”سانت ايانا” تاريخ حاققيندا دئيير: »کئچميشي وتاريخي اونودانلار اونوتکرارلاماغا محکومدورلار«. آذربايجانلي اديب و تاريخچي رحمتليک دوکتور زهتابي آنا ديلي وتاريخين اهميتينه گوره دئيير: » ديلي ني و تاريخي ني بيلمه ين خلقي، نوخودکيمي هر آشا سالارلار! «بئله ليکله هرآشين نوخودو اولماماق اوچون تاريخيميزي اؤيرنمه لي و لازيم اولان درسلري اوندان آلمالي ييق. بونو دا قئيد ائتمه لييم کي: بورادا تاريخدن مقصد، سياسي آماجلارلا اويدورولموش ناغيللار دئييل، بلکه خلقين دوغرو و دوزگون تاريخي دئمکدير. بلليدير کي بئله بير تاريخ هرشئيدن اؤنجه اصيل، قوشقوسوز و دوزگون قايناقلار و فاکتلارا دايانمالي و خلقين ديلي وکيمليگينه خور باخمادان و اونلاري آلچالتمادان، تعصوبسوز و غرض¬سيز تاريخچيلر اليله يازيليب ياييلمالي¬دير. اؤن سؤزومون سون سؤزو بوکي: شوبهه¬سيز بئله بير معيارلا الده اولان تاريخي کيتابلاري ده¬يرلنديرينجه اونلارين چوخونون تاريخ (HISTORY)، يوخ بلکه ناغيل (STORY) اولدوغونو باشا دوشوروک!

   بيلديگينيزکيمي دونيانين اسکي، تانينميش و زنگين مدنيتلري داشغين چايلار و جوشغون نهيرلر قيراغيندا يارانميش وگئنيشلنمه¬يه باشلاميشدير. دجله، فرات، آراز، کارون، نيل، دانوب، سند، گنگ، آمازون، مي سي سي پي، قانسو، جيحون، سيحون و بو کيمي چايلارين ساحيللري، ايلک چاغلاردان اعتبارا” بشرين يئرلشديگي و مدنيته باشلاديغي يئرلر اولموش و چئشيدلي مدنيتلرين يارانيشيندا اؤنملي ائتکيلر بوراخميشدير. آراشديرمالارا گؤره دجله -فرات چايلاري آراسي (ايکي چاي آراسي: بين النهرين) دونيانين ايلک مدنيت بئشيگي اولاراق بشريتين بيرينجي مدنيتيني (سومئر مدنيتي) اؤز قوينوندا بسله¬ميش و بؤيوتموشدور. سومئر مدنيتي حاققيندا چاليشان تاريخچي وتدقيقاتچيلارين يازديقلارينا اساساً التصاقي و بيتيشيک ديللي اولان سومئر خالقي، اسکي چاغلاردا آسيا اورتاسيندان قافقاز و آذربايجان يولو ايله کؤچه¬رک ايکي چاي آراسينا دوغرو يؤنلميش و اوچايلارين آراسينداکي وئريملي و برکتلي تورپاقلاردا يورد ساليب ياشاميش و دونيانين ايلک مدنيتينين تمليني قويموشلار. دئمک همين خالقين بعضي طايفالاري آذربايجان تورپاقلاريندان کئچرکن او اراضيلري ياشاماغا اويغون گؤرونجه اورالاردا يورد ساليب قالماق قرارينا گليرلر. بعضيلري ايسه زاقروس سيرا داغلارينين اتکلري، اؤزلليکله ايلام وخوزيستان تورپاقلاريني مسکن اولاراق سئچيب اورالاردا يارانان زنگين و گؤز قاماشديريجي مدنيتين تمليني قويماق قراريناگليرلر. بو دانيلماز حقيقتي اونوتمامالي¬ييق کي اسکي آذربايجان اراضيسينين اؤنملي بؤلگه¬لريندن اولان يوردوموز زنگان دا همين مدني کؤچلرين آنا و اساس يولوندا قورولموش وگونوموزه قدرگليب چاتميشدير. تاريخي آراشديرمالار و تاريخي خريطه¬لرين وئرديگي بيلگيلره اساسا”سومئرلرله قوهوم اولان و سومئر خالقيندان آيريلان قوتتي- لوللوبي طايفالاري اسکي چاغلاردا زنگان اراضيسينده، داها دوغروسو قيزيل اؤزن و زنگان چايي ساحيللرينده يوردساليب ياشاميش وآنا يوردوموزداکي مدنيتين اساسيني قويموشلار. همين ائللر آذربايجاندا يارانان ماننا و داها سونرالار مادکيمي گؤرکملي مدنيتلرين قوروجو و صاحيبلري کيمي تانينماقداديرلار. ماننا- ماد مدنيتلري حاققيندا يازيلان چئشيدلي قايناقلاردا بئله بير حقيقته راست گلمک اولور.اؤرنک اوچون:ايران تورکلرينين اسکي تاريخي اثرينده بوباره ده اوخويوروق: »آذربايجان ومرکزي ماد خلقينين اساسيني تشکيل ائتميش لوللوبي و قوتتي خلقلري اورمو گؤلونون شرقي، جنوبو و قسماً غربينده وهشتري- ميانا، همدان، قزوين و زنجان تورپاقلاريندا ياشارديلار.« (زهتابي،ايران تورکلرينين اسکي تاريخي، ج 1، ص220) دئمک قيزيل اؤزن وزنگان چايي کناريندا تاپيلان يوزلرجه تاريخي اثر بو آيدين حقيقتي ثبوت ائتمکده دير. گؤزل زنگانيميزين زنگين بؤلگه¬لرينده بولونان تاريخي و گؤز قاماشديريجي اثرلر، زنگاندا ساخلانيلماسادا تاماشاچيلارين گؤزلريني قاماشديراراق اونلاري حئيران قويماقدادير. اؤرنک اولاراق چيير (چهرآباد!) دوز معدنيندن تاپيلان دوزلو کيشيلر و اونلارا عاييد ملزمه¬لر (پالتار، سيلاح، ساخسي قاب- قاجاق، آياق قابي، سوس و بزک آلتلري و…)دن آد آپارماق اولار. ايرانين هيندوستاني آدلانان وئريملي و برکتلي تاريم بؤلگه¬¬سي، سولطانيه دوزو، معدنلر معدني اولان مانيشان بؤلگه¬سي و دندي – انقوران ماحالي، يام ياشيل ابرچاي بؤلگه¬سي و اسکي¬ليگي حضرت ابراهيم، ايسماعيل و قئيدارنبي(ع) زامانينا قدر اوزانان قئيدار و…، يئرلريميز منجه اسکيچيلر و آرخئولوقلار جنتي اولاراق اونلارين نظر دقتلريني جلب ائده بيلر. آرتيرمالي¬يام کي بوگون آنتيک شئيلر وعتيقه قاچاقچيلارينين اليله ياغمالانماق عَرَفه¬سينده اولان باشقا دفينه لريميز، زنگانا و زنگانلييا لاييق موزئي¬لرده يئرلشيب قورونماق اوچون اؤز زنگان سئور آرخئولوقلار و اسکيچيلريميزين يولونو گؤزله¬مکده¬دير. شوبهه¬سيز گله¬جک آرخئولوژي آراشديرمالار و اينجه¬له¬مه¬لر نتيجه¬سينده تاريخ قدر قيمت و اسکيليگه ماليک اولان يوردوموز زنگانين تاريخي، توز – تورپاق آلتيندان چيخاراق گوندن – گونه آيدينلاشاجاقدير. بئله¬ليکله بئله بيرپارلاق، زنگين و اسکي مدنيته ماليک اولان بير يوردون و شَهَرين دوزه¬ليش تاريخيني ساساني دؤولتي دؤورونه (226م)  باغلاماق عاغيلا سيغار بير ايش اولا بيلرمي؟ هله ده وار بيزيم تاريخچيلريميز حمدالله مستوفي¬نين سندسيز و باشقا بير تانيق و شاهيدي اولمايان روايتيندن آسلاناراق تورک-پارت (اشکاني) سولاله¬سيني حاکيميتدن سالان، ساساني دؤولتينين قوروجوسو، اردشير- بابکاني  اسکي زنگانيميزين قوروجوسو کيمي تانيتديرماغا جان آتير، اونو شهين! آدلانديراراق زنگانين آدينا دا اسکي پهلوي ديليندن غريبه بيرآنلام، کؤک و کيمليک چيخارماق قرارينداديرلار! بو آچيقلامالارا داياناراق دئيه بيلهريک کي: الده اولان فاکتلار و سندلره اساسا آنايوردوموز زنگانداکي مدنيتين قدمتي سومئرلره قدراوزاناراق 7000ايلليک تاريخه ماليکدير. بو اوزدن بئله بير اسکي مدنيتين اوزون تاريخيني قيسالتمامالي و اونو اولدوغو کيمي تانيييب – تانيتديريب و دَه¬يرلنديرمه¬لي¬ييک. اينديسه گؤرَک بير زنگانلي اولاراق آنايوردوموزون کولتور و تاريخينه گؤره اولان گؤره¬ولريميز نه¬لردير و اونلاري نئجه يئرينه يئتيرمه¬لي¬ييک! منجه هر زنگان سئور زنگانلي، اؤزه¬لليکله آيدين فيکير، درس اوخوموش و دوشونجه صاحيبلري آشاغيداکي گؤره¬ولري يئرينه يئتيرمکله زنگانين زنگين تاريخي، کولتورل ميراثي و معنوي وارليقلاريني قوروماليدير. قيزيل قلمين معلومات اساسيندا عصرآذربايجان راپورونا گوره .