بولگه لر سرويسي:بولگه لر سرويسي:احمد دوغرودان دوغروسو بو گئجه آز قالميشدي مني گؤتوروب يئره چيرپسين. هله نه ياخشي اوتانقاج‌دي. اؤزگه‌لرين يانيندا حؤرمت ساخلار. حيرصيندن ديرناق‌لاريني چئينر. بارماق‌لاريندا ديرناق قالماييب کي! ديرناق‌لاري‌نين آلتينداکي قيپ-قيرميزي ات ائشييه پيرتلاييب. ايندي بيلرم نييه دلي اولدو… گؤره‌سن نه ائلييير؟ ياتيب؟ يوخسا گئنه ده تلويزيونا باخا-باخا ديرناق‌لاريني چئينه‌يير؟ آيناني بير آزجا آشاغي ائنديرير، بير ده اؤزونه باخير.»رويا خانيم! آخي سنين عيبيني هئي باشينا قاخينج، اوزونه توخونج ائله‌سه‌لر، خوشونا گئدر؟ ايندي ائوه دؤنمه‌يه هئچ اوزون اولاجاق؟ نه ائيله‌دي کي! قولوندان توتوب کاناپه‌يه ساري چکدي داااا… نييه ائله دئدين آخي؟ سنه دئسه‌لر کي، ديرناق‌لاريندان چيمچه‌شيرم، منه اليني اوزالتما، خوشونا گلر؟ اگر ائوه دؤنسم ديرناق‌لارينا هئچ فکر وئرمه‌يه‌جه‌يم«.آينايا باخير. آرخا شوشه‌نين اته‌يينده‌کي ايت، باشيني تيتره‌ده تيتره‌دير، سانکي اونو حاقلايير. ماشيندان يئره دوشور. پارکينگين قاپيسيني آچيب ائشييه گؤز گزديرير. ايشيق ديره‌يي‌نين لامپاسي‌نين بالونو يئکه بير دوزدان‌دير سانکي. دوزو يئره سپه‌له‌يير. يئر هله آغارماييب. »قار آغير ياغسا، گئده بيلمرم. قوي يوخاري قالخيم؛ قاپييا قولاق ياتيرديم؛ بلکه ياتيب!«قاپيني ايشگيلله‌ييب، آستا-آستا يوخاري قالخير. ايکينجي قاتدا بوتون ائولرين ايشيق‌لاري سؤنوکدور. اوچونجو قاتدا اورتانجيل قونشونون ايشيغي، قاپي‌نين باشينداکي شوشه‌دن پيلله‌لره دوشور. دؤردونجو قاتا چاتديقدا گؤيرچين کيمي بارماق‌لاري‌نين اوجوندا يئرييير. قولاغيني قاپييا دايايير. تلويزيون سسي گلير. »هله ياتماييب. ائله آللاهيندان ايميش من ائودن چيخيم. آغزيمي آچاندا دئيير، دينمه! اعصابيم خرابدي، دانيشما! بانک حساب‌لاريمي قاتميشام. حساباتيم يئرسيز چيخير، نه قدر ساليب-چيخيرام يئنه ده آز گتيريرم! هه، هامي‌نين يانيندا آز گتيرير، بير ائله منه آرتيق گلمه‌يي باجارير. آنام هاردادي گليب گؤرسون، همين نجيب اوغلان نئجه ده تک‌باشينا موسيقي ييغيناجاغي قوروب، چالديرير!… باخ گؤر نئجه ده سس گلير!دلي شيطان دئيير قاپيني آچ، ايچري گير؛ گئت گؤر نه‌‌يي ايزله‌يير بئله؟ يقين پورنو فيلمي‌دي‌هااا. آشپزخانادان يامان بويلانيردي رکلامينا باخاندا گؤردوم. دئينه قيچين سينسين رويا!… ائودن نييه چيخيردين کي! سن خاراباندا اوتورسان، او دا اؤز بيلديييني ائله‌مزداا«.پوسقودا دايانان پيشيک کيمي، بير ده قاپييا قولاق ياتيردير ايچريدن گلن سسي ياخشي ائشيتمير. آشاغيدان پيلله‌لردن سس اوجالير. دئيه‌سن يوخاري قالخان وار.»سس ائله‌مه! پيس ايش‌دي. ساخلا ائوه قونشولار ياتيب.«»دييه‌سن بو سس فريبا خانيمين سسي‌دير. ايندي نه ائله‌ييم؟ مني بوردا گؤرسه، نه دئير؟«بير قاپييا باخير، بير ده ا‌ييليب نرده‌دن يوخاري قالخان‌لارا باخير. نه ائيله‌سين، بيلمير. باشماق‌لارين چيخاريب الينه آلير. پيلله‌لرين اوجونو توتوب، اوغرون-اوغرون دام يولونا قاچير. آشاغيدان گلن سس گئت-گئده اوجالير ياخين‌لاشير. اونون ايسه آياق‌لاري اوشويور. »کؤپه… قيزي! بير-ايکي عاغيللي-باشلي آدام گؤرنده، اؤزوندن چيخير. سنه کيم دئدي دور اوينا؟ ائله بيرجه کيشي‌لرين قاباغيندا قيرجانماغين قالميشدي؟ ها دئييرم دينميييم اولمور کي، اولمور.«»سن آلـلاه دينمه. قونشولار ياتيب. قوي ائوه يئتيشک، نه قدر دانلاياجاقسان دانلا دا…«»گئنه ائوه يئتيشيريک، خانيم تويوق کيمي ميسير. ديل تؤکور، يالوار-ياخار ائله‌يير باااخ! آخشامدان اؤزگه‌لرين يانيندا شئر اولموشدون آخي؟!«»دينمه. سن آلـلاه دينمه. قونشولار ائشيدر.«دام يولوندا ديوار ديبينه سيخيشيب. ائشيتديک‌لرينه اينانا بيلمير. فريباني آپارتمانين ان خوشبخت خانيمي ساناردي. فريبا هميشه ياراشيقلي، گولر اوزلويدو. بير دئييب مين گولردي.پيلله‌لرده‌کي سس کسيلدي. باشماق‌لاري الينده پيلله‌لري ائندي. يئنه قولاغين قاپييا دايادي. تلويزيون سسي کسيلميشدي. کور-پئشمان پيلله‌لري آشاغي ائندي. اوچونجو قاتدا باشماق‌لاريني گئيدي. آياق‌لاري سويوقدان دونموشدو. پارکينگه چاتدي، قاپيني آچيب ديوارا دايادي.»ائله تصديقسيز گئده‌جه‌يم. گئجه‌نين بو ساعاتيندا پليس- مليس هاردايدي؟« قار، پارکينگين آچيق قاپيسيندان ايچري سپه‌له‌نير. ماشيندا اوتوروب موتورو ايشله‌دير.»آخ ائئئي! ايشله‌دي دئيه‌سن. گل ايندي بو دوه اؤلوسونو قاپيدان ائشييه چيخارت. بير آز دقّتلي اولسام، بير-ايکي فرمانا چيخاردارام. نه‌دير کي؟ گؤرموشم، احمد ماشيني پارکينگدن نئجه چيخاردير. دالي دنده‌يه آتيب، اوچ فرمان ساغا، ايکي فرمان سولا، سونرا دوم-دوز ائشييه چيخارام. قوي آينادان باخيم. اااااه! کئشگه او ايتي يئريندن گؤتوررديم. آرخايا باخاندا، باشي‌نين تيتره‌مه‌سي فکريمي جايديرير. آهان! بو بير فرمان، بو ايکي…«تاققيلتي سسي گلدي. آياغيني ترمزا باسدي. ال ترمزونو قالديردي.»آاااا… نه اولدو؟ بو سس نه ايدي؟ اولمايا فريبا خانيم‌گيلين ماشينينا توققوشدوردوم؟ يوخ‌هااا! اآللاه ائله‌مه‌سين.« قاپيني آچيب يئره ائندي. ماشينين آرخا گيلگيري، فريبا خانم‌گيلين بادمجاني مزدا-? لرينه دايانميشدي.»اؤله‌سن رويا! اؤله‌سن! ايندي نه دئيه‌جکسن؟ گونده يوز دفعه بو ماشينا داروگر فيسيلداديرلار. سيله-سيله، پوفله‌يه-پوفله‌يه ساخلاييرلار. اوووف! گؤر نئجه ده جيزيق ساليب. ايندي نه ائليييم؟«اوشويور. جاني گيزيلده‌يير. گيزيلتي کوره‌ک‌لريندن آياق‌لارينا قدر ياييلير. پارکينگين قاپيسيندان قار شوتويور. سويو سوزولموش کيمي گئديب پارکينگين قاپيسيني باغلايير. قار اوستونده، آياق‌لاري‌نين ايزي قالير. ماشينا ياخينلاشديقجا، ياش باشماق‌لاري‌نين ايزي يئر اوزرينده گئت-گئده کيچيلير. ماشينين ايچينده اوتورور. »گؤر سورمه‌ميشدين! هاچان هوش-باشيني بير يئره ييغاجاقسان قيز آخي! هله منه تصديقسيز ماشين سورور. آدام کيمي پارکينگدن چيخارتماغي اؤيره‌ن، سونرا احمده بوي دئ!… دوغرودان احمده نه دئيه‌جه‌يم؟ احمد جهنّم فريبا خانيم‌گيله نه دئييم؟ اولماسا گئديم احمدي چاغيريم. يووو. اونا يالوارماياجام. دئسم، آجيق آچد‌ين – دئير. گئجه‌نين بو ساعاتيندا قيشقيرباغيرا حوصله‌م يوخدو. قوي ائله ماشيني يئرينه قايتاريم، سحر فريبا خانيمين ارينه دئيرم«. آياغيني گازا باسير. موتورون سسي پارکينگه دولور. ايندي ايسه فرماني، عکس طرفه – سولا قايتارير. داااااانق! آياغيني ترمزا باسير. ايکي‌اللي باشينا چالير. ماشيندا اوتورارکن، قاپيني باغلاماغي اونودوب، ماشينين قاپيسي مزدانين شوفر قاپيسينا دايانيب. اؤزونو يامان‌لايير.»عغيل‌سيزين بيري عغيل‌سيز! بو نه ايش‌دي؟ گلدين قاشين آلاسان، گؤزونو چيخارتدين؟«فرماني بير آزجا ساغا قايتارير. ماشينين قاپيسي، مزدانين ازيليب-جيزيلميش قاپيسندان آرالانير. بادمجاني رنگين اوستونده، آغ پرايدين ايزي قاليب. ماشينين موتورن سؤندوروب اوتورور.»آخي بوآداما دئين يوخ کي، يئر قورتولموشدو بو آت النگه‌سيني گتيريب بيزيم ماشينين بؤيرونه سوخموسان؟ ايندي باشيما نه داش ساليم؟« اوشويور. گؤزونون ياشي قورويوب، آغلايا دا بيلمير. دالي صانديقدان پتو گؤتوروب، ماشينين ايچينه قاييدير. پالتوسونون جيبيندن موبايليني چيخاريب بير مئساژ يازيب احمدين نومره‌سينه گؤنده‌رير.»من تصادف ائله‌ميشم!«باشيني صندله سؤيکه‌يير، پتونو بورنونا قدر چکير. ايستي نفسي بورنونون اوجونو قيزديرير.»قوش بئيين خانيم، رويا خانيم! بو دفعه دوغرودان دا اوتاناجاقسان. بو دفعه جماعت، آتين ايشه‌مه‌يينه دئييل، يول پليس‌لري‌ايله بيرليکده سنه گوله‌جک‌لرهاا. دئدي‌قودولار باشلاياجاق. قونشولارين ديليندن دوشميه‌جکسن«.گؤزلريني يومور. پليس ماشيني‌نين قيرميزي ايشيغي گؤزلرينده يانير، سؤنور. يانير، سؤنور.
بولگه لر سرويسي:هيچقيرا- هيچقيرا پيلله‌لردن ائنيب، اورتا قاپيدان پارکينگه دوغرو گئدير.
بولگه لر سرويسي:احمد دوغرودان دوغروسو بو گئجه آز قالميشدي مني گؤتوروب يئره چيرپسين.