هِيوا
هِيوا
1400/10/05
بولگه لر سرويسي: آي بالاخان پيچاغيني جيبيندن چيخارد قارپيزي کس گؤره ک شانسيميزا نئجه چيخاجاقدير.
داود_پيرعليلو
بولگه لر سرويسي: آي بالاخان پيچاغيني جيبيندن چيخارد قارپيزي کس گؤره ک شانسيميزا نئجه چيخاجاقدير.
بالاخانين بير قارا دسته‌لي پيچاغي وار ايدي، دسته‌سي بوينوزدان دوزلميشدي. تيغه‌سي ده چوخ ايتي بير پيجاق ايدي. هميشه يانيندا اولاردي بونا گؤره کي، ايشي داوار آلوئري ايدي، بيردن داوارلارا بير زاد اولسا تئز باشيني کسسين، قويماسين مردار اولا. جيبيندن چيخارديب قارپيزي ياواش- ياواش کسير، هره بير طرفده باخير. بيري ديير کالدي، بيري ديير يئتکيندير. . . قارپيزي کسيب قورتاراندان سونرا آغ آپباغ چيخدي او بيري قارپيزي گتيرديلر، اونو دا کسندن سونرا گؤردولر او دا کالدير اوچونجو قارپيزي دا کسيب گؤردولر او دا او بيريسيلَره تايدير. بالاخانين حالي توتولوب داها دينمير،کي اوچ قارپيز چيلله‌يه ساخلاييب، اوچو ده کال چيخيب. اؤز- اؤزونه دئيينير. کال قارپيزلاري آرادان گؤتوروب بير تَليسه ييغديلار کي، سونرا دوغراييب داوارلارا وئره‌لر. بيردن بالابگيم اؤز قارپيزيني گتيريب کورسونون اوستونه ديغيرلاتدي. چپيک چاليب، دئدي:-آتا ايندي گؤر من ساخلايان قارپيز نه چيخاجاق .
“آتا، باشينا دولانيم منيم قارپيزيمي کس” دييه کورسونون باشينا دولانير چپيک چالير،گولور. بالاخان بونا گؤره کي بو دا کال چيخاجاق حيرصيندن بالا بگيمي هايلاشديريب، دئدي:– قيز گل اوتور يئره. او قارپيزي دا گؤتور آت او يانا. او دا ائله او بيريلره تاي اولاجاق.
بئله‌ده هِيوا پيچاقي بالاخاندان آليب، دئدي:-ال گرک ال اولا ايندي بونو اؤزوم کسرم گؤر نئجه قيرميزي چيخاجاق.شوخلوقجا پيچاقي قويجاق قارپيز بيردن جير گئديب، ايکي بؤلوندو. قارپيز نه قارپيز؛ قيپ قيرميزي، سانکي بوياقلي ناردير. کورسونون باشيندا اوتورانلار هورا چکيب هره بير ياندا دييرلر-گولورلر کي، قارپيزي هِيوا کسيب اونا گؤره قارپيز قيرميزي چيخيب. او گئجه چوخ گؤزل بير گئجه‌لردن ايدي.گئجه ياواش- ياواش ياري اولماقدا گؤزلردن يوخو تؤکولور هره بير طرف ده چُرت وورمادادير، اما بالابگيم ين يوخوسو گلمير. بالابگيم آناسينين يانيناگئديب کورسو يورغانيني باشينا چکيب، آناسينا ياواشدان پيچيلداييب دئدي:– آنا، بوگئجه بير آتا- آنانين خاطره‌لريندن منه تعريف ائيله يوخو آپارسين ياتيم.
آناسي دئدي:
– قيزيم قوي قالا ساباح گئجه دييرم. بوگئجه هامي يورولوب يوخولاري گلير، قوي ياتسينلار. هم ده ياري گئجه اولوب بيوَقتدير، سن ده باشيني آت يئره يات، سؤز وئريرم ساباح سنه بير عجيب خاطره تعريف ائدم. بالابگيم ين سؤزلريني ائشيدن هِيوانين باجيسي، پيچيلتي ايله هِيوايا دئدي:
– آي باجي قاداني آليم، منيم ده يوخوم قاچدي، قوي من ده گليم کورسونون سيز ياتان وَرينه، قاينانانين حاجي لِيلَکلري بالالاريندان آييرماسيني تعريف ائيله.
هِيوا دا لاپ ياواشدان دئدي:
– آي باجي سن ده وقت تاپدين؟ اوغرونون يادينا داش سالدين ايندي بالابگيم هيچ قويماياجاق ياتاق کي، او خاطره‌ني تعريفله.
باجيسي گوله- گوله دئدي:
-باجين قوربان اولسون سنه باجي، بو دا بير گئجه‌دير دا. ياقسمت بير ده بوجور جمع اولوب بير يئره ييغيشيب دردِ دل ائيله‌يک، هله او خاطره‌ني تعريف ائله ياتاق. بالابگيم ده کي ماجال وئرمير، هي خالاسينين سؤزونون آراسينا گيريب ديير:
– آنا قربان اولوم سنه! دئ دا نه اولار، بودور با خالام دا ديير کي، او خاطره‌ني تعريف ائيله. اينديه قدر بيزه دئمه‌ييبسن،آنا باشينا دولانيم دي دا.
هِيوا ياواشدان بالابگيمي هايلاشديريب دئدي:
– قئز باشيني قوي يئره يات، سس سالما قوي ياتانلار راحات ياتسينلار. بيردن بالاخان کورسونون او اليندن دئدي:
– هِيوا منيم گؤزل بالامي بيکِيف ائيلمه، منيم ده يوخوم قاچدي. چوخداندير او خاطره‌ني ائشتمه‌ميشم،تعريف ائيله ياتاق.
هِيوا قبول ائديب باشلادي قايناناسينين، کي بالابگيمين بؤيوک آناسي اولوردو، قايناتاسينين ديليندن ائشيدن خاطره‌ني تعريف ائيله‌سين. ماجرا بئله باشلانيردي، بيرگون هِيوانين قايناتاسي گيلين حيطلرينين بَرينده بير بؤيوک چنار آغاجي وار ايدي. او چنار آغاجينين لاپ باش طرفينده بير حاجي لِيلک اؤزونه يووا سالميشدي. نئچه ايللر ايدي، او حيوان اورادا ياشاييردي. ايلده اوچ آي اوردان ارکک- ديشيسي ايله کؤچوب آيري بير يئره گئديب اوچ آي قالاندان سونرا يووالارينا قاييدارديلار. او حاجي لِيلک جفت ايدي، ارکک و ديشي بير يئرده ياشاييردلار. او ايله قدر هيچ بير جوجه‌لري اولماميشدي. آمما او ايل حاجي لِيلگين ايکي بالاسي يومورتادان چيخدي، جوججولتو سسلري ائوه گليردي. هِيوانين قايناناسينين آدي سلمه خاتون ايدي. سلمه خاتونون حيطلرينده بير بؤيوک حوضلاري وار ايدي کي، نئچه دنه باليق او حوضا سالميشدي. سلمه خاتون هر آخشام او حوضون برينده اوتوروب او باليقلارين اوزمَگينه باخيب، خوشو گلردي و اونلاري دا چوخ- چوخ ايستردي. بيرگون آخشام چاغي، گونده‌کي تکين حوضون برينه گئديب اوتوردو، باشلادي باليقلارين اوزمه‌سينه باخماغا. او، باليقلاري هرگون ساياردي. او گونو سايدي گؤردو اون باليقدان ايکيسي يوخدور. چوخ ناراحت اولوب اؤز- اؤزونه دئدي حتما ايت يا پيشيک آپاريب. ناراحات گئديب بير آز او يانليقدا بير سؤيود آغاجينين داليسيندا گيزلنيب، حوضو گوددو.
بير زمان گؤردو حاجي ليلک چنار آغاجيندان اوچوب حوضا ساري گلدي، بو ال- آياغ ائيليه‌نه، تئز باليقلارين بيريني ديمديگينده توتوب چنار آغاجينين اوستونده‌کي يوواسيندا ائندي، باليغي بالاسينين آغزينا قويدو. سونرا يئنه ده اوچوب حوضدان باليقلارين بيريني ده ديمديگينده گؤتوروب يوواسينا آپاريب او بيري بالاسينين آغزينا قويدو. سلمه، حاجي ليلگين ايشيندن برک ناراحات اولدو، اونلارين يوواسيني داشا باسدي. داشلارين هردن بيري يووايا يئتيريب جوجه‌لرين و حاجي ليلکلرين باشينا دوشوردو.
حاجي‌لِيلَگين بالالاري اونون داشلارينا گؤره قورخوب، هول اولوب، بيردن يووالاريندان او يان- بو يانا قاچاندا ايکيسي ده آغاجين اوستوندن يئره دوشدو. چون هله اوچماق باجارميرديلار، تازا يومورتادان چيخميشديلار، بير تيکه ات کيمي يئره دوشجک دَمده جانلاري چيخير، ائله اوردا اؤلورلر. حاجي ليلکلر گؤرورلر بالالاري آغاجدان دوشدولر باشلارينين اوستونده گاه او يانا اوچوب، گاه بو يانا اوچوب سسلنيرلر. سلمه اؤزو ده گؤردوگو ايشيندن پشمان اولوب برک ناراحات حال ايله اوراني ترک ائديب، قونشولارينين ائوينه گئدير بلکه او آنا حاجي ليلگين بالاسينا گوره تقللاسيني گؤرمه‌سين. آنا حاجي ليلک سلمه گئدندن سونرا بالالارينين باشينين اوستونه قونوب اوزون ديمديگي ايله او بالالاري ترپَديب ناله ائدير. سلمه قونشولارينا ماجراني ديير کي نه اولوب. قونشولاري تئز ائودن چيخيب حاجي ليلکلره ساري گئدير. حاجي ليلکلر گؤرور آدام گلير بالالارينين بريندن اوچوب يووالارينا قونورلار. سلمه خاتونون قونشوسو اؤلن جوجه‌لري اوردان گؤتوروب آپارير بير داغ وار ايدي کي، اونلارين ائولريندن ايکي اوچ يوز متر آراسي اولاردي، او داغين اتگينده بير شور سويون آياغيندا اونلاري قويولاير، بلکه آنا وآتا حاجي ليلکلر بالالاريني گؤروب ناله ائتمه‌يه‌لر. قاييدان باشدا گؤرور آتا و آنا ليلکلر اونون باشينين اوستوندن کئچيب بالالاري تورپاغا قويولانان يئره ساري گئتديلر. او صحنه‌دن چوخ ناراحات اولوب ائوه قاييدير، چوخ ناراحات حال ايله اوزونو سلمه‌يه توتوب دئدي:
– آي سلمه باجي يامان گناه ايش گؤرموسن، آلله آخيريني خير ائيله‌سين او قوشلار چوخ برک ناله ائديرلر.
منبع :