ساري گلين

بولگه لر سرويسي: ماراليم! قلبيمين جوشان پيناري. ساري ساچلي گؤزل قيزيم! اينسانلار بو دونيادا نه ائتمه‌ديلر کي؟! گاه حرامي، اَهريمن و شيطان اولوب دونياني و وارليق‌لاري، قارانليقلارا سورودولر. خيال‌لاريندا گاه جنت ياراتديلار، گاه دا جهنم. آمما بو دونيادا اَن اؤنَمسيز، تکجه اينسان‌لارين سعادتي اولدو. بير پارا آدام‌لاردا ساواش‌لار و قاوقالار ياراداراق بير کوپه قيزيل، بئش قاريش تورپاق و دؤرد گونلوک قودرته خاطير، يئر اوزونده اؤزلرينه جنت قورماغا چاليشديلار. تانري‌يا قولوق دئيه، اؤزلريني تانري‌دان اوستون سايديلار. آسديلار، کسديلر، توتدولار و قولدورلوقلا، حاققا و دوزلويه اينانان و اسکي قارا دوشونجه‌لري قارقيشلايانلارا قان اوتدوردولار. عصيرلر بويو ائله اينسانلار بو ساياق گليب نسيل‌لر دَييشيلدي، آمما يئر کوره‌سينده، زامان – زامان باخيشلار دَييشيلدي و شنليک‌له ياشايانلار دا اولدو.

عليرضا ذيحق

 بولگه لر سرويسي: ماراليم! قلبيمين جوشان پيناري. ساري ساچلي گؤزل قيزيم! اينسانلار بو دونيادا نه ائتمه‌ديلر کي؟! گاه حرامي، اَهريمن و شيطان اولوب دونياني و وارليق‌لاري، قارانليقلارا سورودولر. خيال‌لاريندا گاه جنت ياراتديلار، گاه دا جهنم. آمما بو دونيادا اَن اؤنَمسيز، تکجه اينسان‌لارين سعادتي اولدو. بير پارا آدام‌لاردا ساواش‌لار و قاوقالار ياراداراق بير کوپه قيزيل، بئش قاريش تورپاق و دؤرد گونلوک قودرته خاطير، يئر اوزونده اؤزلرينه جنت قورماغا چاليشديلار. تانري‌يا قولوق دئيه، اؤزلريني تانري‌دان اوستون سايديلار. آسديلار، کسديلر، توتدولار و قولدورلوقلا، حاققا و دوزلويه اينانان و اسکي قارا دوشونجه‌لري قارقيشلايانلارا قان اوتدوردولار. عصيرلر بويو ائله اينسانلار بو ساياق گليب نسيل‌لر دَييشيلدي، آمما يئر کوره‌سينده، زامان – زامان باخيشلار دَييشيلدي و شنليک‌له ياشايانلار دا اولدو.
ماراليم ! بونلار بير طرفه؛ طبيعت اينسانلارا و بوتون جانلي وارليق‌لارا حياتين شيرينلييين داديرسادا، سئلي ده اولدو، فيرتيناسي دا. زلزله ده قوپدو، وولقان دا. يئر اوزونده تورپاقلار بؤلوندو و هر يئره بيري صاحيب اولاراق، وطن ياراندي و وطنه محبت ده اولدو، تعصوب ده؛ آمما يئر اوزونده اينساندان باشقا هرنه جانلي وارسا و حتا ييرتيجي اولانلار تاي‌لارينا تاي توشلارينا دوست اولوب، آرخا دوروب آجليقدان گَبَرسه‌لرده، اَت‌لريني يئييب قانلاريني تؤکمه‌ديلر.
ماراليم! بونلارلا بئله، اينسانلار ايچره درين اينجه دويغولو و جانلارا ده‌ين جانلار دا اولدو. آداملار بير پارا آداملارا اينسان دئديلر و بير چوخونا دا اَهريمن. اهريمني آداملار، شيطاني لعنت‌لسه‌لرده ايچ‌لرينده بالالييان شيطاني گؤرمزدن گليب اوره‌ک‌لر پارچالاديلار.
بونلاري دئديم سؤز آچاق گونش سيمالي و سينه‌سي آي اولدوزلو ساري گلين‌دن؛ ساري گلين‌ين حئکايه‌سيندن.
مين‌لر ايل اؤنجه، تبريزده هله گؤي مچيد تيکيلمه‌دن و اورمودان گلن آتلار کيشنه‌ييب خزرين قوينوندا دالغالار رقصه گيره‌ن اودلار دياريندا، مَلَک روحلو اينسانلار، اَهريمن و دئو صيفتلي آداملارلا ساواشا گيريب بؤيوک بير قاوغا ياراندي. او زامانلار و او آنلاردا، گونش قيزيل ساچلاريني هؤروب سما‌دان يئره قوناراق، نه گون باتان وارايدي نه گون چيخان. آي اولدوزلار وار ايدي، آمما ايشيقسيز و گؤرونمز. ظولمتين نه اولدوسونو هله اينسانلار آنلاميرديلار. آمما گونش‌ين آلتين ساچلاري، آداملاري ايکييه بؤلدو. بيري‌لري اونو جاندان سئويب وارليغينا شوکر ائده‌رک، ائل‌لرينه گلين آپارماق ايسته‌ديلر؛ بعضي‌لري ده اونو اوغورلويوب آيدينليغي بوغاراق، قارانليق ايش‌لر سايه‌سينده جَهلي، خورافه‌ني و يالاني يالتاقليغي يايماغا چاليشديلار. گون اوگون اولدو کي اهريمن دوشونجه‌لي آداملار، بولور قلب‌لي آيدين اينسانلاري قانا بولاشديريب اعتراض فرياد‌لاريني سوسدوردولار و گونشي اسير آپارديلار. اونلار ظفر تاپديقدا، آيدين فيکيرلي اينسانلار ماهني‌لار قوشدولار:
ساچين اوجون هؤرمزلر، گولو قونچا دَرمزلر… ساري گلين
بو سئودا نه سئودادير؟ سني منه وئرمزلر…
نئيليم آمان، آمان، آمان… نئيليم آمان، آمان… ساري گلين
اهريمن‌لر گونش‌ين آلتين ساچلاريني قيريب يولارکن، تکجه اونون ساچسيز سيماسي قالدي و سؤنمز ايشيغي. اينسانلار ايسه ماهنيني دوام ائتديلر:
بو دره‌نين اوزونو، چوبان قايتار قوزونو… قوزونو…
نه اولار بيرگون گؤره‌م نازلي ياريمين اوزونو…
نئليم آمام، آمان… نئليم آمان، آمان… ساري گلين
گونش گؤردو خئير ايله شر يئر اوزونو بورودو و داها، چوخ قلب‌لره نور اثر ائتميري. بو اوزدن، گونش قيزمارليغيني آرتيريب گؤي‌لره ساري قاناد آچاراق، کهکشانلارين پارلاق گليني اولدو و کهکشاندا ائله يئرده بير قصر قوردو کي، يئرکوره‌سيني گاه قارانليغا بوغدو، گاه ايشيق‌ليقلا آيدينلاشديردي و گونشه وورغون اولان اينسانلار ماهني‌لاريني بئله قورتارديلار :
عاشيق ائللر آيريسي، شانا تئللر آيريسي… ساري گلين
بير گونونه دؤزمزديم، اولدوم ايللر آيريسي…
نئيليم آمان، آمان… نئيليم آمان، آمان… ساري گلين
سونو بللي اولمادان، او گونلردن مين‌لر اؤتدو و اؤته‌جکدير، آمما حيات دوردوقجا، آلاولار يوردوندان، ساري گلين ماهنيسي، مين‌لر بوغازدان سسله نرک، گونشين قولاغينا چاتيب، جانينا جان قاتاجاقدير.

منبع :