آذربايجان ناغيللاري بولگه لر سرويسي:پادشاه گولوب دئدي:- من قيزيمي بير حلال سود امميش ناموسلو آداما اره وئرمک ايسته¬ييرديم. اونا گؤره ده بئله بير قنير گؤتوردوم. کيم منيم قيزيمي گليب ايسته¬ييرديسه، من اونو ساليرديم قيزيمين يانينا. اؤزوم ده اليمده قيلينج قاپي‌نين دئشيگيندن باخيرديم. قيزا دا تاپشيرميشديم کي، اوغلانلا مازاق ائله‌ييب اونو دينگيلدتسين، نئجه کي، سن اؤزون ده بونو گؤردون. ائله کي، قيز بئله ائله¬ييردي، اوغلانين ال به ال حالي دگيشيب آيري فيکيرلره دوشوردو. ال به ال ناموس‌سوز آدام اولدوغونو بيليرديم. من ده اليمده¬کي قيلينجلا باشيني بدنيندن آييريب يئر اوزونو بئلنچيک ناکس‌لردن تميزله¬ييرديم. اما سن دوغرودان دا حلال سود امميش آدامسان. چونکي قيز نه قدر سنه سوخولدوسا، سن قاچدين.اوغلان دئدي:چونکي منيم آتام منه وصيت ائله‌ييب کي، «ائله کي، گؤردون بير مقصودا چاتا‌جاقسان، اونا چاتماق اوچون تلسمه».پادشاه توي ائله‌ييب قيزي وئردي اونا، پادشاه‌ليغي دا اونا تاپشيريب قوجا گونلرينده حرمخاناسينا چکيلدي. بو دا بوردا اؤز کئيفينده اولسون، بيز گؤرک کيچيک اوغلان نه اولدو. کيچيک اوغلان گئديب-گئديب بير شهره يئتيشدي. بير گون شهري گزه-گزه لاپ چيخدي قيراغا. قاباغينا بير گؤزل دام-داش چيخدي. ائوين پنجره‌سيندن بير قيز باخيردي، بير قيز باخيردي کي، گئتمه گؤزومدن، گئدرم اؤزومدن. اوغلان بير اوره¬کدن مين اوره‌گه قيزا ائله وورولدو کي، هئچ مجنون دا بو بويدا وورولماميشدي. آخشاماجان قالدي اوردا. گئجه چيراقلار ياناندان سونرا گلدي شهره، اما ائله فکري اورادايدي. گئجه دوشدوگو حجره‌ده¬کي يولداشينا درديني آچدي. او آدام احوالاتي بونا دانيشدي.دئمگينن بو قيز پادشاهين قيزي ايميش. پادشاه اونو کيمه وئرمک ايسته‌ييبسه قيز گئتمه‌ييب، اونا گؤره ده پادشاه اونو دده ماليندان محروم ائله‌ييب، ائويندن قوووب. او دا همن او دام-داشي تيکديريب اؤزون ده تيلسيمبند ائله‌ييب اوتوروب اوردا. ايندي او تيلسيمي آچماغا نه قدر پهلوان‌لار گليبسه، دوشوب قاليب‌لار اورادا.اوغلان دئدي:من او قيزي آلاجاغام.سحر گئتدي پادشاهين يانينا. پادشاه اونو لاپ ياخشي اوره¬گي ايسته‌ين کيمي قبول ائله‌ييب درديني سوروشدو، اوغلان اؤز فيکريني دئدي.پادشاه دئدي:من لاپ اوره¬کدن بونا شادام. آنجاق واللاه اونون اختياري منيم اليمده دئييل. او اولوب بير چپل سئحرکن. اوغلان دئدي:- من اونون تيلسيميني سينديرارام. آنجاق نئجه کي، سن اونون آتاسي، باشينين صاحبي، اول سنين يانينا گلميشم.اوغلان اوردان چيخيب سوراقلاشدي، اؤيرندي، بو شهرده لاپ قوجا بير آدام تاپيب اونون يانينا گئتدي. قوجا اونا دئدي:بالا، او تيلسيمي سينديرماق اوچون بيرجه يول وار. او دا بودو کي، قيزين ايکي قاراباشي وار. بونلار هفته‌ده بير گون گليب بازاردان لازم اولان شئي-شوي آليب آپاريرلار. او قاراباشلاردان بيريني گرک پول گوجونه آلداديب تيلسيمين سيرريني اؤيرنه‌سن.اوغلان گئديب کسدي بازار يولونون اوستونو. قيزلاري آخير کي، آلداديب، تيلسيمين سيرريني اؤيرندي. صاباحيسي گئديب پادشاها معلوم ائله‌دي کي، من بو گون تيلسيمي سينديراجاغام.بونو دئييب اوز قويدو شهرين قيراغينا، قيزين دام-داشينا طرف. شهرين اها‌ليسي احوالاتي ائشيديب ييغيشديلار بورا. اوغلان آلتدان گئيينيب اوستدن قيفيللاندي، ايکي شاققا ات گؤتوروب گيردي ائوه. باخدي کي، قاراباشلارين دئديگي کيمي پيلله¬کانين قاباغيندا بير آسلان، بير ده بير قاپلان باغلانيب. قيزلارين اؤيرتديگي کيمي اتين بير پارچاسيني آسلانا، او بيريني قاپلانا آتدي، آياق قويدو پيلله¬کانا. قاپيدان کئچنده گؤيدن آسيلميش سئحيرلي قيلينج آشاغي ائندي. تئز يانينداکي ديواردا دوران دويمه¬ني باسدي. قيلينج سيندي، دوشدو يئره. گيردي ائوه. باخدي کي، هر طرف اود آليب يانير. اودون ايچيندن ده بير اژدها بونا حمله ائله¬يير. قيزلارين اؤيرتديگي کيمي اؤزون آتدي اژدهانين اوستونه. ياپيشيب بوغازيندان بونو بوغدو. هر طرفي توستو بورودو. تيلسيم سيندي. جماعت چؤلده دوروب اوغلانا حيفسيلنيرديلر. بير ده گؤردولر کي، اوغلان بودو قيز قوجاغيندا چيخدي بالکونا. جماعتدن بير گورولتو قوپدو کي، تا نه تهر. قيز دوشدو، گلدي آتاسينين برابرينه. اونون اليندن اؤپوب دئدي: - آتا، سن مني هر يولدان کئچنه وئرمک ايسته¬ييردين، من ده بونا راضي دگيلديم. ايندي بو اوغلان، دئيه‌سن، ائله من آختارديغيمدي. سن رخصت وئرسن، من بو اوغلانا اوچ سوال وئررم، جاوابلاريني قايتارا بيلسه، گئدرم بونا.پادشاه راضي اولدو. قيز اوغلانا دئدي:- ايندي گئت، منيم سورغولاريمي گؤزله!صاباحيسي-گون قيز اوغلانا بير زومرود گؤندردي. اوغلان گئتدي بازارا، بير دنه زبرجد آليب قويدو بونون يانينا، قايتاردي دالا. او بيري گون قيز اوغلانا بير دنه آلماز گؤندردي. اوغلان آلمازي بير داش آلتدان، بير داش اوستدن قويوب ازدي، بير دسمالا باغلاييب قايتاردي دالا. اوچونجو گون قيز اوغلانا بير بريليان گؤندردي. اوغلان گئديب بازارا، اوندان دا قيمتلي بريليان آلدي، ايکي دنه ده ياقوت، هاميسيني بير يئرده گؤندردي قيزا.قيز آتاسينا خبر گؤندردي کي، اوغلان سوال‌لارا جاواب وئريب. کبين کسيلدي، توي اولدو. ائله کي، توي قورتاردي، پادشاه اوغلاني دا، قيزي دا يانينا چاغيريب سوروشدو:- ياخشي، ايش قورتاردي، ايندي سن منه دئ گؤروم، بو تيلسيمي نئجه سينديردين؟اوغلان دئدي:- منه آتام تاپشيرميشدي کي، چتين‌ليگه دوشنده قوجا آداملارين مصلحتينه قولاق آس! اودو کي، من ده بير قوجا تاپيب اونون مصلحتينن تيلسيمي سينديرديم.پادشاه اوزونو قيزينا توتوب دئدي:- بس سن نه سوال وئردين، او سنه نه جاواب وئردي؟قيز دئدي: من بيرينجي دفعه اونا بير دنه زومرود گؤندرديم کي، من آتام-آنام اوچون زومرود کيمي باها‌لييام، سن مني آلا بيلمزسن. اوغلان دئدي:- من سنين فيکريني آنلاديم. اودو کي، بير دنه زبرجد آليب گؤندرديم کي، چوخ دا قولتوقلارين شيشمه‌سين. ائله من ده آتا-آنام اوچون زبرجد کيمي قيمتلي¬يم.قيز دئدي:- من ايکينجي دفعه بير آلماز گؤندريب دئديم کي، من آلماز کيمي برکم، سن منيم آرزولاريمي يئرينه يئتيره بيلمزسن.اوغلان دئدي:- من باشا دوشدوم، اونا گؤره ده آلمازي ازيب سنه گؤندرديم کي، اگر سنين آرزولارين هاداغا‌دان چيخسا، او آرزولاري من بئله‌جه ازرم.قيز دئدي: - سونرا من بير دنه بريليان گؤندرديم کي، من بريليان کيمي گؤزه‌لم.اوغلان دئدي:- من باشا دوشدوم. اودو کي، اوندان دا قيمتلي بير بريليان آليب سنه گؤندرديم کي، ائله من ده گؤزه‌لم. آنجاق يانينا دا ايکي ياقوت قويدوم کي، ايندي گؤر بيزيم کيمي ايکي گؤزه¬لدن ايکي دنه ده ياقوت کيمي اوغلان دونيايا گلسه، نه قيامت اولار...پادشاه بونلارين عقل-دراکه‌سيني گؤروب ياواشجا دوردو آياغا، تاجي گؤتوروب قويدو اوغلانين باشينا.قارداشلار بير نئچه ايلدن سونرا بيرلشيب گئتديلر آتا‌لارينين يانينا. آتا‌لاري بؤيوک دسگاهلا اونلارين قاباغينا گئديب گتيردي ائوه. احوالاتي بيلندن سونرا اونلارين آلنيندان اؤپوب دئدي:- من اوندا قصداً ائله ائله¬ديم کي، سيز چيخيب، گئديب اؤزونوزه چؤرک آختاراسينيز. چونکي اؤز الي ايله قازانماييب آتا مالينا گؤز تيکن‌لر آخيردا بدبخت اولارلار.
پادشاه گولوب دئدي:- من قيزيمي بير حلال سود امميش ناموسلو آداما اره وئرمک ايسته¬ييرديم.