قادينين گنل اولاراق توپلومدا کي يئري
قادينين گنل اولاراق توپلومدا کي يئري
1396/11/08
بولگه لر سرويسي: قادينا اولان منفي مناسبت اؤزونو هر زامان قادينا قارشي حقوقسوزلوق و و يا بير چوخ ايلکل قبيله اي شئيلري بهانه ائدرک اونو ايزوله ائتمک تشبث لرده اؤزونو گؤسترير، بو داورانيش و توتوم ايسه اصلينده تکجه قادينلار دئييل، بوتون اينسانليغا قارشي بير حاقسيزليق و ظولم دور. همده زيان و ضرري راحت و تئز جبران اولمايان بير حاقسيزليق و ظولم. هئچ شوبهه سيز گونوموزده قادين اولماق داها بير چتين حالا گلميشدي. قادين لارين کيشي لر مقايسه ده داها فرقلي بير ياشام طرزلري واردير. کيشي لر کيمين راحت و ساده بير ياشام طرزلري يوخدور،اؤزلليکله داها آز گليشميش توپلوم لاردا قادينين ياشامي داها چتين دير
بو توپلوم لاردا هئچ بير ديير گورمه ين قادينلارين ياشاماسي بئله بعضا بير معجزه دير. گليشميش توپلوم لار اوچون سون ايل لرده اورتايا چيخان قادين_کيشي برابرليک قاورامي کئچرليدير. قادينلار بو توپلوم لاردا اؤنملي بير قونوم صاحيبي حالينا گلديکلري آرتيق تثبيت اولونموش بير گئرچکدير. آرتيق باغيمسيز بير اينسان اولماق ايسته ديک لري اوچون، داها گليشميش قادينلاري توپلومدا گؤرمک مومکون دور.
گليشميش توپلوم لاردا قادينلار اوخويا بيلير،يوکسک تحصيلات آلا بيلير،و اؤزلرينه ايش قورا بيليرلر. بو شکيل ده باغيمسيز بيراينسان حالينه گليب لر. بو توپلوملاردا قادين دئديگينده باشقا هئچ بيرکيمسه يه باغلي قالمادان يانليز اؤز آياقلاري اوستونده حيات لاريني سوردورن مستقل اينسانلار آغلا گلمکده دير.
آز گليشميش توپلوملارا حاکيم اولان دوشونجه ايسه قادينلارين سادجه ائولنيب اوشاق صاحيبي اولماق اوچون دونيايا گلديک لري دير، بو سببدن بو توپلوم لاردا يئتيشن قادينلار تحصيل آلماماقدا و حتي تک باشلارينا توپلوما بيله چيخماماقداديلار.
بو شکيلده قادينين هئچ بير اؤزگورلويو اولماماقدادير. اويسا ائيتيملي بير قادينين،گله جييميزين تأميناتي اولان گنج لريميزين بيلگيلي بير گنج اولماسيندان توتون ساغليق،توپلومسال ياشام و کولتورل يؤنلريله جامعه يه وئره جه يي آرتيلارا سون درجه ده احتياجي واردير. توپلومون ياشام سويه و کيفيتينين يوکسلمه سينده ده توپلوم اوچون قادين اولمازسا اولماز دير.
بو ندن له ده قيز اوشاقلارينين ائيتيم لري سون درجه ده اؤنملي دير. ،اکونوميک آچيسيندان باشقاسينا باغيملي اولاراق ياشيان قادينلار حياتلاريندان هئچ بير ذؤوق آلا بيلميرلر،اوزگورجه سينه ياشايا بيلمه ين ،ايسته ديکلريني قوشانماقدا سربست اولمايان قادينلار، توپلومدان سيلينميش بير کاراکتر اؤزليگي گؤستريرلر.
ياواش ياواش دونيا اوزرينده دييشن بو دوشونجه ايله بيرليکته زامانلا داها چوخ قادينلاري فرقلي قونوم لاردا گورمک مومکوندور. اؤرنيين ،اينديسه بير چوخ گليشميش توپلوملاردا فرقلي ايشلرده چاليشان بير چوخ قادين گورونمک ده دير.
چاليشان بير قادينين هر زامان عايله ايچينده قارشيلاشاجاغي چتين ليک لر البته کي اولاجاقدير ،فقط بونلاري عايله بيربيرينه سايقيلي،ديروئرن، داورانيب و عايله ايچينده سوروملولوقلاريني بيربيرلريله پايلاشان و بير اويوم ايچينده اولمالاري چوخ اؤنملي دير. يئتيشديريلن اوشاقلارين ان باشدا ائيتيم قونوسوندا اوزمان بيريندن دستک آلاراق يئتيشديريلمه سي و قارشيلاريندا کي حياتدا،سوروملو ،دوزن لي و چاليشقان اولمالاري اوچون يارارلي اولاجاقدير؛آيريجا بو ايچينده ياشياجاغي عايله وتوپلوم ايچين ده چوخ اؤنملي دير.
باشقا جور دئسک، بير قادين اوچون اوچ شرط حاظيرلانيب يا قازانيلارسا، سورونلاري زامان_زامان حل ائتمک ممکوندور. بو شرطلر.
1?کيفيتلي و آيري سئچکي ليکدن اوزاق مدرن ائيتيمين توپلومدا هر ساحه لي و گئنيش بير شکيلده اولماسي و ياييلماسي.
2?ايش و چاليشماق شرايطي و ايمکان لارينين وار اولماسي و آيري سئچکي ليکدن اوزاق بير ذهنيت و شرايط دن، عدالتي جسينه داغيديلماسي و پايلاشيلماسي.
3?حقوقي سيستئمين ايلکل ليک يئرينه مدرن دونيانين، اينسان سئور ، اخلاق و عدالت آنلاييشي اساسيندا قورولماسي و وار اولماسي.
بو شرط لر يارانديغي زامان آرتيق قادين لار ايکينجي درجه لي بير اينسانلار کيمي يوخ بلکه اراده، اينام، تخصص، باشاراجاق و حقوق صاحبي اولاراق توپلوما گوجلو و فايدالي اولاراق گيريب و بير چوخ سورونو حل ائتمک و توپلومو ايره لي يه آپارماق قابليتينه ماليک اولاجاق لار. بئله بير شرايط ده توپلوم کئچميشين حسرتيندن قورتولوب، گلجه يه اوميد گؤزو ايله باخاجاق.
چونکي روحي و معنوي باخيمدان قادينلار توپلومدا، انرژي، روح و معنويت باغيشلايان اينسانلارديرلار. قادينسيز بير توپلوم يا قادينلارين نقشي آز اولان بير توپلوم سرت، کوبود و روحسوز بير توپلوما چئوريله بيلر، کي اوردا اينساني دويغولار و معيارلار داها ضعيف بير دورومداديرلار. قادينسيز بير توپلوم يا قادينلارين رولو آز اولان توپلوم لار، اينساني توپلومدان داها چوخ مکانيکي بير توپلوما بنزه مکده ديرلر کي، بئله توپلوملاردا زامان سوره جينده تک يؤنلو بير ماهيت و ايشله ييش داشييماغا مجبوردور لار.
اصلينده قادينين رولونو توپلومدا محدود ائتمه يه چاليشانلار، قادينلارين ياشام ساحه لريني محدود ائد رک، قادينلارين ياشام دان پايلاريني محدود ائديب، اونلاري ذؤوقلو بير ياشامدان محدود ائتمک فيکرينده ديرلر. اويسا بو هم اينساني باخيمدان همده ،بو گونکي مدرن ياشام و مدرن توپلوم اؤزه لليکلرينه قارشي بير توتوم دور.
دورنانيوز يايديغي معلومات اساسيندا عصرآذربايجان راپورونا گوره ، قادينا اولان منفي مناسبت اؤزونو هر زامان قادينا قارشي حقوقسوزلوق و و يا بير چوخ ايلکل قبيله اي شئيلري بهانه ائدرک اونو ايزوله ائتمک تشبث لرده اؤزونو گؤسترير، بو داورانيش و توتوم ايسه اصلينده تکجه قادينلار دئييل، بوتون اينسانليغا قارشي بير حاقسيزليق و ظولم دور. همده زيان و ضرري راحت و تئز جبران اولمايان بير حاقسيزليق و ظولم.
منبع :