکاني، نئجه دئيرلر چاققي چوققو وارايدي. اودور کي اوزاق يوللاري اوزون موددتلر يولداشي اولموشدي قيرميزي يابو. سونرالار گوردوم گلساري ايله تانابايين يولداشليقينا چوخ اوخشاري وارميش.
يابونون يئدگي آتامين الينده منسه آرخادان گئديرديم. آتامينان آز چوخ سفره چيخميشدم قاباقلار. عادتاً يا او منه تجروبه‌لريندن، خاطيره‌لريندن يادا ديندن، معجيزه دن دانيشاردي، يادا منيم اوشاق دونيالي سورغولاريما آراملا جاواب وئرردي.اوگون ايسه، نه منيم سواليم واريدي نه ده آتامدا دانيشماغا کيف داماغ.قالين شوشه‌لي عينک گوزونده اولسايدي دا، گاهدان ياخشي گؤرمه‌دن اياغي داشا ايليشيردي. ييخيلماسين دئيه آتين نوخداسيندان آسلانيردي. بيلميرديم نيه آتي مينمير. يهرسيز پالانسيز اولسايدي دا مينيب او داشلي يوللاري گئده بيلردي.دولايي بولاغ ين اوستوندن آشيب مرزولويه طرف يوللانديق. يولون آلتي مئشه‌نين سون سرحددي ايدي. خاللانميش قره قات، بويورتگان، آلچا، اوردا بوردا گؤزه ده‌ييردي. منسه هئچ اونلارا مئييللنميرديم. سوکوت باغريمي چاتلاديردي.گؤيه باخديم. گؤيون ده حالي قاريشيق ايدي. صحرامانين اوستونده آغ يوموشاق پامبيق لئچه‌يي کيمي بولودلار اويناشيردي.
گون باتاندا خريل هاچاسي‌نين اوستونده ايسه قارا بولود غضبلي هده کسن کيمي آرانا طرف ياييليردي.خيرداجا بير آشيريم آشاندان سونرا، برزوند ياليندا بير کيشي تاپيلدي. يدگينده بير مال يادا داوار. يامانجا دارتينيردي. . قويونون بوينونا عادتاً ايپ باغلاييب چکمزلر، آنجاق او حيوانين خيرداليقي قويون اولماقيندا مومکون گؤستريردي.او کيشي‌دن آشاغي، دره کيمي قجلليقا گوم گوم دئيرلر. سببي‌ده بودور کي اوردان اؤتن مال حيوان يا اينسانين اياق سسي قايادان عکس اولوب بير آغير گوم گوم سسلنر.گوم گومدا يولدان آيريليب اوکيشي‌يه طرف ديکلنديک. بير داشين ديبينده اوتوروب ايکي ياشلي بير ديشي بئزوون بوينونا دولاديغي ايپدن توتموشدو.گونشدن، داها دوغروسو کاسيبليقدان، قاراگوندن، اوز گؤزو قارالميش آريق اوتوزبئشه ياخين ياشلي، هاما چوخ قوجا گؤرونتولو او کيشي نين آدي نورالله ايدي.آتام يابونون نوخداسين بوراخدي. نورالله ايله سالاملاشدي. آت بير آز آرالانيب اوتلاماغا باشلادي.نورالله‌نين بئزوو آرتيق وحشي جيرانا اوخشاييردي. بيرجوت زيل قارا پارلاق گؤزلري ايله بيزه همده يابويا سورغولو بير نظر ساليب اوتلاماغا داوام وئردي.من او ديقيه کيمي سببين بيلمه‌دن کدرليديم. اونداکي نورالله‌نين دانيشيغيندان سببين بيلديم آرتيق مکدر اولدوم.دئمه آتامين پولا احتياجي اولدوغوندان نورالله ايله ايکي گون اول کليبرده قيرميزي يابونون معامله‌سين ياپموش، آل وئر اوچونده اوگونو برزوند يالين قرارلاشموشلار.آتام اعتراض ائديردي کي: سن پول گتيرمه‌ليدين بئزو يوخ. بيز بئله دانيشماميشديق. نورالله‌نين کي سؤزلريندن بيرجور خواهيش و التماس ياغيردي دئدي: قيمتين هاميسي قدر پول الده ائده بيلمه‌ديم. سن بو بئزوو گؤتور قالانينا پولوم چاتار.آتام نورالله‌ني اوزوندن ده يازيق گؤردوکده راضيلاشدي. اونلار ال وئرديلر بير بيرينه معامله‌دن خئيير آپارماق آرزولادير.آتام آهسته قيرميزي يابويا طرف گئتدي. همان يابو کي اوزون ايللر، اوزاق يوللار ايستيده سويوقدا کليبر چايي يولوندا، آبش احمد، موتالليقدان بئله الينين عصاسي همده يول يولداشي اولموشدو. آراملا آتين بوينون قوجاخلادي. او اوزوندن بو اوزوندن بيرده قاشقا آلنيندان اوپدو. تومارلاماق قصديله الين. بوينونا ,يالينا چکدي. سونونجي نوازش سونونجي تومار!.آت آراملا دؤندو منه طرف باخدي. سانکي نئچه آن باخيشي ايليشدي. گؤزون گؤزومدن چکه بيلمدي.
من او باخيشا تابلاشانماديم. اوزومو دوندرديم آرانا طرف. گؤز ايشله‌ديکجه مئشه‌لر چکيلميشدي. باخيشيم دوزداق‌دان علي آباد مئشه‌سيندن آشدي، آغيدان هيجران دوستدان ايکي چاي آغزي‌ناجان گؤردو. داها تارلاشدي هئچ يان گؤرونمه‌دي. گؤزومون ياشي قويمادي گؤرم. قويماديم آتام يا نورالله آغلاماغيمي گؤرسونلر. قهر بوغازيمي کسسيده ده سسيز آغلاييرديم. هم آغلاماقدان اوتانيرديم همده ايسته‌ميرديم گؤز ياشيمي اونلارين سئودالاشماسينا نحس گتيرن کيمي دوشونه‌لر.منيم اؤزومونده قيرميزي يابوينان آزماز يولداشليغيم اولموشدو. چوخ آلاتوران آخشاملار اونو مينيب بولاغدا سووارماغا آپارميشديم. اونون بئلينده بولاغدا شکيليمي گؤردوکده بؤيومک، کيشي‌لنمک حيسسي تاپارديم.– بالا گئداق.آتامين بو سؤزو مني آييردي بوتون شيرين خاطيره‌لريمدن. امينم کي آتام اؤز گؤزيله آغلاماغيمي گؤره بيلمه‌سه ده اوره‌ک گؤزوايله گؤردي و هئچ نه دئمه‌دي. آخي بيلردي کي هيمه بندم.باشيم آشاغي يول گئديرديم. يعني گئديرديگ. بيلميرديم هارا گئديريگ مهم ده دگيلدي. آز مدتدن سورا برزونده يتيشديگ. نورالله نين ائوينه. بللي اولدو کي نورالله بير چاي ايچمه‌يه همده قالان بورجون اؤده‌مک اوچون آتامي راضي ساليب ائوينه گئدک.بيزيم آران کندلرينده ائولر حصارسيز اولور، هاما تات کندلرينين چوخوندا ائولرين حصارديواري همده بؤيوک گيريش قاپوسو اولاردي.نورالله حيطينده بئزولا يابونو باغلاييب، قاباقلارينا بيرقوجاق اوت تؤکدي . ايچري کئچکديک.نورالله نين من ياشدا بير بالاجا زيرنگ قيزي وارايدي. آنجاق بئش ياشي اولاردي ائله. چاينيکي سوايله دولدوردو قويدو اوجاغا.گؤزلريده ائله بيزولارينين گؤزو کيمي زيل قارا يامانجادا اورکک ايدي. دوغروسو آرتيق معنالي. آردي وار