بو گون كدرلي ائشيگه چيخديم
بو گون كدرلي ائشيگه چيخديم
1397/03/06
بولگه لرسرويسي: دونن ناهاردان سونرا كيچيك چايين كؤرپوسوندن كئچديم و اوزو يوخاري خياباندا يولومو داوام وئرديم. مشهدي علي اكبري گؤردوم. يئنه هميشه كي كيمي دالدان ال لرين توتموشدو،باشين آشاغي سالميشدي،بير پارچاني اؤرتوك كيمي باشينا باغلاميشدي تا يئكه شيش كي نئچه ايلدير آلنينين كناريندا هئي يئكه لير گؤرسنمه سين. كؤهنه كوت گئيميشدي.
بير ايستي ياي گوني ايدي.ياخينليغينا يئتيشجك حالين سوروشدوم.جرأت ائله مه ديم اوزونه باخام.يئنه دئدي كي هر يئره گئديب آمما ساغالان دئييل.چتين ليكله دانيشيردي.هميشه آغزينين سويو دانيشاندا آغزيندان اوزومه سه پيلردي و من ناراحت اولارديم.بو دليله فاصله ني رعايت ائله ييرديم.
دئييردي جماعت اونا ياخينلاشماقدان و اونونلا دانيشماقدان چكينيرلر و قورخورلار مبادا خسته ليگي اونلارا دا سرايت ائله يه.يئنه اوره ك وئرديم.نه ائله مك اولاردي.
اونو اوشاقليقدان تانيييرديم .حامبالليق ائله يردي و ايل لردن سونرا بير ال آراباسي باش باغلاييب و بو ياخين زامانا قده ر خالقين يوكونو داشيييردي و پول قازانيردي.ايندي داها ايشله مه يير .فقط هردن خيابانلاردا گؤرونور و يالنيز آدديم وورو.
بير گون دئدي بيلمه يير نه گوناه ائله ييب كي تانري تئز جانين آليب راحاتلامايير.
او اؤنجه ايشله ين و دئيه ر گولر آدام ايدي و اوچ دوكانلاردا بير دوستومون ماغازاسيندا كي هردن اورايا گئده رديم هردن اونو اورادا گؤره رديم و او كئچه جكدن و خاطيره لريندن دانيشاردي.
بو گون ائوده سؤزوم اولدو.كدرلي ائشيگه چيخديم.هاوا چوخ ايستي ايدي.اؤزومو پاركا يئتيرديم.كؤلگه ده بير نيمكتده اوتوردوم.قاريشقالاري گؤردوم كي آسفالتين اوزه رينده گل گئتده ديرلر و چاليشيرلار.بعضي لري نارين و ايري قوملاري يووانين ده ليگيندن ائشيگه چيخارديرديلار و بعضي لري دن لري يووايا داشيييرديلار.
چاليشما يئرلري يووانين هنده ورينده ايدي.گؤردوم قرمزي قاريشقالار اطرافدا سرعت ايله حركتده ديرلر ،آمما جرأت ائله مه ييرلر اونلارين يووالارينا ياخينلاشسينلار.
اونلارين بيري بير كيچيك قاريشقاني توتموشدو.يئردن بير يارپاق گؤتوروب و اونو قرمزي قاريشقانين اليندن خلاص ائله ديم و يووانين ياخينليغيندا بوراخديم.
قاريشقالارين چاليشمالاري دايانماز داوامي وارايدي.بيردن گؤردوم بير اوزون قاريشقا يووادان چيخير.گؤزلويومو ووردوم تا ياخشي گؤره م .يوخ، بير قاريشقا باشقا قاريشقاني اؤز گوجلو انگينه آلميشدي ائشيگه چيخارديردي.قاريشقاني يووانين ياخينليغيندا بوراخدي و يئنه يووايا قاييتدي.گؤردوم قاريشقا آخسايير.چتين ليكله يئنه اؤزون يووايا چاتديردي آمما يئنه ائشيگه ساليندي.نئچه يول بو ايشي تكرار ائتدي.
نهايت صدمه گؤرموش قاريشقا يورولدو آمما هله ده جاني وارايدي.اؤز دؤوره سينه فيريلداييردي آمما داها يووايا چاتماقدان اومودسوز اولموشدو و يووانين هنده ورينده كؤلگه لنيردي و اؤزون يئر اوزونده چكيردي.باشقا قاريشقالار ، كيچيكلي بؤيوكلي ، اونا اعتناسيز، قاني سويوق چالشماقداايديلار.اونلارين اعتناسيزليقلاريندان اؤفكه لنديم.
بير قاريشقا كي كئچه جكده اونلار ايلا ايدي، اونلارايلا چاليشيب و حيات سورموشدو، ايندي قووولموش يالنيز و اومودسوز اؤز دؤوره سينه فيريلداييردي.عصبيّت ايله اؤز اؤزومه دئديم گئديم بير شوشه نفت گتيريم يووالارينا تؤكوم و ياشاييشلارين بير بيرينه ووروم.
آمما يئنه فيكيرلشديم و گؤردوم كي حيواناتين حياتيندا غريزه اوزو ايله باشقا ياسا حاكمدير و اونلاري گره ك اؤز باشلارينا بوراخاسان.بو ايستي آسفالتين آلتيندا نه خبرلر كي يوخ ايدي.
ناهار وقتيندن بير ايكي ساحات كئچميشدي و من تمام بو مدّتده بو صحنه لره تاماشا ائله ميشديم.قرمزي قاريشقالار اوو انتظاريندا هنده ورده سرعتله حركتده ايديلر. بير قاريشقا باشقا قاريشقاني دا ائشيگه داشيدي آمما او قاريشقا هله ده جاني وارايدي ، تئز بير ده ن گؤتوروب و سئوينجك يووايا قاييتدي.
بو گئجه يئنه ده پاركدا همان نيمكت اوستونده اوتورموشام .چراغلارين ايشيغينين آلتيندا قاريشقالار چاليشماقدا ديرلار.بئچارالار فيكر ائله ييرلر كي هله گوندوزدور .باشلارينا بؤرك كئچيب.يوخودان ، دينجلمكدن بير خبر يوخدور.
حيواناتين چوخ حصّه سي گونون دوغولماغي ايلا دن و خؤره ك ييغماغا چاليشمالاريني باشلاييرلار و گونون باتماغي ايلا يوخو و دينجلمه يه باشلاييرلار.او گونون صحنه لري ياديما دوشدو.
قاريشقالارين ماجراسيني بير دوستوما دئديم و او دئدي اونلار اؤلن قاريشقالاري يووانين باشقا يئرينه قويارلار.
صدمه گؤرموش قاريشقا ايشي‌هارا چاتدي.او قاريشقا كي شايد منيم يا سيزين آياغيميزين آلتيندا صدمه گؤروب.
آه!ياديمدان چيخيب.مشهدي علي اكبر ايندي‌هارادادير و حالي نئجه دير؟
منبع :