گؤره سن مني گؤرسه تانيياجاق
گؤره سن مني گؤرسه تانيياجاق
1397/07/15
بولگه لر سرويسي: گؤزلليگي،اردمي،تعريفي ،تئز تئز قولاغيما گليب چاتسادا ، اؤزونو آنجاق يئددي ياشيندا بيردؤنه گؤرموشدوم.
اونون ايري قومرال گؤزلري، چاتما قاشلاري، گوللو ياناغي وار ايدي.
گؤزلري هئچ واخت ياديمدان چيخماز.گؤرمک همن تانيياجاغام اونو. اونا تاي قيرخ قيزين دوزومونده ده اولسادا، اونوتانييارام.اونلاربيربويدا بيرگئييمده اولسالاردا کيمسه نين گؤزو اونون گؤزونه بنزه مز. محض گؤزلريندن تانييارام اونو هرياندا اولسا.
نييه بوجومله لري بئله جه سؤيله ييرم.بيرنفر دئميشگن آخي جرياني وار…. من 14ياشيمداايکن اونون 7 ياشي وارايدي.ايند ي منيم 26 ياشيم وار اونون نئچه ياشي اولار؟
بيرساده رياضي موعاديله سي دير ؛ بارماق حيسابي له ده جاوابا يئتمک اولار باخ قوي بارماقلاريملا حئساب ائله ييم گؤروم …بو بئش، بودا بئش…اولار اون …ايکي اون …اولار نئچه؟….يوخ قوي بيرآزدا فيکيرله شيم….
آخي اونون حاققيندا دوشونمه يين لذتيني چوخ دوشونمه لي يم…. بيرده…..
من اون دورد ياشينداايکن او يئددي ياشيندا ايدي؛ بؤيوک باباميز گيلده ايديک اونون گؤزلري ياخشي ياديمدادير.قومرال گؤزلري وار ايدي .بؤيوک باباميز بيزه ناغيل سؤيله ييردي….
آها …بو جومله لر اوناغيلين بئينيمده قالان قالينتي سيندان آخدي ديليمه ساري…..هانسي سولطان هانسي شاهين قيزيني اوغلونا ايسته ييردي. شاهين کونلو اولماديغيندان سولطانا نئچه چتين مسأله سؤيله يير .
نئچه گون واخت وئرير اونلارين جاوابيني تاپسين يوخسا يولونو توتوب دوز گئتسين …..آنجاق اونئجه؟ اونو سؤيله ييرم شاهي زادي يوخ..او نئجه…؟
ماشين داغ دؤشونده کي يولدان يوخاري قالخير.گئتديکجه سسي اوجالير.
اومسأله لردن بيري بو ايدي شاه بيربوياقدا بيربنيزده اولان قيرخ قيز اوغلانا بيرجور گئييم گئيينديرير.سونرا اونلاري صفه دوزور، سولطان بيلمه لي ايدي کي بونلارين هانسي بيري قيز هانسي بيري اوغلان دير. مسأله لرين بيري ده …آها …ياديما دوشدو: بير بويدا بيربوياقدا اولان اوچ آلماني وئرير سولطانا ؛ او بيلمه لي ايدي کي بو آلمالارين هانسي بيري اينيشيل ، هانسي بيري بيلدير،هانسي بو ايلين تاخيلي دير….
بير آيريسي دا وارايدي ائله بيل ،ايندي ياخشي ياديمدا دئييل، آنجاق ماراقليسي هامان بيربيرندن سئچيلمه ين قيزلارلا اوغلانلارين آييردي ايدي. …
تئلفونلا دانيشماغي سؤيمور ائله بيل يوخسا ايشلرين بيرچوخونو ائله سينه گؤرمک اولاردي.ايند ي اونون گؤزو-گؤزه لليگي منه بللي ايدي آنجاق سسي- سؤزو قارانليق. نييه ايسته مير دي منيمله تئلفون آرخاسيندا دانيشسين؟…….
گؤره سن مني گؤرسه تانيياجاق؟12ايل بوندان قاباق منيم بوغوم ساققاليم يوخ ايدي. گؤره سن بو پوروفسورو ساققاليما گولمه يه جک؟اوندا گولمه يي دوزلو ايدي.گولمزدي گولمزدي بيردن قاه-قاه چکردي.
اوندا عئينه ييم ده يوخ ايدي.کوت-شالواردا گئيمزديم….اونئجه؟ گؤره سن عينک تاخمايير؟ حاييف دئييل اوگؤزلره؛ طبيعي لي ييني آلار اوندان. .عينک قاشلارينين دا اوستونو توتار.
بورنونو سيخار لاپ بيرذرره ائيلر.يوخ عينک وورماسا ياخشي دير. وورسادا نئيله يک, آپاريب اؤزوم قومرال بيرلئنز قويدورارام، بير يوللوغا عينکدن راحات ائلرم اونو. ….آها اوبيري مسأله ياديما دوشدو …. داغين دؤشونده آت اوتلاييردي . بالاسي دا يانينداايدي.
اوشاه ، سولطانابيربويدا بيربوياقدا اوچ آت گؤرسه دير.دئيير :بونلارين هانسي بيري بؤيوک آنا ،هانسي بيري آنا ،هانسي بيري بالادير؟…….
دوغرودان سولطان اؤزو کي سؤاللارين جاوابيني تاپابيلمه ميشدي.آنجاق ائله بيل بير نفر اونا اؤيرتميشدي…… ايندي ياخشي ياديمدا دئييل نئجه اولموشدو………اونون بويو اؤز ياشيدلارينا گؤره اوندا اوجا ايدي. ايندي گؤره سن، نئچه قاريش بويونا آرتيب؟ منله بيرگلر گؤره سن؟ خيياواندا ال-اله توتوب دولانانداايکيميزين بيربويدا اولماغيميزچوخ گؤزل اولار…أه لعنته گلسين شهري، اوزاقليغي لعنته گلسين….
آنجاق اؤزوم ده قوصورلوق ائتميشم .نئچه دفعه بابام گيل کنده گئده نده مني ده ايسته ديلر آپارسينلار. منيم اوره ييم آتلانيردي اونون اوچون ،آنجاق بيلميرم نييه گيزله ديرديم . آنجاق بيلميرم نييه يوخ ايشيم وار دئييرديم.سونرالار نئچه دفعه اؤزوم تک باشينا ايسته ديم گئدم؛ آنجاق اوره ييم ايسته سه ده آياغيم گلمه دي.
سونرا دانيشگاها گئتديم داها چوخ اوزاقلاشديم ؛موهنديس اولدوم داهالاپ چوخ؛ ايش تاپديم … آنجاق اونو اوره ييمده ساخلاديم کيمسه ني اونلا توتوشدورماديم. آنجاق اونئجه؟ گؤره سن درسينه داوام وئريب؟ بئشي اوخويونجا دئييرديلر نومره لري ايييرمي اولور. بئشده ناغيل کيتابي دا اوخويور؛ هله اؤزوده بيرزادلار يازير.دوغرودان نه اولدو ؟ ائله بيل بابام دئييردي کندلرينده دوققوزا جان مدرسه وار… هه ائله بيل دئييردي دوققوزو اوخودو… ائله سه اوندا دوزگون کيتاب اوخويا بيلير…بلکه ده ديپلومون آليب دير. اوندا ديري باش قيز ايدي.
ائله سه آپارارام اؤز يانيمدا مونشو کيمي ايشلر.ائوده ده باهم اولاريق ايش يئرينده ده …… ائله بيل دوداغيم قاچير بيرآز فيکريمي آيري يئر ه وئرمه لي يم ماشيندا ياخشي دئييل. …..داغين دؤشونده کي آتين بالاسي اورکور قوراضا اوتوبوسون سسيندن.آخ ائي.. نئجه نازدير.
نئجه ده خوش رنگي وار.آخ ائي …قاچيشينابيرباخ گؤر نئجه قيچي قيچينا دولاشير! …باخ گؤروم ائله بيل بابام دئييردي يازيق اوشاق اوخويا بيلمه دي. نه قدر قارداشيما يالوارديم گتيريب من ساخلاييم خرج ده ايسته ميرم وئره سن .
خرجي مندن قويوم بورادا درسيني اوخوسون ؛کؤنول وئرمه دي کي وئرمه دي.يازيق قيز گؤز ياشلاريني قوورقاتک تؤکوردو. ..أ ه لعنته گلسين بو کور تعصصوبو .
حاييف دئييل اوايستئعداد کورقالسين. .. هه ائله بيل اوخوماييب.. دئپلوم آلماييب . اوندا يولداشلاريما نه دئييه رم….ائوده اؤزو اوخويار ايمتاحانا گئدر.
اونون ايستئعدادي ياخشي دير.. اوحتمن اوخويا بيلر ..آخي اوندا هله نه واخت دئپلوم آلار.
آخي ائوله اوشاقلا درس ده اوخويا بيلر؟…. أ ه لعنته گلسين بو مدني آراليقلاري…بو ايش باشيندا اولانلاري. ….أه نييه ياديما دوشمور اومسأله لرين جاوابي … قيز اوغلان آلماآت….
اوتوبوس مني سالمادان يئنه يئنير اوزو آشاغي. داغين دؤشونده کي آت ايله بالاسي اورادان گئديب لر. بيرجوت قومرال گؤز حتمن پنجره آرخاسيندان يادا قاپيلاري آغزيندان قوناغين گؤزله يير. آنجاق لعنته گلسين اونون قوناغيني.
منبع :