تاختالي کؤيدن مکتوب‌لار

بولگه لر سرويسي: اذيت چکرم؟ باجارمارام؟ من سنين کيمي‌لري پايا يئرينه قويار و ماشيني ائله سوره‌رم کي، روحونوز دا اينجيمز.

يازار: عزيزنسين
چئويرن: اسماعيل شيخلي
بولگه لر سرويسي: اذيت چکرم؟ باجارمارام؟ من سنين کيمي‌لري پايا يئرينه قويار و ماشيني ائله سوره‌رم کي، روحونوز دا اينجيمز.
– آرخاداش، سنه بير سؤز دئمه‌ديک کي، من دئديم کي، سينه‌سينه دؤين شوفئرلر ده بو ايشي گؤره بيلمزلر.
– بونو منه دئييرسن؟ سينه‌سينه دؤين شوفئر ائله منم. ماشيني ايکيجه بارماق يئرين اوستو ايله ائله سوره‌رم کي، خبرينيز اولماز.
– چوخ چتين…
– سن بونا باخ، هله بير دانيشير دا مرج گله‌رم، سنينله آرخاداش اؤزو ده بيره- بئش قويورام، نه دئييرسن؟
– آ کيشي…
– آرتيق- اسکيک سؤز لازيم دئييل، مرج‌لشمک؟
– آرخاداش…
– آرخاداش- زاد بيلمه‌رم. بئش من قويورام، بير ده سن، نه دئييرسن؟
– آي آرخاداش…
– اوزون ائله‌مه، دئديم قورتاردي. من ماشيني لاپ قيل کؤرپودن کئچيريم, سن ده گؤر.
شوفئر اؤزوندن چيخدي. بحثه گيريبميش کيمي قازي آرتيردي. ماشين ائله بيل قانادلانيب اوچوردو. بيز هامي‌ميز «آللاه سن ساخلا»- دئيه يالوارماغا باشلاديق.
– هه، بير سن قوي، بئش ده من. بيره- بئش. نئجه‌دير، راضي‌سان؟
موتور نريلده‌ييردي. يول‌لار کله- کؤتور ايدي. شوفئر اؤز هونريني گؤسترمک اوچون گئتديکجه سورعتي آرتيريردي، ماشين‌لارين ساغيندان، تراموايلارين سولوندان، يوک ماشين‌لاري‌نين قاباغيندان، آوتوبوس‌لارين يانيندان گولـله کيمي اؤتوب کئچيردي. نئچه دفه آز قالدي ديره‌يه چيرپسين. تراموايـين يانيندان قيل ياريب کئچدي.
– ايکيجه بارماق يئر اولسون، کئچه‌جم. بيره- بئش قويمايان ناموس‌سوزدور. نه دئييرسن؟ لاپ قيلين اوستوندن ده کئچه‌جم.
– اينانديق، قارداش اينانديق. کئچيره‌رسن، گؤردوک کي، کئچيره‌رسن.
شوفئر قيزيشديغيندان هئچ نه ائشيتمير، گؤزو هئچ نه گؤرموردو. داليميزجا پوليس‌لر دوشموشدولر. نه قده‌ر سيغنال وئريرديلرسه شوفئر ساکيتلشمير. ائله تئز- تئز:
– نه دئييرسن؟ بيره- بئش قويورام. راضي‌سان؟- دئيه باغيريردي! – کيشي‌سن چيخ مئيدانا.
ماشينين گولـله کيمي گئتديييني گؤره‌نلردن بيري صالاوات چئويردي. او بيري‌لري‌نين رنگي ساپ- ساري سارالدي، قورخودان چنه‌لري شاققيلدادي و ديل‌لري سؤز توتمادي کي، صالاوات چئويرسينلر. ايچري‌ده‌کيلر يالوارماغا باشلاديلار.
– آي قارداش، آمان‌دير ياواش سور.
– سن مرجي اوددون…
– آللاه خاطيرينا سرعتيني آزالت…
– سؤزومو گئري گؤتورورم.
شوفئر دئييلن‎لره قولاق آسميردي. تکرلرين آلتيندان چيخان داش‌لار گؤيده ويژيلدايـيردي. کؤک کيشي يالوارماغا باشلادي.
– ساخلا من بورادا دوشمه‌لي‌يم.
شوفئر هئچ کسه قولاق آسمير، قيرميزي، ياشيل ايشيق‌لارا دا فيکير وئرميردي. قاباغينا کئچني قوش دسته‌سي کيمي اطرافا داغيداراق توز- دومان ايچينده ماشينيني‌سوروردو.
– بير- بئشه راضي‌سان‌مي؟
بئينينه آت تپميش شوفئر هئچ دايانانا اوخشاميردي. ايلاهي هئچ اولماسا سن کؤمک اول، قوي موتور ياتسين، تکر پارتداسين، يا دا بئنزين قورتارسين. ايشين ترسه‌ليييندن بونلارين هئچ بيري اولموردو. آدام تپه‌سينده هر ايکي يوز آدديمدان بير ماشينين يا تکري پارتدايـيب يا بنزين توکه‌نير يا سو قورويور يا دا ياغي قورتارير، آما ايندي… شوفئر ايسه…
– بيره بئش- دئيه باغيرير، سوکاني ساغا- سولا هرله‌ييردي.
هئچ ماجرا فيلم‌لرينده ده بئله قووهاقوو اولمور. پوليس‌لر، قانگئستئرلر ده بو سورعتله ماشين سوره بيلميرلر. ماشينين تکرلريندن، موتوروندان ايندييه قده‌ر ائشيتمه‌ديييم سسلر چيئخيردي:
– فيررر… زينگ… فيس‌س‌س… چاک… چوک…
ايچري‌ده‌کيلر ساغا- سولا آتيلير، بيري او بيري‌نين بئلينه مينير، او بيري‌نين قوجاغينا يـيخيليردي.
من يوک يئرينده ايديم. آمما نئجه اولورسا بيلميرم گؤزومو آچاندا اؤزومو سولدا پنجره‌نين يانيندا گؤردوم. ماشينين سيلکه‌لنيب نه حالا دوشدويونو اؤزون تصورونه گتير. ماشين بيردن داياندي، ايچري ده گورولتو قوپدو. باشيما بير شئي ديدي. ماشين اوّل قاباغا سونرا دالي- دالي گئري گئتدي.
بيردن باخيب گؤردوم کي، ماشين اورتادان ايکي‌يه بؤلونوب، لاپ اورتادا بير تئلفون ديره‌يي ديم- ديک دورور.
ديره‌ک ماشيني اورتادان ايکي بيچميشدي. من بو گورولتودن تزه‌دن اؤلدوم. آما اوّل‌دن اؤلموش اولدوغوم اوچون سسيمي چيخارتماديم. قريبه‌لر اؤلنده ايکي اؤلورلر کي، امل‌لي- باشلي اؤلسونلر. ياشاياندا ياري‌جان ياشايـيب‌لار، هئچ اولماسا اؤلنده ايکي قات اؤلسونلر.
کؤک کيشي سره‌سم کيمي دانيشماغا باشلادي:
– آمان آللاه، بيز ماشينا مينه‌ن‎ده اورتادا ديره‌ک يوخ ايدي، ايندي بو هارادان تاپيلدي؟
تاکسي شوفئري‌نين آياق‌لاري آنا قارنينداکي اوشاغين آياغي کيمي قارنينا يـيغيلميشدي، بوزوشوب قالميشدي. آما يئنه باغيريردي:
– بيره- بئش وئريرم… بيره- بئش. تانيدين مني؟ سنه دئديم کي، ايکيجه بارماق يئر اولسون ماشيني اورادان سوروب کئچيره‌رم. گؤردون؟
باختيمدان بو دفه قضا شهرين اورتاسيندا اولموشدو. پوليس‌لر تؤکولوب گلديلر. هاميميزي باشقا بير تاکسي‌يا دولدوردولار.
 بير نؤو تورپاغين آلتينا گيرسم ده يعني اؤلموش اولسام دا يئرله علاقه‌مي کسه بيلميرديم. بو اينسان‌لاردان ديري واختي چکديک‌لريم آزيميش کيمي ايندي ده مئييديمي اينجيديرلر.
سالامات قال قارداشيم ائششک آري‌سي. سنه خوش‌بخت‌ليکلر و جان‌ساغليق‌لاري آرزولايـيرام.
اؤلموش ائششک...

منبع :