بولگه لر سرويسي:سحري تئزدن دوروب چاچاللانديق گئدک »دوه‌چي«-ده بؤيوک مامانيم گيله. بؤيوک باجيم‌لا من اننه‌م‌دن خودافيز‌لشديک، يوک- ياپيميزي گؤتوردوک، مامانيم دا بالا باجيميزي آلدي قوجاغينا، يولا دوشه‌ک. اننه‌م بيزلره قوشولوب، چوخ بو يان- او يانا گئتمزدي. طايفا بؤيويويدو، آغيرباشلي‌ليغيني قوروياردي هميشه.
گئديب اننه‌نين بوينونو قوجاقلاديم، ياناغيندان بير ماچي آليب، فرانسيزجا “او غؤ وواغ” يعني گؤروشريک، دئديم بيله‌سينه. او دا باشيني توولاييب دئدي:
-آي قيز! دده‌ن سوغان، ننه‌ن ساريمساق، سن نئجه اولدون بئله گولمه‌شکر بَي قيزي؟!
گتيريب سيگار قوتوسونو، کيربيت و چوباغالتيسيني قويدوم قاباغينا، دئديم:
-اننه داريخسان گئتمييم‌اااا…. هن؟ نه دييسن؟ گولمه شکر قالسين يانيندا؟
الي‌نين داليسيله “گئت! گئت!”- دئيه اشاره ائديب، نارين گولومسمه‌سيني مندن گيزلتمک ايسته‌دي. بيلديم يالانچيق تعاروفوم اوره‌يينه ياتيب!
سورا گينه ال اشاره‌سيله مني بري چاغيريب، دئدي:-بورا باخ، بالامسان! هوشدورم‌ناناي ائلرسيز، بير خطا چيخار. اوشاغي گؤزدن قويمايين، اؤزوزدن ده موغايات اولون.
آنام الينه گله‌ني بوقچالاييب، سوخموشدو قيرميزي نايلون سله‌يه، اونو دا چوللاميشدي منه! گوجوم چاتا- چاتمايا سله‌ني داشيمالي ايديم… دسته‌لري اليمي کسيردي، آنجاق آخشاما کيمي دئييب- گولوب، آتيليب- دوشوب، آغاج باشيندا اويناقلاياجاغيميزي ياديما ساليب، گوج بيللاهينان هينقينا- هينقينا سله‌ني سوروتدوردوم.
-قيز سله‌نين ديبين سورتمه يئره!-دئدي آنام.
-من سوتمورم، اؤزو سورتوشور! -دئديم.
-بير جيققيلي ديح توتسان سورتوشمز!
“اوزاقدان باخانا آسان گلر، ديلده دئمه‌سي راحات‌دي، هن، دوز آدامسان گل اؤزون گؤتو، اوشاغي وئر منه…” دئمک ايسترديم، آما دئمه‌ديم. دانلاق ائشيديب، اووقاتيمي کورلاماغا ده‌يمزدي!
سله اووجوما يئر سالميشدي، اووجوم قيپ قيرميزي قيزارميش، گؤينه‌ييردي:
-ديح توتا بيلسم توتارام دا… آغيردي آخي…
-ياخجي دي! يئتيشدوخ! -دئدي مامانيم، کيچيک باجيمي آشتانا پيشتان ائليه- ائليه.
دربند اوزون، يوک آغير… هين چوشونان، دربند باشينا چاتديق. ال ائله‌ديک بير تاکسي‌يه، ساخلادي. “هارا گئديرسيز؟” دئيه سوروشدو شوفئر.-دوه‌چي‌يه گئده‌جيوخ- دئدي مامانيم.
من تئز آتيليب اوتوردوم قاباقدا، سله‌مي ده قويدوم ايکي قيچيمين آراسينا. باجيم الينده‌کي يئکه ساکي آلدي قوجاغينا کئچيب دالي صندله يئرلشدي. مامانيم چاديراني ويردي ديشينه، قاباق قاپيني آچدي، شست اينن ياپيشدي قولاغيمي ائششک قولاغي کيمي چکه- چکه مني يئنديريب، دالي صندله دورته‌له‌دي، آز قاليرديم زوزا تَپه‌م… اؤزو ده، اوشاق قوجاغيندا، سوخولدو اوتدو يانيمدا؛ الينَن قوي، آياغينان تَپ… ماشينين داليسي آز قاليردي پاتداسين! (او زمان‌لار، قيز اوشاغي‌نين تاکسي‌نين قاباق صندلينده اوتورماسي خوشاگليم دييلدي، آنجاق من لاپ داشلار چاتداسين دوققوز يا دا اون ياشيم اولاردي). بورنومو دويونله‌ييب، قاشقاباق ساللاييب، فيس- فيس- فيس نفس چکه‌رک، چيين‌لريمي، يانچاغيمي ترپتديم کي، ياني يئريم داردير، چکيلين! بيردن مامانيم بودومدان ائله بير قيرتيق گؤتوردو کي، ايچيم کئچدي، ايليکلريم گؤينه‌دي، بئينيمده سئرچه‌لر اوچوشماغا باشلادي. خيميمي چکيب، ميسيب اوتوردوم.
او دؤنم‌ده، تاکسي‌يه مينن ده آز اولاردي. اينديکي کيمي ايکي آدديمدان اؤتور زيرتباشي ماشينا مينيب شوفئره پول وئرمک دب دييلدي. جماعات هله، چوخ اوزاق يول‌لاري دا پيادا گئدردي. اونا گؤره ده تاکسي‌لار بوش- بوش خيابان‌لاردا دولانيب مسافر پئشينده گزرديلر. شوفئرلر يالواريب مينديررديلر آدامي، اينديکي کيمي مازاماتا قويمازديلار!
دوه‌چي، تبريزين چوخ قديم و تاريخي محله‌لريندن‌دير. بير طرفدن سيرخابا، بير ياندان دا اميره‌قيزا يئتيشير. تاکسي، سئيد حمزه‌دن دؤنوب گيرردي دوه‌چي‌يه. او زامان دوه‌چي‌ده باشي آچيق قيز يا دا آرواد دولانمازدي. مامانيم مني ده، باجيمي دا چوخ تر- تميز، سانتيمانتال گئيينديريب کئچينديرردي. اؤزو چاديرا اؤرتردي آما بيزه اؤرتدورمزدي، اوردا بيزه ترسه باخارديلار هميشه. من دوه‌چي‌يه گئدنده کوچه- باجايا چوخ چيخمازديم، قورخارديم. کوچه خلوت اولسايدي، بعضن فاناتيک اوغلان اوشاق‌لاري داش دا آتارديلار آداما.
شوفئر يولا دوشدو. تاکسيچي راديو آچميشدي. لاپ تازاجا مود اولان بير سفئح اوخوماق واريدي، او زامان‌لار بتر ديل‌لره دوشموشدو؛ اول قديمکي او قارا تئلفون‌لارين زنگي‌نين سسي گلير، ديررررر- ديررررر، سورا جيف تهر بير خانيم سسي دئيير:
-جاني دالئر -بله خانوم
-جاني دالئر
-بله خانوم؟
-دزد اومده به خونمون بيا که ميترسم از او…
اوخوماغين سونوندا معلوم اولور او جيف تهر خانيم بو پليسه وورولوبموش، اوغرونو توتماق ماهاناسيله اونو ائوه چکمک ايستيرميش… من اوشاقليغيم‌لا اتيم- ايپليييم تؤکولردي بو اوخوماغي ائشيدنده، آنجاق ندنسه سؤزلري‌يله هاواسي هله ده کي وار ذهنيمده قاليب‌دير!
ائله‌بيل شوفئرين ده زهله‌سيني آپارميشدي بو اوخوماق. راديونون دويمه‌سيني بوردو، بوردو، بو سفر “آذربايجان- آذربايجان”لاري اوخوردو خواننده. چوخ سونرالار من بيلديم ذهنيمده هله ده قالان و خوش سسله‌نن بو ماهني‌نين اوخوياني رحمتليک عيسي بالا يا سرابلي عيسي باربد ايدي؛
چوخ کئچميشم بو داغلاردان بو داغلاردان
دورناگؤزلي بولاق‌لاردان بولاق‌لاردان
ائشيتميشم ياخينلاردان اوزاق‌لاردان
ساکيت آخان آرازلاردان آرازلاردان
يوردوم يووام مسکنيم‌سن آذربايجان…..
بالاجا باجيم مامانيمين قوجاغيندا ماهني‌نين هاواسييله به قول معروف چاپان چاليب خوشان خوشانليق‌لا ناي- ناي ائليردي. يئتيشديک بالا حامام اوستونه، دربند آغزيندا تاکسي‌دان دوشدوک. مامانيم دارتينيردي کيفيندن پول چيخارديب وئرسين، باجيمين قيرميزي امزييي آغزيندان دوشدو قَنووا. آللاه گؤرستمه‌سين، باجيم گؤزون يوموب، آغزين آچيب ائله جيهنه تپيب، ونگه‌ونگ آغلادي کي، دئيه‌سن عقرب سانجيب، يا دا قارا بووه چاليب بيله‌سيني! اونون قره‌چيليييندن مامانيم کيريخ دوشدو، بيلميردي چاديراسيني ييغيشديرسين، بيلميردي اوشاغي ساکيت‌لسين، بيلميردي شوفئرين پولونو وئريب يوللانديرسين… کلفچه‌سي حئسابي دويون دوشموشدو.آردي وار