سويوق کولکلر آدامين اوزونو قامچيلاييردي. بوزلارين اوستونده يورودوکده، بودرويوب ييخلماق قورخوسو دا واريدي. بوگون قالين گئيينسم ده سويوقدان ايچيمه گيرميشديم. جئبيم چؤلدن ده سويوق‌ايدي. اللريمي‌تئز- تئز آغزيمدا اووخالاييب، قوينومدا گيزله‌ديرديم. بوزوشوب گوده‌لميشديم. کناردان باخان مني، بئلي بوکولموش قوجا ساناردي. سئرچه‌لردن، سيغيرچينلاردان خبر يوخ ايدي. بو‌هاوادا ايتي ده ويرسان يوواسيندان چيخماز مثلي. گئتمه‌ليديم. آياغيمين آلتيندا قارين قابيرغالارينين و سوموکلرينين سانکي سينميش سسيني ائشيديرديم. قارين ازيلمه‌ييندن سئونجک دئييلديم. سسي، اعتراض کيمي‌قبول ائديرديم. من بيليرديم کي اونون حاقلاريني تاپدالاييرام. هئچ کيمسه بونا راضي اولا بيلمز بيريسينين حاقلاريني آياق آلتيندا قويسون. هر گون مکتبده، تئلويزيوندا، اينترنتده و چوخ يئرلرده حاقلارين قورونماسيندان سؤز ائشيديرديم. حتي بونا گؤرا نئچه- نئچه تشکيلاتلار، سنديکالار، قوروپلار يارانيب. فهله‌لرين، قادينلارين، انسانلارين و باشقا- باشقا قوروپلارين حاقلاريني قورويورلار. حئيوانلارين، طبيعتين و حتي دونيانين دا اؤزونه گؤرا حاق- حقوقي اولاراق، دونيا سويه‌سينده کئشيکچيلري وارميش.

هاوا ياواش ياواش قارالماقا باشلاميشدي. کوچه نين باشيندان آغزي آشاغا بير کيشي گليردي، بؤرکو دوز بوغازيناجان چکميشدي، گؤزلري چتين گؤرسه نيردي، عميم جواد ايدي، قارا بير پالتو ائينينده، يئکه بير پاليد آغاجي الينده و کولکلردن سوورولموش قاردان، دونموش اوستو باشي، کوچه يه اوزانميش قونشو ايشيغينين آلتيندا آغ مونجوق کيمي‌پاريلداييردي. مني گؤرجک دئدي.

– آي بالا بو قياماتدا‌هارا گئديرسن؟ قاييت بو يولدان،‌هاوالار چوخ سويوخدو. يا دونارسان، يادا سني قورت قوش يئير.– سنه قوربان عمي‌جان، چوخ اوزاغا گئتميرم. تئز قاييداجام.

کيشي‌يه سؤز وئرميشديم. بيرده منيم بيرينجي دفعم دئييلدي. اونلارين تنديرخاناسينين آرخاسيندا آنبار واريدي. بو گونلر چتين آغليم کسيردي کي بو سويوقدا چؤرک پيشيرسينلر. آنبارين ايچينده آدامدان سونرا هر نه تاپماق اولاردي. دمير پارالاري، اوت، سامان، آيري- آيري چوواللار، قوروتماغا گؤيدن آسيلان ساريمساق و سوغان گؤزه چارپيردي. هميشه کي کيمي‌يئريني بيليرديم. کيمسه گؤرمه‌دن قاپيني آچيب کئچديم ايچه‌ري. اودون اوجاغي يانيردي، اوجاغي تزه يانديرميشدي. ايچري توستولو و نئفت قوخويوردو. کيچيک بير چارپايينين اوستونده آغ کاپشئنلي و قالين قارا پوتونلو ،کريم، بير کيتابدان شعير اوخويوردو:

او قدري ناله ائتديم کي قيزاردي لاله تک باغريم

باخيب اؤز دؤوره‌مه گؤردوم قرنفيل، ياسمن ياندي

قونوب آسوده داملاردا، اؤتور هئيبتله بايقوشلار

الينده حقي بايراق ائيله‌ين، دوز يول گئدن ياندي.

مني گؤرجک قالخدي آياغا. چيناقلاريمدان ياپيشدي. سيلکه‌له‌دي و گولومسه‌يرک دئدي:

– اده سن يئکه بير ايگيدسن، بئله سويوقلاردان نه قورخوبسان؟ ائله بوزوشوبسن، دئديم بلکه بؤيوک بابام گلدي. يولچو يولدا گرک.

باخيشلاري و گولومسه‌مسي، سويوقو بوتونلکله ياديمدان چيخارتدي. اؤزو تک باشينا بير يئره باخاندا، چوخ جيددي باخيردي. منيمله دانيشاندا گؤزلرينين ايچي گولوردو. باخيشلاريندان گونشي و گولوشلريندن باهاري تجسوم ائديرديم. هر بير کلمه‌سي ايچيمده اوميد دوغوروردو. من اونا اينانيرديم.

– يامان يوبانميشيق داداش. بو گون ايشيميز چوخدو. بورا باخ بو کره دوز ايکي تليس وار.‌هامي‌ائوده‌دير. کيمسه چؤله چيخماز. فورصتدن استفاده ائديب بونلاري پايلاياق. بئش- بئش، اون- اون آت تليسه. دوستلارين آديني دا اوستونه يازميشام. سن آشاغا طرفه پايلا، من ده يوخاري طرفه.

تله‌سه- تله‌سه بير-بيريميزدن آيريلديق. هر دوستون قاپيسين دؤيدوکده اوره‌ييم يئرينده قالميردي. گوپ- گوپ سسيني آياقلاريمين تاپبيلتيسيندان داها ياخشي ائشيديرديم. بيرينجيسي، سئوينجدن. ايکينجيسي کيمين قاپييا چيخماغيندان نيگران ايديم. ايکي ساعات چکمه‌دي قاپي- قاپي دولاشاراق، ايشيمي‌بيتيرميشديم. يئني‌دن صاباح ناهاردان سونرايا قرارلانميشديق. گئجه‌ني سئوينجله سحره يئتيرديم. قراريميزا تله‌سيرديم. قاپييا چيخديقجا نه سويوقلوق حيس ائديرديم، نه ده نيگرانچيليق. ائلکتيريک سيملرده و آغاجلارين لوت بوداقلاريندا سئرچه‌لرين و سيغيرچينلارين رقصيني گؤروردوم. اوسته‌ليک ايکي قوش گؤورچين ده قورولداشا- قورولداشا، چاليشيرديلار آنامين تويوقلارينا سپدييي دنلره ياخينلاشسينلار. قرار واختي گليب چاتميشدي. کوچه‌لري، دؤنگه‌لري، دوننکي بوزلوقلاري نئجه قاچا- قاچا آتلاميشديم اؤزوم ده بيلمه‌ديم. تنديرخانايا ياخينلاشاندا، قيچلاريم قاچماقدان دوردو. بيرآز يئريديم. داها يئرييه بيلميرديم. اؤزومه دالدا بير يئر آختارديم و کناردان قيچلاريمين گوجونو گؤزلريمه وئرديم. باخديم…باخديم؛ داها چوح دقيق باخا بيلمه‌ديم. اللريمي‌گؤزلريمه چکه‌رک، گؤردوکلريمي‌خاطيرلاديم. تندير يانيردي، يانيندا ايکي نفر، انبارداکي تليس‌لرين ايچينده‌کيلرين، بير به بير تنديرين ايچينه آتيرديلار. بير نفرده يئرده اوزانميشدي. موغانين سيزاقي يئني‌دن باشلاميشدي. آياقلاريم دونوب، ديشلريمين بير-بيرينه ده‌يمه‌گينين سسيني دايانديرا بيلميرديم. اوره‌ييمين سسيني ائشيده بيلميرديم. پيس بير يئل اسيردي. تنديردن قوزانان بير پارچاني، کولک اؤنومه آتميشدي. ترپنه بيلميرديم. آنجاق ياخشي باخا بيليرديم. آلا يانيق بير شئيين اوسته ياريمچيق بير يازي اوخويا بيليرديم.