درين بير يارا ايزي
درين بير يارا ايزي
1400/10/19
بولگه لر سرويسي: اونون رنگي آوازيميشدي …
سولماز جمالي
بولگه لر سرويسي: اونون رنگي آوازيميشدي …
ديز-ديزي سورونسه ده هاراسا قاچماق ايسته‌ييردي؛ آغارميش اوزونده آغزي اييلير گؤزلري آخير نفسي تينجيخيردي.
بيرآز سونرا چيغيرتي‌لار عذاب ايچينده چيرپينيب اينيلده‌‌ين اينسانين سسينه چئوريلدي. نفس کسن ناله‌لري يئري ده يانديريردي گؤيو ده.
پيچيلتي گزيردي، نيفرتدن سس‌لري اسيردي.
-حتمن اوزوقارا چيخيب …
-سنين آغزووي جيررام …
هر طرفدن يوزلرله گؤن قاييش قورخونج فيسيلتي‌لا گؤيه قالخيب شاققيلتي‌لا اونون اوز-گؤزونه، بدنينه ائنيردي. بيري قاييشين توققاسي‌لا اونون قان ايچينده اوزه‌‌‌ن اوزونه چيرپدي.
قان اوز-گؤزومه چيلندي. ديکسينيب بير آدديم گئري آتيلديم. ائله بيل بيري يئري آياغيمين آلتيندان چکدي بير باشقاسي دا عئيني آندا گوجو ديزلريمدن آلدي. اللريم‌له قولاقلاريمي کيپ قاپاديم؛ اينيلتي سنگيميردي …
ميني‌بوسون آيناسيندان آسلانان چيرکه باتميش قولچاق گوله‌رک آتيليب دوشور. ماشين شهرين بيتمک بيلمه‌‌ين چالا چوخورونا دوشدوکجه تاققاتوروق سسي داها دا چوخالير؛ قولچاق‌‌لا برابر بيز ده يئريميزده شيدتله سيلکه‌‌له‌‌نيريک.ميني‌بوسدا مندن باشقا تکجه ايکي قادين وار ايدي. اوچوموز ده باشدان آياغا قارايا بورونموشدوک؛ ماسکلاريميزي دا تاخيب لاپ ائله عمللي-باشلي قاراچي‌‌لارا اوخشاميشديق.ياشاديغيم يئردن آيري شهره ميني‌بوسلار بير ده مينيک ماشين‌لارلا گئتمک اولور. قادين اولدوغوم اوچون کيچيک ماشين‌لا گئديب گلمه‌يي عاغليمين اوجوندان بئله کئچيره بيلمزديم.پرده‌ني کنارا ييغيب شهريمه باخيرام. آلچاق ديوارلي کهنه توکانلار گؤزومون اؤنوندن سورعتله سوووشور؛ مسجيدلر، چؤرکچي‌لر، باققاللار … بو شهرده اوره‌يين ايسته‌ديکجه باققال وارايدي، اوره‌يين ايسته‌ديکجه گؤزه‌لليک سالونلاري؛ هر آدديما بر-بزه‌‌ک وساييلي ساتان توکانلارا راس گليردين آنجاق؛ بير موزيک مرکزي، رسامليق کيلاسي، تئاتر سالونو؛ بوتونلوکله هنره عاييد اولان هئچ بير ايزي گؤره بيلمزدين بو شهرده ….کئييميش قيچيمي دار-دودوک اوتوراجاقلارين آراسيندا بيرآز ترپه‌ديب اليمي پنجره‌نين تينگه‌سينه سؤيکه‌ييرم؛ آياقلاريم قوروموشدو.ميني‌بوسون شوفئري رنگي روفو گئتميش فيلاکسيندان اؤزونه چاي تؤکرکن بؤيرونده اوتوران کيشي‌يه دانيشير:-گونلرين بير گونونده بير کيشي گئدير ات آلماغا؛ قصابا دئيير منه ياريم کيلو ات چک. بو طرفدن باشقا بير کيشي گليب دئيير: منه اون کيلو مال اتي، اون کيلو قويون اتي، بئش کيلو دا دؤيمه اتي چک. اول‌کي کيشي مات قالير. گودور طرف اتين آليب گئده سورا قصابدان جرياني سوروشا. باشووي چوخ آغريتمئييم، خولاصه کيشي اتي آليب گئدننن سورا قصابا دئيير: قارداش بو کيميدي؟ نئينيردي بو قدر اتي؟ قصاب چؤنوب دئيير کي آدي ربعلي‌دي، بو اوچ دنه آروات آليب اوچو ده دول، اوچونون ده اري وارليميش؛ ايندي بو بئله الله‌ين گونون گؤرور. کيشي چؤنور دئيير: منه ده اون کيلو مال اتي چک اون کيلو دا قويون اتي. آليب گئدير ائوه؛ آروادي ائبئله اتي گؤرجه‌يين مات قالير. سوروشور کي بئبئله اتي نئينيرسن کيشي؟ احسان وئره‌‌جکسن؟کيشي قاييديب دئيير: ربعلي يئيينجک اؤزوم يييه‌‌رم.ميني‌بوسداکي کيشي‌لرين هاميسي برکدن گولوشدورلر. هره‌سي بير آتماجا آتيب اؤز خياللاريندا مزه‌له‌نيب داها دا شاققيلداييب گولدولر.-جاااااااااان …-گؤر او کيمدي هاااا … اوچ آروااات …-بختور باشووا ربعلي … الله بيزه ده يئتيرسين اولاردان …شيرتيلانماق اوچون اللرينه لاپ چم دوشموشدو.گؤزلريمي چؤله زيلله‌‌ييب اؤزومو ائشيتمه‌‌مزلييه وورسام دا ايستر-ايسته‌مز دوداغيمين دريسيني ديشيم‌له قوپاريرديم. ديشيمي-ديشيمه قيسيب شاليمين قارا ساچاقلاريني بارماغيما دولاييب آچيرديم.
اونلارا باخماسام دا باخيشلاريني اوزه‌ريمده حيس ائديرديم؛ دوداغيم بئله قاچمامالي‌ايدي. يان-يانا اوتوران ايکي قادينا گؤزوم ساتاشير؛ عصبي-عصبي لئچک‌لري‌نين باغيني داها دا برکيديب يئرلرينده قورجالانيردي‌لار.کيمسه آرخادان آستادان قادينلار حاقدا چيرکين بير سؤز ايشلتدي، باشقا کيشي‌لرين آستا هيريلتيسي ميني‌بوسو چولغالادي. شوفئرين اوزونو ميني‌بوسون قاباق آيناسيندان گؤروردوم. او گولوب-گولوب قفيلدن گؤزو قيزينين شکيلينه دوشدو؛ بوغازيني آريتلاييب جدي گؤرکم آلدي و قارا بوغونو آلت دوداغي‌‌لا اوينادا-اوينادا درين فيکره دالدي.شوفئرين اوزبه اوزونده فرمانين آرخا طرفينده شيشه‌يه ياپيشديريلميش قيز اوشاغي‌نين شکيلي باياقدان اوزومه گولومسه‌ييردي؛ اونون پامبيق کيمي يوموشاق ساچلاري سول گؤزونون اوزه‌رينه تؤکولموشدو. ساغ اليني چنه‌سي‌له ياناغي‌نين آراسينا قويوب بيرآز باشيني ايميشدي.اونون گؤزلري تئز-تئزي ديغيرلانيب ايشيق کيمي پار-پار پاريلداياراق قيزينين شکيلينه جالانير؛ باخديقجا ايچي کئچه‌‌رک قيميشير.قيزيمنان آيري قالماغيم اولدوقجا اوره‌ييمي سيخيردي.آغلاماييم دئيه پيرتلاشيق دوشموش قولاقليغي چيخاريب ساهمانلاياندان سونرا موبايلا قوشورام.گؤزلريمه لاپار-لاپار گونش دييب سوووشور. گاه آغاج‌لارين، تيکينتي‌لرين داليندا گيزله‌نير گاه گؤزلريمه شاخير.شيلانکي کردي‌نين قيراغينا قويور؛ باياقدان حيهطده اکدييي بي‌بري، تره‌ني سولاييردي. قاشقاباغي يئردن گئديردي. تئز-تئز نفس آليب وئردييندن، اؤز-اؤزونه ديلي‌نين آلتيندا ميرتلانماغيندان حيرصلي اولدوغونو بيليرم.-ايستئييرسن تک زنن خايلاغي هارا گئدهسن؟ باشووا هاوا گليبئه سنون … ائله اوغول ايستئييرم گئدهسن.يانيمدا پيلله‌ده اوتورور؛ چيين چيينيمه. نفس‌لري‌نين سسيني ائشيديرم. هله ده دونقولدانير ….گئتمه‌ييمي قولاغي چالميشدي. اوزونون قيزارتيسيني باخماميش دا گؤره بيليرديم. هله هاراسيدي؟! بيرآزدان تضييقي ده قالخاجاقدي؛ آخ-واي ائلييه-ائلييه آلنينا يئکه پله‌هلي لئچه‌ييني ده باغلاييب منيم قاباغيمي آلماق اوچون هئچ بير ايشدن، سؤزدن چکينمه‌‌يه‌‌جکدي. سوندا ايسته-دييي سونوجا وارمايينجا داها اؤنمليسي الي بير شئي توتمايينجا گؤزونو يوموب آغزيني آچماق اولاسيليغي دا يوکسک اولاجاقدي.هردن بير يونگول يئل اسير. گونشين ايشيغي آستا-آستا ترپه‌نن يارپاقلارين آراسيندان اوز-گؤزومه دوشور. يئل يارپاقلارلا رقص ائديردي؛ ديوارا قونان سئرچه‌لرين قانادلاري‌لا توکلريني قابارديردي.-گئده‌جم.دوغولدوغو گوندن آناسيندان آييريب اللريميزله بؤيوتدويوموز ايت‌‌يميز حيه‌‌طين اورتاسيندا اؤز کؤلگه‌‌سي‌‌له اويناييب آتيليب دوشوردو. حيه‌طيميزده شنليک وارايدي ائله بيل.منه ساري چؤنمه‌ييني حيس ائديرم. گونشين ايستيسيندن قورونماق اوچون ساغ اليني آلنينا داياييب گؤزلريني ياري‌‌آچيق ياري‌‌يومولو منه ديکير.– باري قيزيني دا آپار. ارين داي بونو قبول ائله‌مز.حيهطده بير ييغين قومون اوستونده تک باشينا اوينايان قيزيما باخيرام. باخيشيمي حيس ائديرميش کيمي بير آن چؤنوب اوزومه گولومسه‌يير. اليمي دوداغيما آپاريب اونا اؤپوش گؤندريرم.-سيز ديللنمه‌سؤز او هئچ نه دئمز. قيزيمي دا عؤمرومون آخيرينا کيمي بئليمده داشييا بيلمه‌رم. گؤيلوم ايستئيير دوستومون تويونا تک گئدم. اونو آپارسام ال آياغيما دولاشار.
-هئچ توشو يوخدو کي تکووه دوروب گئدهسن. باخ منيم چؤله گئدن سؤزوم اولماز. قديم‌نن دئييب‌لر پالازا بورون ائل‌نن سورون. سني تک گؤرن دييه‌جک گؤره‌سن هارا گئدير، آدين ديللره دوشسه گونون قارا اولار.-ايشاره بارماغيني قاتلاييب اوجونو آغزينا ساليب برکدن ديشله‌يير، باشيني بوللايير،- الله سن گؤرستمه.
منبع :