جئيران خانيمين اوغلو

بولگه لر سرويسي:بير هفته استراحتدن سونرا والايلايا - والايلايا شرکته دؤنموشدو ، هيکللي آداما دا چوخ چتين اولار آخي بو بئل آغريسي الي بئلينده اولدوغوندان چکديي آجي - آغري بللي ايدي ، يازيغين ايشي ده آياق اوستونده ايدي ، بئلينه زور دوشدوکجه بير آز اوتوروب دينجه لندن سونرا يئنيدن آياغا قالخيب ايشليردي . کئفين سوروشماق ايچين يانينا گئتديم :

سلاااااام آآآآآآآآ ممي ! کئف احوال ؟ نه خبرلر ؟سلام  ! دوغرودان پيس اوشاقسان هااااا ! ملاقاتيما گلمه دين باري زنگ ووروب حاليمي سوروشايدين ...گؤرورسن دا باشيم چوخ قاريشيق اولور ، شرمنده ! هله نئجه سن ؟گئچينيرم داااااا- من اؤلوم ؟ واللاه سن چوخ بتر آدامسان ، بو زمانه ده گئچينمک هر آدامين ايشي دئييل ! کيشي به سن هله بير هفته استراحتدن سونرا يئنه ده يان پرتي ايشليرسن آخي !
هن بابا ... من ده آغير آداام ... بئل ده کي دوزلمک بيلمير !هله نه ايش گؤروردون کي بئلين سرپدي ؟هئچ زاد بابا ! اوچ دؤرد عاييله ييغيشيب بير معمولي قوچ آلديق ، قرار اولدو هميشه کي کيمي اونون باشين من کسيب اتين بؤلوشک آما هر يئري آختارديم پيچاغي تاپانماديم !
اسماعيلا دئديم :»اوغول ! چيخ داما گؤر پيچاغي داما آپاران اولماييب ؟ «اسماعيل داما باخيب پيچاغي تاپدي ، من ده قوچو بئليمه آليب داما چيخارتماق ايسته ديم آما بئليم سرپيب نردوواندان يئره ييخيلديم ...
لاپ دا ياخشي اولوب ، ائله حقين ايميش ! نيه پيس اوشاق ؟کيشي به سنين عاغلين آزميشدي ؟ به قوچو داما چيخاردينجا ، دامدان پيچاغي گتيريب قوچو دا يئرده کسه يدين دا ! دوز دئييرسن هااااااا ... بونو ييخيلماميشدان قاباق دئيه جه يدين باااا ! اووجومو اييله مه ميشديم کي آ ممي ! دؤکتوره ده گئتدين يا يوخ ؟
گئتديم آنا چوخا باخدي بيله مه ، دؤکتورلرين چوخو بيمه ايله باخميرلار کي ، يالنيز داوالاري دفترچه يه يازيرلارکي داوالارين دا چوخونا بيمه شامل اولمور آما بو بير هفته استراحتيمين خرجين بيمه وئره جک !آ ممي دوز دئييردي ، آدي بيمه اولوروق پولون دا اؤزوموز تؤکوروک ، هانسي ايش صاحيبي ايندي ايشله ينلرينين بيمه سين اؤزو تؤکور ؟ بير زامان ايشله ينلري آنباردا گيزله درديلر کي بيمه مامورو گؤرمه سين ايندي ده دئييرلر کي  :»بيمه پولون اؤزوز تؤکسز بيمه ائديرم ! « آ ممي دئدييي کيمي ده دؤکتورلرين چوخو يالنيز داوالاري دفترچه يه يازماغي بيليرلر !من آ ممي ايله دانيشديقجا " آ مخصود " دا هردن سؤزلريميزه قاتيشيب ، هردن ده اؤز - اؤزونه گولوردو ! آ ممي دن آيريلاندان سونرا آ مخصودو چاغيريب سوروشدوم :»هن ؟ نه اولوب ؟ کئفين سازدير هااااا ! بيزيم سؤزلرين هاراسي گولمه لي ايدي کي سنين ايچين گئچيردي ؟«بير سؤز دئيه جه يم سنه ، يوخ دئمه هااا- نه سؤزو آ مخصود ؟آ ممي شرکتده هامينين آناسينين آدين اؤيره نيب هاميني دا اؤز آدي ايله يوخ آناسينين آدي ايله سسلر ، ايندي لاپ يئريدير کي اونون آناسينين آدين اؤيره نيب بيزه لوطف ائله يه سن ! بيز اونون آناسينين آدين بيلميريک آخي !
په هوووو ! دئييرم ها هر سحر ايشه گلنده ، سنه " سلام نرگيز خانيمين اوغلو ! " دئير ، رحيم آغايا دئير : " يورولما فاطما سورانين اوغلو ! " خخخخخخ دوز دئييرسن ... اوشاقلاري آناسينين آدي ايله سسلر !- بلي ... هم قلبي قارادير هم ده ايسته مير اوشاقلار دا اونو آناسينين آدي ايله سسليه لر ، بيزلر ده کي اونون آناسينين آدين بيلميريک ، بيزه پوز وئرير !ايندي من نجور اونون آناسينين آدين اؤيره نيب سيزه دئييم ؟
چوخ راحت ! بير - ايکي گون سونرا بيله سيندن سيجيللي فتوکپي سي ايسته ييب دئيه جکسن کي »بيمه دن زنگ ووروب ايستيرلر پرونده يه ووروب استراحتلرينين پولون وئرسينلر !«فتوکپي دن آناسينين آدين اوخويوب بيزه دئيه جکسن ! آهاااااااااان ! ولي خرجي وار هاااااااا ! خخخخخخخخ بير گون ناهارا منه قوناق ! او بيري اوشاقلاردان دا گؤروم نمنه بويون اولورلار ، صبحانه دن ، کؤينکليکدن زاددان ، گؤروم نمنه قوپاردا بيلرم دا !نئچه گوندن سونرا آ مخصود دئين کيمي ، آ ممي نين يانينا گئديب بيله سيندن فتوکپي ايسته ديم !منيم فتوکپي مي نئيليرسن پيس اوشاق ؟
خير اولا ... بيمه دن زنگ ووروب ايسته ييبلر ، گومان ايستيرلر پروندن يه ووروب سونرا استراحت پوللاريني تؤکه لر !آ ممي قبول ائديب صاباحيسي گون مني چاغيريب فتوکپي ني دؤرد قات قاتلاييب بيله مه وئردي ، من ده آليب دفتره ساري گئتديم آما فتوکپي يا باخيب گؤردوم آناسينين آدينين اوستون ائله قارالاييب کي اوخونماسين ! فيکر ائتديييميزدن داها چوخ قلبي قارا ايميش ! جرياني اوشاقلارا دئييب اونلاردان ايسته ديم سسلرين چيخارتماسينلار ! من ده اوزومه گتيرمه ييب دؤزدوم .
صاباحيسي گون ناراحات قيافه ايله آ ممي نين يانينا گئتديب دئديم :»آغا ! دونن وئردييين فتوکپي نين مخدوش اولدوغونا گؤره بيمه دن زنگ ووروب بير آيريسين ايسته ييبلر ! «آ ممي اؤنجه بير آز هويوخدو آما قبول ائتدي کي صاباح دوز عمللي سين چيخارديب گتيرسين ! صاباحيسي گون اؤزو مني چاغيريب فتوکپي سين بيله مه وئردي !
من ده بير آز فاصله آچاندان سونرا هيجان ايله فتوکپي يا باخيب گؤردوم بو دفعه ده آناسينين آدينين اوستونه بالاجا کاغاذ قويوب سونرا فتوکپي چيخارديب کي آناسينين آدي بيلينمه سين ! بو دفعه اوشاقلاري جرياندا قويوب بيله لرينه تاپشيرديم کي آ ممي نين يانيندا بارا وئرن اولماسين ! صاباحيسي گون حيرصلي قاش قاباقلي ايکن آ ممي نين يانينا گئديب دئديم :» آغاااااا ! بيزي سريييبسن يوخسا اؤزونو ؟«
نه اولوب پيس اوشاق ؟يئنه ده بيمه دن زنگ ووروب دئييبلر کي گؤندردييينيز فتوکپي درده ده ين دئييل ! نيه ؟نيه سين اؤزون مندن ياخشي بيليرسن ! بيمه دن دئييبلر :
صاباح سيجيللينين اصلين بيمه يه گتيرين يوخسا بو متقلب آدامين بيمه سابقه سي کؤکوندن سيلينه جک ! "  بيلميرم نه ايش گؤروبسن کي بيمه نين گؤزونه آلا - بولا گليرسن !آغاي پيس اوشاق خاان ! اولماز من بو استراحتيمين پولون بيمه دن ايستمه يم بلکي ياخامدان ال چکه لر !استراحت خرجينه ربطي يوخدور با ، شک ائديبلر پرونده ن ايله مدارکينه !
صاباحيسي گون آ ممي مني گؤرجک سيجيلليسين چانتادان چيخارديب منه وئردي : » پيس اوشاق ! شولوزونمه سن بو سيجيلليني بيرينه گؤستره سن ! خئچ سن اؤزون ده آپيب باخما ! ائله بئله سي بيمه اداره سينه گؤندر ! « سيجيلليني بيله سيندن آليب بير ايکي آتديم فاصله آچاندان سونرا ايلک صحبفه سين آچديم ! حيرص آ ممي نين باغارسيغين کسيردي آما من آختارديغيمي تاپميشديم !  سيجيلليني بوکوب آ ممي نين اؤزونه قايتارديب دئديم :»من آختارديغيمي تاپميشام کيشي ! نه استراحت خرجي نه بيمه سي نه سيجيلليسي ؟
 منه اؤنملي اولان سنين آنانين آدي ايدي ! بو نه پيس عادتدير ؟ اعلاميه لرده آنالارين آدين يازماغا قلبي قاراليق ... جمع ايچينده خانيملارين آدين آپارماغا قلبي قاراليق ... خانيما ، بيزيم اوشاقلار دئمک ... اوغلان ! ال چکين بو ايشلردن ! بيري سنين آنانين آدين بيلسه نه اولار مثلن ؟ آددير دا ، بو دونيادا کيم آدسيز قاليب ؟
هره نين بير آدي وار دا !«سونرا اوزومو اوشاقلارا توتوب اوجادان دئديم :» اوشاقلار انتظار سونا چاتدي ! داها صاباحدان بو کيشيني آ ممي سسله مه يين ! بو کيشي جيران خانيمين اوغلودور ! جيران ايله جيران خانيمين اوغلونون ساغليغينا جانا سينر چپيک چالين ! «

منبع :