پاييز قوشلاري و گونش پنجره سي
پاييز قوشلاري و گونش پنجره سي
1397/05/14
بولگه لرسرويسي: هاوا پاييز لاميشدي. يارپاق‌لار بير-بير ساراليب، سولورکن ا‌للري آغاجين قوينوندان اوزولوردو. خزل‌لر آياق آلتيندا قالاراق، گليب-گئده‌نه دئيينيرديلر.
پاييز قوشلاري ايسه اؤزلريني اويان-بويانا چيرپيب، قورو كوللاردان آيريليب، گونش باغچاسينا گئتمه‌يه، ساچ‌لاريني يولوب، يئره تؤكوردولر. كول‌لار دا اونلارا قارا يئلين گلمه‌ييني و بونلاري گونش باغچاسينا آپارماسيني وعده وئريردي..
ياواش-ياواش آغاج‌لار اسمه‌جه‌يه دوشدولر و قورخولاريندان اولوب-قالان يارپاق‌لاريني دا تؤكدولر. بالاجا قاسيرغالار بورجودا-بورجودا قارا يئلين گلمه‌ييني موشدولوق وئرديلر. گئتمك زاماني يئتيشميشدي. قارا يئل قانادلاريني آچميشدي و پاييز قوشلاري تلسه-تلسه قونوردولار قانادلارينا و ماوي گؤيه ساري چكيليرديلر. اونلار گؤيون ماويلييينده ساده‌جه اؤزگورلويو دوشونوردولر.
هردن ده گؤزلري ساتاشيردي اونلارلا ويداعلاشان يئرده‌کي کول‌لارا. پاييز قوشلاري گئتديكجه گؤزدن ايتديلر. هيجان هاميسي‌نين روحونو بوروموشدو. قارا يئل ده دايانمادان قاناد چاليردي و سينيرلاري كئچيردي.
پاييز قوشلاري سئوينجك قارا يئلين قانادلاري نين آراسيندا يئره باخيب، نه قدر گؤي‌لره قالخديقلارينا گووه‌نيرديلر. بو آندا گؤزلري ساتاشدي يئرده بيتن قارا كول تيكان‌لارينا. تيکانلي کول‌لار يئل‌لرين قانادلاريني يارالاييب، پاييز قوشلاري نين چوخونو توتموشدولار.
قارا يئل بير آز دا اوجالدي. کول‌لاردان اوزاقلاشماق ايسته‌ييردي. بو يوكسلمك آلچاق بولودلارين چوخونو قيسقانديردي. اونلار قاش- قاباقلاريني ساللاييب، شيمشك‌لريله پاييز قوش‌لارينين اورک‌لريني اوزوردولر. آنجاق يئر- گؤيو پاييز قوشولا دولو ايدي.
كولا ايليشن كيم، باتداغا باتان كيم، آمما اونلارين هاميسي‌نين تکجه آماجي گونش باغچاسينا چاتماق ايدي. بو قورخونج سينيرلاريدان سونرا، قارا يئل كي قاناد وورماقدان يورولموشدو ياواش-ياواش يئره ياخينلاشدي بير آندا هاي دوشدو گونش باغچاسي، گونش باغچاسي گؤرونور، پاييز قوشولاري ال-آياغا قالديلار و سئوينديك لريندن يئرده – گؤيده دايانماديلار.
گونش باغچاسي اوزاقدان ره به ره سوسنميشدي، اورادا هر بير زاد دوم -دورو گؤرسه نيردي. همه شه باهار آغاجلاري نين يارپاقلاري پاييز قوشولارين گؤزلريني قاماشديريردي .آمما گونش باغچاسي داها قاباقكي كيمي دئييل دير.
اطرافينا مفتيل دن بير تور چكميشديلر كي قارا يئلين قانادلاريندا او گوج قالماميشدي كي او سينيري آشسين.
اونا گؤره گلن پاييز قوشو اؤزونو چيرپيردي تورا، و تورون دليكلري ده او قدر كيچيك ايدي كي اونلاردان سووشانلاريندا له له ك لري يولونوردو و اوچماغا قادير دئييل ديلر و تورون بو اوزونده قالانلار دا ساده جه گونش باغچاسي نين حسرتيني ياشاييرديلار.
فقط پاييز قوشولاردان نئچه سي کي اوچماغا اينانميشديلار ائله يه بيلديلر گونش باغچاسينا چاتسينلار.
منبع :