بولگه لر سرويسي: گون باتان چاغي دير گؤزلريم آنامين خسته گؤزلرينده يووا قوروب. اوچورتماغيم گلمه‌يير. يولداشلاريم دانيشگاهدا يئريمي ساخلاسالار دا آنامين اورک دويونتو لري مني دايانديرير. گئديم-گئتمه ييم فيکيري بئينيمده دالقالانير ايتييي ايتميش کيمي بيلمه يرکدن ائوين اوباشبوباشينا دولانيرام. گؤزلريم آنامين گؤزلريني بوراخمايير. ديلي توتار-توتماز آنام دئدي: قيزيم قارانليق قوووشمادان دايانما گئت.!... آياقلاريم قاپيميزين ائشييينده، گؤزلريمين نيياران قوشو يوواسينا قاييدير ايرفده آتامين شکيليني گؤرورم. آنام يارالي بير اوو کيمي بويرونه سيغينيب. من هاردا اولدوغومو بيلنمه ييرم.! يالنيز آتامين باش داشينا قازيلميش شکيل اؤنومده دايانير: قيزيم آناني بوراخيب گئتمه. او، چوخ خسته دي.! آنامين يورقون گؤزلري بير دؤنه ده مني آياقدان باشا سوزوب دئدي قيزيم گئت، ناراحات اولما ياخشييام آياقلاريمين بيري گئتسه ده اوبيريسي دايانير خييابان‌لار سينما پرده سي کيمي اؤنومدن سوووشور فيليمين هاراسيندا اولدوغونو ايتيرميشم. خانيم دانيشگاه قاباغي دي. سوروجو دئدي: تاکسي‌دان دوشوب کيلاسا ساري گئديرم آنامين اورک دويونتو‌لري قولاقلاريمدا دويونور.باشيم آغيرلاشيب داريخيرام. يوبانميشام اوستاد درس دئيير. قاپيني دؤيوب ايچري گيريرم. سولمازين يانيندا ايله شيب اوستادي دينله مه يه باشلاييرام. گؤزلريم باخسا دا قولاقلاريم ايچيمي دؤشورور.! سيرا-سيرا اکيلميش داشلار اؤنومده رئژه گئديرلر يوخسا من اونلارا باش اييرم. خالامين گؤزلرينده بيتيب آنامين گؤزلرينده گؤيريرم. آناملا بيرگه وادي رحمتده اولدوغومو دوشونورم.! آتامين قبريني قوجاقلاييب آغلاييريق.!...آنسيز سولمازين اليني اليمده دوياراق هئچ نه دئمه دن اوستادين کيپريکلري گؤزلريمي چالير. ديکسينيب اؤزومه قاييديرام.کيلاس سونا چاتيب. سولماز سوردو: سوسن نه اولوب؟ فيکيرين چوخ داغينيقدي. اوز-گؤزوندن نييارانليق ياغير. دئ بلکه اليمدن گلدي کؤمگ ائله ديم. گؤروردوم اوستاد درس دئينده ده فيکرين نم هاردايدي. قيز آغلامسينيب دئدي: سولماز ياخشي بيليرسن گؤيده آللاه يئرده کيمسم يالنيز آنام دي. آخي او جاوان ايکن حيات يولداشين الدن وئريب قارا گونده ياشاييب. ايشچي‌ليک ائله‌ييب مني بؤيودوب بويا-باشا چاتديريب.اوزون زاماندي اورک خسته‌لييي ايله چاليشير نئچه دؤنه اوزمان حکيم لره آپارميشام داوا درمان جاواب وئرمه يير.بويون لاپ پيس دوروم دايدي. اونو ائوده يالقيز جاسينا بوراخيب دانيشگاها گلديييمه گؤره نييارانام. دئييرم آخي بو نه درس اوخوماغي دي گئجه نين قارانليغيندا دانيشگاه نه يه دير"ديه ر"؟. سولماز دئدي: ناراحات اولما سوسن ياخشي اولار انشاللاه. کيلاسي بوراخ. تئز دور آياغا دربست بير ماشين توت گئت آنانين يانينا. دوزون دئيير سن سولماز گئتمه ييم ياخشي دير. قيز خيياباندا دايانيب گلن ماشينا دئييرآقا دربست. کيمسه دايانمايير. "بودا کي، شخصي ماشيندير.! "هارا خانيم؟ لاله . ايلش. قيز ايله‌شرکن دئدي: بير آز يئيين سور آنام خسته دي. سوروجو دئدي: ائشيک کمربندي سايخاش اولار ايندي اوردان گئده‌رم. يئيين سور قارداش يوبانما. ماشين يئيين گئدير. کئچي جانينين هاييندا قصصاب پييي آختارير. سوروجو داغ دره دن دانيشير.گؤزلري آينادان قيزي زوم ائله ييب. هئچ بوراخماسي دا يوخ دور! هرنه‌دن خبرسيز قيزين فيکيري آناسينين يانيندا دير. خييال عالمينده اوشاقليغي گؤزونون اؤنونه گلير. قولچاق لاريني دوزوب يانينا اونلار ايله اوينايير گاهدان دا حووصله دن گئديب هره سيني بير يانا بوراخير.اينديسه ائوه گيريب آناسيني اؤلموش گؤرور. هاي-هاراي سالير. قونوم-قونشولار سسه گليرلر.!...ماشينين تورموز سسي چؤل يولونون توز- توپراغيندا بوغولاراق پيچاغين پاريلتيسي گئجه نين قارانليغيندا قيزين گؤزلريني قاماشديردي!! سوروجو دئدي: تئز اول دينسن اؤلدوره جه يم.! قيز تئز ماشيندان يئره آتيليب آغلايا-آغلايا يالواردي. " سن آللاه منيمله ايشين اولماسين يازيغام. آنام خسته دي اونا يازيغين گلسين." سوروجو قيشقيريب دئدي: دئديم تئز اول يوبانما.! بو آندا چؤل يولوندان باشقا بير ماشينين چيراغ‌لاري گؤرسه نرکن قيزين اوره يينده اومود چيراغ‌لاري ياندي. سوروجو قيزي بوراخيب هؤله‌سک ماشيني دالي قاباق ائله ييب قاچدي.! قيز ده توز تورپاق ايچينده او گلن ماشينا ساري قاچير. ماشين قيزين يانينا يئتيشيب داياندي: دؤرد گنج کيشي دوشدولر يئره، خانيم. نه اولوب؟ نييه قاچيرسان.؟!!...
بولگه لر سرويسي: گون باتان چاغي دير گؤزلريم آنامين خسته گؤزلرينده يووا قوروب. اوچورتماغيم گلمه‌يير.