هِيوا
هِيوا
1400/10/12
بولگه لر سرويسي: سلمه اوزو ده کي برک ناراحاتدير بير سؤز دئمه‌دن ائوينه قاييديب اوشاقلاريني گؤرجک او بالا قوشلار يادينا دوشور، اونا عذاب وئريردي. او گوندن ده، گون باتانا بير آز قالان حاجي ليلکلر گونده بالالاري دفن اولان يئره گئديب باشلاريني گؤيه توتوب ناله ائدرديلر، سونرا يووالارينا قاييدارديلار.
داود_پيرعليلو
بولگه لر سرويسي: سلمه اوزو ده کي برک ناراحاتدير بير سؤز دئمه‌دن ائوينه قاييديب اوشاقلاريني گؤرجک او بالا قوشلار يادينا دوشور، اونا عذاب وئريردي. او گوندن ده، گون باتانا بير آز قالان حاجي ليلکلر گونده بالالاري دفن اولان يئره گئديب باشلاريني گؤيه توتوب ناله ائدرديلر، سونرا يووالارينا قاييدارديلار.
هِيوا کي بو ماجراني تعريف ائديردي بير هؤنکورمک سسي ائشيتدي. باخيب گؤردو بالابگيم ايچين چالا- چالا، آغلاماغيني گيزله‌ده- گيزله‌ده آغلايير.
گؤزلريندن او قدر ياش آخيب کي، ساناسان اوزونو سو ايله يويوبدور. هِيوا تئز اليني بالابگيمين باشينا چکيب، دئدي:
– قيزيم ندن آغلاييرسان، بير اتفاق ايدي اوندا دوشوبدور دا، سنين ده بؤيوک آنان بيلميردي اونلار اوردان دوشوب اوله‌جکلر.
دورووب بير سئگين سو گتيريب بالابگيمه وئريب ايچدي. سونرا قوقو چيراغينين خودونو آزالتدي، هره اوز يئرينده ياتيب يوخلاديلار. بير ايل او گونون اوستونده کئچدي. بير گون هِيوا ايله بالاخان تورپاق گتيرمگه، بير گؤي تپه وار ايدي کندليلر اوردان تورپاغ گتيريب ائولريني چيرپارديلار آغارتما يئرينه. اوشاقلاري ائوده قويوب گئتديلرکي، تورپاغ گتيريب ائوي چيرپالار. سحر تئزدن يولا دوشموشدولر اوشاغلار يوخودان دورانا قاييديب گلسينلر و اوشاقلارين چاي.- چؤرگيني وئرسينلر. بير زامان کندده سس دوشور کي گوي تپه‌ده تورپاغ گلدي ايکي نفري آلتينا آلدي.
دئمه هِيوا ايله بالاخاني گوي تپه‌يه گئدنده کندين چوباني گؤرور، تورپاغ باشلارينا گلنده ده گؤرور، تئز قاچيب کنده هاي سالير.کندليلر اؤزلريني يئتيره‌نه، دئمه اونلارين جاني چيخير.
تورپاغين آراسيندا بير بؤيوک داش وار ايميش، او داش بونلارين ايکسينين ده اوستونه دوشور، ائله اوردا جانلاري چيخير دنيادان گئديرلر. بالابگيم يوخودان اويانيب گؤردو هاوار سسي گلير. قارداشيني دا يوخودان اوياديب سسه ساري گئديرلر،گؤرورلر آتالارينين بير خالاسي وار ايدي او هاوار چکير آغلايير.
کندليلر گؤرورلر اوشاقلار گلدي، تئز صحنه‌ني دگيشيب، نه اولدوغونو اوشاقلاردان گيزلَديرلر کي، بيردن اوشاقلار بيليب قورخماسينلار.
بالابگيم آتاسينين خالاسيندا سوروشور آي خالا نه اولوبدور؟ نيه آغلاييرسان؟ خالاسي ديير:– آي بالا هئچ زاد، بالاجا اوغلوم آغاجدان دوشوب، اونا گؤره ناراحاتام.بير تهر ايله بالابگيم و قارداشيني قونشولارينين ائولرينه آپاريب، اونلارا بير تيکه چاي چؤرک وئريرلر. هي بالابگيم ده قونشولاريندان سوروشور کي:–
آتام ايله آنامي بير يئره گئدنده گؤرن اولماييبدير؟ يوخودان دوروب گؤردوم ائوده دگيللر.بالابگيم تئز- تئز آناسي ايله آتاسيني سوراقلاشير، بير تازا گنج گلين اولان قونشولاري اوشاقلارين اوزونه باخيب، دونوق- دونوق ديير:
– هلبت بير يئره گئديبلر دا بالابگيم. بير تيکه چؤرک يئيين، اونلار دا گلر.
بالابگيم:-ين رنگي پؤرتوب، سانکي بير نفر اورگينده، بؤيوک بير قضانين باشلارينا گلديگيني، ائولرينه دومان چؤکدويونو ديير. بالابگيم.-ين دوداقلاري توتار توتماز بيردن دئدي:– اولمايا آنام ايله آتامين باشيندا بير اويون وار بيزه دئميرسيز؟!
بالابگيم:-ين کنديسيندن نئچه ياش بؤيوک اولان قارداشي اؤزونو سينديرمادان باجيسينا ديير:– بالابگيم چؤرک يئييرسن يئه، يئميرسن دور گئدک ائويميزه! ايندي آنام ايله آتام گلر.
سؤز قارداشينين آغزيندان چيخماق همن بالابگيم تئز يئردن قالخيب قارداشينا دئدي:
– دور آياغا داداش! دور گئدک ائويميزه، چؤرگه مئيليم يوخدور. گئدک اوجاغي يانديراق، آنام ايله آتام گلنه بير چاي قوياق، يئتيرمک همن ايچسينلر.بئله ده قونشولارينين گؤزلري دولوب دئه ها دئه اؤز.- اؤزونه ياش آخارکن اؤزونو آنجاق ساخلاييب، بالابگيمه دئدي:–
آي بالابگيم، بيزيم تويوغون جوجه‌لريني گؤرموسن؟ تازا يومورتادان چيخيبلار، دؤرد گونلوکدولر، ائله گؤزلديرلر کي، آدام ديير باخديقجا باخيم. دور گئدک اونلارا بير باخاق گور نه گؤزلديرلر.
او حالدا قونشولارينين قاپيلاري دؤيولدو، بالابگيم سئوينجک دئدي:– داداش سانکي آنام ايله آتام گليب گؤروب ائوده دييليک، اونلاردير قاپيني دؤيورلر، قوي من قاچيم آچيم.قونشولاري ايسته‌ييردي آغزيني آچيب بير سؤز دئسين،گؤردو بالابگيم بودور ها، قاچدي قاپيا ساري.
قاپيني آچماميشدان گؤردو ايکي قادين قاپينين داليسيندا بير- بيرينه دييرلر کي:
-آللاه او اوشاقلارين کمگي اولسون، او اوشاقلار يازيق اولدولار!
بيري دئدي:– آي بالا من هئچ زادا چوخ يانميرام، بالابگيمه چوخ يانيرام. او نئجه آتا- آناسيز قالاجاق؟! اونو هِيوا ايله بالاخان چوخ ناز ايله بؤيودوردولر.
او حالدا بالابگيم:-ين الي قاپينين يئزه‌سينده قورودو، دنيا حيوان بالانين باشينا دولاندي، روزگاري عوض اولدو. اونون داليسيجا چيخان قونشولاري گؤردو بالابگيمين الي قاپينين يئزه‌سينده ساناسان برق توتوبدور. تئز قاچيب بالابگيم
- ين اليندن ياپيشاندا گؤردو اللري بوم بوز اولوبدور. بالابگيم هاردادير، حيوان بالا يئرينده قوپ قورو قورويوب ساناسان اؤلوب دور. اوشاغي قوجاقلاييب تئلئسيک قاپيني آچدي.
منبع :