چؤکوش

بولگه لر سرويسي: يالين‌آياقلاري جوتله‌نيبدير. گؤزلري يوموق‌دور. دوداقلاري گوموشو بولودلار قده‌ر پاريلدايان بيغ- ساققالي‌نين آراسيندا ايتيبدير. پامبيق قده‌ر آغ ساچلاري، آشاغييا ساري آخان چييينلرينه دوشوبدور. بوغازينداکي ايپ، فيليمده‌کيلر کيمي دوگونله‌نمه‌سه‌ ده، اؤز گؤره‌ويني اييي‌جه يئرينه‌ يئتيريبدير.

ويدا حشمتي

بولگه لر سرويسي: يالين‌آياقلاري جوتله‌نيبدير. گؤزلري يوموق‌دور. دوداقلاري گوموشو بولودلار قده‌ر پاريلدايان بيغ- ساققالي‌نين آراسيندا ايتيبدير. پامبيق قده‌ر آغ ساچلاري، آشاغييا ساري آخان چييينلرينه دوشوبدور. بوغازينداکي ايپ، فيليمده‌کيلر کيمي دوگونله‌نمه‌سه‌ ده، اؤز گؤره‌ويني اييي‌جه يئرينه‌ يئتيريبدير.
منه حيطده‌کي تاغين اورتالاريندان آسلانان اوزوملري خاطيرلادير. اوزو، کيشميشي اوزوم قده‌ر ساري‌دير. هئچ ترپه‌شمير. سانکي هر آن گؤزونو آچيب، اطرافا درين باخيشيني ديکله‌ييب، گولومسه‌يه‌جکدير.
قيسسا قوللو ماوي، آغ يوللاري اولان کؤينه‌گي‌نين ياخاسيندان کؤهنه ترکؤينه‌يي ديشاري چيخيب‌دير. بيردن کؤينه‌گي‌نين اته‌گينه گؤزوم دوشور. بير طرفي آشاغي، بير طرفي اوستده دوروبدور. بللي‌دير کي، کؤينه‌گيني تله‌سه-تلسده گئييب، دويمه‌له‌ييب‌دير. آخي، پالتارلاري کؤهنه اولسايدي دا، دوزه‌نلي گئيينردي. اؤز-اؤزومه دئييرم:
– بو ايشده بير ايش وار.
قيللي قوللاري يانينا دوشموش، اللري‌نين دامارلاري سولوقموش حالدادير. بيله‌يينده‌، گؤي رنگينده‌کي بارماق ايزي ايلگيمي چکير.
نئچه گون اؤنجه ايدي. ايکي کيشي ناهار چاغيندا، اونو کوچه‌ده دووار ديبينده قيسديرميشديلار. کؤک اولان ساققالي کيشي حيرصله آغزيني اونون اوزونه ياخين توتوب، توپورجه‌گيني اوزونه سپه-سپه، قيسيلميش سسله باغيريردي. سرت حالدا ياشلي کيشي‌نين بيله‌گيني سيخميشدي. او بيري کيشي داها گنج اولان سا، الي‌نين بيريني دووارا سؤيکه‌ييب، اونون قاچماغيما مانع اولاجاق کيمي دايانميش، سيقارا چکيردي.نه‌دن سه، اوزون زاماندير اينسانلار اوچون حيسسيمي ايتيرميشم. کيمسه‌نين دردي-سئوينجي وئجيمه دييل. هئچ نه اوچون، هئچ کيمسه اوچون اوزولوب، ماراقلانماماغا چاليشيرام آرتيق.دونن گئجه اونو کوچه‌ده گؤردوم. مني چاغيردي. ايستر-ايسته‌مز ياخينلاشديم. بيرليکده بيراز يول گلديک. نه‌دن سه او اولايي گؤردويمدن اونا سؤز آچماديم. درديني سوروشماديم. آنجاق آيريلديغيميزدا، هئچ اؤزونو آساجاق آداما بنزه‌ميردي. هميشه‌کي کيمي ياشامدان دانيشيردي:
– باخ! سئوگي اينساني آياقدا ساخلار. سئوگي‌سيز اورک وورار، آنجاق چيرپينماز…
»سونرا قوللاقليغيني قولاقلاريما قويارکن، ليلي-مجنون اوپراسي‌ني چالير« دئدي. دينله‌ديم. قولاقليقلاري چيخارديب، اونا ساري توتدوم. اوزومده‌کي ايفاده دييشيلمه‌ميشدي.
– گؤره‌سن اؤزونو آسيب گرچکدن؟
کناريمداکي گؤزلوکلو اوغلانا باخيرام. ماراقلا اونا باخيب، دئيير:
– واللاهي من اونو تانيرام. اؤزونو آسمازدي بو آدام.
من ده گؤزلريمي قيييب، اونون دئديييني اؤزومه تکرارلاييرام.
– گؤره‌سن اونو سئوگي‌سيزليک اؤلدوردو؟
گؤره‌سن نه دوشوندو ده، اؤزونو آسدي؟ دوغرو دئيير بو اوغلان. او اينتحار آدامي دييلدي.
اؤز-اؤزومه دئييرم »سنه نه؟«
نئچه گون اؤنجه ياديما دوشدو. خياواندا بير کيشي بير قاديني فرمان قيفيلي ايله ووروردو. اونا سؤيوش دئييردي. بيز يولدان کئچن‌لر ده اونا باخيرديق. هئچ تپگي گؤرسه‌تمه‌دن تکجه باخيرديق. ايندي بيليرم »سنه نه؟« دئمه‌گين نه اولدوغونو. ياخشي آنلاميشام.جماعاتين اورتاسيندان يئر تاپيب، چيخماغا چاليشيرام. قيچلاريمدا سوستلوق حيس ائديرم. مامورلار او آن يئتيشيرلر.
»ائشييه گؤروم« دئين مامورون سسيني ائشيديرم. هر کسي او کيچيک حيه‌طدن ديشاري ساليرلار. کوچه‌ده‌کي جاماعاتين آراسيندا قالماقال دوشور. دايانيرام.
بير کيشي ياواش سسله باشقاسينا دئيير:
– بو محله‌ده بو ياشلي کيشيدن سس‌سيز-سميرسيز اينسان تاپيلمازدي. هميشه قولتوغوندا بير کيتاب، آستاجا گئديب، گلردي.
باشيمي ساللاييرام.
– هانسي قاسيرغا اونو بو اسکي دخمه‌يه آتميشدي گؤره‌سن؟ همان کيشي دئيير.
بير باشقاسي آرخامدا ياوش سسله دئيير:
– هردن يوخاري ماحالداکي قهوه خانايا گليب، چاي ايچردي.اوزونه باخيرام.
– هه… بلکه ده داريخمالار اونون ايچيني قاراتماسين دئيه، قهوه خانايا گلردي. دئييرم.
– من اونو ياشيندان-باشيندان دولايي کيتاب اوخويانا بنزه‌تمزديم. ايلک دفعه چوخ چاشميشديم. آخي بيزيم محلله‌نين قوجالاري، کيتاب اوخومازلار. گنج بيري کيشي دئدي.
او بيري کيشي گولومسه‌ييب، دئدي:
– چوخ بؤيوک ايش گؤرسه‌لر، مخلله‌نين کيچيک مسجدينده ييغيشيب، باهاليقدان دانيشارلار.
– دوغرودور. گنجلردن ده کيتاب اوخويان بيريني گؤرمه ميشم هئچ!… ميزيلدانيرام.

منبع :