گووروخ اوغلو علي اکبر نييه اؤلدو...

بولگه لر سرويسي: » فارس جاواد« دانشگاهدان اخراج اولوب »پيکار با بيسوادي« معلمي يازيلميشدي؛ دوشموشدو احمدآباد کندينه. هفته‌ني باشا باش احمدآباددا اولوردو؛ جوما آخشامي، جوماني دا قاييديردي سارابا. ياي گلدي، فرصت اولدو يئنه قاييتدي تبريزه.

مسعود آذر

بولگه لر سرويسي: » فارس جاواد« دانشگاهدان اخراج اولوب »پيکار با بيسوادي« معلمي يازيلميشدي؛ دوشموشدو احمدآباد کندينه. هفته‌ني باشا باش احمدآباددا اولوردو؛ جوما آخشامي، جوماني دا قاييديردي سارابا. ياي گلدي، فرصت اولدو يئنه قاييتدي تبريزه. دانشگاه يولداشلارينان آرا بير گؤروشوردو. انقلاب باشلاميشدي، هر يئرده تظاهرات، هر يئر تلاطمده ايدي. شهرده دانشگاهلار باغلانميشدي؛ مدرسه‌لر قاباغي شلوغ‌ايدي. هرگون تظاهرات ايدي. دانشجولار، مدرسه شاگردلري خياوانا چيخيب شعار وئريرديلر. بو وضعيت ياواش- ياواش شهرلردن کتدلره ده چکيليردي. نهايت ياي قورتاردي، مدرسه¬لر آچيلدي. ياخشي فارسي دانيشا بيلمه‌ديگي اوچون يولداشلاريندان »فارس جاواد« لقبي آلان »جاواد« دا کنده قاييتمالي ايدي. آنجاق اونون کنده قاييتماغي گلميردي. هر حالدا چاره يوخ ايدي، او يئنه قاييتدي احمدآبادا. يئنه ده اوشاقلاري توپلاييب، آدلاريني يازدي مدرسه‌يه. اوشاقلار نئجه سئوينيرديلر کي، کئچن ايلکي آغا معلم يئنه‌ده اونلارين کندينه گليب. آخي بو آغا معلم باشقا معلملرله فرقلي ايدي. بير قارداش کيمي اونلارلا دانيشيردي، بيرليکده چيخيرديلار کندين چؤل چاييني دولانماغا و …
فارس جاواد تبريزدن قاييداندا دانشگاه يولداشلاري اونا »دببه قراري« وئرميشديلر. بئله کي کنددن سارابا قاييداندا نشانلانميش برق آغاجينين اوستونده بير چارپاز علامت اولسايدي، او دببه‌ده بير شئي اولدوغونو بيله‌جک‌ايدي؛ علامت اولماسايدي معلوم کي تزه بير شئي يوخدو. پلاستيک دببه ده ميرزه حميد ‌آغانين زمي‌سينده چوروک بير آغاجين ديبينده باسديريلميشدي. علامتي گؤرن کيمي فارس جاواد دببه‌ني آچيب شاهليق عليهينه اولان اعلاميه‌‌لري گؤتوروب، سارابدا يايمالي‌ايدي.
چهارشنبه مهر آيي‌نين 21 ايدي. فارس جاواد آخشام اوستو گلدي سارابا. اوولجه گئديب برق آغاجينا باخدي. آغ گج ايلن بير يئکه علامتين وورولماسيني گؤردو. آخشام اوستو قاش قارالاندا ميرزه حميد‌آغانين زميسينه طرف يولا دوشدو. بيرآز اويان بويانا باخيب، بير کيمسه‌ني گؤرمه‌ديکده، اؤزونو آغاجين ديبينه يئتيردي. اوت آلاغي قيراغا چکيب، بيرآز تورپاغي ائشه‌له‌ييب، دببه‌نين اوستون آچدي. قاپاغين آچيب اعلاميه‌لري چيخارتدي. سونرادا دببه‌نين آغزيني برک – برک باغلاييب، تورپاقلا اوستون اؤرتوب، عادي نظره گلسين دئيه، بير آزادا اوت آلاغ‌لا اوستونو باسديردي. ساري پاکاتدا اولان اعلاميه‌لري کؤينه‌يي‌نين آلتينا قويوب، تله‌سيک زميدن چيخدي. قاييت باشي يولدا »بورنو يئکه قولام« ين آروادي اسمر و اوشاقلارينا توش گلدي. اؤزونو اله آليب، اونلارلا دا حال- احوال ائله‌ييب، قولام عمواوغلويا برک- برک سلام گؤندردي.سارابا چاتديقدا بير باشا قوهوملارينين حيط‌ينده کيرايه ائتديگي دؤشنه‌جکلي اوتاغينا گلدي. اوتاق حيطين او باشيندايدي. پاکاتي آچيب اعلانلاري چيخارتدي: باشيندا »اعدام انقلابي سرهنگ زماني‌پور مزدور جنايتکار رژيم در مشهد« سؤزو يازيلميش، گوشه‌سينده ايسه قيرميزي اوراق چکيش آرمي گؤزه تاخيليردي. فارس جاوادين اوره‌يي داهادا قيوراق دؤيونمه‌يه باشلادي. اونو اؤزونه چوخ جلب ائدن آرمداکي کلاشينکفون شکيلي ايدي. تئز اعلانين بيرين گؤتوروب، قالانيني يئني‌دن پاکاتا قويوب، يورقان دؤشه‌يين آراسينا سوخدو. باشلادي اعلاني اوخوماغا. اوخويوب قورتاراندان سونرا اونو دا فرشين آلتينا قويوب، ائشييه چيخدي. بيرباشا »مدد اوغلي موسي« نين قفه‌سينه گئتدي. قليانلار شاققاشاق شاققيلدير؛ تانباکو توستوسوندن دئييرسن بس قفه‌يه گؤزياشارديجي گاز آتيبلار. هر يئرده انقلابدان سؤز کئچيردي؛ قفه‌ده‌ ده انقلابين بحثي چوخ قيزغين گئديردي. قليانلارين خورولتوسو ايله سياسي بحثلر بيربيرينه قاريشميشدي. توستو اليندن اوتورماق اولموردو. ايکي چاي ايچييب، بئش قيران آتيب دخيله، چيخدي خياوانا. بيرآز شهري دولاشدي. صاباح ائرته‌دن گليب اعلانلاري پايلامالي‌ايدي. هارالارا آتماسيني، هارالار ياپيشتيرماسيني دوشونوردو. بو فيکيرلرله اؤزونو »بالاخان جييرپز« ين توکاني قاباغيندا گؤردو. گيردي توکانا. ايکي-اوچ شيش جيير يئييب، بيرباشا گئتدي ائوه. چيريشي، دولچاني بيرده چؤرتکه‌ني سهمانلاييب، باشين قويدو ياتدي.سحر ائرته‌دن گون چيرتداماميش اعلانلاري پئنجه‌يي‌نين آلتينا قويوب، چيريش وسايلين گؤتوروب، چيخدي چؤله. بير باشا بازارا ساري گئتدي. ايلک نوبه‌ده چيريش وسايللرين بير آغاجين يانيندا گيزلتدي، سونرا باشلادي اعلانلاري داغيتماغا؛ بو ائوه، او ماغازايا آتيب، بير ساعات کئچمه‌دن يوزه ياخين اعلاني پايلاميشدي. آغاجين يانيندا گيزلتدييي چيريش وسايلين گؤتوروب، قنوودان آخان سو ايله چيريشي دولچانين ايچينده قاريشديريب، اعلان‌لارين قالانيني دا دووارلارا ياپيشديرماق اوچون يولا دوشدو. اونلاريدا نئچه مدرسه‌نين، اداره‌نين قاباغيندا دووارا ياپيشديريب، شهرين چارراهينا گلدي.
چارراهدا »مشدي قدرت« ‌ين روزنامه توکاني وارايدي. عين حالدا فهله مئيداني دا ساييليردي. سحر ائرته‌دن فهله‌لر گليب ييغيشيرديلار اورا، اوردان گئديرديلر ايشه. هر کيمسه‌نين ساختمان ايشي، يادا اکينچيليک ايشي اولوردو گليب اوردان کارگر آپاريردي. مشدي قدرت توکانين قاباغيندا بير اعلان تابلوسو وورموشدي کي روزنامه‌لري جاماعات اوخوماق اوچون اوندان آساردي. فارس جاواد اويان بويانا باخيب، بير کس اولماديغيني گؤردوکده تر-تله‌سيک آخيرينجي اعلاني دا مشدي قدرت‌ين اعلان تابلوسونا ياپيشديريب، آرادان چيخدي.
واختي يوبانديريب يئني‌دن اورا قاييديب و اوخويانلارين تاثراتيني گؤرمک ايسته‌ين فارس جاواد، چارراهي اوزو آشاغا گئتمه‌يه باشلادي. »سوت آشي ساتان جامال« ين توکاني آچيق ايدي. ايچري گيريب سلاملاشدي. بير کاسا سوت آشي سفارش وئريب اوتوردو. جامال عمي سفارشي حاضيرلايارکن دئدي:
– آغا مودور! سنين ساوادين وار، باخ گؤر بو اعلان نه‌دير؟ سحر گلنده گؤردوم قاپيدان ساليبلار ايچري.ال آتيب جيبيندن بير اعلاني چيخارتدي.– گؤروم نه‌دي بو جامال عمي.
– آي فيلاني، ائله بيل ديمقراتلارينکي‌دير.
– هاردان دئييرسن جمال عمي؟ اوخويوبسان؟
– يوخ، آغامعلم! منيم ساواديم يوخدو کي، اوستونده اوراق چکيش عکسي وارايدي، دئديم بلکه ديمقراتچي‌لار پايلييب‌لار.
– هه نه‌ده قيرميزي اوراق چکيجدير!– آغا معلم! سنين ياديوا گلمز، آخي سن اوندا اولمازدين. فيرقه‌ليکده بئله اعلانلار چوخ پايلاناردي.– جامال عمي بو اعلان فدايي‌لريندي.– دئديم دا، فيرقه‌نين ايشي‌دي.– يوخ، جامال عمي، بو فيرقه فداييلري‌نين کي دئييل. بولار باشقا فدايي‌ديلر.– يئتيم، نه باشقاسي. فدايي، فدايي‌دي‌دا. باخ اوراق چکيشده اوستونده.– جامال عمي بيرآز فرقليدي‌لر.– وئر منه گؤروم، نه فرقي وار، وئر، ايندي جاماعات گليب گؤرر.
فارس جاواد جامال عمي‌له بيرآز دا دانيشيب، آشين ايچيب، چيخدي چؤله. ياپيشديرديغي اعلانلارا اوزاقدان باخيب گؤردو هله يئرينده‌ديلر. گلدي شهرين چارراهينا. گؤردو بير عده کارگر جاماعات ييغيشيب تابلودا کي اعلانا باخيرلار. اوردا دورانلاردان ساوادليسي يوخ ايدي اوخوسون. اوراق چکيجي بيربيرينه گؤرسديب نه اولدوغونو احتمال وئريرديلر. اذان تزه وئريليردي، »پئشناماز حاجي ميرزه‌قاسيم« گئجيکميشدي، تلسيک قاچيردي اؤزونو نامازا يئتيرسين. »اوستا صابر« اونو گؤروب سالام وئردي. حاجي ميرزه‌قاسيم سالاميني جاوابلاييب دئدي:– اوستا صابر نامازا گلميرسن؟ صبح نامازينين ثاوابي چوخدو ها.
– ميرزه، او نامازين کي ايچينده ماليک اولسا من اوني قيلمارام. سن گئت نامازا، من ده دوروم بوردا، بلکه بو گون بيري ده گلدي مني آپاردي ايشه. اوندا هر ايکيميز گئجه ائوه چؤره‌ک آپاراريخ، ايکيميزين ده ايمانيميز کاميللشر. آخي آتا بابا دئميشکن »آج قارينين ايماني اولماز«.
– گينه کوفر دانيشما صابر. مندن دئمک. ياخشيسين اؤزون بيلرسن.
– ميرزه تله‌سيرسن گئت، هئچ دئمه‌دين منيم او سوواليمين جاوابين تاپدين يا يوخ؟
– هه تاپميشام، نامازدان قاييداندا بوردا اولسان دييه‌رم.– تلسمه، هئش تلسمه، ياخشي اوخو، ياخشي اؤيرن، سونرا دييرسن. تلسمک لازيم دئييل.– ناييران قالما اؤيرنميشم، ياخشي دا اؤيرنميشم، نامازي قيليم، قاييداندا دييه‌رم.
حاجي ميرزه‌قاسيم مچيده ساري گئتدي؛ فهله‌لر ايسه مئيداندا دورموشدولار. هردن بيريسي گليب اونلارين بيري ايکيسي ايله دانيشيب راضيلاشيرديلار. بير خئيلک زامان کئچدي، اداره‌لرين آچان واختي ايدي؛ بو آندا نامازدان قاييدان حاجي ميرزه‌قاسم اؤز توتوب اوستا صابره دئدي:
– اوستا صابر، تاپديم ها کيتابدا کاسيبلارا نه يازيب.

منبع :