سئرچه و داغ سيچاني
سئرچه و داغ سيچاني
1397/04/30
بولگه لرسرويسي: باهارين سون نفسي يله وداع لاشيردي دوغما طبيعت ، منه ائله گليردي کي داغلارين کيرپيک لري ياشالميش ؛ آنجاق دوماندان ساغيلان سيرريلي نارين داملالارا شئح دئييردي لر .
کهر آتين يال – قويروغونون توکونو بير کلک له توپ -توپ سيخيلميش آلچاق بوي قوجا آلچا کولونون چئوره سينه کيم کسيب سپه له ديسي زاماني يله بللي دئييل ايدي .
زامانلارين گئديشاتيندا اسن يئللر کهر آتين کسيلن ساچلاريندان(ياليندان) دوگونلو – دوگونلو جله لر هؤرموشدو !
بير داغ سيچاني ائويني – يوواسيني همان توکلرين جله لي اورتاليغيندا امين – آمان ياپميشدي ، بو ايش اونون اوچون هر اطرافلي قازانيردي ؛ او توکلر له ائو – ائشيگيني مبلمان قيلميشدي تا کي کؤرپه بالالاري صاباحلارينا دينج – دينج گؤز آچسينلار ، بيرده کي قان قادالي قيرقيلار و ستم ديمديکلي سئرچه لر اونون کؤرپه بالالاريني حيات اوفوقوندا هلاک قيلماسينلار .
داغ سيچاني يئنيجه بالالاميشدير ، اونون لوم لوت بالالارينين گؤزلري هله آچيلماميشدير .
او داغ سيچاني هانسي بير سئودا و هوسله بالالارينا سود وئرديسي ، منيم حس لريمدن داها اوزاق و غريب اولا بيليردي ! …
کيلکه ميش توم توپ قوجا آلچا کولو کلگين باغرينا ائله دوغما – دوغما سيخينميشدير کي فصيللرين شاختالي کولکلري اونون جانينا آجي نئشتر يئريده بيلميردي !
همن او آلچا کولونون باغرينين اورتاسيندا بير سئرچه يووا باغلاميشدير ، آلچا کولونون نارين بوداقلاري و تيکانلاري ائله کيپ کيپ کيپه لميشدي کي، هئچ بير قيرقي و هئچ چاليجي ايلان او سئرچه نين يوواسينا يول تاپا بيلميردي .
سئرچه نين بالالاري يئنيجه يومورتادان چيخميشديلار ، بلکه ده سيچانين بالالارييلا بير گونده حيات قوخوسونو آلاراق دونيايا گلميشديرلر ، آخي اونلاردا لوم لوت اولاراق کؤينک سيز ايديلر و گؤزلر ي هله آچيلماميشدي .
او سئرچه هاردانسا بالالارينا يئمه ک داشييردي ، او هر دؤنه کي آغزيندا خوخولجان يا ها بئله قورد و … يله يوواسينين دووارينا قونوردو ، اونون بالالارينين هر بئشي ده لوت بويونلاريني يوخاري اوزاداراق آغيزلاريني گئن – گئن آچيرديلار تا کي آنالاري اونلارا سود يؤخ ، بلکه يوموشاق – يوموشاق يئمه کلردن يئديرتسين!
آنا سئرچه يئمه ک داشيماقدان يورولموردو ؛ او، قونشولوق حورمتيني قورومادان سيچانين يوواسينا گؤزلريني ائله زيللاميشدي کي يازيق سيچانين اوره يي اوزولوردو !
آنا سئرچه بير باش قيلينجيني يازيق سيچانين اهل – عيالينين اوستونه چکه ، اونون يوواسينا هيجوم قيلدي !
آنا سيچان يوواسينين آغزيندا آغزيني گؤيه دوغرو آچيب – يوما ، اوره يي قورخا – قورخا بالالارينين پرستارليغينا دؤنوبن اونلاري قوينونون سقفي آلتينا آلدي !
آنا سئرچه سيچانين يوواسينين آغزيندا جيک – چيغيرلي چيرپينيردي کي ، اونون آياغينين بيريسي جله يه گئچدي !… اولسون کي قانادلاري آزاد و سربست ايدي ، آنجاق آياق باغلي اولورسا آزاد قاناد اوچا بيلمز !
آنا سئرچه قصديندن دؤنه ، قورتولوشونا جهد قيلدي ، هارايلاريني آسمانلارا بوراخدي ؛
او هر دؤنه چيغيرديقجا بالالاري يئمه ک قصدي ايله آغيزلاريني گؤيه آچيرديلار ! … آنجاق آتالار دئميشکن : » گئچي جان هاييندا ، قصابين کؤنلو پي آختارير « .
سئرچه اؤز جانينين هاييندايدير ، دويغولارا ائله سيزيردي کي آنا سئرچه پام پاک بالالاريني اونوتموش اولسون !
آنا سئرچه بلکه آنا سيچانا يالوارييردي کي کؤرپه بالالارينا خاطير اونو او تهلکه دن قورتارسين !…
قورخولار آنا سئرچه ني اطرافلي قرارلاييردي کي ، ناگاه بير بوز ايلان کله يين جيريغيندان باشيني قووزاياراق آنا سئرچه نين شيکارينا انديشه له ندي !
بير چاليجي قيرقي ايسه گؤي اوزره دولاناراق آنا سئرچه نين سسلرينه هدف لريني گئتدي !
قيرقي گؤي اوزوندن ، ايلان ايسه يئردن آنا سئرچه يه هيجوم قرارينا گليرديلر ؛ آنا سيچان قيرقي يلا ايلاندان خبرسيز سئرچه ني يان قيلماق قرارينا دورموشدو ؛ جله لري کسگين ديشلري ايله چئينه ييب بير بير آچيردي ، اولسون کي آنا سئرچه ايلان لا قيرقيدن قورخوردو ، آنجاق آنا سيچان اونلارين هر اوچوندن قورخوردو ،امما او ايکي دوشماندان خبرسيز ييدي !…
آنا سيچان جانينا ال قاتيب آنا سئرچه نين آياغينا باغلي اولان جله ني چئينه ييب آچاراق اونو قادا – بلادان قورتاردي !….
آنا سئرچه قورتوراراق اوچوب گئتدي يوواسينين سرچينينه قونوب دينجه لدي ،آنا سيچان ايسه يوواسينا دؤنوب – دؤنمو يه ، ايلانين زهرلي ديش لرينين اورتاسيندا سيخيليب جان وئردي !!!….
آنا سئرچه هئچده اونون يارديمي قرارينا قاناد چالمادي ! … او بلکه اؤز خيلاصليي سئوينچينه دينج – دينج نفسلريني ده ردي !
آنا سيچان جانيني بالالارينا قوربان وئرميشدي ! زامان دورمادان اؤز يولونو توتوب گ ئديردي !
ائله نچي بير دورومدا ايلان گؤي اوزره قانادلانان
قارانقوشو دوياراق اؤز يوواسينا دؤندو ، قيرقي ايسه پروازلاريني اوزاقلارا آپاردي ؛ يالنيز قالميشدي سيچانين يئتيم بالالاري بيرده کي بالالي سئرچه !….
آنا سيچانين يوواسينين اطرافيندا اولان جله لرين دوگونو آچيلميشدي ، سئرچه نين دويغولاري ايله نفَسي اورتاليغيندا بير ظفر و بير خطر طوفانلانيردي ؛ آنا سئرچه داها سس سيزجه سينه سيچانين يوواسينا دؤنه ،هئچ بير قوروق ايله قارشي – قارشي اولمادان سيچانين يئتيم بالالاريني ديمديگينه آلاراق اؤز بالالارينين آج قورساغي اوچون اونلاري بير -بير هلاک ائده حياتلارينا سون بيتيردي و ديديب بالالارينا يئديرتدي!!!….
آتالار دئميشکن : » قاري دوشمان دوست اولماز« .
بلکه ده اوچونجو دوشمان آنا سيچانين اريني داغين بير بوجاغيندا هلاک قيلاجاق ايدي !…
منبع :