آذربايجان ناغيللاري بولگه لر سرويسي:بيري واريدي، بيري يوخودو. تانريدان سونرا هئچ کيم يوخودو. البت ده اوشاقلار! بو چوخ چوخ اوزون زامان اؤنجه‌يدي. زامان کئچديکجه هر شئي اولدو، حئيوانلار اولدولار، آداملار، ائولر، کندلر، شهرلر، مدرسه‌لر، کيتاب و قلملر و هم ده ائو تاپشيريقلاري. سوروشورسوز بس بونلار نئجه اولدولار؟ هاردان گلديلر؟ منجه ده سيزين ماراقلانديغيز بو طرز شئيلر چوخ گؤزل سورولارديلار. آمما اوشاقلار بوگون بو سورولاريزي ياديزدا ساخلايين، بير باشقا ناغيليميزدا دا اونلارين جاوابلاريني تاپاريق. چونکي بو گونکو ناغيليميز جيرتدان و معلليمين اونا وئرديگي ائو تاپشيريقلاريدير.جيرتدان کيمدير!؟باخين! نئجه ده من اونوتقان بيريسي اولموشام. هئچ جيرتداني سيزه تانيتمادان اونون ناغيليني دئمه‌يه باشلاميشام. آماندي ها! سيزده منه تاي اولمايين. عاغليزا هر نه گلير تئز اليزه بير قلم آلين، دفتريزده يازين. چونکي تانري، سيز اوشاقلارين عاغيللارينا هر زامان گؤزل فيکيرلر، چوخ ماراقلي سورولار گؤندرر. هر کيم نه دئسه، قويون دئسين. بوراخين اونلار سيزين دوشونجه‌لريزله آلاي ائتسينلر. آمما بونو بيلين کي، سيزين خياللاريزا گولن اينسانلار چوخ سهو ائديرلر. او خياللار تانري طرفيندن وئريلن ان قيمتلي خزينه‌لرديلر. هر زامان اونلاري قورويون.واي، واي، واي. . گئنه باشيم قاريشدي. جيرتدان ياديمدان چيخدي. ياخشي، گولمه‌يين. دا بو سفر ناغيليميزدان باشقا بير يئره جايماياغيمي سيزه سؤز وئريرم.هه، جيرتدان سيزه تاي بير مدرسه اوشاغيدي. اوشاغيدي، چونکي من اونو تانيييرام. او ايندي آرتيق بؤيويوب، يئتشکين بيريسي اولوبدور. بو ناغيلي دا من اونون کيچيکليگينده يازديغي دفتردن اوخويوب سونرا سيزه يازديم. بلي بس نه. بيرآز اؤنجه سيزه نه دئديم. عاغليزا نه گليرسه دفتريزده يازين دئمه‌ديم مي؟ باخين گؤرون جيرتدان کيچيک ياشلاريندا نه قدر ده گؤزل شئيلر دوشونورموش.البت ده اونون يازيسيني سونرا من ائديت ائتميشم. ائديت نه دئمک؟ياني کي خطالاريني دوزلتميشم. بيليرسيز اوشاقلار! يازيديغيز شئيلرين خطالي اولماسيندان اصلا قورخمايين. حتتا بؤيوک يازيچيلارين شعيرلري، حئکايه‌لري و ناغيللاري دا خطالي اولار. بونا گؤره ده يازديقلاريني بير ائديتورا گؤستررلر. ائديتور دا اونلاري چوخ ديفتليجه اوخويوب سهولريني دوزلدر. سيزلر ده يازماقدان هئچ چکينمه‌يين. يازديقدان سونرا آتا، آنا، بؤيوک قارداشيز و باجيز او يازينين ائديتورلوغونو ائله‌ير. يادا ساخلايين اؤزوز بؤيودوکدن سونرا گله‌جکده اونلاري دوزلديب کيتاب حاينا گتيررسيز.هه، نه وار؟ گئنه کي گولورسوز. نه اولوب؟هه آنلاديم. آي کول باشيما تؤکولسون منيم. گئنه ناغيليميزي اونوتدوم. هله منه باخين کي سيزلره نئجه ده سؤز وئرميشديم.جيرتدان چوخ زيرنگ اوشاغيدي. مدرسه ده معلليميني ديققتلي دينلردي.جيرتدانين فقط بير عئيبي واريدي. هفته‌نين ايلک گونو مدرسه‌يه يورقون آرقين و يوخولو گئدردي. نئيه؟ ايندي سيزه ندنيني سؤيله‌رم.چونکي هفته سونو تعطيليني صاباحدان آخشاما قدر باشي اوينامايا قاريشاردي و تعطيل گونونون سون ساعاتلاري، گون باتاندان سونرا ائو تاپشيريقلاري يادينا دوشردي. هئي يازاردي پوزاردي، تا کي گئجه ياريسي معلليمين اونا وئرديگي تاپشيريقلاري يئرينه يئتيرردي. بونا گؤره ده گئجه‌ني گئج ياتاردي و صاباحيسي گون، يوخولو يوخولو مدرسه‌يه گئدردي.گونلرين بيرينده، گئنه هفته‌نين ايلک گونو يوخولو حالدا مدرسه‌يه گئتدي. صينيفده او قدر يوخوسو گليردي کي آرتيق معلليمين نه دئديگيني ائشيتميردي. معلليم کيتابدان بير شئيلر اوخويوردو، هامي دا اونون دئديکلريني دفترلره يازيرديلار.جيرتدانين اوتوراجاق يئري پنجره قيراغيندايدي. پنجره آچيغيدي. جيرتدانين گؤزلري بيردن ائشيکده پنجره قاباغيندا اوجا بويلو، ايکي بوينوزلو بير دئوه ساتاشدي. هامي باشي آشاغي يازماقلا مشغولدو. بونا گؤره ده کيمسه دئوي گؤرموردو. جيرتدان قيشقيرماق ايسته‌دي، آمما قورخودان ديلي توتولموشدو. سس چيخارا بيلميردي. ائله او آندا، دئو گوجلو و اوزون قوللاريني پنجره دن ايچري اوزاتدي و جيرتداني اوتوردوغو يئردن قاپيب ائشيگه گؤتوردو. سونرا دا اونو بئلينده کي توربايا آتدي و مدرسه دن قئيب اولدو.جيرتدان يول بويونجا توربادا قورخو ايچينده آغلاييردي. دئو اونو تورباسيندان چيخاراندا اؤزونو بؤيوک بير اوطاقدا گؤردو. او هله ده آغلاييردي.دئو اونا دئدي کي:– اگر منيم دئديگيمي ائله سن، سنينله هئچ ايشم اولماز، يوخسا آخشام يئمه‌ييم اولارسان.جيرتدان آغلايا آغلايا سوروشدو:– منيم جانيمدان نه ايستيرسن؟دئو دئدي کي:– من توپ اوينامايي چوخ سئويرم. آمما معلليميميزين وئرديگي ائو تاپشيريقلاري اوزوندن اوينامايا چوخ واخت قالمير. آتام دا دئيير کي درسلرينه دوزگون چاليشماسان سنه يئمک يوخدور. سني بورا گتيرديم، يا منيم درسلريمي يازارسان، يا دا وئررم آنام سني قازاندا پيشيرر، آخشام يئمه‌ييم ائله‌رم.جيرتدان دئدي:– دئو قارداش! نه اولار، مني يئمه. باخ! نه قدر درسين وارسا هاميسيني من يازارام.سونرا دا دئوين دفتر قلميني الينه آلدي و يازمايا باشلادي. دئو ده توپونو گتيردي اوطاقدا آتيب توتدو. بيردن توپ هاوادا فيرلاندي و جيرتدانا دوغرو گئتدي. جيرتدان توپو گؤردو و آنيدن يئريندن سئچراييب باشييلا توپا ووردو. دئو بو دورومو گؤرونجه تعججوبلندي و سئوينه‌رک دئدي:– اوها! سن توپ اوينامايي باجارا بيليرسن مي؟جيرتدان دئدي:– بس نمنه! من هفته سونلاري صاباحدان آخشاما ائله توپ اوينارام.دئو دئدي:– دئييرم کي. آخشام چاغينا هله چوخ قالير. گئدک ائشيگه، بيرليکده بيرآز اويناياق. سونرا سن گئري دؤنوب منيم درسلريمي يازارسان.جيرتدان قبول ائله‌دي و ايکيسي ده ائودن ائشيگه چيخديلار. ائوين قاباغيندا بيربيرلريني قووالاديلار. توپا شوت چکديلر. ايلنديلر، گئنه ايلنديلر و زامانين نئجه کئچديگيندن هئچ ده خبرلري اولمادي. فقط هاوانين قارانليغيندان و بيرده يورقون توشدوکلريندن نه قدر گئج اولدوغونو آنلاديلار.دئو باخدي جيرتدانا، جيرتدان دا دئوه. ايکيسينين ده سسي چيخميردي. ايکيسي ده، نه لر اولاجاغيني ياخشي بيليردي. بيردن جيرتدان اوجا سسله آغلامايا باشلادي. دئو ده اوزونو ائوه ساري توتوب قيشقيردي:– آنا، آي آنا! تئز اول قازانا سو دولدور، قوي اوجاغين اوستونه.سونرا دا جيرتدانين بوينوندان توتوب ائوه آپاردي. جيرتدان آغلاياراق يوکسک سسله دئوه تئز تئز دئييردي:– نه اولار مني يئمه، نه اولار مني يئمه.او آندا جيرتدان چيينينين ترپتنديگيني حيسس ائله دي و سونرا دا بير سس ائشيتدي:– جيرتدان، جيرتدان! دور منيم بالام.جيرتدان باشيني يوخاري قالديردي. صينيفدايدي و معلليمي ده اونون باشي اوستونده دورموشدو. صينيف يولداشلاري هاميسي اوجا سسله “نه اولار مني يئمه” دئييب گولوردولر. معلليمي ده گولوردو.جيرتدان هامييا باخدي. او دا گولمه‌يه باشلادي. آرتيق يوخوسو قاچميشدي.آمما او گوندن سونرا اؤزونه سؤز وئردي، بير داها ائو تاپشيريقلاريني گئج ساعاتلارا ساخلاماسين.
بولگه لر سرويسي:بيري واريدي، بيري يوخودو. تانريدان سونرا هئچ کيم يوخودو.