پاپاخ

بولگه لر سرويسي: دوستوم ال تلفونون يانديريب، کيمه‌سه زنگ ائدير:

ائليار پولاد

بولگه لر سرويسي: دوستوم ال تلفونون يانديريب، کيمه‌سه زنگ ائدير:
– سالام هازار عمي، نئجه‌سن؟
– …– هازار عمي منم. باغا گليرم، قوناغيم دا وار. آرتيق زحمت وئرمک ايسته‌ميرم. چاينيکي قوي اوجاغا، داريخميشام. گليرم صحبتله‌شک.
– …– اوزولدوم هازار عمي، اينجيمه، اؤزوندن موغايات اول.– ….
– جانين ساغ اولسون. تکي ساغليق اولسون. اؤزونه ياخشي باخ!
– …– يوخ! ناراحات اولما! هر شئي ياخشي اولار. سالامات قال! خداحافيظ.دوستوم دريندن کؤکس اؤتوروب تلفونو سؤندوردو. من قايغيلانميشديم. نه باش وئردييني آنلاميرديم. سوروشماق، ماجراني بيلمک ايسته‌سه‌م ده، اوتانديغيمدان، سوروشموردوم. دوشونوردوم، لازيم گلرسه دوستوم ايضاحات وئرر.ايشيق دوشن ساحه‌ده يول و يولون کناريندا سيره‌يله بير-بيري‌نين ايچينه کئچن آغاجلار گؤرونوردو، سانکي قوجاقلاشميشديلار. منده غريبه تأثراتلار اويانيردي. دوستوم سوسوردو، منده لال-دينمز دويغولو اولاراق يولا داوام ائديرديم. دوستوم بيردن سوکوتو پوزدو:
– ياواش، ايره‌لي‌ده سولا دؤن! هازار باغينا يئتيشيريک.ماشيني ياواشيتديم. سيخ آغاجلارين آراسيندا بوش يئر گؤروندو. آچيق يئردن سولا دؤنوب، گئنيش بير ساحه‌يه گيرديک. آچيق ساحه‌نين قورتاراجاغيندا يوغون گؤوده‌لي، قوللو-بوداقلي آغاج گؤردوم، ماشيني آغاجين ياخينليغيندا ساخلاييب، ماشيندان دوشدوک. دوستوم آغاجا ياخينلاشيب، اليني آغاجين گؤوده‌سينده گزديردي. سانکي اونون جانلي اولوب-اولماماسيني يوخلاييردي. آغاجدان آرالاندي. منده آغاجا سؤيکنيب، سيگارت يانديرديم. اؤزومو سيرّلي عالمده حيسّ ائديرديم.
دوستوم هاوالي آداملار کيمي آچيق ساحه‌ده آشاغي-يوخاري، ساغا-سولا، حرکت ائديردي. ال-قولونو دارتاراق، اوجادان حييفسيله‌نيردي:
– بوتون آغاجلاري قوردوب، يوخ ائديبلر. ائله‌بيل بورا هئچ واخت باغ اولماييب. بوراني نه حالا ساليبلار؟ هاني بوراداکي آغاجلار؟ اريک، آلما، آرمود، نار، گيلاس و گيله‌نار… نئجه اولدو، هارا يوخ اولدولار؟ نه گلدي بو باغا؟ باخ بورادا اريک آغاجلاري واردي، بير آز او ياندا، آلما، بورادا اوچ نهنگ آرمود آغاجي، داديندان دويماق اولموردو. بورادا نار آغاجلاري، قان قيرميزي نار…
بيردن ماشينا اوتوروب »گئتديک!« -دئدي. باغدان چيخاندا (اصلينده باغ يوخ ايدي)، دوستوم کؤکس اؤتوروب، دانيشيردي:
– هازار ياشايا بيلمه‌يه‌جک! آرتيق او اؤلودور، ورثه‌لر اونو اؤلدوردولر…
من هله ده دوستومون دانيشيقلاريندان هئچنه آنلاميرام. او ايسه، واييخسانير، باشيني بولاييب، کؤکس اؤتورور. هيجان ايچينده‌يم. بيرآز يول گئدندن سونرا دوستوم اطرافلي ايضاحات وئرير:
– باغي اوغلانلاري آرالاريندا بؤلوشوب، آغاجلاري دا گؤردويوموز کيمي آرادان آپاريبلار. کيشي‌ني ده آپاريب، شهرده کيبريت قوتوسوندا يئرله‌شديريبلر. او ياشايا بيلمه‌يه‌جک!..
ايندي هر شئيي باشا دوشورم. دوستومون سؤزونو کسيب، سوروشورام:
– هازار عمي‌نين نئچه ياشي وار؟
– هشتاد دؤرد-هشتاد بئش، روحييه‌لي و گئنيش اوره‌کلي اينساندير، يوزدن آرتيق ياشايا بيلر، آنجاق باغدا، طبيعت قوينوندا. شهر اونو سيخاجاق…
يول بيزي آپارير. ساغ و سولوموز «آرديج» آغاجلاري ايلا احاطه‌يه آلينيب. من حييفسيله‌نيرم کي قارانليق هر طرفي بورويوب، آنجاق ماشينين محدود ايشغي دوشن ساحه‌ني گؤره بيليرم. گوندوز اولسايدي، طبيعتين بو عوضسيز منظره‌سيندن بوللوجا ذؤوق آلارديم. آزدا اولسا بو محتشم گؤرونتولردن دويغولانيرام. يولون کناريندا بعضي ساحه‌لر دووارا سالينيب، دروازا قاپيلاري قويولوب. بو دا طبيعتين اويغونلوغونا خلل گتيرير. اينسان اوغلو چاليشديقجا طبيعته زيان وئرير و عادي اويغونلوقدان چيخارير…
بير دؤنومو دؤندوکده، يئني سالينميش مچيد گؤروندو. مچيدين قاباغي گئنيش ميدانا آچيليردي. دوستوم »ساخلا!« دئدي. ماشيني مچيدين قاباغيندا ساخلاديم. ماشيندان دوشدوک. دوستوم بورانين »پير« اولدوغونو دئدي. من سهويمي باشا دوشدوم. »بورادا اينسان ياشاميرسا، مچيد کيمه لازيم ايدي«. پيرين اطرافي، آزدا اولسا مئشه‌ليک ايدي. پيرين حؤرمتينه گؤره اينسانلار بورادا دَييشليک آپارماميشديلار.گؤزوم قارانليغا آليشاندا، ساغ طرفي دره گؤردوم. سيخ آغاجلارين قول-بوداغي بير-بيرينه کئچميشدي. قيش مؤوسومو اولدوغوندان و آغاجلارين چيلپاقليغينا باخماياراق، اوست قات چپرله‌نميشدي. آشاغي‌دا يئره ياخين سطح‌ده آغاجلارين گؤوده‌سي آرالي اولدوغوندان سئچيليردي. بعضي نهنگ آغاجلارين گؤوده‌سيني يانديرميشديلار. يانغين آغاجلارين گؤوده‌سينده اوووق ياراداراق، قارا کؤهولو خاطيرلاديردي. آغاجلارين گؤوده‌سيندن باخاندا، آشاغي دا دره‌نين اورتاسيندا چاي سئزيليردي.
دوستوم دره‌نين قاشينا گئتدي. اليني آغيزي‌نين اطرافيندا هؤره‌رک، قيشقيردي:
– پاپاخ! پاپاخ!.. بو دفعه بيرآزدا اوجادان قيشقيردي. – پاپاخ!.. پاپاخ!.. منم!.. گل…
من هويوخدوم… کولک آغاجلارين بوداقلاري آراسيندا دليجه‌سينه اسيردي. کوله‌يين دهشت دوغوران وييلتيسي، دوستومون قيشقيرتيسينا قاريشاراق مني واهيمه‌يه سالدي. اؤزومو ايتيردييمدن، ماشينا اوتوردوم. دوستوم هله ده قيشقيريردي:
– پاپاخ! پاپاخ!.. گل!.. من بوردايام…
اؤزومو ايتيردييمدن، نه ائتمه‌لي اولدوغومو بيلميرديم. ماشيندا اوتوروب، گؤزله‌ييرديم. فيکريم ايشله‌ميردي، واختي اؤلدوروب و هيجانيمي بوغماق اوچون، سيگارت يانديريب، ماشينين شوشه‌سيني آشاغي ائنديرديم. باييردا ايتلرين هوروشمه‌لري کوله‌يين وييلتيسينا قاريشميشدي. آرادا دوستومون «پاپاخ! پاپاخ!..» چاغيريشي، منيم هيجانيمي آرتيراراق، جانيما بيلمه‌دييم، قورخونو ساليردي.
نهايت دوستوم گليب ماشيندا اوتوروب، سووشدو:
– قورخدون؟..
من کئي-کئي جاواب وئرديم:– قورخماق دئينده کي، او قده‌ر يوخ. آنجاق هيجانلانديم. پاپاخ کيمدير؟
– قورد دور. بوز قورد!..
– نه!.. اَشي، ايندي قورد اولار بورادا، قوردون مسکني ساوالاندير.– وار… –دئييب ماشيندان دوشدو. يئني‌دن دره‌نين قاشينا گئديب و اوجادان قيشقيردي:
– پاپاخ!.. پاپاخ!.. گل… منم… بوردايام…
هله ده اؤزومه گله بيلميرم. بو اويونون نه ايله قورتاراجاغي‌نين ماراغيندايام. قوردون بورالاردا ياشاماسي منه باياغي گلير. »بورالاردا قورد اولا بيلمز.« بئينيمدن کئچير. دره‌ده اوجاق قالانميش ايميش، اوزاخدان کول آلتيندا کؤز قارانليغين اورتاسيندا ايشارير. »اود اولان يئرده قورد اولا بيلمز«. نه ايسه شوبهه‌لي دوشونجه‌لر بئينيمي يورور…
دوستوم ماشيندا اوتورور، ماشيني ايشه ساليرام. اونون گؤستريشي ايله يولا داوام ائديرم. دوستوم سيگارت يانديريب، سؤزه باشلايير:«يئددي-سککيز ايل اؤنجه ايدي. قيش فصلي ايدي. قار ياغيب هر طرفي بم-بياض اؤرتوکله بوروموشدو. داريخمالار مني طبيعتين قوينونا سوروکله‌ميشدي. قيش مؤوسومو و قاردان خوشوم گلير، طبيعتين سوکوتونا دالماغدان آرتيق حضّ آليرام. ماشيني پيرين قاباغيندا ساخلاييب، دوشموشدوم. قارين آياغيمين آلتيندا خيرپيلداماسي‌نين و طبيعتين گلين کيمي آغ-آپپاق بورونمه‌سيندن خوشلانيرديم. هنده‌وريمه بؤيوک ماراقلا باخير و اطراف منظره‌دن، گؤز اوخشايان طبيعت سرگيسي‌نين منه باغيشلاديغي خوش دويغولاردان فرحلنيرديم…
هنيرتي حيسّ ائتديم. اطرافي دينشه‌ديم. هئچنه گؤرمه‌ديم. دره آشاغي گئديب، چايين قيراغينا چاتديقدا، گؤزومه يئکه‌پر بوز ايت گؤروندو. سال داشين اوستونده شونگويوب، منه باخيردي. تعجوبله يئريمده دوروخدوم. نئجه اولان ايش‌دير، ايت اولاسان، هورمه‌يه‌سن؟ اوشه‌ندييمدن قورويوب، يئريمده دايانميشديم. ايت ده يئريندن ترپنميردي. بيرآز بير-بيريميزه باخديقدا و زامان اؤتدويوندن کئييم آچيلدي. نه ايسه دوشوندوم کي، قوجا ايت دير، بورادا دايانيب، باشقا ايتلري گؤزله‌يير. هوسسيز ماشينا قاييتديم. ماشينا چاتديقدا قانريليب، گئري بويلانديقدا، ايتين منيم آرخامجا دوشوب گلدييني گؤردوم. مني گؤرجک اودا داياندي. دويغولانديم، يازيغيم گلدي قوجا ايته. ياديما دوشدو بورا گلمه‌ميشدن کنددن ائوه ات آلميشام. ماشينين آرخاسينا کئچيب دال صانديقدان بير تيکه ات گؤتوروب، دره‌نين قاشيندا داشين اوستونه قويدوم. گل آي آللاهين حئيواني دئييب، کنارا چکيليب گؤزله‌ديم. بيرآزدان ائهمال اته ساري يئريدي. داشين اوستونده اولان اتي يئمه‌يه باشلادي. بؤيوردن، اونون باخيش بوجاغيندان کنار ايته ياخينلاشيب، اليمي بئلينده گزديرديم. ياواش-ياواش سيغاليمي باشينا طرف آپارديم. بو زامان ايت منه طرف دوندو، گؤزلريم گؤزلرينه ساتاشاندا، دهشت ايچينده سهويمي آنلاديم. ايت دئييلدي، قورد ايدي، قوجا قورد… لال-دينمز بير-بيريميزي سئير ائديرديک. بو حال نقده‌ر چکدي، بيلمه‌ديم. اؤزومه گلنده بوتون قورخو و هورکودن آزاد اولموشدوم. او گوندن بيزيم دوستلوغوموز باشلاندي. آديني «پاپاخ» قويدوم. بوش واختلاريمدا گليب اونو يوخلارام، پاپاخ دئييب، چاغيرارام، گلر و گؤروشريک. آمما بو گون نييه گلمه‌دي؟ بلکه بورالاردا اينسان هنيرتيسيني دويوب، بوراني ترک ائديب، خلوت يئرده مسکن ساليب…»
دوستومون گؤستريشي ايله يولا داوام ائديرم. گئتديکجه يولوموز يوککوش اولور. تپه‌ليکده، اؤنوموزده ماشينين ايشغي‌نين فونوندا بالاجا ميدانچا گؤرونور. اطرافي سيخ مئشه آغاجلاري بورويوب. دوستومون ايسته‌يي ايله ماشيني ساخلاييرام، دوشوروک. هاوا آرتيق سويويوبدور، کوله‌يينده شدتي آرتيب، آغاجلارين بوداقلاري آراسيندا قورخولو وييلتي ائشيديلير.
تپه‌دن يانا دره باشلايير. دره آشاغي سيخ مئشه‌ليک دير. دوستوم دره‌نين قاشيندا دوروب قيشقيرير:– پاپاخ!.. پاپاخ!.. گل… منم… بوردايام…
بير مدت کئچير، يئنه قيشقرير:
– پاپاخ!.. پاپاخ!..مني يئني‌دن هيجان بورويور. نامعلوم دويغولار، هم شيرين، هم ده آجي بير-بيريني عوض ائدير. ايچيمدن کئچيردييم هيجانلار مني الدن سالير… بيردن دوستومون سسينده دَييشکليک يارانير و بو منيم ده هيجانيمي بوخولايير، يومشاق و نوازشلي سسله دانيشير:
– گل… هه گل! نييه داياندين! گل… سنين گؤروشونه دوستومو دا گتيرميشم…
دوستوم يالوارير… من مات قالميشام. دوستومون سسينده اولان محرمليک و شفقت دويغوسو مني ماراقلانديرير، او ايسه چاغيريشيني داوام ائدير:
– گل… منيم سئويملي پاپاخيم! گل!.. قورخما گل…
منه ساري دؤنور:– باخ!.. گؤرورسن اورادادير. گؤزلري نئجه ايشيلدايير، سندن احتياط ائدير…
من باخيرام… سيخ مئشه‌نين اورتاسينا، بارماغيني توشلاديغي يئره… زيل قارانليق، کولک وييلتيسي و ايلييه ايشله‌ين سويوق…
 سون

منبع :