ايبو اورا تهراندي…

بولگه لر سرويسي:گونش باتي‌يا ساري گئدرکن، گؤزو آرخاسيندا قالاراق بيزدن آيريلماق ايسته‌مه‌ييردي. آخشامين لاپ شيرين چاغيندا، کندين قوزئينده اولان خرمن‌ليک‌ده فوتبال اويناييرديق. اويونون شيرين يئرينده آلاي-قولاي باش تاپديم اوزاقدان بيري آديمي سسله‌يه- سسله‌يه بيزه دوغرو گلير.

بولگه لر سرويسي:گونش باتي‌يا ساري گئدرکن، گؤزو آرخاسيندا قالاراق بيزدن آيريلماق ايسته‌مه‌ييردي. آخشامين لاپ شيرين چاغيندا، کندين قوزئينده اولان خرمن‌ليک‌ده فوتبال اويناييرديق. اويونون شيرين يئرينده آلاي-قولاي باش تاپديم اوزاقدان بيري آديمي سسله‌يه- سسله‌يه بيزه دوغرو گلير.
 ممد… ممد…. ممد….خرمنه ياخينلاشاندا، لاپ کيچيک قارداشيم، بايرام‌دير گؤردوم! تئز مئيدان‌دان ائشييه چيخيب، بايراما دئديم: نه‌دى بايرام؟ نه اولوب؟نفس- نفس وورا-وورا، ممد! ايبو…ـ آي اوغلان نفسيني آل، بير آز دينجل سونرا دئ دا. ممد، ايبو گليب! موشتولوغومو وئر! آي قاداني آليم بايرام، خوش خبر اولاسان!“يولداشلاريما ساري چؤنوب، آي اوشاقلار من گئديرم ائوه، قارداشيم تهراندان گليب”،- دئييب بايرام ايله بيرليکده ائوه ساري گئتديک. بايرامين 12 ياشي وار ايدي. او ائويميزين سون‌بئشييي ساييليردي. ائوده 5 اوشاق ايديق. من ائوين اوچونجو اوشاقي‌يديم. بايرام هاميدان چوخ من‌له آراسي ساز ايدي، منيم ده بايرام‌لا.
ايبو دا، ائوين ان بؤيوک اوشاغي ايدي. 1380 دان ايش اوچون اورميه‌دن تهرانا گئتميشدي. ايندي بئش ايل ايدي اوردا قاليردي. بو بئش ايلين ايچينده بير دفعه ده اونو ياخيندا گؤرمه‌ميشديک. فقط سسيني ائشيتميشديک.يولو گئده- گئده مينلرجه فيکير بئينيمه گلدي. رؤيالارا گيرميشديم. لاپ او اوشاقليغيمين شيرين چاغلارينا. 1375 ايدي. منيم يئددي ياشيم وار ايدي و ايبونون اون‌دؤرد ياشي. کندين اوشاقلاري هرگون باليق توتماق اوچون، قودوق‌بوغان چايينا گئدرديک. من سويا دوشمزديم. ائشيکدن ايبو گيله باخارديم. باليق توتاندا اورک‌دن هاراي چکيب، گؤيه آتيلارديم:– ياشاسين ايبو، ياشاسين ايبو!– ممد سن ده ياشا، بو باليق‌لاري سنه توتورام.سونرا آپاريب اود اوستونده بيشيريب يئيرديک. بئله- بئله خاطيره‌لرده ياشايا- ياشايا ائوه چاتديم.قاپي آچيق ايدي. قاپيدان ائيوان گؤرونوردو. ايبو آتا- آنام گيل ايله دانيشيردي. مني گؤروب گولومسه‌دي. من اؤزومو ساخلايانماييب اونا ساري قاچديم. گؤز ياشلاريم آخيردي. ايبونو قوجاقلاييب اللريمي کوره‌يينه دويونله‌ديم:
– نه جورسان ايبو؟– ايبو نمنه دي؟ ابراهيم! يئکه کيشي اولوبسان!– ايبو بو نه سؤزدو! ايبو ياني بو بئش ايلده پيس اولوب؟!– بله! دا دوباره بو واژه‌ني ايشله‌تمه ها!!– هله بولاري بوراخ آي قارداش! تهران‌دان تعريف‌له؟ نه ائليرسن؟ اورالاردا نه وار نه يوخ؟!– هئچ، مشغولام شکر خدا!آنام ايسه: ممد قارداشين يول يورغونودو داريخديرما ال- آياغين يوسون شامي گتيريم، ابراهيم ايکي گونه‌جن کندده‌دي دويونجا دانيشارسيز. هله سنه ده ايش تاپيب! – دئيه دانيشيغيميزا قوشولودو.آتام دا، همشه‌کي کيمي سس‌سيز- صداسيز چي‌چئست راديوسونو دينله‌ييردي. آخشاملار، آتام فقط راديويا قولاق آساردي. هئچ کيمنن ايشي اولمازدي.هؤوولسک آنامدان سوروشدوم: نه ايشي آنا جان؟محمد تهراندابير خارِجي شرکت‌نن همکاري ائليرم. بيلديم ليسانس آليبسان دانيشميشام سني ده اورا آپارام! – دئيه، ايبو آنامين عوضينه آچيقلادي.قاش‌قاباق ساللاييب چوخ جدي دئديم: يوخ من اورميه ده ايش تاپاجايام. بورادا دا چوخ ايش وار. يازيچي‌ليغادا تازا باشلاميشام.– خب نمنه يازيرسان؟ هارالارا چاتيبسان؟ نه‌يين وار؟– بيرزادلار يازيرام دا! کيتابيمي‌ دا حاضيرلاييرام اينشاا …. اوچ آيا قورتولار…بيلميرم نييه قاپيدان گيرمک همين بو سؤزلر باشلاندي. ائوده‌کيلر ده قيراقدا نئچه گؤز ده بورج آليب بيزي دينله‌ييرديلر.آنام بير داها دا سؤزوموزه قوشولدو: اوشاقلار سوفرا گلدي. دانيشيق‌لارينيزي ساخلايين شامدان سونرايا.شاما قيزارتما ايله ساريمساقلي‌ايدي.
 منيم ان چوخ سئوديييم يئمک‌لردن بيري. شامي يئييب ايبو ايله بالاخانايا گئتديک.ايبونون اوستو باشي دا ده‌ييشميشدي. خط باشيلاري قولاغيني کئچميشدي. توکلرينين بير آزي ساغا، بير آزي دا سولا، بير آزي آلينينا، بير آزي دا گؤيه ساري دارانميشدي. دارانميشدي نه دئييم، يالانميشدي!اؤز عالمينده فشن ائله‌ميشدي! هره‌ميز باشيميزين آلتينا بير ياستيق قويوب اوزانديق. او من‌له اهميت‌لي دانيشيق آپاراجاغي اوچون هئچ کيمي اوتاغا قويماييب، سيزلرله صاباح گؤروشوب- دانيشاريق سؤز ايله باشلارين اکدي!– خب محمد سن تعريف ائله؟! نه خبر؟– من ده هئچ خبر يوخدو، دئديييم کيمي داها چوخ يازماغا مشغولام. ايش ده آختاريرام ها. بير ايکي مجله‌دن سؤز وئريبلر يازي يازام اونلار، البته آللاه دئين اولسا. اينشاللاه علاقه‌مه گؤره ده بير دوز- عمللي ايش تاپارام.– بابا بي‌خيال! يازيرام کيلويي چنده؟!!– اوجور دئمه، منه چوخ مهمدي…– باباي من پول تهراندا، زندگي تهراندا، سني ده آپاراجايام، مامان گيلي ده راضي سالميشام. باور ائله‌ميسن فقط بير سئري گل…او گئجه او قدر دئدي دانيشدي، بئينيمين ديبين قازيب مندن بير ديل اوجو گلرم جاوابيني آلدي. صاباحيسي گون بيلميرم کيملرله ايشي وار ايدي آخشاماجان شهرده قالدي، گئجه‌ني ده يورغون- آرغين قاييديب، من شام يئميرم، شهرده بيرزادلار يئميشم دئييب ياتدي.او گونون صاباحيسي، گئجه ساعات اونا من‌له اؤزونه تهرانا گئتمک اوچون بيليت آلميشدي، بيلميرم نييه، آما قاييتماغا چوخ تله‌سيردي.
آردي وار

منبع :