هِيوا
هِيوا
1400/11/03
بولگه لر سرويسي: آلماسين اوشاقلارينين بير شيطان صفت خالالاري وار ايدي. آلماسين قاباقکي خانيميني او دق ائيله‌تديريب اؤلدورموشدو. نانجيب- بخيل بير آدام ايدي. او، ياواش- ياواش اوشاقلاري قورشالاماغا باشلايير.
داود_پيرعليلو
بولگه لر سرويسي: آلماسين اوشاقلارينين بير شيطان صفت خالالاري وار ايدي. آلماسين قاباقکي خانيميني او دق ائيله‌تديريب اؤلدورموشدو. نانجيب- بخيل بير آدام ايدي. او، ياواش- ياواش اوشاقلاري قورشالاماغا باشلايير.
اوتورور- دورور اوشاقلارا ديير، او اؤز آناز دگيل، بوگون- ساباح دا بير اوشاغ گتيره‌جک، سيز ايشله‌يه‌سيز اونون اوشاقلاري ييه.
آلماسين داواري، مالي، کهر آتلاري وار، دنيا مالي لحاظيندان کِيفي ساز ايدي.ائله کي خالالاري اوشاقلاريني اؤگردير مال- داوارا باخان اولمور، اوغلانلاري داوارلاري آپاريب آجي به سوسوز بير داشلي- قوملو چايلاقدا ياتيرديرلار، آخشامدان آخشاما گتيريرلر کنده طويله‌يه ساليرلار. بيرگون آلماسين کندده اولان باجيسي باغلارينا گئدنده گؤرور آلماسين بؤيوک اوغلو مال- داواري چايلاقدا آج به سوسوز ياتيرديب اؤزو ده چيخيب بير بؤيوک داشين اوستونده اود يانديريب، چاي قويور. عمه‌سي اوغلاني چاغيرير ديير:– آي بالا بو مال- داواري بوردا آج ساخلما، اؤتور قوزئيده اوتلاسينلار،آلله-ا خوش گئتمز، گناهدير.جوابيندا اوغلان ديير:– آي عمه! من ايشله‌يه‌جاغام آيريسي يئسين؟! من اؤگئي قارداشا، اؤگئي آنايا مال ييغاجاغام؟!عمه‌سي بو سؤزو ائشيديب برک ناراحت اولور، گليب بو سؤزو قارداشي،آلماسا ديير:-سنين بؤيوک اوغلون بئله بير ايش گؤرموشدو، من دئديم گناهدير، منه بئله جاواب وئردي. قارداش، اوشاقلارينا اوتور نصيحت وئر، او خانيم دا يازيقدير شهردن گليب بوردا سنين هر چتينليکلرينه دؤزور. اوغلونون سؤزلريني ائشيديب بيلسه، او دا اورکدن ناراحت اولار، اونون دا سنين مالينا جاني يانماز.آلماس همن گونون آخشامي گؤرور اوغلو ايکي داوارين باشيني کسيب، کنده گتيردي. آلماس اوغلونا دئدي:– بو داوارلارا نه اولوب؟ نيه باشلاريني کسميسن؟اوغلو دئدي:– آتا بونلاري ايستي وورموشدو. گؤردوم اؤلوب مُردار اولاجاقلار اونا گؤره باشلاريني کسديم کي، هيچ اولمازسا اتلري يئييلسين، مردار اولماسين.آمما آلماس حال قضيه‌ني ياخشي بيليردي، باجيسي اونا دئميشدي، آنجاق اوستو اؤرتولو اوغلونا بير آز نصيحت وئريب، داها آيري سؤز دئمه‌دي.
اول ايل مال- داوارين ياريسيندان چوخو آجيندان، سوزوندان قيريلدي. آلماسين اوشاقلاري دا هيچ بيري مال وارليقلارينا جان يانديرماديلار. آلماسين هر نه‌يي وار ايدي دؤرد ايلين ايچينده اليندن چيخدي.اوغلانلاري آلماسدان آيريليب گئديب ائولنديلر، قيزلاري دا اره گئتدي. قالدي بير آلماس بير قوجاليق بيرده بالابگيم. اون ايله قدر بالابگيمين اوشاغي دا اولماميشدي. بيرگون بالابگيم بيلير کي، بطنينده اوشاغي واردير. سئوينيردي کي اوشاغيم اولاجاق تکليکدن چيخاجاغام، منيم ده اليمدن ياپيشانيم اولاجاق. او گون کندليلردن بيري بالابگيم- ين قارداشينين اؤلوم خبريني گتيردي.
بالابگيم ائشديب برک ناراحت اولدو. اورکدن آغلايا- آغلايا اليني گؤيه گؤتوروب آلله-ا دئدي:
– الهي من کيمه تاوان وئريرم؟! نيه بس منيم اوزومه گون دوغمور؟ آنامي، آتامي، باجيمي، اوشاقلاريمي مندن آلدين. ايندي بير قارداشيم قالميشدي اونو دا منه چوخ گؤردون ؟سنه شُکرلر اولسون آلله بئله بنده ساخلاماغا نه وار؟!
بالابگيم بئله سؤزلر دييب آغلايير، سيزلايير غربت يئرده، آدامسيز غريب بير انسان…
گونلر کئچدي بالابگيم بير گؤزل اوغلان اوشاغي دنيايا گتيردي. اما آلماسا هم قارداش اولوب، هم خانيم اولوب، هم اوغول اولوب، گئجه- گوندوز بالابگيم چاليشير ايشليير. ياواش- ياواش مال داواري زحمتلرينين گوجونه اله گتيردي، اوغلو دا بؤيويوب ياواش- ياواش اللريندن توتور. بير گون قيش فصليدير، چيلله گئجه‌سي. هاوا يامان بوراندير. بالابگيم کورسونون اوستونه يئمه‌ليدن، قووورقادان، قارپيزدان قويوب قوقو چيراغي دا ائولرينين طاقچاسيندا يانير. بيردن گؤردولر قاپي دؤيولدو. تاق تاق تاق …بالابگيم ايسته‌دي دورا آياغا، آلماس قويمادي. دئدي، اؤزوم گئديب قاپيني آچارام. حيطلري بؤيوک کند حيطي دير دا، آلماس دوروب قاپييا گئتدي. يئتيريب قاپييا دئدي:– قاپي دؤين کيمسن؟باجيسي گوله- گوله سسلندي:– منم قارداش، قوناق ايسته‌ميرسيز ؟آلماس سئوينيب قاپيني آچدي، دئدي:– نيه ايسته‌ميريک! سندن ده عزيز قوناق؟! گئچين گلين ايچرييه، هاوا چوخ سويوقدور.باجيسي حيطدن سسله‌يير:– بالابگيم! قادان آليم قوناق ايسته‌ميرسن؟بونو دييه- دييه گلير. بالابگيم بالديزينين سسيني ائشيدجک کورسودن دوروب ائوين قاپيسيني آچاندا گؤردو بالديزي‌دير، همان بالديز کي بالابگيمي قارداشينا تيکه توتموشدو. اؤپوش، گؤروش، گئچيب کورسوده اوتوروب دئدي:
– آي بالابگيم هاوا چوخ سويوقدور، ايندي ايستي چاي يامان ياپيشار، منه بير ايستي چاي تؤک ايچيم.بالابگيم بالديزينا تئز بير چاي وئردي، باشلاديلار گئچنلردن دانيشماغا. صحبت يامان شيرين گليردي، بالابگيم- ين اوغلو بابک، شيرين- شيرين قولاق آسير. سؤز سؤزو گئتيرير آرشين بئزي.سؤز گلدي چاتدي بالابگيم- ين آناسي هِيوانين قايناناسيندان قالان خاطره‌يه. باشلادي حاجي لِيلگين خاطره‌سيني دئمگه. بابک ايکي قولاق دا بورج ائيلييب قولاق آسير. خاطره قورتولاندان سونرا بابک دئدي:– آنا همان آغاج گؤره‌سن قالير؟ حاجي لِيلکلر گؤره‌سن ديريديلر؟بالابگيم دئدي:– بالا بيلميرم کي. نئچه ايل بوندان قاباق بير دفعه کنده گئديب گؤردوم. اوندان بو يانا بيلميرم اؤلوبلر قاليبلار،آغاج قالير يا يوخ.بابک دئدي:– آنا منه بير سؤز وئررسن؟بالابگيم دئدي:– نه سؤزو اوغول؟!
منبع :