منه اينتيحاردان بير حئکايه يازين

يوخودا گؤردوم اؤزومو آسيرام. اَل-آياق چالاراق سون نفسلريمده بيتيردي.

بولگه لر سرويسي: يوخودا گؤردوم اؤزومو آسيرام. اَل-آياق چالاراق سون نفسلريمده بيتيردي.
بيردن کندير قيريلاراق يئره سريلديم. يوخو گؤردويومو بيلدييمدن آسيلي، يئنه دار کنديريني قوشدوم. اَل-آياق چالديم، نفسيم سونا اَردي، يئنه کندير قيريلدي… سحر چاغي زيرنا موبايليمين سسي ايله يوخودان قالخديم. سانکي باشيما داش سالديلار. هر گون سحر يئمه‌ييمي راديونو‌دينله‌يرکن يئيه‌رم. آپاريجي خبرلرين باشليقلاريني سؤيله‌ييردي: سورييه‌ده تئروريسلرين يوروشو ايله قيرخ سسکيز قادين و اوشاق جانيني ايتيردي. . . بغداد دا بير اينتيحاري بومبا ايلا يوزلرله اينسان قانينا بلشدي. . . تئروريسمه قارشي بير توپلانتيدا تروريستلرين تؤرتدييي ايشلر يارغيلاندي. . . ميلل سازمانينين اوشاقلاري ساوونما بولومو افغانيستاندا اوشاقلارين پيس دورمدا اولدوغونو وورغولادي. . .
بيليم يوردوندا ادبياتدان باشقا هر سؤز دانيشديم. اؤزومده بيلميرديم نه دانيشيرام، قالسين اؤيرنجي‌لر. سونوندا وئردييم قونودا حئکايه يازمالاريني تکليف ائده‌رک، سؤز وئرديم کيمسه اَن گؤزل حئکايه‌ني يازيرسا اونو درگي‌ده ياييملاياجاغام. يوروقون-آرغين ائوه دوشدوم. مطبخده يئمه‌يه هئچ نه تاپا بيلمه‌ديم. حيات يولداشيم بئش-آلتي آي اؤنجه بوشانيب گئتميشدي. گئديشيندن اوزگون دئييلديم، دوغروسو چوخ دا سئوينيرديم.
يوخودا يئنه اينتيحار ائديرديم. حامام وانيندا داماريمي وورموشدوم. قان ايستي سويون ايچينده ياواش-ياواش سوزولوردو. سوزولدو. . . سوزولدو. . . ! سو آل قيرميزييا بوياندي. داشيب ائوي قوينونا آلدي. يوخو گؤردويومو بيلديييمدن آسيلي ايسته‌ميرديم اويانام. آنجاق يئنه زيرنا موبايليمين سسي يوخونو زهر ائله‌دي. راديو بير قادينين اؤزونو يانديرماسيندان سؤز آپاريردي. يئردن-گؤيدن اينتيحار ياغيردي. اؤيرنجي‌لر اينتيحار قونوسوندان يازديقلاري حئکايه‌لري گتيرميشديلر. اونلارا گؤز گزديره‌رک هئچ بيري ماراغيمي چکمه‌دي. آنجاق اينتيحارلاري قولتوغوما ووروب، ائوه ساري يؤنلديم. ائوده اولان درمانلارا گؤز گزديرديم. آرواديم دلي کيمي ايدي. گئجه‌لر ياتا بيلمزدي. يارامازين يوخو درمانلاري هله قاليردي. هر گئجه ياتاقدا بيريني، بير بارداق سو ايله ايچه‌ري آتاردي. سونرا مندن اوز چئويريب ياتاردي. آرواديم بو درمانلارين بيري ايله گون اورتايا دک کيمي ياتاردي. بونلارين بئش-آلتيسي مني‌دينج ائده بيلردي.
اؤيرنجي‌لره سؤز وئرميشديم اَن گؤزل حئکايه‌ني درگي‌ده ياييملايام. گئجه ياريادک اونلاري اوست –آلت ائله‌ييرديم. نئچه‌سي من دئدييم قونودا يازيلماميشدي. بيريسي تانرييا مکتوب يازاراق اونو پوست ائتميشدي. کاغيذين آلتيندا يازديم: اينترنتله تانريلا ايلگيلنسن داها تئز جواب آلارسان. نئچه‌سي سئوگي حئکايه‌سي يازميشدي. اونلارا دا يازديم: سئوگي اودوندان يانيرسينيزسا، حئکايه يازمايين. او يانيق اوره‌يينيزين اودو بير يول سئوگيليزايله ياتاقدا ياتماقلا سؤنر. يازيلارا چوخلو اتک يازي يازدان سونرا ياتاغيما گيرديم.
سحر يئنه زيرنا موبايليمين سسي ايله يوخودان قالخديم. سحر يئمه‌ييمي راديو ايله بيرگه يئديم. اؤيرنجي‌لرله حئکايه‌لرينين‌ ديرسيز اولدوغونو آنلاشاراق بير داها قلم توتمالاريني ايسته‌ديم. صينفده پنجره‌نين اؤنونده دايانميشدم. دوشونجه‌لريم اوچوب اوزاقلارا گئتميشدي. چوخ اوچماسين دئيه اونلاري گئري قايتارديم. من يئنيجه گؤيلردن يئره ساري قاييتميشديم. گئجه تئلئويزيوندا کي وئرليشلر ياديما دوشدو. »الله اکبر «سسيله قانلار يئره آخيردي. »الله اکبر« قارا بايراغين اورتاسيندا توتستاق قالميشدي. »محمد رسول الله« دا اونا اتک يازي اولموشدو. قيز اؤيرنجي‌لر‌دن بيرينين آتاسي گلميشدي. قيزي اوره‌ک خسته‌لييينه اوغراشميشدي. اونو بير قيراغا چکديم. يئکه‌پر بير کيشي ايدي. گؤزلري دولموشدو. اوره‌ييني بوشالتدي. حکيملر درمان اوچون اوتوز ميليون پول ايسته‌ييرديلر. بللي- بليرسيز يئکه‌پر کيشي دانيشارکن بئينيمده بير ايشيق چاخماق کيمي چاخدي. دئديم:»من سنه قيرخ ميليون وئره‌رم، آنجاق منه بير ايش گؤرمه‌ليسن«. شاشقينجاسينا باخيردي. »قورخما بو پول سنه آنا سوتوندن حلالدي«دئيه‌رک موبايل نومره‌سيني آلديم. آخشام چاغي قالديريملاردا آديملايارکن دوشونجه‌يه دالميشديم. خياباندا ماشينلار گل- گئت ائديرديلر. من اؤزومو ماشينين اؤنونه‌ده آتا بيلميرم‌مي؟ قورخونون بالاسي اؤلسون. قورخورام. کئچن گئجه داما چيخميشديم. دايانميشديم اوچ قاتلي تيکينتينين قيراغيندا. اؤزومو يئره آتا بيله‌رم مي؟ اؤلمه‌سم کيم منه يييه دوراجاق؟ بونلار البت باهانادي. قورخورام. منيم يارامازليغيم بير باشا قورخومدان و چيخارسيزليغيمدان آسيلي ايدي!
گئجه پنجره‌نين اؤنونده موبايليملا اويناييرديم. “زنگ آچيم؟ آچماييم”؟ يئکه‌پر کيشي‌يه زنگ آچديم. اوندان سونرا دلي‌لر کيمي ائوده گزيرديم. بير آن اؤزومو اوتاغيمين اؤنونده گؤردوم. بو اوتاغي اونوتموشدوم. سؤز وئرميشديم داها اورا آياغيمي قويمايام. آنجاق يئنه تپيلديم ايچه‌ري. بير آز دايانديم، اويان- بويانا گؤز گزديرديم. ايره‌لي گئده‌رک ماسانين اؤنونده دايانديم. بو ماسانين آرخاسيندا چوخلو گئجه‌لري سحر ائتميشديم. آنجاق ايندي توز ايچنده ايدي. نه يازيق هاميسي بير ايلغين ايميش. اوتوراجاغي گئري چکيب اوتوردوم. سون يازيمين کاغيذلاري ائله قويدوغوم يئرده قالميشدي دوداغيما بير آجي گولوش اوتوردو. کاغيذلاري يئره سپه‌له‌ديم. کيتابلار اوست-اوسته قالانميشدي. هگل دن،‌نيچه دن، بورخس دن کافکادان. . . بير يومروقلا اونلاري دا يئره سرديم. کافکا يئره سريلدي، آنجاق باخيشلاري مندن آيريلماييردي.
سحر يئنه زيرنا موبايليمين سسي ايله يوخودان قالخديم. اؤيرنجي‌لره دئديم بو قونو دا يازمالي‌سينيز: “بير کيشي پول وئرير اونو اؤلدورسونلر”. اؤيرنجي‌لرين شاشقين باخيشلارينا اؤنم وئرمه‌دن صينيفدن چيخديم. بانکا ساري يؤنلديم. اوردان ايسه ائوه دؤندوم. يوخ! ائوه دؤنمه‌ديم. قبريستانا ساري گئتديم. اؤلولرين سايي بيزدن چوخ اولورسادا »بيز دئمه‌سم داها ياخشي اولار«،‌سيزلردن چوخ اولورسادا شهرلري بالاجا ايدي. منده بويونصاباح اؤلولرين قوينونا‌سيغيناجاغام. بونلارا تاي ياتاجاغام. داها سحر چاغي موبايليم زيرنا چالماياجاق. راديو ‌دينله‌مه‌يه‌جه‌يم. اؤيرنجي‌لري حئکايه يازماق زوروندا قويماياجاغام. قوي شاعيرلرين سايي بونداندا آرتيق آرتيريلسين. من اؤلندن سونرا حئکايه ‌نه‌ييمه يارار؟ بونا باخماياراق وصيت ائده‌جه‌يم منيم قبير داشيمدا شعر يئرينه بير حئکايه‌جيک يازسينلار.گون اورتا چاغي موبايليم زنگ چالدي. يئکه‌پر کيشي‌ايدي. پول ايسته‌ييردي. دئديم»گل ايشيوي يئرينه يئتير سونر«. گليشي ياريم ساعات سورمه‌دي. هووشنه ايچينده ايدي. من ايسه ‌دينج دورومدا تئلئويزيون قارشيسيندا اوتورموشدوم. آز قاليردي دوشسون آياقلاريما. آياغا قالخاراق آچاري گؤتوروب ايشقابا ساري يورودوم. ايشقابي آچيب پوللاري اونا گؤسترديم. سونرا باغلاييب آچاري جيبيمه قويدوم.
دئديم:»من بوش يئره پول وئره‌سي دئييلم. سن مني اؤلدورمه‌ليسن. سونرا جيبيمدن آچاري گؤتوروب پوللاري آپارا بيلرسن. يالوار-ياخار دا يارارسيزدي. سؤز وئرميسن، اونوتوموسان مي«؟
يئکه‌پر کيشي دئدي:»من بو آن قيزيمدان باشقا هئچ نه‌يه دوشونه بيلميرم. ايندي پولو وئر سؤزومده وارام، صاباح سنين ايشين بيتيب« بو دارتيشما چوخ سوردو. يئکه‌پر کيشي ياواش – ياواش اؤزوندن اولوردو. قيزارميشدي. سويوق يانا ياناشمامدان داها آرتيق ‌سينيرلي اولوردو. ياخامدان ياپيشاراق مني بير بوجاقدان باشقا بوجاغا سوروتله‌دي. سونوندا باشيمي هارا ايسه چيرپدي. يئره سريلديم. کافکا کيمي يئره سريلديم.‌ ديل-دوداغي قوروموشدو. نه ائده‌جه‌ييني بيلميردي. سونوجدا جيبيمدن آچاري چيخارداراق، پوللاري گؤتوروب گئتدي. گئجه‌نين قارانليغيندا اؤزومه گلديم. باشيم قاناميشدي. گؤزگونون اؤنونده دايانديم. اوز – گؤزومو قان بوياميشدي. آنجاق هله اؤلمه‌ميشديم. ياراماز گئده مني اؤلدورمه دن پوللاريمي گؤتوروب گئتميشدي.
باشيمين ساغلام سوره‌جي چوخ سورمه‌دي. يئکه پر‌ ديوثون دا قيزي خسته‌ليکدن ساغلام اولاراق پولومو گئري قايتاردي. چوخ دوشونوب- داشيناندان سونرا بير سونوجا چاتماديم. يئنه ياشاما گئري دؤندوم. آنجاق هله دوشونجه‌لريم يئرينده ايدي. بيليم يوردوندا من اولماديغيم سوره‌ده اؤيرنجي‌لر حئکايه‌لريني بيتيرميشديلر. قونو »پول وئريم، گل مني اؤلدور« ايدي. حئکايه‌لري بير يئره توپلاديم. گئجه‌لر حئکايه‌لره ‌سيغينيرديم. اونلارين آراسيندا اؤزومه اويغون بير حئکايه آختاريرديم. بير حئکايه‌ده قادين حيات يولداشيني اؤلدوروردو. نه ياخچي بو قونو اؤز کافاما چاتماميشدي؟ منيم آرواديم چوخ اسکيح آدام ايدي. پول وئرسه ايدين هر ايش گؤرردي. موبايليمدا نومره‌سي قاليرمي؟. .

منبع :