قديم آداملارين تفرئحي
قديم آداملارين تفرئحي
1397/09/26
بولگه لرسرويسي: بيزيم اوشاقليق زاماني رسانه‌لر، ارتباطي وساييل آزيدي. چوخ ائولرده تئلويزيون يوخويدي. بعضي ائولرده بير سينيق راديو اولاردي؛ اونودا نه اينکي فرستنده زاد گوجسوزييدي، داييم پارازيت بوراخاردي و اخباردان زاددان چوخ کوشولتو ائشيدرديک. خوب، ايندي دئييرسيز بئله بير وضعيت‌نن ميللتين تفرئحي نجور اولاردي.
عرض ائله‌ييم او زامان ميللت گونوزلر کوچه‌ده يا توکانلارين، قفه‌لرين قاباغيندا اؤزلرين گونه وئررديلر و ان بؤيوک سياسي- اجتماعي، عائيله‌وي مسائلي ائله بو گونه‌ورلرده دانيشيب حل و فصل ائلرديلر. چونکو ميللت اوندا قيرخ قات والانلي پرده‌نين داليندا گيزله‌نيب منيم کيمين گونشدن يازمازديلار. آخشاملار دا قونشو- قوهوم بيربيرينين ائوينه گئديب گئجه ياريسيناجا هر دره دن دانيشيب گولرديلر. اوندا بو زهريمار کامپيوتر، گوشي، تلگرام يوخويدو کي ميللت اوشاغ بؤيوک باغا کيمين تپيله ايچينه.
بيردنه‌ده اوشاقليق تفرئحلريميزدن بير مشهور کئفلي وارييدي شهريميزده. ائوي تيکيلن شارابي گؤردو نه بير ايکي گيلاس ايچه، ائله کوپونده چيميردي، لول کئفله‌نيردي. بير يول خبر گليردي فلانکس سبزه مئيداندا کئفله‌نيب آرخا توشوب. بيز اوشاقلار اتي کسيلميش کيمين قاچارديق باخماقا. او ائششک کيمين آرخدا آغناردي، جماعاتدا باخاردي. داي بتر تفرئحميز وارييدي.
بيردنه‌ده تفرئحلريميزدن پهلوانا باخماقيدي. جماعت اوسته اوسته دوراردي پهلوان مئيدان اوخوياندا. پهلواندا ميللتي چوخ گؤروب اؤزوندن چيخيب گاه ماشين سينه‌سيندن کئچيردردي؛ گاه زينجير قيراردي؛ گاه مجمعي جيراردي. و آمما لااااپ بؤيوک تفرئحيميز اگر بيلسه‌نيز نه اييدي؟ قونشولارين ساواشماسي. قديملر نه اينکي جاماعاتين بيربيريله چوخ ارتباطي وارييدي چوخدا پيرتلاشيب، ساواشيرديلار. ايندي کيمين دئييلدي کي آپارتمانين بير طبقه‌سينده قونشونون بيري لاپ اؤلسون باشقالارين خبري اولمور.
بعلي؛ گونلرين بير گونو ياي گونون بيري، ناهاري تزه يئميشيک، هره بير يئرده هرله‌نيب استراحت ائليريک؛ لاپبادان‌هاي قوپدو. ديک آتيلديق نه اولوب؟ هره‌ميز تاي دئيشيک باشماقدان زاددان گئييب قاچديق کوچه‌يه. ائيييي کوچه دوز شبئه مئيداني‌دي. ننه‌م بيريندن سوروشدو: آي باجي نه اولوب؟
– نه اولاجاق؛ گولتاج شاصنمين بير دسته تويوغ جوجه، غاز، هشترخانينا ددت وئريب اؤلدوروب.
ننه م: ويييي باشيما خئير. نئجه کي باجي؟
– گويا شاصنمين تويوغ جوجه سي هئي گئديرميشلر گولتاجين حيطينه. اوراني سيچيب ميردارلاييرميشلار هله هئچ. گولتاجيندا تويوغ جوجه‌سينين دن دوشون اليندن آليب تؤکورميشلر قارينلارينا. گولتاج نئچه دؤنه شاصنمه اخطار وئريب تويوغ جوجه‌ني ييغشدير؛ گويا صنم بو قولاغدان آليب او بيريسيندن وئريب ائشيگه؛ گولتاج دا حيرصيندن يازيغ حيوانلارا ددت تؤکوب اؤلدوروب . ايندي صنم جسدلري ييغيب تليسه گئدير دادگاها شيکايته.
بيز اوشاقلاردا قونشونون ائو جورلاماقا تؤکولن داشلارين اوستونده اوتورميشيق شئيطانجا بو شيرين ماجرايا قولاق آسيريق. بير يول »ددان« -يولداشيميزين بيري- دئدي: اوشاقلار بيليرسيز نه قئيراق؟ بيز سس سسه: نه ؟!
– ديرناغيميزي بير بيرينه سورتک دئيه‌ک:هامي‌ساواشا/ من تاماشا. اوندا داوا بيتمز، کئف ائله‌ريک.
ايندي سيز فيکير وئرين اوندا بيزيم نئجه کئفي‌سازليغيميزا هله اليميزده بير سورمادان زاددان اولسايدي داوا لاپ ياپيشاردي.
آغا ديرناقلاريميزي سورته‌رک بويلانيب باخيريق گؤرکملي تيياتر صحنه‌سينه. شاه‌صنم خالا چيگينيده بير تليس اؤلو تويوق جوجه مئيدان اوخويور. عفت کلامين کاميلن الدن وئريب؛ آغزيندان چيخاني گولتاجين داليجا چيغيرير. بو حئينيده بيرده گؤردوک گولتاجين کريم آددا بوغو بورما لات، لوطو اوغلو جماعتي سؤکه- سؤکه گلدي مئيدانا. شاصنم خالانين الينده کي تليسي آلدي؛ زوربا زورونان نئچه دؤنه باشينا توولاييب تولازلادي. غريبه منظره اولموشدو. ددتله قوخوموش حئيوانلار سپه‌لندي کوچه اوزونو. لئش، لئشه دايانيب. گونده کي وورور لاپ قوخويورلار. شاصنم خالادا بو دؤنه هر يئردن الي اوزولموش ددتلي قوشلارين بير بير باسيب باغرينا نئجه ظولوم- ظولوم آغلايير. هردن‌ده قارقيش ائله يير:» جييارين يانسين کريم/ ننه‌ن ماتمينده اوتورسون کريم/ نئجه صنمين ائوين ييخديز/ کومه‌نيز داغيلسين/ ائويز ييخيلسين«.
هله گولتاج دا؛ معرکه قوروب آروادلارا آند آمان ايچيرکي شاصنم قارا ياخير؛ من حئيوانلارينا ددت تؤکمه‌ميشم. بيزده گولوروک:» به گؤره سن بو قوخويان ددت اييي‌هاوادان گليرمي؟!«
خيلاصه بتر گونلريميز تفرئحلريميز وارييدي. ايندي آساييش چوخالسادا قديمده اولان او ديلخوشلوقلار يوخدو. ماشيني ياشام آداملاريدا اوره‌گي سويوق ماشين ساياق ائله‌ييب. صوبح‌دن آخشاما قاش قاباقلي ائله چيرپينير؛ نهايتده » الي خمير/ قارني آج«. دوغرودان‌هارا گئدير اينسان؟!. پس قينامايين افروزون اوشاقليغي همشه کي حسرتي‌دير. هله ليک.
منبع :