آغ بولوتلار رقصه گلهرک گؤي اوزونو توتدو
1397/11/29
بولگه لر سرويسي: 1326نجي ايلين باهاري ايدي. داريخما منه ال وئرديييندن قصبهنين اطرافينا گزمهيه چيخميشديم. قات- قات اوجالان سيار داغلارين قوينوندا يئرلشن»مظفّر قالاسي«نين طبيعت گؤزللييي اينسانين روحونو اوخشاييردي. داغلارين اتهييندن شاريلتي ايله آخيب، اينسان عؤمرو کيمي گئدن چايلارين همهمهسي، هر طرفده قايناييب قالخان دورو بولاقلارين زمزمهسي، حزين- حزين اسن يئلدن، رقصه گلن يارپاقلارين پيچيلتيسي، آزاد قوشلارين بوداقدان- بوداغا سيچراياراق، سئوينجله دولو، شيرين نغمهلري، مني اوز غم- خيال دونيامدان آييرميش، گول چيچکلرين عطري توتغون شراب تک مني مست ائتميشدي. هر طرفه اوز دؤندرسن، طبيعت اؤز گوزللييي ايله اينسانين اوزونه گولوردو.
گزه- گزه گليب ايلديريم بولاغينين باشينا يئتيشديم. يورولموشدوم، ال- اوزومو يودوم. بولاغين کناريندا اوتوروب، يئرين سينهسيندن گؤز ياشي کيمي قايناييب قالخان دورو سويا تاماشا ائتمهيه باشلاديم. ندنسه، يئنيدن غم لشکري منه هجوم ائتدي. اورهييم دولغون بولوت کيمي توتولدو. اوز ائل- اوبام، وطنيم ياديما دوشدو. ايندي اورادا طبيعت اؤز دونونو دييشيب، دوزلر، ياماجلار آل ياشيلا بورونوب، هر گولون اوزهرينده بير بولبول جهجه وورور. چؤللرده قويون سورولري، قوزولار ملهشير.
چوبانين چالديغي يانغيلي توتک سسي داغ- درهلره ياييلير. باهار، هر يئره باهاردير. آنجاق منيم وورغون کؤنلوم وطنيمين يازيني آرزولايير. آخي، من اونون قوينوندا بويويوب، بويا چاتميشام. تورپاغينين هر آدديميندا سئوگي، سئوينج، کدرلرله دولو خاطيرهلريم واردير. هر شئي دن اوستون سئوگيليم ده اورادادير. او، گؤزو يولدا مني گؤزلهيير. آيريليق درديني کيم بيلمير؟…
اورهييم توفانا توتولموش دنيز کيمي تلاطومه گلميشدي. داها طبيعت گؤزلليکلريني گؤرموردوم. روحوم قوشو وطن دياريندا پروازا گلميشدي. اونون خيالي گؤزومون اؤنونده جانلانيردي. او دا منيم کيمي پريشان، سولغون، توتغون، دولغون گؤرونور. او دا هيجران اودونا يانيردي. آمان آللاه!… نه قده‌ر دؤزولمزدير!…
ايکي اليم ايله باشيمي‌توتدوم. سانکي بونونلا بئينيمده عمله گلميش فيرتيناني ساکيت ائتمک ايستهييرديم. سون گؤروشوموزدن آلتي آي کئچردي. آيريليق دقيقهلرينده اوز وئرن هيجان، گؤز ياشلاري، اوميدسيز باخيشلار بير- بير گؤزومون اؤنونده جانلاندي، بوتون وارليغيمي‌سارسيلتدي.
بويله بحرانلي بير حالدا ايکن، محبّتله دولو اينجه بير سس:
– آغا، سالام!… دئيه منيم داديما چاتدي. قورخونج يوخونون وحشتيندن اويانان آدام کيمي اؤزومه گلديم، قارشيمدا اون- اون ايکي ياشلاريندا، قيوريم ساچلي، آياق يالين بير قيزي گؤردوم. او الينده بير دسته گول قاباغيمدا دايانميشدي. قارا- ايري گؤزلرينده مهر- محبّتله دولو وحشي بير باخيش وار ايدي.
– من بو گولو سنه درميشم- دئيه گول دستهسيني منه اوزاتدي. من شاشقين بير حالدا گولو آلديم. او، سئوينهرک گوللرله بزهنميش اوتلاري ياراراق دلي جئيران سيچراييشلاريلا اوزاقلاشدي.
من اونو تانيديم. اليمدهکي گول دستهسينه تاماشا ائتمهيه باشلاديم. نرگيز، بنؤوشه و سايره… رنگبهرنگ گوللرين آراسيندا يئرلشديريلميش ايکي دنه لالا گولو بو دستهنين گوزلليييني تاماملاميشدي. بو گول دستهسي معصوم بير قلبده چيچکلهنن پاک بير عشقين ترنّومو قده‌ر دانليغين ايفادهسي ايدي.
گول دستهسينه تاماشا ائتديکجه، اونون آل، ساري، قيرميزي، بنؤوشه چيچکلرينين يارپاقلاري خاطيره دفتريمين ورقلرينه چئوريلدي.
بو گونکو کيمي ياديمدادير، قيش ايدي. قار، عظمتله اوجالان داغلاري توتسادا هله الشتر دوزلرينه آغ اؤرپهييني سره بيلمهميشدي. بهمن آيينين اوچو ايدي. آخشام طرفي بيردن آغ- قالين بولوتلار رقصه گلهرک گؤي اوزونو توتدو. سويوق- سازاق، قارشيسينا گلهني قامچيلاييب قوووردو.هاوا قارالديقجا سويوق داها دا اوزونو گوسترير، قار- بوراندان خبر وئريردي.
بيز ده دؤرد نفر يولداش، قالانميش دووار بوخاريسينين دؤورهسينه يـيغيلميشديق. بيزيم اختياريميزا وئريلميش بو اوتاق هر شئيدن آرتيق کيچيک بير کندلي تؤولهسينه اوخشاييردي. دووارلاري توستودن قارالميش ايدي. قاپيسي قيريق، پنجرهسي ده يوخ ايدي. چالا- چوخور دؤشهمهسينده يورد سالميش بيرهلر جوولاندا ايدي.
اينسانين اوزو برک اولار. اگر آز دا اولسا، اوميد نورو قلبينه ايشيق سالميش اولسا، هر چتينلييه دؤزهر. بيز ايکي آيدان بري بو اوتاقدا گونلري بيربهبير يولا ساليرديق.هاميميز بير دردلي ايديک. بوخارينين توستوسو ايچريني دولدورموشدو. آجيشان، ياشارميش گؤزلريميزي هردن سيلهرک، نوروز کيشينين صحبتينه قولاق آسيرديق. او،هاميميزدان ياشلي، دونيا گؤرموش، اؤلکهلر گزميش، روزگارين ايستي- سويوغونو دادميش، شيرين صحبتلي بير آدام ايدي. اوجا بويلو، ائنلي کورکلي، ساچ- ساققالي آغارميش بو آدامين، اوزو، آلين قيريشيقلاري سؤيلهدييي داستانلاري کيمي حئکايهلر ترنّوم ائديردي. او، بو گون بيزه اوز ائلاوغلوسو ستّارخانين داستانيني سؤيلهييردي.
او، صحبتيني قوتاريرکن اوجاقداکي اودونلار يانيب، قوتارميشدي. قيرميزي کؤزلرين اوزونو کول قاتلاري اؤرتموشدو.
ائشييين سويوغو قاپينين چاتلاريندان اوزونو ايچري ووراراق، اوتاغين‌هاواسيني سويوتماقدا ايدي. ياتاق يئرلريميزي دوزلتديک. آفتافا گؤتوروب گئري قاييدانلار، بوزوشموش بير حالدا: – قار ياغير، بوراندير! – دئيه، اؤزلريني ايچري ساليرديلار. هر کس يورغانيني باشينا چکيب اوز نفسيله يئريني قيزديرماغا چاليشيردي. بو دا اينسانين عؤمروندن بير گون ايدي، کئچدي.
منبع :