بولگه لر سرويسي:قادينين‌مي شَپيتلري گئيديگيني، يوخسا شَپيتلرين‌مي قادينين آياغينا کئچديگيني دئمک اولموردو.
بيري گئديردي، او بيريسي ده آردينجا. بير اوتاقدان او بيري اوتاغا، هالدان آشپازخانايا، اوردان دا ايش اوتاغينا.
قاپي بير الين ايته‌له‌مه‌سي ايله جيريلداييب آچيلدي. اوتاغين اورتاسيندا بير نئچه صانداليه و بير بؤيوک يازي ماساسي وار ايدي. هر يئر بؤيوک-کيچيک کيتابلارلا دولويدو. هر کيتاب اؤزونه اويغون بير جيلده بوکولوب، يان-يانا قفسه‌لره دوزولموشدو.
بو اوتاغا چوخ آز گليردي. ناهاردان سونرالار هئچ واخت، سحرلر ايسه چوخ آز. سون زامانلار بو اوتاغا گلمه‌سي داها دا آزالميشدي، آيدا بير-ايکي دؤنه.قاپيني آچيب اطرافا باخيندي. اوتاغين اونا هميشه يئني‌ليگي وار ايدي و اونو هميشه بو حالا ساليردي، اورک دؤيونمه‌سينه! ائله‌بيل اَري اوجا بويو ايله، بوغدايي ساچلاري و چاتما قاشي ايله اوردا ايدي.
ماسانين آرخاسيندا اوتوروب، کاغيذلارين اوستونه اَييلميشدي. ايندي، تک ائشيديلن سس ديوار ساعاتي‌نين تيک-تاکي ايدي، بير ده قلمين کاغيذ اوستونده گاهدان يئيينله‌يييب، گاهدان دا ياواشلاييب ايره‌للمه‌سي‌نين سسي.
ساعات اونو ايگيرمي دقيقه کئچيردي. اَري درسده ايدي و اقتدارلا اوستادلار سککي‌سينين اوستونده بير طرفدن او بيري طرفه آدييملاييردي. اونونلا برابر اونلارلا گؤز اويان-بويانا گئديب-گله‌رک بوتون حرکتلريني ايزله‌ييرديلر. او دا ائله ايلک جلسه‌ده هر شئيي بير طرفليک ائله‌ييردي: »من اللي اؤيرنجي يوخ، اللي هئيکل ايسته‌ييرم. باشا دوشدوز؟« سونرا دا جاوابيني آلماق اوچون گؤزونو دوزلتديگي هئيکل‌لرين آغيزلارينا تيکيردي.
نملي دسمالي بير قات داها قاتلادي. بو ايشي گؤروب بيتيرمه‌ليدي؛ بو اوتاغين توزو آلينماليدي. سون تميزليگي نه واخت ياپديغي يادينا گلميردي. خاطيرلاديغي قدر، اَري اَن سون اونا »بوندان سونرا منيم ايش-ماساما توخونماياجاقسان،« دئميشدي. سونرا دا اؤزونه بير ايستکان چاي تؤکمک اوچون آرخاسيني اونا چئويريب آرتيرميشدي: »هر شئيي قاريشديريرسان. سن گئدندن سونرا آرتيق هئچ نه اؤز يئرينده اولمور«”قاپيني ياواشجا اؤرتوب، ساللانا-ساللانا ماسايا ساري گئتدي. کاغيذ دسته‌لريني آغير-آغير گؤتوردو، آلتلارينا دسمال چکيب، دقتله اؤز يئرلرينه قويدو.
سونرا يئنه ده آيري بير دسته‌ني گؤتوردو. ماسانين ساغ طرفينده رنگي و بويو فرقلي بير آز کاغيذ وار ايدي. اونلار اينجه-اوزون ايديلر، رنگلري ده گؤي ايدي. بو گونه قدر بو کاغيذلاري گؤرمه‌ميشدي. اوستلرينده قيسا سطيرلر حاليندا، بعضا صحيفه‌نين اورتاسينا قدر اوزانان بير شئيلر يازيليب، سونلارينا تاريخ قويولموشدو؛ 1377 تير آيي‌نين اونو، 1377 مورداد آيي‌نين اوچو، 1378 فروردين آيي‌نين بيري و… . بيري‌نين ده تاريخي ائله بو دونن ايدي؛ 1378 خوردادين ايگيرمي بئشي. عنوانين قاباغيندا ايسه بو جومله اوخونوردو: »سوسن قبول ائتسين!«
اَري‌نين اونو آلداتديغيني بيليردي، اما شعر يازديغيني دئييل.بيرآن، ماسانين آرخاسينداکي فيرلانان صانداليه‌يه اوتوردو. بويونون قيسا اولماديغينا باخماياراق آياقلاري ندنسه يئره چاتميردي. اليني اوزاديب، قلم قابيندان جوهرلي قلمي گؤتوردو. قلم ياشيل ايدي. شعرلر ده بو رنگله يازيلميشديلار. بلکه ده کؤنلونه بير شئيلر يازماق دوشموشدو. اما جوهرلي قلمين قاپاغيني گؤتورمه‌دي.ساللانا-ساللانا آشپازخانايا قاييديب، دسمالي حامامين قاباغيندا يئره آتاندا اللرينده بير شئيلر هله ده آغيرليق ائديردي.