آذربايجان ناغيللاري بولگه لر سرويسي:بيري وارايدي، بيري يوخ‌ايدي. تانري‌دان سوواي هئچ کيم يوخ‌ايدي. »آرمودان بي«آدلي بير کيمسه وارايدي. آرمودان بي چوخ يوخسول بير آدام ايدي؛ اونون وار دونيادا اولوب- اولاني بير آرمود آغاجي ايدي. آرمود آغاجي‌نين مئيوه‌سي يئتيشنده، آرمودان بي اونلاري دريب، آپاريب بازاردا ساتار و اونون گليري ايله کئچينردي. بيرگون باشا دوشور کي، آغاجين مئيوه‌لري آزالير. آرمودان بي اوغروسونو توتماق اوچون گوندوزلر گودوکچو اولور و آغاجيني گودور، آمما بير زاد دان باش تاپمير. بير گون بير بيليجي کيشي‌نين يانينا گئديب اوندان مصلحت آلماق ايسته‌يير. او بيليجي کيشي دئيير: سن گئت بير آز قير – ساقيز آل، آپار آغاجين گؤوده‌سينه ياپيشدير. اگر بير کيمسه گلسه قير – ساققيزا ياپيشيب قالاجاقدير. آرمودان بي ده ائله او بيليجي کيشي‌نين دئديگي کيمي ائدير و همن گونون گئجه‌سي ياري اولاندا حئيوان زنگيلتيسي ائشيدير و چيراغيني يانديريب، گئدير آغاجين يانينا، گؤرورکي بير تولکو آغاجا ياپيشيب و گئده بيلمير. آرمودان بي بالتاني گؤتوروب تولکونو وورماق ايسته‌ديکده تولکو آغلاماغا باشلايير و دئيير: مني اؤلدورمه، پادشاهين قيزيني سنه آلارام. آرمودان بي دئيير آي حئيوان نه دئييرسن؟ مگر من کيمم کي پادشاه قيزيني منه وئرسين، مگر قيزيني يولدان تاپيب؟!تولکو دئيير سنين بو سؤزلرله ايشين اولماسين، ايشي تاپشير منه. اگر باجارماديم اوندا مني اؤلدور.آرمودان بي تولکويه اينانير و اونون ال- اياغيني تميزله‌يير و تولکو دوروب پادشاهين سارايينا ساري گئدير و بيرنفري يوللايير کي، گئت؛ پادشاها دئه کي، آرمودان بي دئيير، چاناقينيزي وئرين قيزيللاريميزي اؤلچک. پادشاه بو سؤزدن تعجب‌لنير و دئيير کي بو آرمودان بي کيمديرکي بير بئله قيزيلي وار و اونو چاناقلا اؤلچمک ايسته‌يير.تولکو چاناغي آلير و اويان بوياني دولانيب بير تيکه قيزيل پاراسي تاپير و پادشاهي اينانديرماق اوچون چاناغين سينيق يئرينه ياپيشديرير و چاناغي سارايا آپارير و پادشاها وئريب قاييدير. پادشاه بير داها تعجبله‌نير آرمودان بي‌ين هارادان بئله قيزيل يئيه‌سي اولماغينا مات قالير و اؤز – اؤزونه دئيير: من بير پادشاهام بير بئله قيزيليم يوخدو، گؤر آرمودان بي‌ين نه قده‌ر پولو وارکي، چاناغين سينيغينا ياپشيب قالان قيزيلا اهميّت وئرمه‌ميش. بير نئچه گون کئچير و سارايا آدام گؤندريرکي پادشاه ساغ اولسون آرمودان بي ايجازه ايسته‌ييرکي سيزين قيزين ائلچيليگينه گلسين. پادشاه بو سؤزو ائشيديب چوخ سؤينير و ايجازه وئرير.تولکو آرمودان بي‌يين يانينا گئديب اونا دئيير: – تئز اول حاضيرلاش، گئده‌ک پادشاهين قيزينين ائلچيليگينه.آرمودان بي دئيير:– تولکو قارداش سن کي منيم وضعيمي گؤرورسن! من بير فاغير آدامام. پادشاه قيزيني منه وئرمز.تولکو عصبلشيب دئيير:– تئز اول، حاضيرلاش! نئچه دؤنه دئميشم کي، منيم ايشيم له ايشين اولماسين.تولکو آرمودان بي‌يي حاماما آپاريب، اونو يويوندوروب بزه‌تديرير. آرمودان بي دئيير:– تولکو قارداش منيم قوناقليغا گئتمه‌لي پالتاريم يوخدور.تولکو اونو گؤتوروب يولا دوشور و سارايين ياخينليغيندا آرمودان بي دن آيريلير و دئيير:– من گئديرم بير يئره تئز قاييدام، سن بورادا اوتور و من گلينجه بير يئره گئتمه.تولکو گئدير و اؤزو ايله بير دست پالتار گتيرير. آرمودان بي پالتارلاري گئييب دئيير:– نه گؤزل سن بونلاري هاردان گتيردين!؟تولکودئيير:– من گئتديم پادشاها دئديم کي، بيز سيزه گليرديک، سيزين ايتلر اوستوموزه گليب و آرمودان بي ين پالتاريني پارچالاديلار، بير دست پالتار وئرين آرمودان بي گئييب ائلچيليگه گلسين. پادشاه دا بونلاري منه وئردي.آرمودان بي پالتارلاري گئييب، سئوينجک حالدا يولا دوشدو و ائلچيليگه گئتدي و پادشاه قيزيني آرمودان بي يه وئردي و قيرخ گون، قيرخ گئجه توي توتدولار. واخت اولدوکي، گليني آرمودان بي‌يين ائوينه آپارسينلار. پادشاه قيزيني ائوينه يولا سالديقدا او قده‌ر جهيز قوشدو کي بير شهر توتماز ايدي و بير قوشوندا مامور قوشدو کي جهيزي و گليني آرمودان بي ين ائوينه چاتديرسين. آرمودان بي دئدي:– تولکو قارداش ائوين ييخيليسن، بيزيم ائويميز بير بالاجا دام دي چاره ائله.تولکو دئدي:– سنين ايشين اولماسين. من بير يئر تانيرام کي، پادشاهين ائويندن ده يئکه‌دي. اونلار گلمکده و تولکوده قاباقدان قاچيب دئولر شهرينه چاتدي و دئدي:– ائوينيز يخيلسين! قاچين، قوشون گلير!دئولر باخيب گؤردولر کي، بير ييغين قوشون گلير، دئولر سوروشدولار کي بو قوشون نه‌يه گلير؟ تولکو دئدي:– پادشاهين دوه‌لري آزار توتوب، بيلنلر دئييرلر کي، گره‌ک دوه‌لري دئولرين بدنينده اولان ياغ‌لار ايلن ياغلايالار تا دوه‌لر توختايا! اودور کي گليرلر دئولري اؤلدوروب، اونلارين ياغلاري‌لا دوه‌لري ساغالدالار..دئولرسوروشدولار کي، بيز ايندي نئيله‌يک؟ تولکو دئدي:– سيزلر گره‌ک تئزليکله بورادان قاچاسينيز، ال چاتماز يئرلره گئديب چيخاسينيز، يادا توپلاديغينيز اوت تايالاري‌نين آلتيندا گيزلنه‌سينيز تا من گؤروم نه چاره ائده بيلرم. دئولر قاچيب اوت تايالاري‌نين آلتيندا گيزلنديلر و تولکو تايالارا اوت ووردو و تايالار ياندي و دئولر بوتونلوکله اؤلدولر. و تولکو قاييديب قوشونون قاباغينا دئولر شهرينه گتيردي. اونلاري و جهيزي دئولر شهرينده يئر به يئر ائتدي. آرمودان بي گؤردو چوخ گؤزل يئردي گليني ايله اوردا ياشاماغا باشلادي. و تولکودن سوروشدو کي من سنه بير بئله ياخشيليغين قاباغيندا نه ياخشيليق ائده بيلرم؟. تولکو دئدي: – بيرجه خواهيشيم وار. من اؤلنده مني يئددي کفنه بوکوب تورپاغا قويلارسان.آرمودان بي دئدي:– بو کي بير چتين ايش دئييل، ائله‌رم.بيرگون تولکو اؤزونو ووردو اؤلومجولويه، آرمودان بي يه دئديلر کي، تولکو اؤلدو!. آرمودان بي بورنون توتوب تولکونون يانيندان اؤتدو و نوکرلرينه دئدي:– بونو تئز بوردان ردّ ائدين، قوخوسو دونياني بورويه‌جک. تولکو گؤزونو آچيب، گئتدي پادشاهين قيزينين يانينا و آرمودان بي يين يوخسول اولدوغونو و بير آرموددان اؤتورو تولکونو اؤلدورمه‌يه حاضير اولدوغونو اونا دئدي و پادشاهين قيزي آجيق ائله‌ييب آتاسي‌نين ائوينه دؤندو. آرمودان بي گئديب تولکويه يالوار – ياخار ائديب دئدي:– آنلاماميشام ،سهو ائتميشم، گل بو ايشي بيرده دوزه‌لت! شاهين قيزيني قايتار ائوه! نه جور دئسن ائله ائده‌رم.تولکو گئديب پادشاهين ائوينه و دئدي:– آي قيز من شوخلوغ ائله‌ديم. سني سيناييرديم، دور گئت ائوه، آرمودان بي سني گؤزله‌يير. پادشاهين قيزي ائوه قاييتدي. اوزون ايللر بويو ياشاديلار. بير گون تولکو اؤلدو. آرمودان بي اونو يئددي کفنه چولغالادي و تورپاغا قويلادي و ياشاييشينا داوام ائتدي.
بولگه لر سرويسي:بيري وارايدي، بيري يوخ‌ايدي. تانري‌دان سوواي هئچ کيم يوخ‌ايدي. »آرمودان بي«آدلي بير کيمسه وارايدي. آرمودان بي چوخ يوخسول بير آدام ايدي؛ اونون وار دونيادا اولوب- اولاني بير آرمود آغاجي ايدي.