بولگه لر سرويسي:هيچقيرا- هيچقيرا پيلله‌لردن ائنيب، اورتا قاپيدان پارکينگه دوغرو گئدير. ماشينا يئتيشمه‌ميش سيويچين دويمه‌سيني باسير. تيققيلتي سسي گلمير. بير داها بارماغين دويمه‌سينه باسير.ايچيني چکير. پالتوسونون جيبيني آختارير. اپريميش کيرلي کاغذ دسمالي جيبيندن چيخارير. دسمال الينده پرن-پرن اولور. يئره تؤکولن دسمال قيرينتي‌لاريني آياغييلا ماشينين آلتينا اؤتورور. پالتوسونون يئنگي‌سي ايله بورنونو سيلير. قارا ماهوتي پالتوسونون اوستونده آغ بير ايز بوراخير. قولونا باخيب کيرلنميش يئنگيني بؤيرونه سورتور. بورنونو چکه-چکه ماشينين قاپيسيني آچيب فرمان آرخاسيندا اوتورور. اؤز-اؤزويله دانيشير. اؤله‌سن رويا، اؤله‌سن! بو نه زندگانليق‌دي آخي! ائله دوز دئييب‌لرهاا، چوخ محبّت‌دن مرض حاصل اولار. بيليرم. آرپاسي آرتيق دوشوب. يازيق عمه‌م. اري ايله ساواشاندا، يونجاسي آرتيق دوشوب دئيردي، هاميميز گولرديک. ايندي بيليرم نه چکيب؛ يازيق عمه خانيم! آرپايلا يونجانين بير او قدر ده فرقي يوخدور کي! …ائله عمه‌مين اري‌يله، احمدين ده اينک ايله آت قدر فرقي وار. ايکيسي ده بير بئزين قيراغيديرلار. آمما من اؤزوم ده آرپا چؤره‌ييني، هم ده يونجاني چوخ سئويرم. قارنيم سانجيلانماياناجان دسترخاندان قيراغا چکيلمرم. احمد يونجانين اوزونه ده باخماز. آخي نئجه دئييم يونجاسي آرتيق دوشوب. دئيه بيلميرم کي! دئمه‌ميشم ائله بئله اولوب‌داا. هله يازدا يونجاني دوزلويوب يئينده منه گولر. هئچ اينک ده سنين کيمي شيرين-شيرين يونجا يئيه بيلمز – دئير. احمدين آرپاسي آرتيق دوشمه‌سه‌يدي ده، آت کيمي کيشنه‌ييردي. دلي اولموشدو ائله‌بيل. من نه دئديم کي!فقط دئديم هامي‌نين اوزونه گولورسن کي، مينيرلرداا سني!پيس دئديم؟! مينمه‌سه‌لر، گونده او ماميلي-ماتان خانيم منيم ماشينيمدا نه پوخ يئيير؟ ماشينا وام گؤتورن من؛ آلان من؛ سن ده گونده خانيمي قاپي‌لاريندا ائندير. من ده هر گون مجبور اولورام کمالي‌نين ماشيني‌يلا ائوه گليم. هله نه ياخشي دئمه‌ديم‌ها کمالي مني ماشيني‌يلا ائوه چاتديرير. يوخسا فيش-فيشا کيمي فيشيلداردي. اونون آجيغي توتسا دا توتسون. لاپ ياخشي ائليييرم، گليرم. کمالي قونشوموزدودااااا. يول اوسته مني ده گؤتوروب، يئتيرير قاپيميزا؛ نه اولسون کي!باشيني صندله سؤيکه‌يير. گؤزلريني يومور.قوي بير آز اؤزومو تاپيم، جهنّم اولوب گئده‌رم. گؤروم صاباح‌دان هانسي ماشين‌لا خانيمي قاپي‌لاريندا ائنديره‌جک؟بير داها او ائوه دؤنمه‌يه‌جه‌يم. قوي نه قدر تک باشينا هاي-کوي سالير سالسين. هوشو چاتمير کي! دوشونمور بو ساعاتدا قيشقير-باغير سالمازلار؛ قونشولار ياتيب. اؤزو ده بئله قوزو کيمي قونشولار، بيريسي‌نين ده جينقيري چيخماز.سحر فريبا خانيم سوروشسا نه هاي-کوي سالميشديز، نه دئييم؟! هئي اوزومو ديرناقلاديم. هئي ديزيمه چالديم، پيس ايشدي، يواش دئديم. مگر قولاق آسدي! قوي تک قالسين، باشي داشا ديسين. باشيني فرمانا سؤيکه‌يير. آلني اوشويور. گؤز ياش‌لاري ديزلرينه دامير. بورونونو ائله چکير کي، بير آن نفسي قاپانير. چرقدي‌نين اوجويلا گؤزونو سيلير.»عمه‌م دئيردي‌هاا کيشي‌نين وفاسي اولماز. هئچ بير دئمه‌دي گئجه‌نين بو ساعاتيندا هارا گئديرسن؟ »گئتمه!« دئسه‌يدي، ائودن چيخمازديم. بو سويوقدا بوردا نه غلط ائليرم آخي. ها آدديم‌لاريمي آستا آتديم، ها باشماق يئرينده قوردالانديم، بلکه او بيري دفعه‌کي کيمي »گئتمه!« دئسين؛ نامرد اوغلو آغزيني بئله آچمادي.« بورونونون سويو آخير. باشيني فرماندان قالديريب، سينه‌ده‌کي دسمال قوطوسونو گؤتورور. قوطو، بوم-بوش. حيرصيندن قوطونو آرخايا آتاندا دالي شوشه‌نين قاباغينداکي ايته دييب، صندلين اوستونه دوشور. ايت قولچاغين باشي، گورا تيتره‌ين باش کيمي ترپه‌نير.چرقدي‌نين اوجويلا بورنونو سيلير. بورنونون سويو چرقدين اوجوندا آغ لکه بوراخير. چرقدين لکه‌لي اوجونو پالتوسونون آلتينا ييغير. سيويچي ساليب ماشيني ايشلتمه‌يه چاليشير. ماشينين موتورو تير-تير تيريلداييب سونرا سسي کسيلير. فرمانين آلتينداکي ميلچک بويدا ايشيق وار؛ ايشيغا باخير. ياشيل ايشيق يانير. »هله اون ايل‌دير تصديقيم وار دئيير. هوشو چاتمير کي، ماشين گاز ايله ايشله‌ينده موتورو سؤندورمزلر. بو دا اون‌ايل‌ليک شوفر!« ياشيل ايشيغي سؤندورور. قيرميزي ايشيق يانير. يئني‌دن ماشينين موتورونو ايشلتمه‌يه چاليشير. موتور کهليک کيمي قيققيلدايير. او ايسه استهزايلا گولومسه‌يير. »بيليرم‌دااااا،… ايندي پنجره قاباغيندا دوروب گودور. دئيير بس عاجزم، گئده بيلمرم. بس بو تصديقي نه‌دن اؤترو آلميشام؟ کيفيم‌ده ساخلاييب، چوروتميه‌جه‌يم کي! تصديق؟… هله قوي يوخلاييم گؤروم کيفيم‌ده؟«موتورو سؤندورور. کيفيني يوخلايير، قوردالايير. ايچينده‌کي‌لري بيربهبير صندلين اوزرينه تؤکور. سونوندا کيفي ترسينه چئويريب قوجاغينا سيلکه‌له‌يير. بير-ايکي سکّه، جولو بارماق بويدا گؤز مدادي، قاپاقسيز بير ماتيک آياغي‌نين آلتينا دوشور. يئنه اؤز-اؤزويله دانيشير.»گيج‌سن، قوش‌بئيين خانم، گيج! بس دئمه‌دين تصديق‌سيز سيويچ نه درده دَير؟ هوشون باشيندان چيخميشدي؟ ائله شيشدين، ائله سيويچه ال آتيب،گئديرم دئدين، ايندي بويور گئت! گؤره‌ک نئجه گئده‌جکسن؟ اولماسا بير آز گودوم ياتسين. آستاجا قاپيني آچيب ائوه گيريب، تصديقيمي گؤتوررم. او ياتاندا، مين ايلين اؤلوسودور ائله‌بيل. داش کيمي دوشور ياتير. ائوه قاييتديغيمي بيلمز. آمما بيلميرم کي، تصديقيمي هارايا قويموشام. گره‌ک بيربهبير کمدلاري آختاريم«. صندلين اوستونده‌کي قيوير-زيويرلاري کيفينه قايتارير. آياغي آلتينداکي سکّه‌لري گؤتوروب، باشينا دولانديرير. سونرا دنده‌نين يانينداکي تصدّق قوطوسونا سالير. سکّه‌لر، ماشينين سس‌سيزلييينده جينگيلده‌يير.گؤز مداديني ديزينه سورتوب قاپاقسيز ماتيکي بورور. لوله، بوش بوشونا بورولور. لوله‌نين ايچيني پوفله‌ييب، بير ده ترسينه بورور. ايکيسيني ده کيفين کيچيک زيپ‌لي يئرينه قويور. ماشينين آيناسيني اؤز اوتوروشو و بويونا اويغون دهتله‌يير. قاش‌لارين يوخاري قالديرير. گؤزگوده گؤزلرينه باخير. اليني قاش‌لارينا، گؤز قييق‌لارينا چکير.گؤزلريمين آلتي شيشيب. سحر ايشه گئدنده آغلاديغيمي هامي بيله‌جک. هئچ کيمين اوزونه باخميياجاغام. سوروشسالار نه دئييم؟ آچيب آغارتمالي دئييل کي. دئسم ده اينانمازلار. آنام دا اينانماز. هئي تعريفله‌سين، دئسين احمد نجيب اوغلان‌دي. ائلچي‌ليک گونو تلفوندا، عمه خانيما بير ساعات اونون نجيب‌ليييندن دانيشدي. او قدر دئدي کي، آخيردا يورولوب دئديم: او قدر »نجيب- نجيب« دئييرسن کي، من اونو گؤررکن باغلار باغيندا بوينوندا تورباسي اولان آت‌لار ياديما دوشور. آنام حيرصلندي. ديليني ديشله – دئدي. بويون-صاباح او سنين ارين اولاجاق آخي! هر شئيه ظارافاتلا ياناشما – دئدي.بير دفعه من ده او آت‌لارا مينديم. اؤلدوم اريديم. آبيرحيادان دوشدوم. آت ايکي آدديم آتماميشدان دايانيب هامي‌نين قاباغيندا شير-هاشير ايشه‌دي. قوم‌لارين اوستوندن ائله پيس قوخو قالخدي کي، اوره‌ييم بولاندي. هله اوره‌ک‌بولانما بير يانا، منه باخان جماعتين يانيندا يئره گيرسه‌يديم آت اوستونده اوتورماقدان مين قات ياخشي اولاردي. ائله‌بيل او آدام‌لارين گؤزونون اؤنونده اته‌ييمي قاوزاميشديم. آت شاهه قالخيب مني يئره چالسايدي، بو قدر قانيم قارالمازدي. آردي وار
بولگه لر سرويسي:هيچقيرا- هيچقيرا پيلله‌لردن ائنيب، اورتا قاپيدان پارکينگه دوغرو گئدير.
بولگه لر سرويسي:احمد دوغرودان دوغروسو بو گئجه آز قالميشدي مني گؤتوروب يئره چيرپسين.