بولگه لر سرويسي:بيلديگيميز کيمي، ايراندا آذربايجان شاعرلري ضروري احتياج اوزوندن اوزون مودت فارسجا يازماق مجبوريتينده قالميشلار. بو ديلده يازيب صنعت زيروه‌سينه چاتانلار دا اولموشدور. لاکين سونرالار اؤز کؤکونه قاييديب ملي-معنوي ثروتلرينه ده‌ير وئره‌ن ضياليلار دا آز دئييلدي. محمدحسين شهريار کيمي.پهلوي دؤورونده آذربايجان تورکجه‌سينين اولوم اؤلومله چارپيشديغي و بو ديلين جيدي ادبي ايفاده واسيطه‌سي اولا بيله‌جگي شوبهه آلتيندا اولدوغو بير زامانلاردا گؤزله‌نيلمه‌دن يازيلميش و‌هامي‌طرفيندن صنعت اينجيسي کيمي‌قيمتلنديريلميش بير پوئزيا نمونه‌سي مئيدانا چيخير. عنعنه‌وي فارس شعرينين اوستادي ساييلان شهريار اؤز ادبي استقامتيني ده‌ييشه‌رک شيرين تورک ديلينده »حيدر بابايا سالام« کيمي‌چوخ قيمتلي بير اثر يازير. ديلين ملي صافليغي ساخلانماقلا شفاهي خالق شعري اوسلوبوندا يازيلميش بو اثر ايلک گوندن بؤيوک ماراغا سبب اولوب، تورک ديلينين آسيميلياسيايا قارشي مقاومتيني گوجلو صورتده نوماييش ائتديريردي. شهريارا قده‌ر ملي شعر عنعنه‌ميز گونئيده يازيلي ادبياتين آپاريجي استيقامتينه چئوريله بيلميردي. شهريارين »حيدر بابايا سالام« و دوغما ديلينده يازديغي باشقا شعرلري ملي ادبياتين، ملي دوشونجه‌نين انتيباهينا سبب اولموشدو. شهريارين آنا ديلينده يازديغي اثرلر هم ده ملي ديلده مطبوعاتين يارانماسينا تکان وئرميشدي. »حيدر بابايا سالام« ياراديجي گنجلرده يوردا اولان محبتي بو اثرين کؤمگيله اونلاردا تورک ديلينده يازماق مئيليني گوجلنديردي. بو اثردن سونرا شاعرلر طرفيندن ساوالان، بزقوش، ميشوو، قازان کؤشک، پيرکوزن، قافلانتي و بير چوخ باشقا داغلارين آدي دا پوئتيک فورمالاردا سسلندي. حيدربابا ايسه داغلار باباسي اولدو. »حيدر بابايا سالام« اثرينده بيز خالق ياراديجيليغي نومونه‌لرينه چوخ راست گليريک. بونونلا باغلي کونکرئت بير فاکتي گتيرمک اولار. عصرين اوللرينده بير ائل عاشيغي طرفيندن يازيلميش بير شعرين خصوصيتلري بيزه»حيدر بابايا سالام« اثريني خاطيرلاتدي.اثر گونئي آذربايجانين ساوه ويلايتينده ياشايان شاعر »اسد نظام« طرفيندن يازيلميشدير. بو باره‌ده بيز رحمتليک علي‌بي کمالي‌نين ??-جي ايللرده تهراندا چاپ ائديلن »وارليق« درگيسينده‌کي سلسله يازيلاريندان بيرينده راست گلديک. »آپارما سئل آماندي« آدلي بو شعر شهريارين اؤلمز اثري »حيدر بابايا سالام« پوئماسي ايله چوخ اوزلاشير. هر ايکي شعرده اوخشار جهتلر چوخدور. فرقلر يالنيز شعرلرين يازيلما تاريخي و مضمونلاريندادي.اسد نظام بو شعريني ????-جو ايلده يازميشدير. اثرين ائله آديندان گؤرونور کي، او بدبين، تراژيک روحدا يازيلميشدير. اونو دا قئيد ائده‌ک کي، قفيل گلن سئل اونون جاوان قوهوملاريني گؤتوروب آپارير. بوندان تاثيرلنن شاعر بير فاجعه پوئماسي يازير. چوخ ماراقليدير کي، اوستاد شهريار دا مشهور »حيدر بابايا سالام« شعريني بو سبکده يازميشدير. »حيدر بابايا سالام« اثرينده آنا يورددا کئچن گونلرين نوستالژي حسرتي دويولورسا، آدي چکيلن اثرده يايلاقدا قفيل سئلدن بير گؤز قيرپيميندا ويران قالان يوردون مصيبتلريندن دانيشيلير. اسد نظام اؤزو خان نسليندن اولسا دا، هميشه حاق، عدالت طرفداري اولوب، خالقا ظولم ائدنلره قارشي چيخيب، ائله بونا گؤره ده خالق اونو اؤزونه باشچي-ائلخاني سئچيب. سونرالار اونون بو »وظيفه‌سي« رسمي‌اولاراق دولت طرفيندن ده تانينير. بدبختليکدن سونرالار اسد نظامين اؤزونون ياشاديغي، ?? مين ائوي احاطه ائده‌ن يوردا برک سئل گلير. کؤرپه اوغلونو خيلاص ائتمک ايسته‌ين ائل شاعرينين اؤزونو ده سئل آپارير. »سئل آپاردي« آدلي پوئماسي بو گونه قده‌ر ساوه ويلايتي‌نين خرقان بؤلگه‌سينده، اؤزلليکله اسد نظامين منسوب اولدوغو گله‌وند طايفاسيندا ديللر ازبري و اوره‌ک دردلريني گؤسترن المه چئوريلميشدير. اسد نظام بو پوئمادا بوتون دويغولاريني داها طبيعي و رئال وئرمک اوچون خالق آراسيندا ايشله‌ديلن ايفاده‌لردن، دئييملردن، عاغيلاردان استيفاده ائتميشدير. قارا بولوت گؤي اوزونو توتوبدور هئچ بيلمنم بختيم ندن ياتيبدير چرخي-فلک قوللاريمي‌چاتيبدير آرالان بولوت، آرالان بولوت باشيميز اوستونده قارالان بولوت چاديري قورموشدوم دري-درينده من بير چيراغ‌ايديم او گله‌ونده قيرخ بدوو آتلاريم قالدي چمنده آپارما سئل، آپارما سئل آماندي اکبر خان، عسگرخان منلن ياماندي. ائلي طرفيندن ائلخاني سئچيلن اسد نظام ائلين داوارينين بئله ياد اؤلکه‌ده ساغيلماسينا اعتناسيز قالمير: خراب اولسون ويس‌آبادين دره‌سي دؤرد يانيندان سئل گلير اولمور چاره‌سي اسد نظام ايدي ائللر يئيه‌سي بوندان سورا دودمانيم داغيلير ائل قويونو ياد اؤلکه‌ده ساغيلير يقين کي، اسد نظامين بو شعري شهريارين ياراديجيليغيني داها دريندن اؤيرنمک و اونو ياخشي منيمسه‌مک اوچون گرکلي اولاجاقدير. اؤرنک گتيرديگيميز بو شعرين تمثاليندا شفاهي خالق ادبياتينين، ائل عاشيقلارينين و شاعرلرينين شهريار صنعتينده‌کي ايزلرينين داها بير نومونه‌سينه راست گلديک. اسد نظامين سؤزو گئده‌ن شعريني دقتينيزه تقديم ائديريک.
بولگه لر سرويسي:بيلديگيميز کيمي، ايراندا آذربايجان شاعرلري ضروري احتياج اوزوندن اوزون مودت فارسجا يازماق مجبوريتينده قالميشلار.