آدسيز يئرده دوغوش

ويدا حشمتي

گؤزلريني آچير. قار اوزونو دوندوروبدور. زورلا دوروب، اوتورور. اللريني قيچلاري‌نين آراسيندا قيزديرير. بارماقلاري ايله، هؤروکلرينه اوتوران قارلاري سيلکه‌له‌ييب، بير آووج قاردان آغزينا ساري آپارير. قوروموش قان، آغزيني آچماغا قويمايير.
قاري، دوداقلارينا سورتور. دولغون دوداقلاري‌نين قوروموش قانلاريني قوپارديب، بير داها قارلا ايسلادير. دوداقلاريني ديلي ايله ايسلاتماق ايسته‌يير، آنجاق اولمايير. آغريدان گؤز ياشلاري سوزولور. اللريني آرخاليغي‌نين ياخاسيندان ايچري آپاريب، قولتوغوندا قيزيشديرديقدان سونرا آووجلاريني قارلا دولدوروب آغزينا قويور. ديشلري آغرييا گلير. الي‌نين آرخاسي ايله گؤزونون ياشيني سيلير. سيلله‌نين يئري آجيشير. آياغا قالخيب، يولا دوشور. هردن، قاري آووجلاييب، آغزينا دولدورور، سونرا قانلي سويو قارلارين اوستونه بوشالدير. آغ آپ آغ قار قيزاريب، قانلي سو، ياييلير.
گونش بولودلارين آرخاسيندا باتماق اوزره‌دير. او، گؤي قارالماميش، اؤزونو آدسيز يئره يئتيرملي‌دير. اوزاقدان ايتلرين اولاماغيني ائشدير.
کيشي‌نين سؤزو يادينا دوشور. اونو کندين قيراغينداکي قبريستانليغا قدر گتيريب، اوزونه باخمازدان دئميشدي: «بوراني توت، دوز گئت!.. آخشاما کيمي اؤزووو آدسيز يئره چاتدير، يوخسا کؤپکلره يئم اولارسان».
او، آدديمدلاريني يئيينله‌دير. آنجاق لاپ الدن دوشوبدور. هئي‌سيز-هئي‌سيز گئدير. قارقانين قاريلتيسي کاتدانين گولمه‌ييني خاطيرلادير.
کاتدانين سؤزلري قولاقلاريندا دولانير. ساپ-ساري ديشلريني آغاردارکن: «گئت دوعا ائله‌کي، داشقالاق ائتمه‌يينه امر ائتمه‌ديم!» دئييب، اوجادان گولموشدو.
گون باتيب، قاش قاراليبدير. بيراز اوزاقليقدا، کور ايشيق گؤرونور. اوره‌يينه دينجليک اوتورور‌.
او، آدسيز يئره چاتديقدا، بير-بيريندن آز آرالي، اوتاقلاري گؤرور. اؤزونو اوتاقلارين بيرينه چاتديرير. گوجسوزجه، اليني يوموروقلاييب، قاپييا چيرپير.
قاپيني، بير کيشي آچير. اونون قولتوغونا گيريب، اوتاغا کئچيردير. دؤشه‌يين اوستونه اوزالديب، يورغان‌لا باسديرير.
گؤزلريني آچديقدا، اوتاق بوم-بوشدو. قورخولو گؤزلريني اطرافا دولانديرير. آرتيق، آياغا قالخماغا اينجاري يوخدور. اليني جيبينه آپارير. کيچيک قوشو آووجونا آلير. گؤزلريني يومور‌.
او، هوندور آغاجين اؤنونده دايانيبدير، قار دنه‌لري گلين دونونون اوستونه اوتوروبدور. کاتدا الينده يانارجا ايله، کيمي ايسه آختارير. او، قار آدامينا دؤنوبدرور. آنجاق قان آياغي‌نين آلتيني قيزيشدير. کاتدا، اوجا سسله دئيير: «اونو تاپين، اونو داشقالاق ائله‌يين». قار آدامين يانيندان کئچنلر، سانکي اونو گؤرمه‌ييرلر. بيردن ايتلرين سوروسو، هوره-هوره اونا ياخينلاشيب، قاني يالاييرلار. ايتلرين بيري اللريني اونون کؤکسونه دايايييب، ديليني قوپاتماق ايسته‌يير. اطرافي قارانليغا بورونوبدور. کاتدا الينده‌کي يانارجايلا اؤنونده دوروبدور. يانارجانين ايشيغيندا قار، قيپ-قيرميزي گؤرونور. کاتدا يانارجاني اونا ساري توللايير. ايتلر داغيليرلار. اگنينده‌کي گلين دونو، آلوولار ايچينده يانير. او، آلوولانا-آلولانا، آغاجين قاباغيندا دايانيبدير. جاني قيزيشديقجا، لذت آلير. اللريني آچيب، باشيني گؤيه قالديرير. آغاجين کؤکلري، قارلارين ايچيندن اوزانيب، اونون گؤوده‌سينه دولاشيرلار. اونو يئردن قالخيزيب، گؤيه‌ساري آپارير. قويونلار آغاجين اطرافيني احاطه‌ ائديب، باخيرلار. او، بير آلوو پارچاسي اولوب، گؤيه ساري گئدير.
آدسيز يئره گلندن بري، بو يوخونو گؤرور.
ايندي ايسه جاني اود وئرير. دوغوم سانجيسي اونو يوخودان اويادير. آياغا قالخير. آياق يولونا گئتمک ايسترکن، قيچلاري‌نين اورتاسيندان سو تؤکولور. سانجيلار گئت-گئده چوخاليب، امانيني کسير. گاه ديرناقلاريني دووارا چکير، گاهدان بيله‌ييني ديشله‌يير. اوتاغين بوجاغيندا، دؤشه‌يين اوستونده چؤمبه‌لير. پنجره‌نين هئره‌سيندن ياپيشيب، اؤزونه گوج وئرير. اؤلومون آجي داديني، بوتون ووجودوندا حيس ائدير. باغيرير، باشيني ساغا-سولا ساللايير. تردن ايسلانان ساچلاري، گؤيده اويناييب، اوزونه توخونور. اوزو جيم-جيلاق‌دير. کيچيک قوش اوتاقدا اوچور. اونون هر باغيرتيسيندا، ديسکينيب، اؤزونو دووارا چيرپير. او، نه گوجو وارسا باغيرير. ايچيندن بير شئي قيريليب، دؤشه‌يين اوستونه دوشور. درين بير دينجليک بوتون ووجودونو توتور. اوشاغين آغلاماق سسي اوتاغي بورويور.
اوشاغين باتيق اوزونه اليني چکيب، تميزله‌يير.
***
دوداقلاريني اوشاغا ياخينلادير. کؤرپه‌نين ايستي اوزو، جانيني قيزيشديرير. اوزانير، قونشو کيشي گليب، اوشاغين گؤبک باغيني کسير.
اوشاق، اينجه، قيرميزي ديليني چيخارديب، دوداقلارينا سورتور.
گونشين ايشيغي اوشاغين اوزونو آيدينلادير. قوش پنجره‌نين هئره‌سينده اوتوروبدور. اونون کؤلگه‌سي اوشاغين اوستونده عکس اولوبدور.
اوشاق کاتدايا بنزه‌مير، دوداغي‌نين اوستونده قيرميزي ات خال يوخدو. او معصوم گؤرونور.
ديل‌سيزلرين آدسيز يئرينده، يئني بير اوشاق، ديلي اولان بير اوشاق دوغولور. سون