پاييز گونشي گون باتارين قانلي گؤلونده

بولگه لر سرويسي:پاييزين کدرلي گونشي، گون باتارين قانلي گؤلونده بوغولديقدا، سون شوعآلاريني نيسگيل بويالي شهرين آتيشکا‎لاريندان يـيغيشديرير.

نريمان ناظيم

بيراينجي بولوم

بولگه لر سرويسي:پاييزين کدرلي گونشي، گون باتارين قانلي گؤلونده بوغولديقدا، سون شوعآلاريني نيسگيل بويالي شهرين آتيشکا‎لاريندان يـيغيشديرير. ائولرين بيرينده  گنج بيرقادين، تلفونون دسته‎يين، الينده سيخير. ذهني‎نين آلاتورانليغيندا يولونو ايتيرميش قادين يالواريجي لحن ايله دانيشير: »… يوخ دوکتور!
 يوخ دوکتور! يوخ. سيزدن خاهيش ائله‎يير‎م ائوه تشريف گتيريز, خاهيش ائله‎يير‎م دوکتور…، بو ائشيگه چيخارتمالي دئييل.‌هامييا دئميشم، گئديب موسافيرته… بيلميرم نئجه دئييم، عجيب- قريب دانيشير. اصلن باشا دوشمک اولمور نه دئيير, من کي گيجلميشم دوکتور. دئمه‎ينن اولماز، گره‎ک گليب گوره‎سيز….«.
آرواد دسته‎يي قويور, کاناپايا سؤيکه‎نيب  فيکره دالير، »صادق«ين ،کئچن اوچ گونده دانيشديغي قات- قاريشيق سؤزلر، اونون ذهنينده يان- يانا دوزولور: »ياني نه اولسون، بيرد‎ن- بيره بونون باشينا نه گلدي؟…” لحظه‎لر آغير – آغير سورونور. ساعاتـين سسي، آيدينجاسينا، ائوه يايـيلير. هله اوتاقدان بير سس گلمير، آمما او، هر لحظه »صادقنين باغيرتي‎سين گؤزله‎يير. آرتـيق ديکسينمير, عادت ائله‎ييب سانکي! جاملارين داليندان قاتي قارانليق، ايچري سيزير. قارانليق آروادين ذهنينه چؤکور. گؤزلري باخارکن  اويغويا قاپسانير: قديم حيط‎لريدي. تاي  توشلاري ايله  »آياق جيزيغي« اويناييرلار. ساللاخ ممي، الينده بير پيچاق، ياللاه دييه- دييه دالانين پيلله‎لريندن حيطه يئنير. نئچه کلمه آناسيلا دانيشديقدان سونرا، الين آتـيب »مريم«ين خوروزونون قاناديندان توتور. آياغي‎نين آلتـينا قويور. »مريم«، نه‎سه اولاجاغي باشا دوشمه‎ميش خوروزون باشي کسيلير. باشسيز خوروز، مؤحکم بير حرکت‎له، قاناديني، ممي‎نين آياغي‎نين آلتـيندان قورتارير. اؤزون باخچايا آتـير. اونون چيرپينتـي‎سيندان، باخچاداکي گول- گؤيه‎رنتـي‎لر، آل قانا بويانير. »مريم« قيشقيراراق اؤزون، بويوک آناسينا يئتـيريب، اونون ديزلرين قوجاقلايير… اؤز قيشقيرتـي‎سيندان‎‎مي‎دي, يوخسا »صادق«ين‎کيندان, آنجاق او يئريندن سيچراييب اؤزون اوتاغا يئتـيرير.
 »صادق« قان تر ايچينده ،گؤزلرين تاوانا ديره‎ييب:«دي گور نه‎ قده‎ر چابالاييب، »مريم«! گور نه قده‎ر چيرپينيب »مريم«! جومله‎سيني تـيکرار- تـيکرار دئديکده سانکي، چيلغين روحونا سيغيناجاق آختارير. »مريم« مطبخه قاچير. بير قاب سو ايله قاييدير. سويو »صادق«‎ين اوزونه چيله‎ييب، اونو اؤزونه گتـيرير. »صادق«، آستا- آستا توختاييب اويور.
 »مريم« ايسه، اويغودا  گوردويو، اوشاقليق خاطيره‎سينه، يئني‎دن موراجيعت ائتديکده خوروزو بير داها، ذهنينده يارادير: »سحرين آلا تورانيندا، خوروز خوجانيشين‎ده غرور ايله  باشين ديک توتوب سوکوتو ياران باني‎ ايله ياتانلاري آييلتماغا چاغيرير…. سونرا ساللاخ ممي… اونون رحم‎سيز پيچاغي …. »مريم«‎ين، اوره‎يي سيخيلير, گؤزلري ياشالير…
درين دويغولارا دالميش »مريم«، زنگين چالينماسي ايله، آييلير. دوکتور دي، »نئجه‎سيز مريم خانيم«- دئيه، ايچه‎ري گلير. »مريم«‎له بيرليکده اوتاغا کئچيرلر. دوکتور، تختـين قيراغيندا اوتورور. الين ،»صادق«‎ين، آلنينا قويوب، سسله‎يير: »صادق«…»صادق«، منم سياووش. دور گؤروم نه‎يين‎دي! «. »صادق«‎ين گؤزلري آچيلير. قيزارميش گؤزلرينين حاشيه‎سي شيشيب پورتموشدور. قيزمار نفسيندن قايساقلانميش دوداقلاري چاتلاييب، شيريم شيريم اولموشدور. اوزون زامان دينمز   دانيشماز، دونوق باخيشلا، دوکتورو سوزور سونرا سوروشور: »سن ده! گؤردون اونو؟ گؤردون نه گونه سالميشديلار؟! دئييرم آخي شرفسيز…. بي‎شرف قيچيندان نييه بس؟!… دئيير… دئيير اوشاقلارين اللري ا‎سيب، سؤزه باخ، سؤزه! اوشاقلارين اللري اسيب! باخ سؤزه… باخ سؤزه!«
الين اوزاديب، دوکتورون اليندن ياپيشيب اؤزونه ساري چکير: »اليوي بير قوي باشيما, گؤر نئجه زوققولدايير, بئيينيم!… بئينيم، ترپه‎نيب سياووش. يوخ داي… يوخ، من دوزه‎لن دئييلم. داي من دوز‎لمم، سياووش« دئيه، سوسور. سياووش »مريم«ـه ساري دؤنور, »تبي چوخ يوخاري‎دي« دئيه، سويو‌ايلا دسمال ايسته‎يير. »مريم« بير له‎ين سو, بير دسمال، بير شيشه آلکول گتـيرير. سياووش دسمالي ايسلادير، »صادق« ‎ين آلنينا قويور. »صادق« دسمالي آلنيندان آتـيب باغيرير: »بوشلا بابا, بوشلا مني! من دوزه‎لن دئييلم… من دوز… من دو…«. سياووش اونون چيينيندن باسير: »دي دايان، قوي قيزديرماني  يئنديريم. آخي‎!« دئيه  اونو يئني‎دن ياتـيردير.
 »صادق«‎، آغير نفس آلا   آلا زاريلداياراق، ساييقلايير.»گؤزومو يومورام گلير يوخوما. ال چکمير او, گولور منه… او… او منيم سققه‎ليمه  گولور. آخي سنده‎ کيشي سن؟ سن… سنده ده، شرف وار, يوخ، يوخدور. دوز… دوز دئيير او، يوخدور… يوخدور. گيريب منيم بئينيمه سياووش. بئينيمده چابالير او، چيرپينير سياووش… چيرپينير…«!
 سياووش، هله‎ده، اونون آياقلارين تئشت‎ده سرين‎له‎دير. آمما قيزديرما، يئنن دئييل. »صادق«‎ ائله‎جه صادالايير: »کئشگه…، کئشگه گؤرمه‎يئيديم اونو. آخ يانداخ کولو… يانداخ کولو… ، بير يانداخ کولون، الينده سيخيب ساخلاميش, ديک منه ساري, ائله او جور… ائله او حالدا، قولو قورويوب قالميشدي… ائله بيل منه وئريردي، ائله بيل دئييردي گل… گل! آقاي دوکتور بو دا دسته گول! گل… گل آپار قوي  د‎ده‌وين گؤرونا… گه… گه… گل آپار!«. قيزديرما اطرافا ياييلير.
 »صادق«‎‎ين، بارلانميش آغزي، قوخويور. جووجولرينده قايساقلانميش آغ کؤپوک گؤزه چارپير. قه‌هر بوغازينا ييغيشديقدا زور ايله اؤزون توپلايير: »آخ‎خ…  سياووش بودو… بو… بو… بودونون بير طرفينين اتي بوتون گئتميشدي, گئديب لاپ سومويينه چيخميشدي. دئيير: اوشاقلارين الي اسيب… بي… بي‎شرف…, بي‎شرفلر. گؤره سن آللاه، گؤر نه‎ قده‎ر چابالاييب, گؤر نه قده‎ر چيرپينيب، سياووش, گو… گو… گؤر، نئجه… گؤر…, سؤزون چاتديرا بيلمه‎د‎ن »صادق«‎، هؤنکورتو ايله آغلايير. سياووش »مريم«ـه دؤنور، دئيير. »گئت داوالاري گتير«. سياووش الي اسه- اسه، بير آمپول سورنگه چکيب، »صاديق«ـا  وورور. »صادق«‎، آستا- آستا ساکيت‎‎لشيب اويور. اوتاقدان چيخيرلار. سياووش بير ليوان سو ايسته‎يير، سويو ايچير، توما گئدير. سونرا سوروشور، جريان نه‎دي؟,‌هاچاندان بئله اولوب. »مريم« دئيير: »چرشنبه…  او گئجه چوخ بئواقت گلدي. گئجه ياريسئ ايدئ, گلدي ياتدي.
 صاباح، سحر تئزدن، گون تازا چيخميشدئ کي، »پزشک قانوني«دن تئلفون ائله‎ديلر. شهلنديم. دئديم، ايندي کي پزشک قانوني اولماز. دئديلر، دسته‎يي وئر دوکتورون اؤزونه. آييلتديم، دانيشدي. بيلافاصيله گئييندي گئتدي. بير ساعات چکمه‎دي قاييتدي. من صبحانه‎ني دؤشه‎ديم ،گؤردوم کي، سيغار يانديردي. دئديم، آج قارنينا نه خبردي؟
 دينمه‎دي. بير دنه چاي ايچدي، يئني‎دن، سيغار يانديردي .گؤردوم ناراحات‎دي. سوروشدوم، نه خبر ايدي؟ دئدي، اؤلونو باسديرماق اوچون ايجازه‎نامه ايسته‎ييرديلر. گؤردوم، قه‌هر‎دن دوداغي اسير. دئديم، اونون‎دا ناراحات‎چيليغي وار؟  دئدي، آخي ،جاوان قيز ايدي. سوروشدوم کيم‎ايدي… دئدي، بيلمه‎ديم.
 دئديم نييه اؤلموشدو؟ بيردن اؤزوندن چيخدي، اوستومه چيغيردي »مفتّيش‎لييي قورتاريرسان، يا يوخ«. داي من بير سؤز دئمه‎ديم. گئتدي ايداره‎يه. ساعات اون‎ بير ايدي قاييتدي. گئتدي اوتاغا. گئتديم گؤردوم پالتارايلان تختين اوستونده اوزانيب، ياتـيب. ائله او ياتـيش‎دي کي ياتـيب. داييم يوخو گؤرور. سايقيلايير يوخودا…،پيس وضعيت‎ده يوخودان قالخير…«.
سياووشون گؤزلري قالي‎نين گول‎لرينه زيلله‎نيب، باشين قالديرمادان سوروشور:»خوب نه دئيير؟« »مريم«ين سسي، سانکي، قويودان چيخير: نه دييه‎جک، الان دئديک‎لريني، قاتـير قاريشديرير. بير سؤزو بلکه يوز دفه دئيير… من نئيله‎ملي‎يم؟ قورخورام دوکتور… قورخورام، د‎لي اولا آخيردا… »مريم«ي قه‌هر بوغور.
سياووش، هئچ نه دئمه‎دن قويور»مريم« اوره‎يين بوشالدير. »مريم« گؤزلري‎نين ياشين سيليب، سارسيلميش حالدا دوکتوره باخير: و نئيله‎مه‎لي‎ييک دوکتور؟- دئيه گؤزلرين سياووشا تيکير. سياووش ” شايد ائوده توختادا بيلک، آنجاق، اگر بيماريستانليق اولسا بوردا ياتا بيلمز, بوردا ياتسا، ايش چيخاردار«- دئيه، کؤکسون اوتورور.آردي وار

منبع :