بولگه لر سرويسي:کيتاب‌لارين ديلي اولسا دا قولاغي يوخدور يقين! بونو، آتام اوتاغيندا هر گون سانجيدان سيزيلدارکن، هئچ سس دويمورلار کيمي دورودان باخان مين‌لر کيتابي گؤرونجه آنلاديم.
رقيه هاشم‌زاده
ائله سايماز، ائله سس‌سيز سانکي بوتون قازانجيني اونلارا وئرن و بوتون عؤمرونو آياقلارينا قويان بو اينيلتي‌نين صاحابيني تانيميرلار. داها او گل-گئتدن، قولتوقلارينا قزئت وورلموش شاللي-پاپاقلي اوزون پالتولو عاليم دوست‌لاردان دا خبر يوخ. هاميسي يا اؤلوب يا باشقا اؤلکه‌لره کؤچوب‌لر.
آتامين کيتاب قوردو اولدوغونا رغمن اوچ بالاسي‌نين بيري بئله اوخوماغا راغيب اولمادي. بلکه اونون يازي- پوزو عشقيندن اؤزونو اوتاقدا حبس ائديب بيزدن و اؤزل‌ليک‌له آنامدان آلماسيندان دولايي ايسته‌مه‌دن بير تهر ايچيميزده او کيتابلارا قارشي نيفرت يارانميشدي.
راحات-راحات اوخويوب يازسين دئيه معلليم‌ليک‌دن ايستعفا وئرميشدي. ايکي سهمينه شريک اولدوغو کرخانادان گلن گليره ايقناع ائتميشدي. دئييردي: »ائنيميزي ده گؤرر، بويوموزودا«
کيشي سانکي دونيا ترکين قيلميشدي. يئييب ايچدييني ايچينده ساخلاماغا قادير اولسايدي او هردني ده چيخمازدي کاغيذ قوخوسو ديوارلارينا هوپان قارقانميش اوتاقدان.
پنجره‌نين رفينه بئله يارييا کيمي کيتاب قالاميشدي. اونون هاواسي دا، ايشيغي دا، آرواد-اوشاغي دا او کيتاب‌لار ايدي.
آنام زارا گلميشدي داها. الينده کي بوقچاني آغاجين هاچاسينا قويدو. آغلايا-آغلايا باشينداکي نارين گوللو چادراسينين أتک‌لريني ييغيشديريب اؤزل طرزيله قولتوغونا وئردي. بيلمه‌ييمدن توتوب اورا-بوراما چيرپا-چيرپا حووضون قيراغينا سوروتله‌دي.
– ننه‌سيز قالاسان ايندي هاي-هايدا بولاري نجور تميزليييم.آغزيمدان گؤبه‌ييمه کيمي يول چکن بؤيرتکان لکه‌لريني دئييردي. آغ پالتاريما باخمالي دئييلدي. اته‌ييمدن توتوب يوخاري چکه‌رک باشيمدان چيخارتديغي پالتاري اؤنجه الينده توپالادي، سونرا او بيري اليني ايسلاديب کؤکسومه چکيب اونونلا قورولادي. گؤز ياشلاري ياناق‌لاريندا کئهره باغلاميشدي. ياشيل گؤزلري داها پاريلداميردي. آياغا دوروب چادراسيني اوزولموش بئلينه دولادي. دئيينه-دئيينه قورويان پالتارلاري حيرص‌ايله شريتدن ييغيب آستانادان ايچه‌ري آتدي.
گونشين ايستي ال‌لري مرمر تنيمي هوسله تومارلاييردي. اييليب سو ايچمه‌يه آغزيمي شيره داياديم.“ناظيم حيکمت”ين شعريندن بير پارچاسي اؤز سسي‌يله ذهنيمه گلير “سئوييوروم سئني أکمه يي توزا باسيب يئير گيبي…گئجه‌لئيين(گئجه واختي) آتش‌لر ايچينده اوياناراک آغزيمي داياييب موسلوغا سو ايچر گيبي….”يوموروغو کوره‌ييمين اورتاسيندا اوتورسادا روحومون قات‌با‌قاتين گزيشيب ازيب داغيتماغا گئتدي!– ننه‌سيز دئمه‌ميشم او جور سو ايشمزلر؟
او ضربه‌نين آرديندان اوستدن قاباق ديشيم شيره ده‌ييب آغزيمدان آتيليب حووضوا دوشدو. آغلاماديم. آغريميردي. لاخلاييردي ذاتن. ايکي اوچ گونه دوشه‌جک‌ايدي. قان داديني آغزيمدا حيس ائله‌سم ده اودوب اونا بيلديرمه‌ديم. بيلسه نه اولاجاق کي؟ بير يوموروق داها يئيه‌جکديم. ا
وزومو اونا ساري دؤندرديم. بوقچاسيني آغاجدان آليب چادرا قاريشيق قولتوغونا ووردو. الينده کي تميز پالتاري أينيمه چکدي. يئنه قولومدان توتوب سورودو.
– يئري گئدخ داي بورا بيزيم يئريميز ده‌يير. ائو ده‌يير کي کروانسرادي، علي چيخير ولي گيرير، ولي چيخير علي گيرير. قيرواخ يئري!
همشه کي سؤزلر همشه کي اويون. نئچه گون سونرا »بالالاريم آج قالدي« دئيه ساللانا-ساللانا قاييداجاق‌ايدي. آرادا ده‌ين منه ده‌ييردي. قولچاق‌لاريمدان اويونجاق‌لاريمدان کوچه يولداش‌لاريمدان اوچ-بئش گون اوزاق دوشوردوم. لاپ اؤنمليسي حيطيميزين سئوگيسيندن ناکام قاليب اؤلوشگه‌ييرديم.
کيم ايناناردي بو خينا او خينالاردان اولماياجاق؟ ائله او گئديش گئتديک. سانکي بيزي آپاران، مقصدي بللي اولمايان او قاطارين دؤنوش يول‌لاري اوچموشوموش. داها هئچ کس آنامي قايتارانمادي. نه آتامي، قارداش‌لاريمي دينله‌دي، نه بيرجه آغ ساققالي آغ بيرچه‌يي. آتام دا آجيغا دوشوب »بوشاميرام« دئدي…
***
داوالارين وئريب قارشيندا ايله‌شيرم. پريشان حالدا چيين‌لريني بوروين آرپا-بوغدايي ساچلارينا توخونورام. دينيب دانيشمير. آغ‌آپباغ دامارلاري زول دورموش ضعيف و قوجا ال‌لريندن توتورام.
– بابا! آنام اوردا جان چکيشير، سن ده بئله خسته دوشوبسن. گلين عينادي بوراخين بيرليحده ياشيياق. ييرمي ايل بس ده‌يير؟ اونون داوا درمانينا کورور-کورور پول احتياجدي. هاني او کرخانادار دوست‌لارين، تانيش‌لارين. هاني سهمين واريدي، گليرين اولاردانيدي. دي گتير دا. من تح جانيما يئتيره بيلميرم. سرطاندي شوخلوق ده‌يير کي. منيم آيليغيم همين ايکي نفرين قارنين دويورا. سن کي ياخشي بيليرسن. سؤيونورم قارداش‌لاريم خاريجه‌ده تيجارته باخير. قادام اولارين تيجارتينه. گئنه ائولنمه‌ميشدن بئش-اوش قيران يوللارديلار. آلتي يئددي ايلدي اونودا کسيب‌لر. آللاه بالالاريننان چحديره‌جئح.هئچ بيلميرديم کيمه دانيشيرام. من بيلن ،کيتابلاردا هئچ زامان عاييله‌نيزه قارشي بو قدر آجيماسيز اولون دئيه يازماييب‌لار. ال‌لريندن اؤپوب چانتامي گؤتوردوم.
– بابا، قوربان اولوم داي گئتمه‌لي‌يم. ياديننان چيخماسين ها، ياتاندا بو چؤهرايي داواني حتمن آت. صاباح گئنه باش ووراجييام.
حيطده کي گول‌لرين، آغاجلارين بير چوخو آتامين و البته آنامين اودونا يانيب قوروموشدولار. بو ايل‌لرده چکديييم اذيت‌لرين سايه‌سينده اونلارين بو مظلوم حال‌لاريني دوشونمه‌يه‌جک قدر سرت روحسوز و باشي‌سويوق اولموشدوم. تک دوشوندويوم شئي اوّل آنامين ساغليغيني قايتارماق و سونرا اونو آتاملا بيرلشديرمک‌ايدي…
***
صينيفدن چيخديم. اوشاق‌لارين باشيما دوشن سس‌کويوندن سرسم اولموشدوم. ائله کي معلليم يولداش‌لاريمدان بيري اؤنجه‌دن مني قارداشينا ايسته‌دييي مؤوضوعا توخونار-توخونماز توپارلاييب يازيغا ديک-ديک جواب‌لار دئديم. دونوب قالدي. داليما باخمادان قاپيني چيرپيب مدرسه‌‌دن چيخديم.– گؤرور ها مين بير فيکريم، درديم، قايغيم وار؛ هله گئنه او قارني يئکه قارداشين گؤزومه سوخور. نئينيم وکيلدي. دده‌مين دردينه کي! منه ايندي جراح دوحتور احتياجدي. آنامي قورتارا بيلن بي بئيين جراحي بي ده معجزه.بولاري خياباندا يئرييرکن غضبدن ديل آلتي دئييرديم. ايلک گؤردويوم تاکسي‌يا ال ائله‌ييب مينديم. آدرسي دئييب باشيمي شيشه‌يه داياديم. گؤزلريمي يومدوم…
… اون‌اوچ ياشلي موصطافا ساچلاريمي تومارلايير اؤپور، گؤز ياشلاريمي سيلير، اؤن‌بئشيني يئني بيتيرميش محمدايسه قيچيمين ياراسيني باغلايير. آرمود آغاجيندان آرمود دررکن دوشموشم. آنام حووض باشيندا اوودوغو پالتارلاري سويا چکير.
هر دفعه ده پالتارلاري آسديقجا اوچوموزوده قاتيب قاباغينا وورهاي دئيينير. آتام بير الينده چوبوق، پئنجه‌يي چيينينده ياريسي کيتابلا پرده‌لنميش پنجره‌دن بيزه باخيب نه‌لرسه يازير…تاکسي دايانير. چاتميشيق. کرايه‌ني حسابلاييب تشککور ائله‌ييب ائنيرم. اوزاقدان آتامي گؤرورم. قاپيدا قيرميزي بير نئيسان دايانيب. آدديم‌لاريمين سورعتينه آرتيريرام. من چاتينجا ماشين گئدير.– سلام بابا! نولوب؟اليمه ايکي قاتلانميش خيردا بير کاغاذ وئرير. من سوروشماغا هن-هون ائله‌يينجه، چوخداندير دويماديغيم سسيني قولا‌ق‌لاريما يايير:– آنان اوچون نه ايش لازيمدي گؤر!آچيب باخيرام. نه ده چوخدو!-»در وجه آقاي نصرالله ذرّين بابت خريد هزار و هشتصد جلد کتاب…«
آذربایجان غربی بهترین حلقه اتصال ایران با اروپاست
گسترش سایت تکثیر گوزن زرد ایرانی در فندقلو نمین
بیش از ۴۰ درصد زیتون ایران در این استان تولید می‌شود
دشمن به دنبال ضربه زدن به هویت اسلامی است
اتفاق تلخ برای خبرنگار تبریزی پیش از جلسه وزیر اقتصاد
خانواده‌های ایثارگران نیازمند اقدامات جهشی و اولویت‌دار هستند
پیکر مطهر ۶ شهید گمنام وارد ارومیه شد
تمرکز جهاد کشاورزی زنجان بر آبیاری نوین و ترویج محصولات جایگزین
مدیران باید با جدیت کامل وظایف قانونی خود را انجام دهند
نایب‌رئیس مجلس از قطعه ۵ آزادراه مراغه–هشترود بازدید کرد
درباره عصر آذربایجان