کئفلي ايبيش

ائله بيل، کئفلي ايبيش گلير. – هه، اؤزودور. چوسوسلارا گيرندن محله‌ني آلير باشينا سسي بير آغاجدان گلير.– قوي گلسين، بيرآز ايپ باغلييب گئديب ياتاريق.– نه ايپ باغلاماسي، اونو الله ويريب دا، سن نييه ساتاشيرسان.– جوما آخشامي گئجه ياريسينا قده‌ر آييق قالميشيق نييه؟– آييق قالميسان ايبيشه بند اولاسان؟– هن بابا ايپيميزي ائشيبدير. هر گئجه کنسرتي واردي. بيزيم ائوده کي يول اوستونده‌دير بو ماهنيني هر گئجه ائشيديريق.– ياخشي دا، موفته کنسرته قوناقسيز.– بابا نه کنسرتي! ائله بو بندي باشارير.

بولگه لر سرويسي:– ائله بيل، کئفلي ايبيش گلير.
– هه، اؤزودور. چوسوسلارا گيرندن محله‌ني آلير باشينا سسي بير آغاجدان گلير.– قوي گلسين، بيرآز ايپ باغلييب گئديب ياتاريق.– نه ايپ باغلاماسي، اونو الله ويريب دا، سن نييه ساتاشيرسان.– جوما آخشامي گئجه ياريسينا قده‌ر آييق قالميشيق نييه؟– آييق قالميسان ايبيشه بند اولاسان؟– هن بابا ايپيميزي ائشيبدير. هر گئجه کنسرتي واردي. بيزيم ائوده کي يول اوستونده‌دير بو ماهنيني هر گئجه ائشيديريق.– ياخشي دا، موفته کنسرته قوناقسيز.– بابا نه کنسرتي! ائله بو بندي باشارير. ائله بيليرم کي پاساژدان چيخاندان ائوينه تپيلينجاق بو تيکه‌ني اوخويور. ايکينجي بنديندن خبر يوخدور.– ائله اودا غنيمتدير.– هله هاراسين گؤرموسن. ايندي عسگر باققال چيخاجاق معرکه قورسون.– او نييه؟– دايان گؤررسن.ايبيش آشا – آشا گلير. کوچه‌نين ائنينده گئدير، بويوندا. خرزي باغينا يئتيشر، عسگر باققال تومان اينينده بودور چيخير ائششيه.– گئده بس سنين شرفين يوخدور؟ سنين ننه‌ن باجين يوخدور؟
 گئده بس سن نه واخت آدام اولاجاقسان؟ من سنه نئچه يول دئييم بوردا اوخوما، بونو اوخوما؟– آخي عسگر عمواوغلوووو … بس هاردا اوخويوم، بس نمنه اوخويوم؟– هر نه اوخويورسان اوخو دا. بونو اوخوما.عسگر عمواوغلوووو … آخي من باشقا بيرزاد باشارميام کي.– او … دا آتشپاره بونو اوخوماسيدي گؤره‌ن گؤي يئره گلردي، سن ده هر گئجه ياريسي گليب منيم قاپيمدا اوخوياسان؟– عسگر عمواوغلووو … انصاف ائله‌ميرسن. باشينا دولانيم اونون. سس دئييل کي بهشت نغمه‌سي‌دير.– اولار بو بهشت نغمه‌سين ائويزده اوخوياسان.– عسگر عمواوغلووو … آخي سنه نه ضرري وار؟– آي ياريماز، منيم ائوده قيزيم وار اونا سؤز ائليرلر. ملان دئمه آيري آد دئه‌دا. آيري ماهني اوخو دا. اصلاً نه لازيمدي اوخوما دا. او زهري ماري ايچيبسن، آدام بالاسي کيمين گئت ائوينده باشيوي قوي يات دا.بو حالدا سوچو بابانين اوغلو رحمان تومان پاچا يوخولو- يوخولو ائشييه چيخير.– آي بالا گينه نه خبردير؟ گئجه ياريسي بو نه فيليم‌دير؟ ايبيش الله سنه لعنت ائله‌سين! هر گئجه بو نمايشيوي گره‌ک وئره سن؟ بابا بيز ده آداميق، سحر ايشه گئده‌جاغيق. آي عسگر عمواوغلو سنين ده ايشين قورتاريب هر گئجه بونونلا باش باشا قوشورسان. بابا قوي چيخسين گئتسين دا؟– آي رحمان آخي بو بئناميسا ديين يوخدور گئجه ياريسي بو نه اوخوماغيدي؟– بابا اوخوماق اوخوماق دي دا، نه فرق ائلير، بونو اوخوماسين اونو اوخوسون.– يوخ چوخ فرق ائلير، آيري بيرزاد اوخوسون. يادا اوخوماسين. منيم ائوده قيزيم وار. نييه اونون آدين گتيرير؟ صاباح ائل ايچينده منه مشکل اولاجاق.– آي قردش، سن ده غريبه آدامسان ها. سنين قيزوين سککيز ياشي وار. نه خبردير؟ گؤرنده ديير بس کي ارريق قيزدير. گئد ايچري پيسدير. اؤزووه سؤز دوزلتمه. کئچ ايچري اوتان، ياخشي!– يوخ، منه ديينجاق بونا ديين بيرآز اوتانسين.– ياخشي، پيسدير يئکه آدامسان. کئچ ايچري. دييه‌ريق آيري بيرزاد اوخويار. آي ايبيش قارداش سنين ده قاشينمان وار؟ آيريسين اوخودا!– رحمان قردش، جانيو ايچون آيري بيرزاد باشارميرام کي.
بو حالدا رحمان بيزه باخيب ديير:– سيز گئجه ياريسي بوردا نئيليرسيز؟ ائويز يوخدور؟ گئدين باشيزي قويون ياتين دا؟ سحر ايشه گئتمييه‌جاقسيز؟– آغا رحمان، صاباح جومادير. کرخانالار باغليديلار. نه ايشي؟ بي هفته ايلمه دؤشه‌مه‌دن جيريغيميز چيخيب. بيرآز الله قويسا استراحته چيخميشيق.– استراحته چيخيب سيز گئدين ياتين دا، گورورسيز کي فيليم ده قورتاردي.بو حالدا ايبيش يولون توتوب گئدير، گئده- گئده اوخويور:شافتالي‌لار جالاندي،ملان منيم بالامدي.هاممي قويوب گئدندي،ملان منه قالاندي. – گؤرورسن گئده نين هئچ شرف يوخدور. ايندي بير قران سؤز دئدوخ ها.– ياخشي گئت يات سحر توکان آچاجاقسان. يوبانارسان يورقان باسار، قهبه رضا ساتار، سن قالارسان. سيزده بالامسيز گئدين ياتين.رحمان گئدير ائوينه، عسگر باققال دا دئيينه- دئيينه قاپيني چيرپيب ايچري گئدير. هله ده ايچريدن سسي گلير.رسول دئدي:– گل گئداخ گوراخ هارا گئدير، قاييداريق.– بسدي دا.– بابا بو سوچو بابانين اوغلو قويمادي کي گوراخ نئيلييروخ. گل گئداخ قاييداريق.ايبيش اوخويا- اوخويا گئتدي حاج حميد باغينا ساري. بيرآن گؤزو ساتاشدي گؤردي جمشيد قفه‌سي آچيقدير. گيردي ايچري. بيزده اون آردينجا.– سالام – سالام، سالام – عليک‌السلام جمشيد قفه‌چي اوول اوز توتوب ايبيشه دئدي:– هه ايبيش، بالا تکميل دئييلسن؟ گئت ائويوه دا، او يازيق آروات بو واختاجان سني گؤزلير آخي؟ اونون دا سنده باشقا بير کيمسه‌سي يوخ کي باشين اونونلا قاتسين.– يوخ جمشيد عمواوغلووو …، هله تکميل دئييلم. ايکي چاي وئرسن … داي تکميل اولارام.جمشيد قفه چي اؤز توتوب بيزه دئدي:– خئير اولا بالا؟ سيز نه عجب؟ بو گئجه ياريسي هاردان گليرسيز؟– ايکي چاي دا بيزه وئرسن زحمتي کم ائله‌روخ.– هر گئجه بو واخت ائويزده چاي ايچرديز… بالا؟رسول دئدي:– يوخ بو گئجه يوخوموز قاچميشدي دئدوخ بيرفيرلاناق. گؤردوک قفه آچيقدير. دئدوخ بيزده ايبيشين قوللوغوندا بير چاي ايچاخ.ايبيش اوز توتوب جمشيد قفه‌چي‌يه دئدي:– جمشيد عمواوغلووو … اؤزونو ناراحت ائله‌مه! جاوانديلار، جاهيل ديلار.بو حالدا جمشيد قفه‌چي ايکي چاي گتيريب قويدو ايبيش‌ين قاباغينا. بيزه ده دئدي:– سيز ده صاباح گلرسيز تازا دم چاي وئره‌رم.بيزده بير- بيريميزه باخيب گولوشدوک. آتدان آتدان ايبيشه باخيب گولوردوک کي جمشيد قفه‌چي گؤروب دئدي:– هن اوغول، گولرسيز. گولرسيز. جاوانليقدي دا. آللاها دا بنده‌ليک ائله‌ميرسيز.من دئديم:– يوخ، جمشيد عمواوغلو، هئچ نه يوخدور، عسگر باققال بيرآز ايبيشه دالاشدي. دئدوخ ناراحات اولار ييخيلار ائلر. داليسينجا گئداخ گيرسين ائوينه قاييداريق. اودا گلدي بورا. دئدوخ ايندي کي بئله گليب، اوتوراق بير چاي ايچاق گؤراخ نه اولور. سنده کي بوش يولا سالدين.
جمشيد قفه‌چي بير باخيب بيزه گولومسندي. بوش ايستکانلاري ايبيشين قاباغيندان گؤتوره‌رک سوروشدو:– ايبيش، تکميل سن؟– هه، جمشيد عمواوغلووو …، داي تکميل اولدوم. گئددد …يم ائووه. داي ب…سدي. جمشيد عمواوغلووو … منيم بورجوم نئچه اولدو؟– هئچ نه، سن منه قوناقسان. صاباح گل بيرآز دا شوشه ييغميشام وئريم آپار پول ائله. بوردا قالسا سيناجاق. گئجن خئيرينن.– گئجن خئيرينن، داي گئديرم ائوه. جمشيد عمواوغلووو … گئددد … يم ائوه. بالام روحي داي ائوه‌جاق اوخوموياجاغام. قوي عسگر عمواوغلووو … راضي اولسون. آخي او بيلمير کي منيم ده ملانيم وار ايدي. قوي او راضي اولسون!جمشيد قفه‌چي گوزلرين سيخا- سيخا اؤز توتوب بيزه بوغونتو سسي ايله دئدي:– دورون بالامسيز سيزده گئدين ائويزه، منده باغلييرام. گؤرورسيز هره‌نين ده اؤزونه گوره بير دردي وار کي فقط اؤزو چکه بيلر. سيزين ده گئجه‌نيز خئيرينن.گئجه‌نيز خئيرينن دئييب ائشيگه چيخديق. رسولون بوغازي شيشميشدي  دانيشانميردي. باشينان خدافيظلشيب، قاچدي من گؤز ياشلاريني گؤرمييم.

منبع :