او گون قونشولاريميزين قادينلاري بير بيريله آنلاشميشديلار اوشاقلارينا اوخول پالتاري آلماق ايچين بيرليکده بازارا گئده لر. آخشامين سرين هاواسي ياخين لاشارکن آنالار بير بير قاپيلاريندان چيخيب، اوشاقلاريني بازارا گئتمک ايچين سسله ييرديلر. اوشاقلار اويونلارينين قاتيشماسيندان پوزغون، ائولرينه ساري گئديرديلر. من ايسه گئري دونوب آنامي قاپيميزدا گؤرمک ايچين قاپيميزا باخديم.قاپيميز باغلي گؤرونوردو.ائويميزه ساري قاچيب، قاپيني ايته له‌ييب آچديم. بازارا گئتمک هيجاني ايلا، قونشولاريميزدان دالي قالماماق ايچين گيرر گيرمز، سسلنديم: آنا.......آنا.......آنام هويول حيطه چيخيب، نه اولوب قيزيم؟ نه ايستيرسن؟ سوردوآنا، قونشولار اوشاقلاري ايلا بيرليکده اوخول پالتاري آلماغا بازارا گئديرلر بيزده گئدک؟ سوردوم آنام :«يوخ جانيم، بو گون ايشيم چوخدور؛ گئده بيلمه ريک.» دئدي.چوخ يالوارديم. آغلاديم، راضيلاشمادي. پوزغون، يئنه کوچه يه چيخديم.قادينلار بيربيري ايله دانيشارکن اوشاقلارينين اللريندن ياپيشيب کوچه دن چيخماقدايديلار.فيکيرلشديم کسين آتا آنامدا، صاباح- بيري‌گون مني بازارا آپاراجاقلار. يايين سون گونلري ده بيتيردي. آنام، بويوک باجيمين اوخول پالتارلاريني يويوب اوتوله ييردي.آناما ساري: آنا بوتون يولداشلاريم اوخول پالتارلاريني آليب لار. سيز نه زامان منه پالتار آلاجاقسينيز؟ سوردوم. آنام پالتارلاري اوتولرکن، «قيزيم باجين اوخول پالتارلاري سنين ائينينه اولار. ائله بونلاري گئييب، گئدرسن» دئدي.سؤزلرينين داوامينا قولاق آسمادان، قيزغين، اوجا سسله، چيغيرديم: «يوخ. گئيمه يه جگم. من داها باجيمين گئيديگي پالتارلاريني گئيمه يه جگم. يولداشلاريمين باخيشيندان اوتانيرام. اوخول دا آبريم گئدير» دئيب، آجيغينان اوتاغا گئتديم، ياتاغيمدا يوخويا گئدينجک آغلاديم. سحر آنامين سسي ايله گؤيول سوز يئريمدن دوردوم.آنام باجيمين پالتارلاريني منه گئيديريب، قوللاريني اوزون اولدوغو ايچين قاتلادي.آنامدان آجيغلي،چانتامي گوتوروب کوچه يه چيخديم. نيسگيللي باخيشلارلا، يئني اوخول پالتاري گئيينن اوشاقلارا باخيب، سالانا سالانا اوخولا ساري يولا دوشدوم.
بولگه لرسرويسي:يايين سون گونلري ايدي. گون اورتادان سونرا قونشولارين اوشاقلاري ايلا کوچه ميزين دووارلارين کؤلگه سينده بيربيريميزله اويناييرديق.