بولگه لر سرويسي:قاپي آرخامجا ائله باغلاندي، سسيني ده دويماديم. آياغيمي قاپيدان ائشييه آتيب- آتماميش، گونش‌لي هاوادا گؤزله‌نيلمز دولو- دولماچا ياغيشي کيمي »ده‌وه دادا« ذهنيمه دوشدو! ايکي آدديم آتماميش اونو خاطيرلارکن آزادليغيمين بيرينجي گولوشو دوداغيمدا اوتوردو. دييه‌سن توتوقلانماغيم ايله آزادليغيمين بير اوجو اونا دويونله‌نيب. آخي ائوه تؤکولوب، مني توتوقلاياندا شکوفه‌نين ده‌وه‌سي اولموشدوم. آنام اوتوز ايل قاباق جئهيز گتيردييي هئريز خالچاسينين ترسه خابيندا، اوتاغين دؤوره‌سيني گزيرديک. صحراميز دا اوتاق ايدي، داغ- داشيميز دا. شکوفه گولمکدن کئچينميشدي. بير آندا ده‌وه حاليم ايله هئريز خالچاسينين اوستونه چيخان پوتونلاري گؤردوم. شکوفه نابلد کيشي‌لري گؤرونجه آغلاييب، دئدي:»ده‌وه دادا، ده‌وه دادا، خيخلا!«او آندا مين بير فيکير ذهنيمه گلدي. مين بيرينجي فيکير ذهنيمده قاباريب، قالدي. آنامين خالچاسي ميردارلانميشدي. بو گئجه او خالچانين اوستونده ناماز قيلا بيلميه‌جکدي. ساغ- سولدا دايانميش قاراووللارا باخمازدان بؤيوک آدديملاريملا قاپيدان اوزاقلاشيرام. بيليميرم قفيلدن آزاد بوراخيلديغيما نئجه شادليق ائله‌ييم. دونن گئجه گؤزومو يوموب، ياتاندا عاغليما دا گلمزدي اؤز آياغيم‌لا بو لعنت‌لنميش قاپيدان، ديوارلاردان اوزاقلاشا بيلرم. اوزاقلاشديقجا، قاپي‌نين آرخاسيندا قالميش منه تاي اينسانلار گؤزومون قاباغيندا صف چکيرلر. احد، موسي، محسن، حميد، عسگر… اوردا کئچيردييم آجي- آغريلي گونلر ياديما دوشور. دقيقه‌سي ?? ساعات کيمي اوزانان گونلر… نئجه اولا بيلر او اوزون، سونا چاتمايان گونلر ايندي ثانيه سايينجا ذهنيمدن کئچسين؟! نظريمه گلير او قاپيدان اوزاقلاشديقجا کئچردييم گونلر بيربيرينين اوستونه پرئس اولوب، سيخيلير، ذهنيمده قيسسالديلير، کيچيلير. اؤز فيکيرمه تعجوب ائليرم. آخي مگر زامان دا قيسسالار؟! کيچيلر؟! سيخيلار؟!گؤيلوم ايسته‌يير آزادليغيما گؤره شکوفه کيمي اوشاق يانا ايچدن قايناديب، گولمه‌يي باشارا بيلرديم. آمما دوداغيم تبسم‌نن آرتيق گوله بيلمير. دريندن نفس دريريرم. هاوا سينه‌مين دايازليغيندا قالير. گئنه دريندن نفس دريرم، گئنه هاوا دايازليقدا قاليبجييرلريمين هاوا کيسه‌لري ياريمچيليق دولوب، بوشالير.عاغليما دا گلمزدي گؤزله‌نيلمز بير آندا »اشيالاريوي ييغيشدير گل!« دئسينلر. اشيالاريمي ييغيشديريب، گلديم. ايندي خياباندايام. آزادام. آدديملاريم مني او ديوارلاردان اوزاقلاشديرير. ياشاسين آدديملاريم، ياشاسين آياقلاريم! يقين کي آنام، خالچاسيني يوووب، پاک‌لاييب. اينسان او ديوارلارين، او قاپي‌نين آرخاسيندا اولاندا، کردي‌نين قيراغينا دوزلموش کرپيچ‌لر بئله قيمت‌له‌نير. ائوين پيشي‌يي پلنگ قيمتينده، کوچه ده آوارا- سرگردان قالميش ايت‌لر ايسه شين‌لو ايت‌لر کيمي قيمت‌له‌نير. گونده‌ليييميزده يادا دوشمه‌ينلرين هاميسي حسرت اولوب، اوره‌ييوين باشيني ده‌لير. او ديوارين، او قاپي‌نين آرخاسيندا آغاجين يارپاق اسينتيسيني بئله اؤزله‌ييرسن. يئره تؤکولوب، أزيلميش توت‌لارا تاماحلانيرسان، بوداقدان- بوداغا اوچان سئرچه‌لرين جيويلتيسيني، قارقالارين قاريلتيسيني ائشيتمه‌يه بئله حسرت چکيرسن. خياباندا موتورسکلت‌لرين ويراژ سسي أن گؤزل موسيقي کيمي نظره گلير.آتامين توتون قوخوسونو دا اؤزله‌ميشم. بو گئجه دولدورما سيگاريني آليب، اؤزوم موشتوک باشينا تاخيب، ألينه وئره‌جه‌يم. ائو اهلي‌نين هاميسيني اؤزله‌ميشم. آمما شکوفه‌ني هاميدان چوخ اؤزله‌ميشم، آنامين تابوت زينروونو! تابوت زينقروو دوغولاندا بير هفته بويو کوسوب، ائوه گئتمه‌ديم. آز قالميشديم آتامين اوزونه دوروب، دئييم: »هئچ اوتانماديز؟« آمما نه ياخچي دئمه‌ديم. شکوفه ائوه تازا بير رنگ قاتدي. اوّلده عناد اوزوندن اونو سايميرديم. نه گولوشلريني، نه ايمکله‌مه‌ييني، نه قوللارين آچيب، آنامين قوجاغيندان اؤزونو منيم قوجاغيما سالديغيني، حتي آدديم باشي ييخيليب، آياغا قالخماغي وئجيمه ده گلميردي. اونو لاپ ائله تابوت زينقروو کيمي گؤرورودوم. آمما بير گون گؤردوم من آت اولموشام، ده‌وه اولموشام شکوفه ده منيم بئليمده گزير.شوره‌هيني ائله منه ساليب کي، ائوه يئتيشمکده قويماز نفسيمي آليم. من آت اولوب، کيشنه‌مه‌يي سئويرم، شکوفه ايسه منيم ده‌وه‌لييمي آت حاليمدان داها چوخ سئور يومشاق يئرين بئلداري کيمي بئليمده اوتوروبصحرالاري، داغ- داشي گزه‌ريک. گاهدان او قدر اوتاغين دؤوره‌سينده ديزي ديزي گئده‌رم کي، ديزلريمين دريسي سييريلر. شکوفه سرعتلي ده‌وه‌ني هئچ سئومز. منسه يورولاندا جيغالليق ائله‌ييب، سرعت گئدرم بلکه اؤزو بئليمده گزمکدن أل چکسين. ده‌وه‌نين سرعتي چوخالديقجا دالبادال تيکرار ائله‌ير: «ده‌وه دادا، ده‌وه دادا، بسدي خيخلا!» منسه يوکومو يئره قويوب، بير باشا قاچارام نرديوانا ساري. يوخاري چيخيب، بالاخانامدا اوتوروب، دانيشگاه درس‌لريني و يا آيري بير کيتاب اوخويارام. شکوفه‌ايسه گئنه در به در مني آختارار. هر يئردن ألي اوزولندن سونرا گليب، نرديوانين آياغيندا دايانيب سسله‌ير: »ده‌وه دادا… ده‌وه دادا…«تالواسالييام. ايچيمده بير شئي مني قيجيقلايير، دؤنوب آرخادا بوراخديغيم قاپييا، هوندور ديوارلارا باخيم. آمما اؤزومه غاليب اولورام، باخميرام. او گونلر کئچميشده قالسا دا ايزيني بير عؤمورلوک جيسميمده، روحومدا داشيياجاغام. مگر آياغيمداکي ايزلري سيليب آرادان آپارماق اولار؟ مگر چينه‌داني ايچينده پيشميش تويوق ياددان چيخاسي‌دير؟!ملاقات گونوايدي. آنام نم نه قدر قيوير- زيور گتيرميشدي. کيشمشدن توتدو پيشميش تويوغاجان. هميشه کي کيمي ملاقاتچي‌لاريميز گتيرديکلري يئمکلري بير يئره توپلاديق. زعفرانلي تويوغون اييسي هاميميزي اومدورموشدو. منسه آرا بير، قابلامانين قاپاغيني گؤتوروب، زعفران اييسيني سينه‌مه چکيرديم. فرانسا عطري قوخويان قادينلار بئله بو زعفرانلي تويوغون يانيندا هئچ کيمي ايدي.سوفراني دؤشه‌ديک. هر ائودن بير رنگ، بير بويا، بير قوخو… سوفرانين اورتاسيندا زعفرانلي، بوتؤو تويوق هامي‌نين عاغليني آپاريردي. سوفرا‌آغاسي تويوغو نئچه پارچا ائله‌ييب، بشقابلارا پاي چکيردي. بيردن بيره أل ساخلاييب دئدي: »بو دا نمنه‌دي؟« قاشيق ايله او »نمنه«ني قوردالادي. هامي اونون ألينه باخيردي. بيردن بيره «نمنه»نين نه اولدوغو بللي اولدو. چينه‌دان جيريليب؛ تويوق ده‌ني، يارما- بوغدا تويوغون قابيرقاسينين اوستونه داغيلدي. منسه جين گؤرموش‌لر کيمي يئريمدن قالخيب، ائشييه چيخديم. آنامين يئرينه اوتانديم. بو نه دقت‌سيزليک‌ايدي جووان‌أزن آنامدان اوز وئرميشدي! مندن سونرا هئچ کيم چينه‌داني حسابا قويمادي. تويوق ده‌ني‌ني آييريب، هر کس اؤز پاييني يئدي. منيم پاييم أل ده‌ييلمه‌ميش قالدي. هم‌بندلريم نه قدر اصرار ائله‌ديلر، يئمه‌ديم. آنجاق منيم پاييم او تويوقدان زعفران اييسي اولدو.اؤزومه غاليب اولا بيلميرم. اراده‌مه حاکيم اولا بيليمرم. مگر ممکوندور اينسان دؤنوب آرخاسينا باخماسين؟! مگر نئچه آدديم آرخامدا قالميشلاردان اوزاقلاشميشام؟! تاکسي ده اوتورماميش دؤنوب بير داها او دويوارلارا، او قاپييا باخيرام. گؤرونتوسو ايچينده کئچن‌لري هئچ بللي ائتمير. يولدان کئچه‌نين عاغلينا دا گلمز اوردا نه حاديثه‌لر اوز وئرير. نئجه ده ضديّت‌لي بير دونيادا ياشاييريق؟!قاپيني آنام آچير. مني گؤرجک هويوخوب قالير. سونرا مني باغيرينا باسيب، آغلايير. آغلاماغيم گلمير. آنام مني بوراخميياناجان، باغريندا قاليرام. قوجاقلاري امنيّت دولو آنالارين بير بو قدر گؤزو ياشلي اولدوقلاري منيم اوچون عؤمورلوک بير معما قالاجاق. کدرلي چاغلاريلا سئوينج آني‌لاري هئچ بللي اولمور. هر ايکي حالدا کيپريک سيخماميش گؤز ياشلاري ياناقلارينا آخير! ائو اهلي قاپيدان، پنجره‌دن چيخيب، مني قارشيلاييرلار. دييه‌سن مقدس بير سفردن دؤنموشم. آتام هله ايشدن ائوه دؤنمه‌ييب. گؤزوم شکوفه‌ني آختارير. سوروشورام »ده‌وه دادا ياتيب؟« بيردن بيره هامي‌نين سسي خيپ کسيلير. گئنه آنامين گؤز ياشي ياناغينا سوزور. أته‌يين اوجويلا گؤز ياشيني سيلير. هويوخوب قالميشام. «سحره ياخين هامي يوخودا، دوروب چيخميشدي نرديوانا. گويا ايستيرميش گئتسين بالاخانايا…ائله او گون‌ايدي دا چينه‌دان تويوغون اوستونده قالميشدي!»قاش قاراليب. نرديوانين آخير پيلله‌سينده اوتورموشام. ده‌وه اولماغيم گلير. آت اولوب کيشنه‌مک ايسته‌ييرم. ائله کيشنه‌مک کي، سسيم دونيانين قولاغيني کار ائله‌سين.کاش آنامين گؤزلري منده اولاردي. کيپريک چالماميش غم- غصه دامجي‌لاري باش آليب، ياناغيما سوزردي!بالاخانايا گئتمه‌ييم گلمير. ده‌وه دادانين اؤلوم دردي جانيمي سيخير. منيم اوچ ياشلي شکوفه‌ام… آنامين تابوت زينقروو… کيمين اوغرونا دونيادان کؤچدو؟! …تقدير ايدي، يوخسا ديوارلارين آرخاسيندا اوز وئرن حاديثه‌لره باغلييدي؟ اگر من او ديوارلارين آرخاسينا آپاريلماسايديم، اگر او گئجه اونون ده‌وه‌سي اولسايديم، سونرا اونو قوجاغيمدا ياتيرديب، يئرينه سالسايديم، گئنه ده سحره ياخين يئريندن قالخيب، نرديوانا چيخاجاق‌ايدي؟…ديوارلارين آرخاسيندا قالميشلارگؤز اؤنومده رژه کئچيرلر. يقين ايندي سوفراني آچيبلار. سوفرا آغاسي هر کسين پاييني بشقابينا چکير. منيم بشقابيم صاحابسيز قاليب. گؤزوم قاپيدا، بيراز سونرا آتام ايشدن ائوه دؤنه‌جک. منسه اونون توتون کيسه‌سيني آليب، بير سيگار بوکوب، موشتوکون باشينا تاخيب، آليشديريب، بير نفس‌ليک توستونو سينه‌مه دولدوروب، سونرا موشتويو آتام وئره‌جه‌يم…
آرخامجا ائله باغلاندي، سسيني ده دويماديم. آياغيمي قاپيدان ائشييه آتيب- آتماميش، گونش‌لي هاوادا گؤزله‌نيلمز دولو- دولماچا ياغيشي کيمي »ده‌وه دادا« ذهنيمه دوشدو! ايکي آدديم آتماميش اونو خاطيرلارکن آزادليغيمين بيرينجي گولوشو دوداغيمدا اوتوردو.